الثوب السودانى و حكاياتو

[abdul wahid]

التوب السوداني بين الاصالة والموضة

عُرفت المراة السودانية من قديم الزمان بإحترامها لدينها وتقاليدها وموروثاتها، سوى كان ذلك في سلوكها الأدبي أو مظهرها الخارجي. وهذا المظهر الخارجي في اغلب الأحيان يمثله التوب السوداني والذي أصبح ( عالميا ) مرتبط بالمرأة السودانية ( علماً بأن هنالك بعض القبائل الإفريقية تشاركنا نفس التوب )
** هذا التوب السوداني والذي يعتبر مظهر من مظاهر الحشمة والأدب والجمال في نفس الوقت حتى صار مصدر إلهام لكثير من الشعراء وكثير من الاغاني القديم منها والحديث.
** ففي شعر الشايقية القديم ورد ذكر التوب كثيرا بإعتباره من الأشياء المهمة التي تتفاخر وتتباهى بها النساء في ذلك الزمان ، فمن هذه الاشعار والاغاني على لسان المرأة


جابلي فركي دموع التجار .. وجابلي توب اسمو الحمام طار
جابلي جلابيي جورجي .. وجابلي توب اسمو تبنقلي

وفي الغناء الحديث :

شوف عيني الحبيب بي حشمة لابس التوب
والتوب زاد جمالك زينة يالمحبوب
ويقول الشاعر كدكِّي في صورة جمالية رائعة :

عقلي يتوه معا نورة لمَّا تكمِّل الرقصة
وتقلب توبا فوق راسا وتقول كدي تجري تندسه
** وكثير وكثير من الاغنيات والاشعار التي تمجد التوب السوداني وتعتبره جزء من التراث والأصالة.
** فهل التوب السوداني اليوم هو نفس التوب السوداني الزمان ؟؟
وهل ما زال يؤدي وظيفته كمظهر من مظاهر الحشمة والأدب ؟؟
** الإجابة في تقديري بين ( لا) و ( نعم)
** ليس هنالك خلاف ان تكون هنالك تياب سودانية جميلة سوى كانت مطرزة او سادة وليس هنالك غضاضة ان تكون ألوانه زاهية ومفرحة
** لكن مشكلة التوب السوداني ( المعاصر ) تتمثل في نوعية كثير من التياب والموضات..اذ انه اصبح شفافاً لدرجة ان ترى بوضوح ما وراءه
خاصة اذا كان ما وراءه قصيراً فاضحاً.. بل احياناً مخرَّم كأنه الشبكة ولا يستر شى وجعل من تلبسه في مقام ( الكاسيات العاريات )
** ومشكلة ثانية انه اصبح ( لا يثبت ) على رأس وجعل المرأة في حالة انشغال دائمة بينه وبين رأسها، مما افقده صفته الادبية كمظهر من مظاهر الحشمة والادب.
** فيا اخواتي السودانيات العزيزات ( خاصة المغتربات منكن ) عليكن المحافظة علي أصالتنا وموروثاتنا وقبل كل ذلك ديننا واخلاقنا ، وان يكون اختياركن للثياب أقلاه في حدود المعقول حتي تحتفظ المرأة السودانية بسمعتها وحشمتها وحتي لا يفقد التوب السوداني قيمته وجماله ويندثر كما اندثرت الكثير من الموروثات والتقاليد والقيم واصبحنا في حالة لا يعلم بها الاَّ الله

[صلاح يحيى سليمان]

اخى اشكرك جزيل الشكر على تطرقك لهذا الموضوع المهم جدا فى نظرى.
التوب السودانى حقيقة فقد مكانته السابقة ...
الاسباب ترجع فى كثير من الاحيان لارتفاع اسعاره.
اما التوب الحديث فهو روعة وكل يوم زايد روعة....بس الظاهر
شابات الزمن ده بقوا ما بحبوه....!
السبب شنو يا بنات؟؟؟؟؟؟؟؟؟؟؟؟؟
ما تقولى لى ما عمــــــــــــــــــــــــــــلى....!
هو يعنى الجلابية عمليـــة؟؟؟
الحمد لله احنا الرجال ماسكين فيها.
ياسلام ...امشى السودان...!
البس جلابية وعمة...!
واشيل عكاز...!
اطمختر طالع نازل..!
راجل....راجل....!
ديل نحنا الرجال...!
محافظين على العمة...!
الجلابية...!
وكمان السروال...!



مع تحياتى

[zinebze]

اشكرك جدا على الموضوع

[بت أبوظبي]

[glow1=CCCC33]

والله أنا ما جربت ولبست التوب .. لكن بحس أنه بميز المرأة السودانيه بشكل كبير عن باقي السيدات العربيات .. وصراحه كثير منهن بعشقن هذا الزي الجميل طبعا الغير سودانيات حتى في وحده بتقول لينا إنتو السودانيات جميلات في كل شي وخاصه هذا التوب بألوانه وتصميماته ..
بس في كثير من السيدات السودانيات تخلين عن الثوب نسبه لظروف العمل أو مكان إقامتهن لا تسمح بذلك فينحصر في المناسبات فقط ..
ولنا عوده

[/glow1]

[bitadlan]

من ناحية جماله وتميزه فما في اثنين بيتغالطو فيها لانه بالفعل ليه نكهه خاصه لكن الحقيقه صعب في الحياه على طول يعني في الشغل صعب طلوع سلالم وركوب مواصلات وهلم جره لذلك شويه قل لكن ما ح يحصل يجي يوم يندثر فيه لانه لحدي الان مافي واحده سودانيه بتمشي مناسبه او تزور اهلها او اهل زوجها ( نسابتا ) بدون التوب
شكراً على الموضوع