فى صالة وصول مطار الخرطوم

[المايسترو kaka]

***الحلقة الاولـــى***


اقتربت الساعة من السادسة والثلث مساءً وتبقى ع وصول الطائره القادمة من مطار دمشق الى مطار الخرطوم ساعة الا ثلث,,
دلفت انا الى صالة الوصول بمطار الخرطوم وانا منطط عيونى زى القعونجة الراحت منها المطبقة فى السوق, واتجهت مباشرة الى موظف الاستعلامات الذى انهمك بالطبيظ فى جهاز الحاسب الذى تربع امامه وقلت لة وانا اتثائب::-
هاااااااوووم السلام عليكم..


رد دون ان يرفع عينية المطششات من شاشة الحاسوب وكانة يراقب البيت الابيض بقمر تجسس مع انو كان بلعب فى كوشتينة..::-
اهلا وسهلا اتفضل..


مددت اصبع دون وعى وانا اصيح لة بفرح::-
خت الولد والعشرة و التسعة مع البت ديك..


التفت الى بدهشة جعلتنى انتبة وانا ابلع ريقى ثم نظر الى شاشة الحاسوب ثم قال لى بجدية ::-
نعم اتفضل يااستاذ..


تنححنت زى مذيع الجزيرة احم احم ثم سالت::-
بالله الرحلة القادمة من سوريا دمشق بتصل متين؟؟


التف بكرسية ونظر الى جدول الرحلات بعد ان انزل نافذة الكوشتينة اسفل الشريط وهو يقول::-
بتصل الساعة سبعة و عشرة دقايق.. اى استفسار تانى..


وادرت ظهرى وانا اغمغم::-
لا لا شكرا..


ولمحتة بطرف عينى وهو ياخذ الولد والعشرة والتسعة وبابتسامة ويضعها فوق البنت وهو يطنطن::-
والله ماكنت شايفة..
**


اترزعته فى اخر كرسى فى الصالة وانا اراقب الجميع,,
فى مرتين عجايز ع الطرف الشمال واحدة تنبح مع الاخرى التى غرقت فى نوم عميق والتانية تنبح..


وفى اول الصف الثانى رجل وزوجتو ومعاهم ابنهم الصغير وجنبهم راجل فى الاربعينات يطالع جريد سياسية ولا رياضية ماعارف والشافع يجى يجرها وامو تكورك::-
ياعمورى عيب..


والراجل بتاع الجريدة::-
لا لا خليهو مامشكلة..


والمراه العجوز تنبح , والتانية نايمة..


والشافع يجر فى الجريدة..


وامو ياعمورى عيب..


والراجل بتاع الجريدة لا لا خليهو مامشكلة..


والمراه العجوز لسة تلغلغ وتلكد فى صاحبتة , والتانية نايمة وبقت تشخر..


والشافع يجر فى الجريدة وشرطة منها حتة..


وامو ياعمورى عيب والله اضربك..


والراجل بتاع الجريدة بى ضيق لا لا خليهو خليهو..
و
وفجاءة المراه العجوز تصرخ بغضب::-
ياسجم انتى نايمة وانا من الصباح اتكلم براى سب فوقك..
و
وبلا مقدمات الراجل بتاع الجريدة كرفس الجريدة وادها لى ابو الشافع وهو يقول بزعل::-
عليك الله تانى ماتشترى ليهو حلاوة اشترى ليهو جرايد بس كويس..
وانطلق خارج الصالة..!!
**
اخرج علبت سجائرى من جيبى وهممت باشعال واحدة, ثم تزكرت الله ياخ انا خالو قال احتمال يجى هنا يقوم يلاقينى مولع سيجارة وانا ماناقص برى ونقة..


صرفت النظر عن السيجارة وطلعت الموبايل وركبت السماعة فى اضنينى الكبار ديلك وفتحت الاستديو وبقيت افتش فى الاغانى والفنانين نجاة غرزة لالالا علوية كوارع لالالا سعاد كانون مع حسن ركشة لالالا واخير اخترت سيلين ديون مع الربع اخر حفلة..


وعليت الصوت وقعدت اتهوزز فى مقعدى زى الموبايل الهزاز ومرات يطلع منى صوت زى طرزان دة لما انسجم مع الاغنية وطبعا بطلع بصوت عالى عشان السماعات الافى الاضنين..
اااااااااااااء اع ع ع ع
و...
و......
وفجاءة دخلت من باب الصالة زى دخول ريتشارد ع هيثم طمبل
كانت جميلة المظهر تبدو من اسرة عريقة تتدلى مفاتيح السيارة من بين اصابعها كانت ترتدى بنطال جينز واسع وطونك,, يبدو عليها الارهاق وكانها لم تنم منذ فتح القسطنطينية اتجهت بشبحات واسعة نحو موظف الكوشتينة اقصد الاستعلامات وقالت بصوت عالى سمعتهو رغم السماعات التى ع اضنينى::-
طيارة دمشق باقى عليها كم؟؟
***





تابعونا الجزء الثانى قريبا...

[hdma]

ههههههههههههههههههههههههههههههههههههه
اسلووبك حلوو شدييد في روااية القصة .. بالذاات مع موظف الكوشتينة ده..

ههههههههههههههههههههههههههههههههه
اهاا حتتمهاا متيين ؟؟؟؟؟؟؟؟؟؟؟
احناا مستنيييين ...........

.