الغلّوتيّات (الفوازير) السودانية

[موكب فرح]

ابو الريش شكلك رجعت لي قاموسك الشعبي في الغلوتية الفوق لكن برضو خليني اقول ليك كضبا كاضب بأعتبار ما قد كان من اجابه اولي. ههههههه

طبعا الاجابة التانية صحيحه ميه الميه.
ومبروك

[موكب فرح]

1- بيوض بيوض في الخلاء موجود.


ماعرفتوها؟؟
طيب خدوا الحل: ده العضم ( العظم).

[موكب فرح]

طيب ....

فكروا في حل الغلوتية الفاتت، وهاكم واحدة جديدة:

جدادتي الرقيطة ... تجيب الخبر من تحت الواطة

[align=center]ده الظرف ( ظرف الجواب). طبعا الظرف فيهو الوان بالجنب . لكن باقي التفسير للارقض تمو انت صاحب الغلوتية.

صح؟؟[/align]

[أبوالريش]

[align=center]ده الظرف ( ظرف الجواب). طبعا الظرف فيهو الوان بالجنب . لكن باقي التفسير للارقض تمو انت صاحب الغلوتية.

صح؟؟[/align]

الإجابة طبعاً صحيحة، ومافي باقي تفسير ولا شئ. المقصود بالرقيطة هي الخطوط حول الظرف البتكون باللونين الأحمر والأزرق.

طيب ..

لسة في غلوتية ما لقت حل، عشان نشوف غيرها

[أبوالريش]

دي ....

طيراً طار من قنطار
حتت ريشو وقام عوّار
بطنو السيح وضهرو النار
شدرة فريدة في راسها حديدة
الجن حراسها الموت في راسها

منتظرة الحل ....

وكمان هاكم واحدة جديدة:

عمي المقدّم ... يجري ويتحزّم

[موكب فرح]

[align=center]أبو الريش كدي أمسك ديل لحدي ما اجيكم راجع :

*شق حطب, وشق رطب, وشق فضه , وشق دهب . دي شنوو؟؟


*عنزي أم قرينات دخلت السوق ما جات . دي شنوو؟؟


*سيفي سليتو إن بدخلو في بيتو . ده شنوو؟؟

* أزرق كته كرعي سته . ده شنو؟؟؟؟[/align]

[أبوالريش]

[align=center]أبو الريش كدي أمسك ديل لحدي ما اجيكم راجع :

*شق حطب, وشق رطب, وشق فضه , وشق دهب . دي شنوو؟؟


*عنزي أم قرينات دخلت السوق ما جات . دي شنوو؟؟


*سيفي سليتو إن بدخلو في بيتو . ده شنوو؟؟

* أزرق كته كرعي سته . ده شنو؟؟؟؟[/align]

هلا موكب فرح ...

الغلوتية التانية بتاعتك دي أنا سمعتها باختلاف بسيط، وهي:
حبوبتي أم برتيتشات ... مشت السوق وما جات
ودي حلّها (القروش) لأنها بتدخل بيها السوق وتصرفها، وما بترجع بيها.

كمان الغلوتية التالتة سمعتها كالتالي:
سيفي سليته .. تاني ما بدخل بيته

وحلّها (اللبن)، لأنو بعد ما يتحلب ما بيرجع تاني.

وعموماً كتير من الغلوتيات بتظهر بروايات فيها اختلاف ممكن يكون بسيط زي في الحالة دي وممكن يكون أكبر.

يالاّ حل لينا الغلوتية رقم (1) ورقم (4)، وما تنسوا عندنا غلوتيتين لسة منتظرين حل.[/font]

[aliman62]

أبو الريش تحياتي الغلوتيتين ديل طولن ما اتحلن يعني بالواضح عجزنا عن الحل .





تخريمة: حقو لمن يكون في غلوتية ما اتحلت ما نمشي لي واحده جديدة

ولكم خالص الود

[ابوالدهب]

دي ....

طيراً طار من قنطار
حتت ريشو وقام عوّار
بطنو السيح وضهرو النار
شدرة فريدة في راسها حديدة
الجن حراسها الموت في راسها

منتظرة الحل ....

وكمان هاكم واحدة جديدة:

عمي المقدّم ... يجري ويتحزّم

القلوتيه الاولي الحل هو اللحااااام صاح ولي لاء

[ابوالدهب]

[align=center]أبو الريش كدي أمسك ديل لحدي ما اجيكم راجع :

*شق حطب, وشق رطب, وشق فضه , وشق دهب . دي شنوو؟؟


*عنزي أم قرينات دخلت السوق ما جات . دي شنوو؟؟


*سيفي سليتو إن بدخلو في بيتو . ده شنوو؟؟

* أزرق كته كرعي سته . ده شنو؟؟؟؟[/align]

القلوتيه الاولي حلها : شجر النخيل
الثانيه : الطاقيه
الثالثه: شريط اللمبه الهبوبيه
الرابعه : ابوالجعران (حشره صغيره وسريعه في الجري )

[ابوالدهب]

النشوف منو الزكي فيكم :- 1-عتوتي ود الحرام ضبحته الليله باكر قام
2- قطع البحر بلاعضم ضهر
3- دخل القش ما قال كش

[أبوالريش]

أبو الريش تحياتي الغلوتيتين ديل طولن ما اتحلن يعني بالواضح عجزنا عن الحل .





تخريمة: حقو لمن يكون في غلوتية ما اتحلت ما نمشي لي واحده جديدة

ولكم خالص الود

علي مان62 .... تحياتي

طيب ... ممكن نشوف حل الغلوتيتين:

الغلوتية الأولى:
[align=center]طيراً طار من قنطار[/align][align=center]حتت ريشو وقام عوّار
بطنو السيح وضهرو النار
شدرة فريدة في راسها حديدة
الجن حراسها الموت في راسها[/color][/align]
دي (البندقية)

والتانية:

عمي المقدّم ... يجري ويتحزّم

ده (المترار) ........ "ممكن نشرح المترار إذا كان ما واضح"[/font]

وأنا بتفق معاك إنو لمن يكون في غلوتية ما اتحلت ما نمشي لي واحده جديدة. لكن بس حاولوا معانا، وما تخلونا ننتظر كتير. في نفس الوقت عايزين مشاركات، وأبحتوا القديم وأكيد حتلقوا حاجات ما ذكرناها.[/font]

[أبوالريش]

القلوتيه الاولي الحل هو اللحااااام صاح ولي لاء

أبو فاطمة ....

كضباً كاضب ...... شوف حل الغلّوتيتين تحت.


خليك قريب.

[أبوالريش]

القلوتيه الاولي حلها : شجر النخيل
الثانيه : الطاقيه
الثالثه: شريط اللمبه الهبوبيه
الرابعه : ابوالجعران (حشره صغيره وسريعه في الجري )

أبو فاطمة ....

مرّة تانية كضباً كاضب.
مع إنو {كضباً كاضب} دي مفروض يقولا ليك "موكب فرح".

شوف فوق أنا حليت الغوتية التانية والتالتة، وهي كالتالي:
التانية حلها: {القروش}
والتالتة حلها: {اللبن}

وعلى أي حال، منتظرين موكب فرح لتأكيد الحلول، ولحل الأولى والرابعة.

[أبوالريش]

النشوف منو الزكي فيكم :- 1-عتوتي ود الحرام ضبحته الليله باكر قام
2- قطع البحر بلاعضم ضهر
3- دخل القش ما قال كش

أبو فاطمة ....

الغلوتيات ديل بعضهن تعرضنا له، لكن مافي مانع نجيب حلهم تاني.
عتودي ود الحرام *** ضبحته الليلة وباكر قام ------- ده (الكعكول)
قطع البحر بلا عضم ضهر -------------- ده (الصوت)

دخل القش ما قال كش ------------- ده (الضل)

واصل معانا[/font]

[أبوالريش]

منتظرين موكب فرح يحل الغلوتيات الما محلولة.

وفي هذه الأثناء نديكم واحدة جديدة:

حبوبتي تتجلّع (تتدلّع) في دلعها .. جاها العصار هلعا

دي شنو؟[/font]

[أبوالريش]

أبو الريش تحياتي الغلوتيتين ديل طولن ما اتحلن يعني بالواضح عجزنا عن الحل .





تخريمة: حقو لمن يكون في غلوتية ما اتحلت ما نمشي لي واحده جديدة

ولكم خالص الود

طيب رأيك شنو في الحالة دي يا علي مان؟ نواصل والا نحل؟

[أبوالريش]

أها يا جماعة ......

نواصل والا نفرمل لحدي هنا؟

[العقاب الهرم]

رابطة راسها بلا وجع ونافخة بطنها بلا شبع
دى شنووووووووو

[راح الشاربين]

تشكررررررررررررررر ياجميل