الحزن لا ينتهى

[بنت الرهد]

بسم الله الرحمن الرحيم
اولا: اتكلم بالعاميه بعد اذن الجميع طبعا...
ثانيا: اسفه يا اصدقاء على الغيبه ده.....
وثالثا اسمعوا الحكايه ادوني رايكم بصراحه شديده
القصه ده حقيقيه حصلت لبنت من الغرب وهي صديقه قريبه جدا لى (بنت اهلى)
((مواليد 80 برج العذراء انسانه صدقونى مهما قلت فيها ما بخلص الكلام
انسانه حساسه شديد متواضعه جدا قلبها ابيض شديد من غلط فيها براءه لدرجه انها بتثق في اي زول مره عليها قلبها كتاب مفتوح صادقه في عملها مهما يكون نوع خدومه مستحيل تقول لاي انسان لا حتى لو كان على نفسها بتحب الاطفال شديد ومشاغبه شديد بس لما تنجرح من زول صدقوني بتعب معاها شديد لانها بتمرض من الزعل بس المشكله الحقيقه مافي زول قادر يفهما))
مولده في الغرب واتربت ودرست في الغربه مع الاسره طبعا كانت طفولتها حلوه شديد دلع وحب بس بدون قرب من الام والاب كان قل وقتها مع عمها وزوجته علموها من صغرى ان البنت والولد واحد عشت طفولتي معاهم بكل معنى وحب وحنان لكن للاسف فقد اهم حاجه امي وابوي بقيت غريبه منهم رجعت لاسرتى وانا عمرى 12 سنه خلاص اتبنى بينا جدار الغربى ما بقدر اصراح امي بخاف من الوالد اطلب منو حاجه والمفاجأه الكبرى اني لقيت معاملتم لي مختلفه عن اخوانى في كل حاجه زمان كل حاجه كانت حرام وغلط وعيب وحسع كلو بقى عادي صح الزمن اتغير بس ده خلى حياتي جحيم ومرت السنين وسافرت للسودان لدراسه الجامعه وفرحت للرجعه بس اصدمت في اهلى بدات المشاكل من كل الانواع على اساس اني مغتربه معنى كده اني غلط في كل حاجه غلط في لبسي غلط في اكلي في كلامي في اختيارى للاصحاب ليه الظلم ده وذنبنا شنو المهم واصلت صديقتى حياتها وحبت شاب بكل صدق واخلاص استحملت المر عشانو وحاربت اهلها عشانو رفضت كل شاب اتقدم ليها بس للاسف خدعها وازوج بنت اهلو بقول انو مغصوب للزواج منها لان ابوه ادى كلمه رجال على قول جدودنا.......
انقلبت حياتها فوق تحت يقت ما عارفه الصح من الغلط بقى الحزن رفيق دربها والدموع لا تفارقها
ذنبها انها حبت بصدق واخلاص
وحافظت على نفسها من اجلوا معقول ده جزائها في الاخر يحليلك يا غاليه تلقيها من اهلك ولا من حبيبك المنافق انا معاكي دايما يا غاليه وعارفه انك حتقري الكلام ده بس صدقيني انا بحبك شديد اكتر من اخت
ومعاك لاخر المشوار يا غاليه يا غرباويه
حنتظر الرودود يا اصحاب المنتدى

[bnoota]

قصة محزنة أختي الغالية . لكن كلنا احنا العايشين خارج السودان الاهل في السودان بشوفو بعض طبايعنا غريبة و غلط وأظن كل واحدة مننا بتمر بالحكاية دي فالبنت يفترض تحاول تتفهم الوضع في السودان وتتأقلم مع العادات هناك لانه فعلا بحكم تغير البيئة والعادات بتكون عندنا عادات هم ما بفهموها وبفتكروها غلط. بالنسبة لحبها حبها مخلص و صادق لكن براءة القلب و طيبته ما بتنفع في الزمن دا وحب الولد الصادق قليل لانو في كتير بلعبو و بقضو وقت بس فمفروض البنت اذا حبت واحد وهو قال لها راغب فيك و بحبك طوالي تقول ليهو اذا صادق اتقدم للاهل والا تنسى الموضوع طوالي و ما تهتم بيهو فاذا هو فعلا صادق حيتقدم ع طول و اذا لا حيزوغ براحة وكلمة غصبوني دي كتيرة و كتير بتكون زوغة بس الا القليل . فنصيحتي للاخت تحاول تتوجه لربها وتسالو انسيها ليهو وتقنع نفسها الزواج قسمة ونصيب و انشاء الله حيجيها الاحسن منو .

[mohammad]

شكرااا على القصة الرائعة والمتميزة


تحيااااااااااااااااااااااااتي

[بنت الرهد]

شكرا ليك يا راااااااااااااااااااااااااااائع

[بنت الرهد]

شكرا ليك يا سوداني
على المرور الجميل ده

[zizou]

لازم يابت الرهد انو البت لما تكون مخلصه تلقي الولد خائن او غير مهتم والعكس طوالي

صعب او نادر بكونو الاتنين مخلصين ولا رايكم شنو

تقبلي مروري

[بنت الرهد]

كلامك صح يا غالى وده حقيقه عايشنها
وشكرا ليك على المرور الرقيق ده