هل اولاد المغتربين حناكيش؟؟؟؟؟ ادونا رأيكم...!!

[sadness]

احتمال بسبب الجو فى السودان لانهم اتربوا هناك ولما بيجوا السودان بيكون اتغير عليهم الجو وبيتصرفوا تصرفات الناس بيشوفوها على انها حنكشة maybe

[كلبشة]

ســــــلام عليكم ورحمة الله وبركاته
من يقول ان اولاد المغتربين حناكيش وانا واحد من المغتربين .
ياشباب انتم ماخذين المعلومة هذي خطأ وارجوا منكم انت تعدلو هذه المعلومة الفاشلة

[حاتم تاج السرفزارى]

بخصوص حنكشه اولاد المغتريين اذا صح التعبير__فى هذا الزمن الصعب ده وزمن الاغتراب فى الماضى فى مقارنه اغتراب زمان واليوم عايز اقول ياحليل اغتراب السبعينات والله يرحم اغتراب الالفينات قد يكون هناك حنكشه فى بعض التصرفات وفد تذول بمرور الزمن الصعب__احب اوضح انى مغترب ولكن مستحيل ان اتحنكش لانى سودانى اغبش

[Zola CoOolz]

((الحنكوش / الحنكوشة هو ذلك الززززززوووول الذى لم يذق طعم البشتنه فى حياته الدنيا ..
ولم يتمتع بمذاق الشلهتة فى مدافرات مواصلات الكلاكلة القبة ...
ولم يستمتع بسكن رواكيب الحاج يوسف التى تقى حرارة الشمس ولا تغنى عن زمهرير الشتاء ..
وقضى جميع مراحله التعليمية فى المدارس غير الحكومية ذات الطوابق المتعددة
والبلدان العربية ذات الرفاهية المطلقة.. والمكيفات ذات الهمبريب الضاغط ...
ولم يشرب من المياه سوى المياه الصحية ))

صفات الحناكيش:-

الحناكيش ناس (بابــــــــا) و (مامـــــــا) وناس ال (جلكسي جواهر) و (البيرقر الجامبو)
وناس (أحواض السباحة) و (لعب البلياردو) وناس (عمرو دياب) و (نانسي عجرم) ...

طيب ياجماعه لفيت الدنيا كلها وافتش عن معني المصطلح ( الحناكيش ) ولقيت الناس كلها متفقه
علي التعريف اعلاه !!

طيب ماعندهم ذنب الناس ديل سوي انهم ظروفهم خلتهم يتغربو بعيد من السودان
ويكونو مسجونين في شقه ومايشوفو الشمس الا الخميس والجمعه ..

طيب ده مش عذاب سجن وغربه الناس تعمل شنو وماعندها موضوع غير التلفزيون

ولانو تلفزيون السودان مامشجع خاصه انو كلو اتفاقية السلام وموجهات السلام
بالتالي تبداء رحلة البحث عن قنوات افضل ووووووووووووو
ووولى عودة...!

مع تحياتى

بصراحة ..

صح لسانك و علا شانك في كل كلمة قلتها..

ده الواقع البعيشو و الح ـياة الاتعودنا عليها..

ذنبنا شنو ؟!

ما بنقدر نتغير في ليلة و ضحاها

[سجود]

حراااااام عليكم اولاد المغتربين ما كلهم حناكيش
فيهم الناس المتواضعين
وانا عن نفسى مشتاقة كتير للسودان وعاداتها وتقاليدها الجميلة
وتقاليد حبوباتنا الحلوة

[zizou]

بسم الله الرحمن الرحيم
السلام عليكم ورحمة الله وبركاته
وصل اللهم على محمد وعلى آله وصحبه
وبعد موضوعكم بالجد جذاب بس بزعل ناس وبضحك ناس
في الاول انا مقبم بالامارات ماتميت لسه سنه وعندي اضافه بسيطه اولا ماكل الحناكيييش مغتربين وما كل المغتربين حناكيييش وثانيا المغتربين نقول عليهم بدل حناكيييش محرومين وماتفهموني غلط لانو انا اشتقت لي السودان والدافوري والاصحاب وشارع النيل و و و و . . . وزهجت ومستني متين ارجع بفارق الصبر
اتخيلوا معاي انا لسه ماتميت سنه فما بالك المقيمين هناك اصلا وماجربو ده كلوا
في رايكم الترطيبه والكنتاكي احسن من الوطن والاصحاب والاهل اكيييييد لا بس براااحه عليهم انا شايف انو كفايه عليهم غربتهم

[فارس الرومانسية]

لا لا يا خى الناس ديل كويسين جداً ما حناكيش ولا حاجه
هههههههههههههههههههههههههههههههههههههههههههههه

[زوزو الجامعي]

هلا
والله انا في نظري اننا اولاد المغتربين ماحناكيش بس ممكن انه اللهجه بتكون متغيره عندنا وكمان الحركات والعاداتت غير بس ده ماسبب يخليهم يقولو عنا حناكيش نحنا شو زبنا نحنا غالبا في الغربه بتكون الحياه غير جدا عن السودان يعني الشمس والغبار والسخانه والدلع في الكلام وماما وبابا والكلام ده كلو ماحنكشه بس ده الشي الحاصل من الوضع اللي نحنا عايشنه ومن الناس اللي نحنا بنخالطهم
والله في ناس في السودان مقطين الحنكشه في حين انهم ماطلعو برا السودان ولا حته بس الله غالب ده شي ومشا علينا

[AmerO]

السلام عليكم ياجماعه بصراحه انا ماكنت عارف المعنى للكلمه دي ( حناكيش ) ولي هسي ضايع في معنها عشان الاخ صلاح ماأكد المعنى ..

وبعدين التعيير والتقييم في شخصية الزول بقة هوايه عند السوداني الماطلع برا السودان

... وبرضو كلنا اخوان وشكرا يعطيك العافيه على الموضوع يامشرف ..

تقبلو تحياتي

[همسة حنين]

لا لا لا طبعا ماحناكيش بس هما عشان الواحد لما بيمشي دولة تانية شوية بتتخلبط اللهجتين مع بعض وشوية بتتغير طريقة الكلام ولما يكون الكلام شوية متغير بعض الناس بيعتبروها حنكشة

[amoya225]

اولا بشكر الاخ صلاح
انا عضو جدييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييد
جقيقة انا في رايي اولا مفروض نعرف (ماهي الحنكشة المقصودة فعلا)
علي حسب علمي ان بيئة الشخص التي ينشاء فيها تفرض عليه ان يكون متماشيا مع مقتضياتها وان حاول العدول عن ذلك يكون من الذين يجهلون
مثلا
نفرض انو انا اتربيت في الجزيرة المعروف عن عادات المناطق الريفية وتقاليدها واعرافها ومصطلحاتها تضع بصمة حتي في التعابير والالفاظ والسلوك مما يلحظه الجميع
واذا انا اتربيت ونشات في بريطانيا هل تكون ملامح الشخصية من الجزيرة ومن بريطانيا واحدة
هذا وما بين السطور اوضح
مع العلم باني نشات وترعرعت في الجزيرة ارض المحنة وبعدها اغتربت للعمل

[سندس]

دايرين الصراحة ولا غيرهاااا...
انا ماعارفة لي بيقولو عليهم حناكيش بالعكس هما عاشو غربة دي براها كفاية تخلي الواحد مابيعرف
يتحنكش زاتو المقصود انو في الغربة بيكونو اسرة اسرتين لا جد يدلع ولا حبوبة تدلل ولاخال ولاعم
ولالا يعني باختصار كدة غالبا فاقدين حنان تعال شوف الفي السودان مشاء الله حبوبة وجد واواوا
يعني احساس بالامان ....واقول حاجة تانية والله نحنا البنات بنلاحظ انو اي واحدة بتمشي السودان
وتجي راجعة تلقاها بقت حنكوشة زيادة كلام اتقلب براحة وملحن وحركات عجيبة كدا........
بس بتمنى اكون خفيفة عليكم موضووع جمييييييييل

[Abubakr]

[overline][overline][overline]((الحنكوش / الحنكوشة هو ذلك الززززززوووول الذى لم يذق طعم البشتنه فى حياته الدنيا ..
ولم يتمتع بمذاق الشلهتة فى مدافرات مواصلات الكلاكلة القبة ...
ولم يستمتع بسكن رواكيب الحاج يوسف التى تقى حرارة الشمس ولا تغنى عن زمهرير الشتاء ..


الاخ المشرف العام

لك التحية والتقدير..

وكل الشباب المتداخل ..

تحياتى..

حقيقى الموضوع جد مشوق وجدير بالإهتمام..و يديك العافيه..
بس لو سمحت لى عايز أعلق على تعريف الحنكوش أعلاه بأنأضيف أن الحنكوش هو "من إستلف واقع غير واقعه أو عادات وتقاليد لا ينتمى إليها من ليدعى خلالها رخاء العيش وما يرتبط به من قيم وثقافة وأخلاق وسلوك زايف".

فى تقديرى أن الحنكشة هى مجموعة قيم وإخلاق وسلوك تشكل شخصية معينة تبدأ التعاطى مع الحياة وما حولها بـ (ثقافة إستلاب) غالباً ما تكون / يكون المدعى فيها "مقتنع تمام الإقتناع" بأن هذه الثقافة لا تمثله ولا ينتمى إليها بأى حال من الأحوال .. بدليل أن المدعى لهذه "الحنكشة" وفى أغلب الأحيان يتعامل بشخصيته الحقيقية عندما يكون "لوحده" أو يتعرض لمواقف تكون جاده ولا تحتمل منه التعامل غير بشخصيته الحقيقة. . وعادة فى هذه المواقف يتعامل "المتحنكش" بالعقل الحقيقى الذى لم يمس بدأ الحنكشة "والعياذ بالله"، وما أن ينجلى الموقف حتى يعود "المتحنكش" للبس قميص الحنكشة من جديد وهكذا دواليك.

هنالك الكثير من من هم لم (لم يذق طعم البشتنه فى حياته الدنيا .. ولم يتمتع بمذاق الشلهتة فى مدافرات مواصلات الكلاكلة القبة) وأيضاً لم (يستمتع بسكن رواكيب الحاج يوسف التى تقى حرارة الشمس ولا تغنى عن زمهرير الشتاء ) ولكننا لم نلحظ عليه أى أعرض لداء "الحنكشه" هذا لا هو ولا أخواته ، وأيضاً لم يتح الفرصة مطلقاً لهذا الدأ "العضال" أن يتسرب إلى ذهنه وبالتالى ثقافته وقيمه لتظهر الأعراض "الحنكوشيه" - قاتلها الله - بعد ذلك فى سلوكه .. وكل ذلك كان بفضل التربيه.

قى النموذج السابق لعبت التربيه دوراً هاماً فى ضرورة إلتصاق "الإبن" ولد كان أو بنت بعاداتنا وتقاليدنا وسلوكنا وقيمنا وثقافتنا التى لم يعلمونا(بتشديد اللام) فيها أهلنا ولا أصدقائنا يوماً ما إصول وتقاليد وطرق وإنفعالات "الحنكشة" وسب تطوير آداءها.

دى مجرد وجهة نظر ( قد تكون صاح ولا غلط ولا نص نص)

لك الشكر العميق يا أستاذى العزيز..

وللمتداخلين كلللللهم جل التقدير وأنيق الإحترام..

ولى عوده مؤكده لانو الموضوع حقيقى يستاهل بجد

دمت[/overline][/overline][/overline]

[Abubakr]

يا أخوانا معليش والله ما عارف الرد ده "الحنكشو" أقصد السطروا كده شنو؟

حالوت أصلحو لكن غلبنى .. معليش أعانى شوية أميه مع هذا الجهاز اللعين.

لو ممكن الإدارة تتدخل لإنقاذ الموقف.

لكم جميعاً الود الشاسع.

[حبيب الناس]

[السلام عليكم ورحمة الله وبركاته ,,,
الشكر موصول لك أخي السيد / المشرف العام
من زمن طويل جرت العادة على تسمية المغتربين خاصة بلفظهم الحناكيش ولكن !!!!! من الغريب أن نرى أن هذا اللفظ لم يعد يطلق على المغتربين فحسب بل لحقهم في نفس القطار ابناء الطبقة البرجوازية في السودان (المرطبين) كما يزعم البعض . ومن هنا يلزمنا أن نسأل أنفسنا هل الحنكشة هي الثراء أم تصنع الثراء . فإذا كانت الحنكشة هي الثراء فأظن المغتربين خارج هذه المنافسة لأنهم ببساطة لو كانوا أثرياء لما تركوا سودانهم . ولو كانت الحنكشة هي تصنع الثراء فأظن أن المغتربين أحق من الآخرين بتصنع الثراء وذلك ربما لأن معظمهم ميسوروا الحال . أما عن تصنع الكلام (التعطيش والتخفيف) فالأرجح أن الشخص عندما يسكن مكاناً غير بلده فلابد أن يطرأ على لسانه بعض التغيير ويظهر ذلك جلياً عند بعض إخوتنا عندما يحلوا من ولاية في الأقاليم (الشمالية أو الجنوبية أو الغرب) إلى ولاية أخرى . فمن باب أولى المسافر خارج السودان أو القطر العربي .[/motr1]
وما خلا ذلك الوصف فهو هروب من الواقع

[جمال يوسف]

الحنكوش حنكوش ولو فات ام بده حنكوش؟؟؟؟؟؟؟؟؟ حقيقا الموضوع سلس والهجوم عنيف على اولاد المغتربين ؟ بس الحنكوش عشان يتخلص من الكلمه دى لازم يحتكا بالمجتمع الحوليه وينوع الاحتكاك على كل لطبقات ( البوش- العدس -الخ......)

[نسمة الفجر]

السلام عليكم ورحمة الله وبركاته
مشكور على الموضوع

[zoalallah]

يا اخوانا انا حنكوش ما بحب الا اكل معين وبحب كت كات والايسكريم وجالكسي وخصوصا المكيف وبصراحة انا شايفه احسن اختراع في الدنيا لحدي اسي يعني بصراحة ما قادر اتخيل كيف حيكون شكل الدنيا بدون تكييف. طيب وبعدين وايه المشكلة وثم ثانيا الرجالة مواقف وفي حديث اغلبية الناس بتفهمة غلط اللي هو بقول فيه الرسول عليه الصلاة والسلام (اخشوشنو فأن النعومة لاتدوم) انا بشوف الخشونة في المواقف واسلوب الكلام .والرسول عليه الصلاة والسلام قال كلو من زيت الزيتون واهتدنو به فأنه من شجرة مباركة ,, بس اللهم انه الزمن اتغير والزيوت بقت مستخلصة في كريمات وهكذا وبعدين اللاهتمام بالشكل والمظهر بقى سمة حضارية لاغنى عنها في العصر الحاضر خصوصا انه في واحد من الصحابة قال (اني احب ان اتجمل للمرأة كما هي تحب ان تتجمل لي) , عشان كده يا اخوانا ما معناها انا شقيان وعرقي ينتح ارجل من واحد نزل من حديدة بي ام دبليو وشايل في يده كت كات والتانية ايسكريم لانو ببساطة لو حصلت مشكلة ممكن اللي بتقولو عنه حنكوش ده يقيف معاك اكتر أو يطقطق الشفت العامل فيها مفتح ده زي السلام عليكم .

[ودعازة]

الحنكشة بمعنى ود المصارين البيضاء: فالذنب فى تقصير هذا الحنكوش بالقدرة التفاعلية مع مجتمعه الاغبش تكون فى رقبة ولى امره ، لأنه لم يهيئ لهذا الحنكوش الأدوات اللازمة لدخول ذلك العالم الاغبش. اما التحنكش وشيل شنط الضهر الفاضية وتعطيش الجيم (زى ناس الاخبار اليومين ديل)من قبل الغبش فهذه هى الطامة الكبرى، فهى انسلاخ قبيح عن واقع الفرد الحقيقى وهو مرض عضال (يحمينا ويحمى السامعين منه).
اما اطلاق حنكوش على شخص لمجرد عاش خارج السودان فده قصر بصيرة لأن الحناكيش بالسودان عشرات المرات عما خارجه.
ويجعل مرورنا عليكم خفيف،،،

[امال الناس]

تحياتي واحترامي لك يا مشرف

ابناء المقتربين مجرد ما وصلو سوداننا الحبيب الحنكشة في شنو ولزومها شنو بقوا ذينا واحد الشمس والتراب وزحمة المواصلات وكتم الانفاس واكل الفتة والمرقة عشان كده حقو المغتربين ما يعلموا ابناءهم علي الشئ المش دائم ليهم عشان الفطامة صعبة اوي ولا شنو رايكم يا مغتربين يا حلوين مش حقو تخلهم يلعبوا ذينا في الطين ويلخو العجين ويمشوا حفيانين ويبقوا كمان مبشتنين لاشكولاتة ولا ماكنتوش ولا حنين