ضد الزواج

[سامي حسب الرسول خليل احمد]

تتلاقي النظرات ... ترتجف آثر صعق عاطفي لذيذ ... لاتستطيع ان ترفع عينيك عن محياها .. تبتسم لك ابتسامة ساحرة .. تسقط من طولك صريعا... وبعد لاي تكون في سماوات العشق ترفل في ثياب البهاء النشوة ... لاتنام ولا تعرف طعم النوم.. قد تعد النجوم لكن الحبيبة تسطع مع كل نجمة .. وفي بعض الاحيان تلمع قمرا وتبدو شمسا وتنساب نسيم .. لكن الحقيقة ياعزيزي ان تلك السناريوهات لفلم ممل للغاية اسمه ( اكذوبة الحب) .. فالحب حين يسلبك المشاعر يستحيل الي نفاق قذر .. فكل فتاة عاشقة ماهي الا حية او حرباء تتلون حسب المصلحة الكبري وهي الزواج .. ليس هذا القول غوغاء ولكني أسال كل عاشق ألم تشعر بان حبيبتك الغالية تسعي للزواج فقط ؟ وهل الحب في الذمن الردئ هذا يعني الزواج ؟ ولماذا الحب مرتبط فقط بالزواج بل لماذا نقول ان الزواج هو تتويج للحب ؟ انها الانانية فقط فكل فتاة تسعي لان تري نفسها في عرش وحولها صحيباتها يرقصن ويزغردن في فرح او في تملق لكي يعجب بهن الشباب والحقيقة ان اي فتاة تخشي من الغول الاكبر وهو ( البورة) .
عزيزي تأمل حولك ستجد قصص عشق مأساوية ماتت لا لشي سوي ان الحبيب لايملك مايمكنه من اتمام زواجه بالمحبوبة علي الرغم من انه يقال ( لقد كانو يحبو بعض خالص ) اذن عدم المال لايحقق الزواج وعدم الزواج يقتل الحب فبالتالي الزواج هو الغاية و ليس الحب .
قد تقول لك احداهن ( والله انامستعدة اعيش معاك في راكوبة واكل معاك كسرة بموية بس اعيش باقي عمري معاك ) هذه هي النكتة التي تجعلك تستلقي علي قفاك ضاحكا.. لكن لن تعرف معني هذه النكتة الا بعد ان تظهر لك الحقيقة المتمثلة في انانية الحب .. ان الحب سخافة ان أطرناه في هدف .. عزيزي لاتعتقد اني ضد الزواج بل انا اقدسه واحترمه واطالب به لكني بالتأكيد ضد ان يقتل الحب بأسم الزواج .. دعونا نحب من اجل الحب فقط ..
مع حبي للجميع والي تلك التي تأخر وصولها الي الميناء

[ود الزوحي]

لك التحية اخ سامي .. شايفك زي الوقعت ليك في قصة حب فاشلة .. ولغاية حسي تأثيرا ظاهر فيك ..

صراحة كده .. أجمل حاجة هو الحب .. سواء كان حب صديق والا شي تاني ..

هنا حتكلم ليك عن حب الحبيبة .. لما تقول لوحدة بحبك بيتبادر لذهنها النهاية السعيدة التي يتوجها الزواج .. مع عشان هي عايزة تسمع الكلمة .. وأي اتنين بحبو بعض لازم يكونو بحبو من أجل هدف سامي وهو الزواج .. ولا شيء غير الزواج .. منو ده البقوليها واحد بحبك تقوم تقوليه (الله يبارك فيك) .. (تسلم والله) .. (ده العشم برضو) (مردوده في الأفراح إلى أخره) .. بل بالعكس حيتبارد لذهنها الزواج كما ذكرت .. يعني هي ماكذبت لما قالت ليك ممكن اعيش معاك في راكوبة وحكاية كسرة بموية والكلام ده .. هي لو في يدها أكيد كان وفت بوعدها .. صحي كمان في قصص بتفشل بس تأكد أنو ده ما النهاية . في حاجة اسمها قسمة ونصيب .. شايفك ما تتطرقت ليها خالص .. واضعا اللوم وكل اللوم على البت أو الشاب ..

صدقني .. ليس كل قصة فاشلة .. تعني نهاية العالم والا انو بنات حواء كلهم كذابين أو أبناء ادم غشاشين ..
بل هي فرصة جديدة لتعلم درس نستفيد منه في المرة القادمة

لك من كل التحايا .. وآسف ع الاطالة

تحياااااااااااااتي

[سامي حسب الرسول خليل احمد]

لك الود عزيزي ود الزوحي صدقني انا مامشوكش بل اعيش تجربة حب رائعة جدا لكن مادفعني لطرح هذا المفهوم هو ان كثير من التجارب العاطفية يتم تفشيلها وابادتها بدواعي عدم القدرة علي الزواج في حين ان بمقدور الشاب ان يناضل الي ان يتزوج غير ان العجالة باتمام الزواج هو الذي يقود الي تلك النهايات المريرة لذا اقول ان ليس من الضرورة ان نربط الزواج بالحب بل الحب بالحب .
في كثير من الحالات تجد زيجات ناجحة وليس يسودها حب يكفي القدرة علي التكيف مع مجتمعك الصغير هذا. حين يتملك الفرد احساس انه يحب ليتزوج فان هذا الاحساس يجعل الحب وسيلة للزواج .
علي اي حال اذا كان من ضرورة للزواج فيجب ان يكون في أطار ديمومة العلاقة وليس في تكبيلها في غياهب المجهول . اعني ان معظم حالات الطلاق لاتعود الي عدم الحب فقط بل الي ابعاد اخري من ضمنها الملل والرغبة في التغيير .
عزيزي ودالزوحي ان قضية القسمة والنصيب في اعتقادي قضية مثالية لا اؤمن بها
مع شكري وتقديري لمرورك الجميل

[امال الناس]

تحياتي . بالغت فيها دي ليه يكون ده رايك في كل بنت عايزي تحافظ علي حبيبها اكيد لا يتم الحفاظ عليه الا بالزواج . والحب الناجح هو الانتهي بالزواج ولا انت رايك غير كدي المال ما كل شيئ انا متاكدي لو حبيت اي فتاة وذهبت لطلب يدها للزواج الكل برحب بيك اهلها وجيرانها والناقص بتموا اصلاً العريس بدفع مليون والاهل بدفعوا ضعفه بس عايزين يتموا فرحة ابنتهم بعدين البورة دي قسمة يعني مافي واحدة بتتزوج عشان خائفي من البورة مافي بورة بس بتكون الواحدة قسمتها ماجاءت لسة
ما سمعتي اغنية محمد احمد عوض
من زمان بحبو هو لي حبيب ما خان عهودي وجاءك لي خطيب عليك الله ما تقول ليهولا
يابا ارعي بتك وافرح بجديدها ريدهم يابا سامي والدموع شهيدة عليك الله ما تقو ليهو لا
يابا ما تشور فيه وتدور الشورة والخطاب لو بالغوا زادوا في مهورها يابا بتك بيهو سعادة وسرورها
ثم انه بتكمل بيهو نصف الدين . ليه ما تكون عايزة تتم نصف دينها؟

[سامي حسب الرسول خليل احمد]

[color=000000]عزيزتي امال الناس اكتب ليك وانا بعد ساعة ستحلق بي الطائرة الي السودان رغم هذا كان لابد ان اشاهد حبيبنا الغالي منتدانا الوطن .
اقول لك ياغالية من الطبيعي لكل عاشق ان يسعي للمحافظة علي علاقة الود هذه وليس شرطا ان يكون الزواج هو الحارس الامين بل يمكن ان يصبح السارق اللعين الذي يسرق السعادة من القلوب من اللامعقول ان نقول ان المال ليس كل شي بل هو كل شي
ثانيا عادات المجتمع تجعل اهل البت يسعون الي اكمال زواجها بالتكاليف التي زكرتيها وليس في هذا خطأ
ثالثا ولو انك لم تقتنعي لكن الحقيقة ان كل فتاة خائفة من البورة
رابعا عليك الله موضوع القسمة والنصيب دا خلونا منه
ماسمعتي غنيتي
قال لي بحبك برغم الصعاب
لاخر العمراكون وياك
بس مع الزمن بان قناع
قال حقيقة ياريتو ماقال
انو الزواج شر ووبال[/color] ولك حبي ولك احبابي في المنتدي ملاحظة للجميع يوم غدا الخميس التقيكم من ارض السودان

[امال الناس]

ربنا يوصلك للوطن ولااهلك بالسلامة وانشاءالله اسمع عنك كل خير وكل عديل وزين خطة الحنة والضريرة والعديلة حتي لو بقت مستحيلة

[توحه عبده]

اولا السلام عليكم ورحمة الله وبركاته ،،، ،،،

شوف الحب من غير زواج يسمي لعب عيال اما ان تكون هي كانت تقضي معك وقتا فقط ولاتحبك حبا صادقا او انت لم تحببها حبا صادقا والحب الزائف لايؤدي للزواج .
لكن الحب الصادق الطاهر نهايته الزواج

وربنا يوفقك ويوفقنا .

توحه عبده

[بت مختبرات]

السلام عليكم
تحية طيبة للجميع
مع احترامى لوجهة نظر كاتب الموضوع
لكن بصراحة والله كلامك غريب شديد وفهمك اغرب وياساتر لو كان ده فهم كل الشباب
كونوالوحدة تحب من اجل الزواج ده هو الصح والمفروض،والافضل بالنسبة ليك لانو دليل على انها متمسكة بيك وانها انسانة جادة،واكيد انو الزواج هو الطريقة الوحيدة للمحافظة على الحب كفاية انو حلال ربنا ونصف الدين حتى لو كان فى ملايين حالات طلاق، اهون من انو الزول يحب ويخلى مية مرة تحت مسمى الحب من اجل الحب ،وبعدين فكرتك انو البت بتعرس خوفا من البورة وعشان لمة صحباتها حولها دى فكرة سطحية وما كل البنات كدة

والله فكرة غريبة اول مرة اعرف انو فى اولاد بتضايقو لما يعرفو انو الوحدة هدفها الزواج من الحب ،ولا.......يقول عليها حية كمان وزى الكانو الزواج ده هو شئ كعب ونهاية ماساوية (اتنين متزوجين من غير حب احسن مية مرة من اتنين بحبو بعض ما بفكرو فى الزواج)

تخريمة:::: لوعايز وحدة ما تضايقك بالعرس بتلقى ،،،،واول ما تبقى جاهز للعرس تقول ليك جاااااو
انى قد احببتك من اجل الحب




وياسامى المال ما كلو شئ.................!!!!

تقبل مرورى!!

[محمد مرتضى]

موضوع القسمة والنصيب ــ معناه الإيمان بالقدر خيره وشره .
الحب وسيلة لغاية سامية هي الزواج . عدا ذلك مضيعة للوقت .
سامي حساباتك ما مظبوطة ــ الرجاء مراجعة حساباتك .
ودي وتقديري .

[سامي حسب الرسول خليل احمد]

السلام عليكم
تحية طيبة للجميع
مع احترامى لوجهة نظر كاتب الموضوع
لكن بصراحة والله كلامك غريب شديد وفهمك اغرب وياساتر لو كان ده فهم كل الشباب
كونوالوحدة تحب من اجل الزواج ده هو الصح والمفروض،والافضل بالنسبة ليك لانو دليل على انها متمسكة بيك وانها انسانة جادة،واكيد انو الزواج هو الطريقة الوحيدة للمحافظة على الحب كفاية انو حلال ربنا ونصف الدين حتى لو كان فى ملايين حالات طلاق، اهون من انو الزول يحب ويخلى مية مرة تحت مسمى الحب من اجل الحب ،وبعدين فكرتك انو البت بتعرس خوفا من البورة وعشان لمة صحباتها حولها دى فكرة سطحية وما كل البنات كدة

والله فكرة غريبة اول مرة اعرف انو فى اولاد بتضايقو لما يعرفو انو الوحدة هدفها الزواج من الحب ،ولا.......يقول عليها حية كمان وزى الكانو الزواج ده هو شئ كعب ونهاية ماساوية (اتنين متزوجين من غير حب احسن مية مرة من اتنين بحبو بعض ما بفكرو فى الزواج)

تخريمة:::: لوعايز وحدة ما تضايقك بالعرس بتلقى ،،،،واول ما تبقى جاهز للعرس تقول ليك جاااااو
انى قد احببتك من اجل الحب




وياسامى المال ما كلو شئ.................!!!!

تقبل مرورى!!

عزيزتي بت مختبرات اسف للتأخير لاني وصلت الي السودان الغالي ليلة امس
لااعتقد ان هنالك غرابة في كلامي حسب اعتقادي الخاص انه رؤية قد تكون صائبة وقد تكون لا علي اي حال اقول لك وللجميع ان الحب هو الاسمي والاجمل من الزواج ولا اكابر ان قلت ان الزواج الذي يقوم علي الحب هو بلا شك اروع واجمل .
تقولين ان الزواج هو الذي يحفظ الحب فما هو قولك في الزواج الذي يفشل علي الرغم من انه قائم علي الحب .
لست مضايق من ان احداهن تفكر في الزواج فهذا حلم للجميع ولكني مضايق جدا بالتلاعب باسم الحب من اجل الزواج هل تحبي يابت مختبرات من اجل العرس فقط ام من اجل شاب عشقتيه
اختم قولي في هذا النفاش بان الزواج حلمي وانني ارغب بشدة فيه ولكنها فكرة طرحتها ووجدت نقاش التحية والحب لكل من كتب في هذا الموضوع وانتظروني في مواضيع قادمة من ارض الوطن علي فكرة انا زواجي في العيد وانتم مدعوووون جميعا
مع حبي للجميع

[zaina]

اولا مبروك الزواج مقدما:

بس بفلسفتك دى فى الزواج حتخلينى استغرب فعلا:
يعنى مافى رجال بيحبوا من اجل غرض معين ولما تجى البنت تقول له:امشى اخطبنى بيقوم يتهرب منها
وكذلك فى الجانب الاخر حتلقى فى فتيات بنفس الطريقة " يعنى مجرد "جكس "فقط وليس من اجل الزواج وعندما تجد افضل منه ستقول له "مع السلامة"

فالعيب يااخى ليس فى الحب ولكن فى الطريقة الخاطئة التى تمارس باسمه فهو ليس مجرد عاطفة وانما مزيج من العاطفة والعقل لذلك لما تلقى زوجين احبوا بعضهم وانفصلوا "اؤكد ليك ان تفسيرهم الخاطى للحب كان من جانب العاطفة فقط واهملوا جانب العقل " يعنى التوازن يااخ سامى مهم جدا علشان السفينة ترسا بامان ""

والحب ليس رواية شرقية بختامها يتزوج الابطال

[السودانى الاصيل]

السلام عليكم اخى اخوتى

تحيه للاخ الكاتب على الموضوع والتعبير فهل المعناه تولد الابداع حقا ؟؟؟؟؟

تحيه للاخت بت مختبرات فالاستهجان فى محلو تماما حسب وجهة نظرى
واضحكتنى جددا التخريمه
فهل يا اخى سامى افضل ان تحب انسانه لاجل الحب ثم تاتى لتتزوجها لتعيش معك بقية العمر
فتفاجاك بانها احبتك من اجل الحب وليست الزواج !!!!! كلام لا يستقيم
زينه ايضا كالعاده بها مداخله مليئه بالفهم والمنطق

عن رايى الشخصى :-

اختلف معك كثيرا ولا اؤيد اطلاقا علاقة بين شاب وشابه تحت ما يسمى بالحب بدون دراية
الاهل من الطرفين سواء كان بغرض الزواج او لا فهذا لا يقبله احد لاخته وهو غير جائز

اذا احببت فتاة فانظر قبل كل شئ بعين العقل الى نفسك وتفحص جيدا هذه النواحى وهى ليست كلها

هل انا جاهز ماديا للزواج بما فى ذلك السكن الاسرى ؟؟؟
هل قناعتى تااامه بان هذه الفتاه هى فتاة المستقبل هل انا متاككد من اننى اريد الارتباط بها
وهل نظرت الى بقية الجوانب خلاف الحب ؟؟؟؟؟

هل اجتماعيا يوجد توافق ؟؟؟ هل يوافق اهلها وقبل ذلك اهلى بهذه الزيجه ؟؟؟

هل هى ترغب فى كزوج مستقبل وعلى قناعه ودرايه بكل شئ عنى ووافقت ؟؟؟

عند ذلك فقط لك ان تمارس حبك وحياتك السعيده مع من تحب وستكون سعيدا ان شاء الله ؟؟

خلاف ذلك دع عقلك يخرج هذا الحب من قلبك ولا يوجد مناص من ذلك واى تمادى يؤدى الى
تازم الموقف

وبعد ان كان سهلا اخراجه وهو فى البدايه سترغم على اخراجه كما انت الان وانت صاغر
والمك مضاعف بقدر تماديك

وشكرا للجميع ارجو قبول رايى

[ودالدرديري]

الاخ سامي مساك الله بالخير والنور والسرور وانت وسط اهلك في البلد العزيز
وربنا يجعل اجازتك سعيدة ويتم ليك على خير ياعريس

تجدني اتفق معك في نقطة وأختلف معك في أخرى وأتحفظ في الثالثة
الحب ليس رواية شرقية بختامها يتزوج الأبطال
لكنه الإبحار دون سفينة وشعورنا ان الوصول محال
بيت الشعر أعلاهـ مما أعتبره أصدق عبارات قرأتها لـ نزار قباني ووافقت هوىً في نفسي لواقعيتها حسب رؤيتي
كل البشر يحلمون بالحب وفارسة أو فارس الاحلام حيث يتكون أمير عشقهم في الخيال قبل أن يأتي
وعندما يلتقون يسعون بكل السبل لتتويج تلك العلاقة برباط أبدي لايفترقون بعده أبداً
وقدر لنا المولى جل جلاله سنة الزواج كإرتباط شرعي ننصبه حكماً بيننا كعشاق ويربط بيننا كـ آباء وأمهات مستقبلاً
فينا من يتزوج عن حب وفينا من يتزوج عن غيرهـ وفينا من لايكتب الله له زواجاً أبداً
هنا أتفق معك في مقولة كنت ولازلت أرددها بإستمرار وهي : الحب ليس بالضرورة أن تكون نهايته الزواج
ولي قناعاتي الخاصة في هذا سأعود لك مرة أخرى لأشرحها هنا حيث داهمتني الدقائق الآن


يديك العافية

ولييييييييييييييييييييي قداااااااااااااااااام










و..................الباقي على الله

[بت مختبرات]

السلام عليكم مرة اخرى
تحية طيبة
[quote] ولكني مضايق جدا بالتلاعب باسم الحب من اجل الزواج هل تحبي يابت مختبرات من اجل العرس فقط ام من اجل شاب عشقتيه [/quote]
يا استاذ سامى انت فاكر العرس ده حاجة كدة الواحد بطلعها من جيبو البت تشيلها وتمشى ،، وكانو الزواج ده فى مصلحتها هى بس او انوالزواج ده منافى للحب لييييييييييييييييييييييييييييه؟؟؟؟؟؟؟؟؟؟؟؟
بالمناسبة حتى لو ما كانت بتحبو قبل كدة ،،بما انو زوجها(كونو تتمناهو زوج دى ماحاجة هين وعندها دلالات كتيرةة،لو ما حست انو هو الزول الحيسعدها ويحبها وتحبو،،ولا بس ما يكون فى رايك انو البنات ماعايزين يحبو وما محتاجين للحب)) اكيد حتحترمو وحتحاول تسعدو وترضيو وتتقرب منو لانو ببساطة ده فى مصلحتها،،لو انت سعيد وراضى عنها هى حتكون سعيدة لانها حياة مشتركة وده واجبها والمفروض عليها

بعدين انتو مفهوم الحب ده عندكم شنو؟؟؟؟؟؟؟؟؟؟؟ والله بالجد انا ماعارفة
قصدك يعنى وحدة شفتها مرة وحدة او بتشوفها من بعيد وبتعرف عنها كل خير والناس بتشكر فيا وفى اخلاقها فحبيتها ولا كيف؟؟؟؟؟؟؟؟
ولا تحت مسمى الحب تلفونات ومقابلات وحكاوى لادق التفاصيل يوم بيوم بدون تطرق للزواج لانو ما بتفرق انا بحبو ولو ربنا قدر لينا نعرس بنعرس وانا متاكدة انو دى امنيته قبلى ،،،
هو: بحبها وكفى ،،بحبها !الله !!!!!!!!!!!!!!!!الحببببببببببببببببببببب عيب ولا حرااااام د

بس
ظروفو ما مساعدة،،،لسة طالب او ما شابه
براهم بجيبوها لروحم
ياااااااااااااااااااود الحلال انت عارف ظروفك امسك عليك مشاعرك وقلبك ده وختو فى شئ تانى عمرو ما يخذلك،،،[ حب ربنا ياخى،،حب الصلاة والصوم وقراية القراااااااااااان]
لحدى ما ربنا يسهلها عليك تتزوج وبعداك حب براااااحتك

ويا ود الدرديرى فعلا الحب ما بالضرورة تكون نهايته الزواج وده طبعا برجع للقسمة والنصيب ،،،لكن برضو ارجع واقول ليك لوكانت المشكلة ظروف احد الطرفين تمنع الزواج منذ اول لحظة عرفو بعض فيا بعض فده ما حب ده تقضية وقت وكلام فارغ فى راى ،،،على الاقل يا جماعة لابد يكون فى احتمال لنجاح الحب ده ،،ووالله لو انو كان فى شئ مضمون فى الدنيا دى كان اقول الواحد ما يخش فى علاقة الا وهو ضامنها

اما يا سامى بالنسبة للزواج البفشل حتى لو كان عن حب،، ،، احتمال مشو بفهمك وحبو عشان الحب وكملو كلو، وما لقو شئ لبعد العرس (ارجو المعذرة لاسلوبى الساخر،،لكن حاولت اتكلم ببساطة لانى ما بعرف اعبر غير كدة)
اسمع انا مرة حضرت برنامج اسمو الطريق الصح فى قناة اقرا كان بتكلم عن الحب والعلاقات العاطفية ، طبعا من وجهة نظر الشرع المفروض بحكمنا وما بتجزا عن كل حياااااااااااتنا، ،رغم انوفى حاجات صعبة بالنسبة للزمن النحن فيو ده (حسبي الله ونعم الوكيل)،،حدد العلاقة تماما بين الحبيبين
قال(فى راى الشرع):
لو الواحد بيحب وحدة وظرفو لاتسمح بالزواج(بغض النظر عن فكرة انو الزواج هو الطريق الوحيد للحب فى الشرع دى مفروغ منها) يمشى لابوها فقط انشاء الله ويكلمو بدون اى حاجة بس فكرة انو اهلها عارفين انشاء الله ولى امرها بس ولا كل اهلها سدى بتحلل البيناتم ويبقى فى حكم خطيبها
واذا رفض الاهل يخليييييييييييييها (ومن ترك شيئا لله ابدله الله خيرا منه)
ده بالظبط الكلام القالوا وقال كمان انو الحب قبل الخطبة والزواج ينزوعةزلبركة وبالزواج فقط تحل البركة

واكرر وارجع اقول الزواج هو طريق الحب ونتزوج من اجل الحب ، ونحب قبل الزواج او نفتعل الحب(كلا الكلمتين على حد سواء) ليقودنا الى الزواج الذى هو بالنسبة لنا قمة الحب (ذلك الذى نسعى اليه) والذى حتما نحتاج اليه


تقبل مرورى

سبحانك اللهم وبحمدك اشهد الا اله الا انت استغفرك واتوب اليك[

[zaina]

وبعيدا عن الحب مابعرف ليه انت عايز البنت تحب من اجل الحب فقط وليس الزواج
هل هنالك بنت فى الدنيا ماعايزة تتزوج "ياخى دى فطرة فى كل بنت " ومن حقها ان تتلون كالحرباء لتظفر بالزوج المناسب
والله ماقدرتا افهمك ليه عايز البنات تحب فقط من غير ماتفكر فى ان تتزوج من تحب "يعنى نقعد نحب ساكت والى متى هل الى ان يسرقنا العمر وتحيط بنا كلمة :"عانس المؤلمة من المجتمع"
وحكاية اعيش معاك فى راكوبة دى مابتناسب كل الفتيات وكل زول وحسب قناعتوا بس لو ماعندك مال لتتزوج وتعول اسرة فلماذا اصلا تتزوج رقم ان الارزاق بيد الله ولكن الله قال "اسعا ياعبدى"

غايتوا الله يتم ليك زواجك بس رائيك ده ماواقع لى ابدا