ملاح نعيمية تاكل صوابعك وراه

[مايا]

[align=center]ملاح نعيمية بى طريقتى الخاصه

المقادير :
3 بصلات نقطعهم صغير
وربع كيلو لحمه مفرومه او ازيد شوية
طماطم مخلوطه معاها معلقة صلصه
3 كوب زبادى
ملح - فلفل - بهارات
واكيد الويكه
ونجيب شوية زيت ومعاه سمن او زبده بتخلى طعمها ونكهته حلوه

الطريقه :

بسم الله اول حاجه بنحمر البصل فى الزيت وبعد ما يبقى لونه احمر بنطلعه
وفى نفس الزيت بنقلب اللحمه والافضل تكون معصجه من قبل ونتبله ونضيف
عليها الطماطم يلا بنخليها على نار هادئه لغاية ما تستوى

يلا بنجيب البصل المحمر بنخته فى الخلاط ومعاه شوية موية بعد ما نضربه
نسكبه فى طبق او اى حاجه ونضيف عليها الزبادى ونضربه كويس جدا
ونضيفه للصلصه واللحمه يلا بنخليها لغاية ما تغلى شوية
بنبعده من النار ونضيف الويكة بس على شرط ما مرة وحده شويه شويه
بنضيفه ونفركه كويس لغاية ما تبقى تقيله يلا بنرجعه النار وبنخليها شوية
لغاية ما الويكة تستوى بنطفى النار وبنخت شوية سمنه على الوش

خلاص كده تكونى او تكون عملته احلى نعيمية واخيار تاكله مع الكسره
او اللقمه

وبى الهناء والشفاء[/align][/size]

[سحر محمد]

يا رائعة تسلم يدك يا اغلى اخت مايا الجميلة انا ما كان لى نفس اكل يكن بعد هذه الوصف فتحتى نفسي لطعام يديك العافية اختى مايا تحياتى

[مايا]

سحورة الغالية انشاءالله دائما نفسك مفتوحه
واذا نفسك فى اى طبخه وماعارفه طريقته اختك موجوده
انتى تامرى (عامله فيها ست بيت )

يديك الصحه والعافيه عزيزتى

[sarona]

[align=center]
العزيزة مايا .....

بصراحة طريفة جديدة علي خااااصة باللحمة المعصجة ......

من وصفها بتشهي......

يوم الجمعة أجربها وبجيعك راجعة .....

دمتي بود ......

[/size][/font][/color][/b][/align]

[أبو عمر]

تسلم يديك يا مايا..
أنا مغرم بالنعيمية ..
لو لقيتها فطور مع العصيدة أو في العشاء حتى لو كل يوم باكلها.
شكراً على النعيمية الساحرة.

[رزاز]

شكلك طباخه ماهره يا مايا خلاص الغدا عندك وبالنعيميه دي بس وانا بجيب معاي الاسعاف عشان تشيل تنقل طوالي هههههههه (ماتزعل بمزح معاكي) تسلمي يا عسل ويديك العافيه يارب وتلقى بيت في الصافيه

[الأسير22]

شكرا ليك يا مايا



عليك الله ورينا الأكلات الشعبية دي



لاننا هنا في الغربة


علمينا كيف نسوي الاكلات السودانية دي

[السودانى الاصيل]

والله جوعتينا يا مايا

تسلم اياديك يا طباخه





ويا بخت البياكل من ايدك على طوووووول
فهمتينى

[ام هبه]

ملاح التقلية :
المقادير:
1/ 3 بصلات كبيرة 2/ ربع كيلو لحمة صافية مفرومة 3/ 4 فصوص ثوم 4/ كوب زيت نباتي 5/ فلفل
6/ ملعقة كبيرة صلصة 7/ ملعقة بابمية ناشفة مسحونة ( ويكة)

الطريقة :
يسحن البصل بعد تشويحة بالزيت ويضاف الى اللحمة بعد وضعها في ماء ساخن ويتم تقليبه حتى تستوي اللحمة ويضاف اليها الصلصة والثوم والفلفل وقليل من الملح ويتم تقليبه لمدة 30دقيقة حتى تستوى اللحمة
وبعد ذلك يضاف اليها البامية الناشفى ةتترك لمدة دقيقتين وتؤكل بالكسرة او العصيدة او القراصة. وووووووووووووووووو بالهنا والشفا

[الهايم]

الله عليك يامايا ملاحك شهي جوعتينا فعلا سودانيه من حقك تفتخري بت بلدي
مشكووووووووووووووووووووووووووووووووووووووووووره

[هامونيت]

تسلمي والله انا من زمان دايره اكل سوداني بالجد حاعملها لاني مره عجبتني شديد قربت اكل اصابيعي

وعليك الله ممكن اكلات شعبيه سودانيه وكيفيه طريقته عملها

ودمتمتي بعافيه

وتسلمي مره تانيه على الموضوع والله شهيتي افتحت خالص

[ملاك الورد]

يم يم يم يم يم يم يم يم يم يم يم يميم يم يم يم يم يميم يم يم يم يم يميم يم يم يم يم يميم يم يم يم يم يم

ثكلن يا مايا تسلم يدك

[الدغري]

بقينا عزابة يلا نجرب