حبوبة كتب:تحول لذيذ لموضوع ألذ .. ولو انو اسلوبك في الصياغة خلى الفيزياء تكون بنكهة الفانيليا :D
عارف قريت الموضوع اول مانزل وسارعت اصابع تخط في الرد .. بث للأسف لقيت اني بعرف أكتر عن اللغات ذات الأصول اللاتينية من لغتنا الأم قمت انكسفت ...
وبعدين لم قريتو تاني طمنت نفسي بانو دي مقدمة يمكن السني ناوي يعكس الطريق كدي اصبري
أذكر أني قرأت كتابا أيام الاجتهاد من احد المستشرقين بأن العربية هي أصل اللغات ... وطبعا دمشق أرض الحضارة وكثير منهم يؤكد ويؤيد مع وجود المفندين بالطبع
الألمانية لغة جافة جدا وتفتقر الحس الرومانسي شان كده الساكنين بيلتقوا {ده راي العبدلله} :D
لكن كدي امشي ع الفرنسية والاسبانية واو {تذوبك تحنانا} وخلي الباقي لمن نشوف آخرك
ال لي حبو هدانا واللسان اهدانا يرحمنا يهدانا ولينا يخليك يامولانا ِ
التأمل يا حبوبة (شمس الهدى سابقاً) زي سواقة العربية في الصحراء،،، مافي حاجة بتوقفه، ولا في شيء يحدد مساره. الأفق يمتد ويمتد،، عشان كدة مافي تحكم ولا إحتكام بقانون مسير أو موضوع معين،، وخليها ماشية،، وزي ما ترسى ترسى. لكن،،، بجيك،، وإن كنتي انت بالذات تخليني مرات كتيرة الف الدريكسون من شارع الفيزياء، وخليتيني أنتبه لأنه تفكيري فيه كتير من الفيزياء.
ولفتنى اكثر الحديث عن الهند واتذكرت تاملات نفسى المحتاره بخصوص الهند وهمها
طبعا معروف شهادة الهند فى مجال الكمبيوتر انها ممتازه,, ولى رغبه كبيره جدا جدا بعمل دراسات عليا
ماجستير تحديدا بدولة الهند طبعا يستغرق سنتين من الزمان ولكن العوائق كتيره اكبرها واهمها انى (بنت) بسمع بفلان مشئ الهند يحضر
او يدرس فى مجال معين وانا لانى بنت غير متاح فهنا بحس انو كونى بنت عائق كبير جدا امامى مع انو
رغبتى فى تحصيل الشهاده ربما اضعاف اخرين ,, من الناحيه الشخصيه لى القدره الماديه للذهاب للهند
ولكن ياتى العائق الاكبر وهو لانى بنت احتاج لمرافق ,, الاسره صغيره وكلٌ بمشغولياته ,, عايزه حل
بس ماتقول لى ود الحلال :D لانو هو ذاتو يمكن يكون عائق والا كيف !!
[/align]
الهند الشافتا عيني يا شمعة بتختلف كتير عن القريت عنها أو الشفت عنها تقارير في التلفزيون من معاملتهم للمرأة والتنكيل بيها. يمكن الشفته هو الظاهر للعيان، أو المدينة المشيتا مختلفة. فأنا شفت في المدينة دي (شيناي) لا فرق بين مرأة ورجل،، ولو متوقعة زول يعاملك برقة لأنك أنثى،،، واطاااتك إصبحت. الشفته إنه المرأة في الشارع تقالع الراجل في سواقة الموتر،، ومافي رحمة لرجل أو مرأة،، ولو خلعتك كلمة (المرأة تسوق الموتر) دي،، فما بالك بكونه المرأة عاادي تكون سايقة الموتر وراجلا أو أخوها راكب بي وراها،،،
عادي،، هناك الحكم لكون الإنسان (بشر كادح). ومن الملفت كمية (سيدات الشرطة) أكثر من (رجال الشرطة)،، عشان كدة،،، بتتعلمي كتير لو قررتي،، وما تخلي (جنسك) يحكمك،،، بتستفيدي،، وما أظن أهلك يقيفوا في طريقك لو عرفوا انه عادي البنات السودانيات هناك بيدرسوا،، وفي النهاية،، كل زول وتربيته بيقدر يعيش ويتعايش،، فما تخلي أفكار وكلام يحكم مسيرتك التعليمية،، وخلي ثقتك في نفسك كبيرة
نرجع لي موضوعي الكنت عاوز أمهد ليه بحديثي عن اللغات،، وسرحت فيها
وزي ما قلنا،، تتعدد اللغات، وزي ما عارفين عندنا في جنوب السودان وحده ما يزيد عن 40 لغة (منطوقة)، وفي الهند مثلاً اللغات المعتمدة بالدولة وحدها يزيد عن الأربعين برضو،، شي عجيب،، مع إن المواضيع والخلوقات في كل العالم ده هي هي،، ما بتختلف،، فلاخضرة هي الخضرة، والوعل عندنا زعل، وعند بعضهم (أنقري) وعند الآخرين (جنجال)،،، من وين جات،، وهل في عوامل مشتركة في التعريف بالأشياء دي؟
خلونا نفترض إننا قاعدين في مطعم،، وفي إتنين بي يمينا هيمانييين في المشاعر (عيب، ما تعاينوا كتير)،، وبي شمالنا إتنين بيتناقشوا في لشغل،، وقدامنا مجموعة بتتونس وتضحك،، وورانا إتنين مختلفين وبيتناقشوا بحدة.
شيء غريب،،، مهما كانت لغاتهم،، وحتى لو ما سمعناهم،، بنعرف نوع النقاش (تقريباً)،، والسبب بسيط،، وهو لغات الإشارة والتعبير.
من وين جات الحاجات دي؟ وليه لما يرتبط الحديث بالمنطق تتدخل لغة الإشارة؟ ولما تتدخل المشاعر تلغي كل لغات الحركة،، وتبقى لغتي الحديث والتعبير؟ وأيهما أقوى؟ ولو قلنا انه لغة التعبير هي هبة إلهية،، فمن وين جات لغة التعبير بالجسد؟
لاحظوا معاي،، الزول الزعلان إشاراته بتكون عنيفة،، مافي شك،، لأنه إشاراته كلها تفيد برفضه لشيء، فتكون حركاته أشبه بمن ينثر شيء حوله أو يرميه بعيدا، وكلها حركات تهديد ووعيد،، وخلونا نقيف في تهديد ووعيد دي شوية،، يقبض الإنسان يده،، ويفرد السبابه (هو إسمه من هنا) ويوجهه نحو من يتوعده!!! من وين جات الحركة دي،، وليه كل الناس تتفق فيها مع إختلاف مراضيعهم؟؟
طيب،، أخليكم سرحانين مع الطرابيز الحولنا،، وبسرح أنا براي في علاقات بين لغات الإشارة
مثلاً عند الإشارة لشخص بالجلوس،،، فهناك ضيغ كثيرة،، مثلاً
أولاً :الأمر بصلف للجلوس،،، نفس حركة قبض اليد والسبابة،، والإشارة للشخص بالجلوس، مع الإهتمام لأن يشير السبابة للأسفل (إذلال)
ثانياً: الطلب بالجلوس يكون بمدراحة اليد كاملة مع الإهتمام بكون الراحة في إتجاه الأعلى، أو الشخص المطلوب منه الجلوس، مع إيماءة خفيفة باليد للأسفل في إشارة للتفضيل والإرتياح وليس الإذلال
ثالثاً: إستجداء الجلوس، نفس الحالة السابقة مع إنحناءة الجسم
رابعاً: أمر الجلوس بإذلال أو إستحقار مع نفاذ الصبر،، فتح الكف وتوجيه باطن اليد لأسفل، مع تحرك اليد من أعلى لأسف، إما من الكف فقط أو من الكوع، أو من الكتف، وتعتمد هذه الأخيرة على مدى نفاذ الصبر والإستهجان
خامساً: أمر الجلوس بإذلال أو إستحقار مع نفاذ الإستهزاء، وهو نفس السابقة، مع حركة كف اليد فقط مع التكرار،، وبنوع من البطء أو البرود
دي بعض الحركات البلنقاها في العالم كلو بنفس المفهوم،، كيب،، من وين جات،،، كدي عاينو للجماعة بتاعين نقاشات العمل !! الراجل داك،، كل دقيقة بيقوم يفتح كف يده،، ويخليه في إتجاهه،، مع وضع الكف موازي لصدره،،، والساعد في شكل زاوية مع الكف،، ويقوم يحرك كفه في حركة شبه نصف دائرية متجها من جسمه،، وللخارج (أبعد)، ومن أسفل إلى أعلى،،، وكان يده بتتخطى حاجز قدامها،،، طيب،، دة بيشير لمعى (بعد كدة) أو (ألخطوة البعدها)،
يا جماعة،، انا تعبت،، وبواصل،، بس ياريت أكون قدرت وصلت الفكرة؟؟ ومحاولة لمعرفة،، من وين جات التعابير المشتركة دي،، مع إنه اللغات مختلفة؟
حبوبة،، كدي من الليلة خلي واحدة من عاداتك متابعة حركة يدين الناس وهي بتتكلم،،، ليه الواحد لما يكون محتار بيفتش عن حاجة يتكل فيها يدينه،، ولما يخت يدينه (مثلاً) في الدرابزين وهو غارق في التفكير،، بيخلي مستوى رأسه أقل من كتفيه،، وليه يديه بتكون مشدودتين وفي وضع زاوية شيه قائمة عند الكتفين لدرجة إنه المتفين يبرزوا لأعلى؟
راقبي العينين،، الحاجبني،، الفم،،
راقبي حركة الجسم
لغة عجيبة،، وتوحد أعجب فيها
وخلي الباقي لمن نشوف آخرك
