مكتبةالراحل المقيم : رحمة الله تغشاه / مصطفى ســـيد احمد

[هتان]

سلام شباب سلام
وعساكم دائما متمتعين بالعافية

كتب الكثير من الشعراء في رثاء
الراحل المقيم مصطفى سيد أحمد
فهذه دعوة مني أحبائي لكتابة شيء مما كتب في رثائه وعنه
واخترت هذه المقاطع من كلمات
الشاعر / صلاح حاج سعيد

ماكنت قايل نفسى يوم

أرثيك يا أصدق خليل

أنا كنت بتخيّل أكون قبلك

أسافر غنوة فى الوتر الجميل

زى ما عبرت معاك صروف زمن المسافة

وجينا للى الحزن النبيل

أنا كنت داير الدنيا تمهلنا

ونغنى الفرحة لى الزمن الخرافى .. المستحيل

********

ورحلت ما كان ده الأوان

رحت وحرقت حشا الغنا

خليتنا لى الزمن الهوان

والإرتهان لى خيول زمان الشنشنة

*********

كل المطارات والموانى

وشفع البلد الفتارى

... لسة بارين القطارى

يسألوا الناس عن خبر زولاً

مسطّر إسمو فى قلوب العذارى

وفى عيون كل المساكين ... الحيارى

زول بيطلع من نفس طورية ضامة الطين

تكابد طول نهارا

زول بيسكن فى عيون أطفال

تأمّل ديمة يديها البشارة

ياخى والله الفرقة حارة

وفقدك أكبر من محيط الدنيا

وأكوانها ... ومدارا

*********

طليتنا زى حلماً جميل

فجأة فى غفلة أنسرق

أسطورة تحكى أمانى جيل

فى حب غناك كان ليهو حق

أديتو فى الدنيا الأمل

وريتو كيف فى الحق يقيف

من غير وجل أو إنبهار

علمتو بى حس النغم إنو الكلام

لازم يكون واضح كما شمس النهار

صدقك ملاهو حماس .. يقين

بالخير وبالحق .. والنضار والإفتخار

إنو الحبيبة هى الأرض

والتضحيات عشان عيونا هو الفرض

والدنيا ورّاثا الصغار

*********

وعرفنا يازول قسوة الضنا والتعب

والإرتحال فى غفلة الزمن الصعب

وقولة الوداع بالضبط

والسفر الأبيد من غير رجوع

أو غير متاع

وبكت عليك كل الشوارع فى المدينة

ناحت عليك كل الفواصل

... فى الغنيوات الرصينة

وإنكتم نبض الغنا

جلل سواد حزنك سنا

وإتوشح المنا بالضياع

وكان بدرى يازول الوداع

لا سكة لى درب الرجوع

بعدك أغ######## إلتياع

مسكونة بالأسى .. والخشوع

لكن بريقك ما خبا

أبداً بريقك ماهو ضاع

ساطع كما نور الشعاع

**********

منو قال هو فات

زولاً وهب كل الحياة للأغنيات

منو قال هو فات

ما أظنو زيّك يقولوا فات

يامن وهب كل الحياة للأغنيات

يا من ترك فى قلوبنا أنبل ذكريات

يا من ترك أحلامو فى كل الجهات

وخلّد معانى الروعة بى كل الصفات

ما أظنو زيّك يقولوا فات

يامن وهب كل الحياة للأغنيات

***********

ورحلت ما كان الأوان

رحت وحرقت حشا الغنا

خليتنا لى زمن الهوان

والإرتهان لى خيول حروف الشنشنة




منقوووووووووووووووووووووول

[حازم جمال]

ايها البلبل المغرد
ايها الكنار الشادى
يامن سبقت بفنك عصرك
يايها المقيم بفنك بيننا الراحل بجسدك عننا
يامن غنى مزيكة الحوارى فاطربت حاره مساحتها مليون ميل
يا من غنى بعد المسافه والحزن النبيل
يا ايها الاستاذ المربى
ايها الهرم الشامخ
اهمس لك باعلى صوتى واقول لم يولى عهد الاوفياء ولم يندثر زمن الوفاء فمازال بين ظهرانينا هرم بل جبل او اقول قامة فنية‘ بحجم الاستاذ الشاعرصلاح حاج سعيد ( ابو سعيد ) قلوبهم تتقطر وفاء وهو ينظم قصيدته الرائعه فى رثاك
اما انت يا أخى فى الله وصديقى فى حب الاستاذ مصطفى سيداحمد وشقيقى فى حب الهلال العظيم ايها الرائع هتان فلك كل منى الشكر والتقدير على مجهودك فى البحث عن مثل هذه الدرر النفيسه
وتسلم يا رب

[العربى]

لك التحية هتان ولصلاح حاج سعيد ولحازم جمال
الاستاذ مصطفى ظاهرة كونية حدثت مرة ويستحيل تكرارها
وطرحك لهذا الموضوع يبرهن على انك صاحب زوق راقى ورفيع

توقع مشاركتى لاحقا...

[هتان]

الاخوه الاعزاء حازم و العربي

دعونا نتحدث بكلمات الاستاذ مصطفي عن رحيل مصطفي سيد أحمد


عندما رحل مصطفى سيد أحمد كانت كل دواخلى قد تلونت بألوان حروف أغنياته بعمارها المتساوق، المنسجم شعراً ولحناً ، بأبعادها الملونة، وبتنوعها الموسيقى
أهديكم كلمات أغانى مصطفى والتى نعته وودّعته ، أهديها إليكِ حازم ولك يا العربي ولكل من يفتقد مصطفى


اعزائي..
(سلامات..عشرات حبابك..يسلم شبابك..سلامات)
إرتحل عنّى مصطفى (فتغطّت الأرض بالتعب..والبحار إتّخذت شكل الفراغ) (الحزن النبيل)(الفينا من آهات أليمة)
(وجرح الألم)
(لابيرحل عن عيونّا)(لابتنسى.. لابنمحى)
رحل مصطفى (زى ما بموت وهج الشعاع) (فاحترقت بويتات الفريق) (والنيل فاض وانحنى) (غَيَّر النيل إنحدارو) (وسكت المركب) (وانتحر النهار).
رحل (قمر الزمان) (فرُسِمت أحزان وسؤال حيران فى عيون أيتام) و (مطارات الوداع ضجّت) و (دموع الحاضرين فجّت) (والدنيا تنوح على قمراً مات فى مطر الليل..يتّم نجمات بكّاها السيل) (والليل مشتاق لى دفقة نور) (والموجة تعاند فى التيّار) وأنا (بلحن حزين ووتر موجوع يحكى احساسى) ( حمَلْت روحى فى فوادٍ نازفٍ) (أغالط فى الزمن القاسى) (أنا الآن الترقُّب وانتظار المستحيل) (احتوانى البحر والمد يقاوم والشراع) (والهم عصف) (وانفتح شرفة وجع) (فانصبّ فى عيْنىّ شيئاً من تراجيديا الصراع) (وشقاء وحُرقة وجفاء).
لم أصدق (فتّشتَ عليك بقليب نزّاف) (بقيت أعاين فى الوجود واسأل عليك وسط الزحام) (بسأل عليك مدن..مدن . بسأل عليك فى المنفى فى مرفأ السُفُن) (فتّشتَ عليك) فى (المدينة والبلودات الحزينة) (عانيت قساوة الإنـتـظار) (مالقيتك) (حسّيت عجائب الدنيا إتلمّت بقت جايانى من عصراً سحيق) (أيامى من كُتر الأسى و كُتر العزوف والإغتراب صارت حروف مترهلة ولحظات أسيفة ومهملة) (والزمن زادنى أسيّة) (فعاد فرح الرجوع مُنيا) (والفرح الفيك خلانا وراح) (مابِشبِع روحنا فرح زائف لو كان نتناسَى).
رحَلْتَ عنّى (يافجر المشارق) فكبرتْ (مساحات الأسَى الفى عيونّا). وكنت قد (شيّدتَ فى جواى شوارع للفرح وفتَحتَ فى دنياى مسارح للمرح وبقيت لى سكة وعيون) (هواك إتخَتّ جوّة الجوف ) (مداك إتعدّى حد الشوق) (دخلتَ على الشِعر إنسان) (مشتهيك) (وارث خيالك يسوقنى ويودّى) فى (سِكّة عدم) (مسافر فاقد دليل) (ندمان انا).
يامصطفى تبكيك (الحبيبة) و (البت الحديقة) و (الرواكيب الصغيرة) و (مريم الأُخرَى) و (غابة الأبنوس) و (الطيور) و (الرياحين والمطر) و (السمحة). (ياحُزن الغُنا) يبكيك (الشتاء الدافئ) (وعم عبد الرحيم) و (الممشَى العريض).
أنسى رحيلك كيف؟ (بحاول) (بتتفتّح الأحزان غريبة ومذهلة) (واشتاق أفتّش نسمة فى الزمن العذاب).
عذراً لهذه المحزنة فقد مات (نجم الليل السال شبّال) الذى (غنّى غناوى الحسرة والأسف الطويل) مات ذلك الذى (إمتدَّ فى دنياى سهلاً وربوعاً وبقاع) الذى (حفظ الوداد زمناً صعب) الذى (أرضعته مريم الأُخرَى القوافى ثم أهدته المنافى) الذى (اختار لنا أجمل حروف ووصلة فواصل نادرة من لغة الكلام) الذى (جاء من زمن الشقاء المرسوم على وجه السواقى مظللها) الذى (غنى للحرية) (وتكلم عن الارض وسلام العالم) الذى (نشر الافراح دُرر) (كان الكلمة لصمت الليل وكان النجمة فى الدرب الطويل).
مات (عبّاد الشمس) مات (ضى المصابيح) (مات غريب الوجه مُعذّب) (كان براهو وجاهو حنين الكون إتكوم وغوّر جوّه فى صدرو) (فشال الهم بالجملة) وهذا (عذاب المُغنّى) (وهموم الرحيل).
أغانيك (معانا فى عمق الخاطر) (لابتموت فينا الاغانى) (لابتتنسى لابتنمحى) وحتى احاول (أنسَى الحزن الطال لىّ) أقول (العمر مرسوم فى كف أقدار).


منقوووووووووووووووووول

[FAISAL]

ســـطوة محاسنك الشاعر:- صلاح حاج سعيد
كان نفسى اقولك من زمان
بالكاتمو فى سرى
ومكَّتمْ فى حشاى.. مدسوس سنين
كان نفسى اقولك من زمان
بالشايلو فى عينى معزة
وفى القلب ريدا بخاف الغربة
والشوق والحنين
زاملنى زى خاطر الفرح
وكتين يقاسم الهم عزا
وكتين مدامعى تكون جزا
تفتح مباهج الليل ظنون
كان نفسى اقولك من زمان
سطوة محاسنك عندى ماكسرة جفون
وكت العيون تعبرنى زى خاطر المسا
سطوة محاسنِك ما الرخام الفى الحرير
وكت الثغير يفجعنى بى حرفاً قِسى
سطوة محاسنِك عندى وكتين كبريائِك
ينهزم لى طيبتى بى لفظة حنان
وكتين مشاعرِك تنسجم فى عمرى
تنفح قلبى بى رعشة أمان
سطوة محاسنك عندى وكتين شوقى
يصبح فى هواك
ليل عزة ما بتعرف هوان
كان نفسى اقولك من زمان
عينيك وحاتك غربتى وأهلى وبلادى
الفيها ضايع لي زمن
عينيك وحاتك شوقى لى زولاً ولوف
من بعدو ساب عينى سهن
وانا الكنت داير من زمان
أشرح حكايتى معاك الف
احكيك وازيد القول ولف
واتمنى لو قلبك عرف
كان من زمان
من قبل مافى قلبى يتحكر
زمان الحرقة فى جرح الأسى
من قبل ما حرف الحقيقة الحلوة يتبدل عسى
ويصبح أمانى كسيره فى خاطر الحنان
كان نفسى اقولك من زمان
( اللهم ارحمه واسكنة فسيح جناتة مع الصديقين والشهدا)

[FAISAL]

عــــــدى فــــات
عدى فات زمن العيون الالفه
والحضن الملاذ
ورهافة الحس البِلوّنْ
ضحكة الناس العزاز
بعد الحنان الكان زمان
استوطن المطر الحراز
روّح زمانى وفى رجاك
عانيت قساوة الانتظار
فى ضل شبابيك السفر
صادقت ليلات الموانى
الساكنة فى بحر الأماسى بتنتظر
لو يوم طيوف لحظك تفوت
تعبر خيالاتك تمر
قلق المواعيد الضجر
سهر العيون الاحتراز
واتعزز النوم الخزاز
واتمدد الشقى فى العمر
مليت تباريح الجراحات
البقت بعدك اسى
وزمنا قسى وحالا اسيف
ومشيت افتش عن خطاويك القبيل
واضارى من زمنا وراك ملانى خوف
احتجت ارتاح فى عيون
فيهن ملامحك ذاتا من غير اى زيف
واشتقت لى ضحكة صباحك
والدعاش عطَّر رزاز مطر الخريف
وانا وانت والدنيا الامان
والناس وفا
وخوة صفا
ودفء المشاعر الشاتيه صيف
انا وانت والدنيا الامان
زمن الغناوى الطالعة من قلبا رِضى
وحسا ندى وزوقا رهيف
انا وانت والدنيا الامان
ما العمر شتان بين اوان زمنا حييتو
وعمر ما بتقدر بتعرف
بكرة يصبح حالو كيف
عدى فات

[FAISAL]

الله يديك العافية ياهتان

[FAISAL]

قمر الزمان
كتبت ليك الشاعر:- صلاح حاج سعيد
لا بينى بينك ريده.. لا قصة غرام
إخترت ليك أجمل حروف
وأصدق فواصل نادرة فى لغة الكلام
لا قصدى ألهو معاك بى كلمات غنا
لا شعرى ليك مرجيحة من شعر الغمام
وكتبت ليك
والله يا قمر الزمان
شان جيتى بى زمن المحنه
وشفت فى عينيك حس أهلى القدام
وكتبت ليك
وأنا جاى من زمن الشقا
المرسوم على وش الثوانى مظلله
تمدد الساعات سنين
تتفتح الاحزان غريبة ومذهله
واشتاق افتش نسمه فى الزمن العذاب
وايامى من كتر الأسى
وكتر العزوف والاغتراب
صبحت حروف مترهله
لا فيها نبضة روح تموت
لا فيها سكة زول يفوت
لحظات أسيفه ومُهْمَلَه
وكتبت ليك
ووقفت ليك لا من لقيتك
جايا من قلب الطريق
ولمحت فيك راحة المشاوير البعيده
ولفحة النسمه الحنينه
الجايا من جوف المضيق
حسيت عجائب الدنيا إتلمت
بقت جايانى من عصراً سحيق
عينيك حس أطفال بنادو القمرة
للغائب يعود
وجبينك الضواى
حُجا الحبوبه
فى الزمن السعيد
وأنا فى قساوة الموحش
الزمن المكهرب بالحريق
أنا حيلتى إيه
قولى لى يا قمر الزمان
غير إتكى وأحلم معاك
وأحضن أماسى الصحوه
والأمل البريق

[FAISAL]

الحــــزن النبيل
وبقيت اغنى عليك
غناوى الحسرة والاسف الطويل
وعشان اجيب ليك الفرح
رضيان مشيت للمستحيل
ومعاك فى آخر المدى
فُتينى يا هجعة مواعيدى القبيل
بعتينى لى حضن الاسى
وسبتينى لى للحزن النبيل
ومشيت معاك كل الخطاوى الممكنة
وبقدر عليها وبعرفها
اوفيت وما قصرت فى حقك
ولا كان عرفة غيرك اصادفها
وقدر هواك يجيبنى ليك
جّمع قلوبنا وولفها
وكتين بقيتى معاى فى اعماقى
فى اعماق مشاعرى المرهفة
لا منك ابتدت الظروف
لا بيك انتهت الامانى المترفة
ندمان انا
ابدا وحاتك
عمرى ما شلت الندم
ما اصلو حال الدنيا
تسرق منية فى لحظة عشم
وانا عندى ليك كان الفرح
رغم احتمالى اساك
يا جرح الالم
كان خوفى منك
جاى من لهفة خطاك
على المواعيد الوهم
اهو نحن فى الآخر سوا
باعنا الهوى
ماشين على سكة عدم
وبقيت اغنى عليك
غناوى الحسرة والاسف الطويل

[حافظ عوض الله محمد]

إصطفيت جرحك
د. طلال دفع الله غناء الراحل المقيم مصطفى سيد احمد

وإصطفيت جرحك براك
وتر إنتباهك والنغم
ضفة تزرع فى الشروق
وضفة بتقاوم الألم
شمعة الأمل التهِد ليل الكوابيس
زمن الودار
شامخة بتعاند فى صدى الليل
الهياج الإحتضار

صاح إنتباهك فى الزمن
لما أصطفاك
قدر العصافير .. الرحيل
غدر الشِباك شوك المتاهات .. الدوار
تحتك نسيج الليل .. طويل
الأناشيد الماخدة من حـِزم الشعاع
نار البدايات البتول
للسحابات التلوِّح قوس قزح
بُشـْرَة هطول
ولى ضِيا القمر المقرّح
ضد قوانين الأفول

ليك يا آخر الخيول
فرس الرِهان الما كبا
وهج الشموس الإشتعال ..
وإنكسار المستحيل
شقيتو بى سيل الحروف
الطالعة دابا من الصدف .. مجرى البحر
تيارو والموج الرجوع
أديتو حيل مدّو الزمان كان إنحسر
غيرت فى الزمن الملامح
طعم الكلام .. لون الغُنا
وطبع البذور .. كيميا التراب
طقس المطر
******
صاح إنتباهك فى المكان
زهو السنابل بالقموح
وإجتراحك لى لسان لغة الجموح
وكتين يتوه بين السكات
وسيف القيود .. الإرتهان
شمس الحقيقة .. الـ .. آه ..
بقت منفى ونزوح
وأقتباسك للصبر لغة اليقين
بإنقسامك فى الزمن
وإنصهارك
وإقتسام الآهة بينك والمحن
وإنتصارك لى صباحاً بكرة طالع
من مدارات الصهيل
يا صباحك
لما تنداح ضفة جراحك .. بالشجن
وتقلِد الزمن العديل
يا جراحك
لما تفرد غيم جناحك
فوق عذابات الوطن

[هتان]

مرثيّة نثرٍ لصوت ٍمنغّم ٍ
شعر:عبداللطيف علي الفكي

(الى مصطفى سيدأحمد)

شجرةٌ في هالة القمر.غير ان الذين مرّوا معي مرّوا كراماً فارتعشت.ُ
سمعت روح الله في حفيف أوراقها.
خضرة الملاك دولةٌ تدوزن السماء
للسماء صوت السماء
انحنى الفراغ ابيض
لمحت كف موسى
فما انسلك,,,لسوجع الحمام الا صوتك
قالت الحمام:هذا الذي سمعنا في الجنّة حين كنّا في صلب ادم
كيف قد يتوه في الصلاة حابل النشيد
كيف قد يتوه, كيف قد يتوه
والمدى صلاة
عبّق الأوراق (دلكةً).
ضجّت الخضرة والملاك في صُمات
قالت الحمام يا ملاك
أتشتهي الارجاء
تسكب الخضرة نيلين مباركين؟
غير انّ الذين مرّوا معي مرّوا سلاماً
غير انّ يعقوب لا تزال في نفسه حسكةٌ
يخشى العين تخطف الجمال
قالت الحمام
أجمل ما في الجمال صوت ٌيجيئك يردّ البصر
حنانيك ارغن النشيد عبّأ النشيد
فيه الكليمُ موسى اذ يجاهر
أأراك جهرةً ,أأراك جهرةً؟
ردّد الصدى
ما كذّب الفؤاد ما رأى
لكلّ بذرةٍ سياقها,لكلّ بذرةٍ سياقها
يردّد القمر
فكن اذا انتشت بعطرك الحمام كالمسيع خارج الجدال
فلا جدالَ قد توسوس الحمام
في التين بوذا,وفي الزيتون عيسى
راحيل
ابنك يوسف خطفوه وباعوه وهمّ بالتي
سحرتها عيناه لولا أن صوتاً شفيفاً علّمه الالتزام
في وضح رابعة ايديولوجيا الهمّ بالاخرين.
فما كان للذي رمته قدرة أحلامه في البئر وأخرجته
من المحن الا أن ينصاع حدساً قبل أن يموت
كانط وفي نفسه شيئٌ من شرح حدسٍ
لم تكن الأحلام الا حدس صوت ٍشفيف
خجلت الشجرة أن ترقص له في حضرة الاله
في البدءٍ كانت لغةٌ علّمتنا كيف نجودن الصوت.
الملائكيّ؟
قالت الحمام.
شهدت للخضرة خضرةً كمن يحني الملاك رأسه راضياً:
لبيك يا مصادر الاله انني رأيت جمهرةً من الوهّابية والصوفية والشّيعة والصّهاينة والاخوان والارثوذكس و قبيل كل من تزمّت للشجرة يسقي الشجرة بمعوالٍ يشقّ الأنفس كلما قربت المسافة ادّاركهم صوت ٌشفيف ٌ,أرخوا معاولهم مسحاً للجبين فما انتبهوا.
كيف الرجوع لبذرةٍ شقّت وساوس أرضها! هي للسماء وللبياض نذروها.كشف الاله لصوته دنيا في شكلها قمر
فما ارتعشت

غير أن الذين مرّوا معي جلسوا جلسة استماع

[هتان]

محجوب شريف

يا ويح قلبي وتر فتر
شج الاماسي خبر حجر
عكر ينابع الصفا
واتحتت اوراق الشجر
كل العصافير التي
تعرف تمتما مصطفى
تعزف سلاما يا بلد
ذاك اللي حباك واختفى
سكت المغني
سكت سكت
بكت الكمنجات اتكت
مابين دموعها ودهشتها
بكت الاصابع رعشتها
شكت السلالم وحشتها
مشت المقامات الحفا
انسد حلق الاغنيات المرهفة
شبت شبابيك المدينة وميلت
مااتخيلت
مااتخيلت
انت الى في حاضرة غناك
شالت نجومها وقيلت
ختت همومهة على ظروفها اتحيلت
واتالمت مااتحملت
كم من قصيدة اترملت
زوجتها اللحن الشجي
ودعت احرف لم تكن تتخيلك
نائم تجي
والقامة ياخي مرحلة
دخلت صندوق البريد
جواب مرسل للارض
تلك التغطت بالتعب
يا حنجرة .. يا فنجرة
ياضحكة وسط الزمجرة
ياحالي يازوق ياصعب
يانخلة دلت رطب
حلو الكست تحت الكست
فلنستمع كي ننبسط
ياسهل ممتع و ممتنع
هل نقتنع
ما انت خليل فرحنا الاتولد
ما انت جميل بثينة و ودبلد
نعم الولد
البس قميص الفرهدة اسرح بعيد في المدى
اسرح سعيداً في الصدى
اسمك كبير
املا المسافات البعيدة شبر شبر
في عشرة الضو والندى
وعلاقة الدم والحبر يا مصطفى

[حزن السنين]

رائعة الفنان الراحل المقيم / مصطفي سيد احمد ،،،،


بين الموجة والخزان
سنّى على النضال إيدى
سوّكى بى الهتاف .. فمّى
شوارعك لى .. دويها .. على
إذا ما آخر العلاج الكى ...
مراويدك حُمر يا أمْى
**********
هردت لهاتى بى الغنوات
وقتْ يبرد حشاك .. يا أمّى
من التعب البلا صالح ...
تفيقى .. تروقى .. تنجمّى
تسوّى مكانسك المطرة
تضوى البيت وتنجمّى
تمرقى صبوحة لى الجيران
قدح فوق إيد ... (وفْيد) ألمى
**********
يلاقوك شفّع الكتـّاب
نضاف وظراف بلا النسمى
يغنولك غناوى السـاب
وفى بيوضة مافى سراب
جبال كجمى وفيافى الكاب
تميد بى الخضرة ...منقسمى
فيافى الصّى وبيوضة ..
البراسيم فيها مفروضة
خدارا يرارى شوف عينى
على الأبواب .. طواريها وحواريها
بقت روضة
بقت تشرب من الحامداب ..
تشوفى رهاب ... بُعُد نجمى
.. بشوفو قريب قُرُب نضمى
بشوف العالم التحتانى هيلاهوب وقف ناهض
وهدّ عمايد الفوقانى ..
جوّة الجُب رمى العارض
وفى الساقوا الدمار أفراد
عريق الحب نبض قابض
متل قبض الحروف فى إسمى
وغناوينا القبيل .. رقراق
علينا تصب برد .. قارض
وأجر نمّى ...
أدوبى لهاتى بى الغنوات ..
عُقُب يبرد حشاك .. يا أمّى
....
وطنى ولا ملى بطنى
سكاتى ولا الكلام النّى
بليلتى ولا ضبايح طى
قليلتى ولا كُتُرْ سمّى
سلام يا أمّى
سلام لا هكمى .. لا دكْمى

[هتان]

يا سلااااااااااااااااااام عليك يا حزن

طبعا الاغنيه دي بتذكرني بي زول عزيــــز شديد
و ليها وقع خاص عندي

تسلم

[حزن السنين]

اخي / هتان
مشكور علي مرورك الكريم كويس اني زكرتك بالزول دا ،،،
و هي برضوا عندا مكانة خاصة عندي ،،،،،،،،،

[mohab ahmed tombel]

نحن مهما نكتب يستحال ان نعطي لهذا الاستاذ نصف حقه ولكن يكفي انو نجد اصحاب الزوق الرفيع الاحاسيس المرهفة بدايتي مع الفنان مصطفي كانت بدموع وانا استمع لاول مرة واول اغنية عم عبد الرحيم وحقيقة لا اعرف كيف اشكركم يا شباااااب والعربي بالذات وين ياهتان بالزوق دا كلو من بدري ودمت لنا يا رائع

[asool22]

شكرأ شكرأ شكرأ شكرأ شكرأ
شكرأ شكرأ شكرأ شكرأ
شكرأ شكرأ شكرأ
شكرأ شكر
شكرأ

[هتان]

يا طمبل

الخيل تجقلب و الشكر لي حماد

[عشوقة]

الف شكر يا اخي هتان..
ومين ما يحب الراحل مصطفى..
الله يرحموه ويغفر ليوه..
ويدخلوه فسيج جناته.. امين
[glint]سلمت يداك..[/glint]

[عشوقة]

شكرا لك على الطرح..
بس اتساءل..انوه الكلمات دايما
تشتهر بمغنيها وليس بقائلها
ولكن يرجع الفضل لقائله..
فهل حد يعرف من كاتبها؟
[glint]سلمت يداك..[/glint]