كلمات شماسيه ترجمه لى ناس الشهاده العربيه

[ادهم]

،اول مصطلح هو الجلك والجلكينة وهو يعني الاب والام، والتفتيحة هو الرجل الفاهم والواعي، يعرف كيف يكب (المكنات والجاكات) اي يكذب (ويحنك الفارات) اي يخدع ويغش المغفلين.. و(الجكس) هى المحبوبة.. والشتات يا فردة يعني نحن مشينا يا صديق او جرينا يا معلم نفس المعنى، والجوكي هو سواق الركشة.. اما الشمار فيعني النميمة والشاكوش يعني رفضا للمحبوب، وخمس لي اي اعطني شئ بسيط، وقال الشاعر يفكوك عكس الهواء اي يرفضوك ،والقدة هو مثل لشخص كثير الكلام يقولوا فلان قدة ولصقة وصمغ، ويقولوا فلانة شرط للارض او شدة وغسيل عدة اى فتاة جميلة جداً.. وفلان كج وعارض اى رجل يجلب الحظ السيئ، وفلان بلفان ومقحط، اي شخص بلا نقود. والفلوس هى الشرتيت أو الفلة أو الكنجالات او الضحاكات او التشديرة، وكلها تعني القروش.
ويقولو فلان دا حمام اي زول ضعيف الشخصية، عكسها فلان دا اصلي ومعلم وراسطا وكده.. تعني زول قوي جداً والسكسكة والبجبجة والحتحتة جدع الاستايل، كلها أنواع من رقصات الحفلات، وفلان صبن الكيس تعني خبأه ودساه، وفلان دقس واتلحس، اى خدعوه واكلوا حقوا.. وفلان عمل وهمة في شكل قلبة اى فلان اخترع شيئاً جديداً غير مألوف.. وفلان مستنكح اى زول يغش الناس. والقطع الناشف تعني الرفض والممانعة. وعصلج تعني رفض الامتثال. وفلان عملوا ليه شرحبيل اى شروه، أى لم يأتوه في المواعيد وعملوا منه زغبير، اى زاغوا منو. والبلف تعني الكمساري. وكلمة دفار تطلق على الدامة أي المرأة السمينة، والركشة على الضعيفة. والمرأة تسمى عندهم الحنان والحاجة والبتاعة.. وفلان هرشناه وكحلناه عروض، اى خوفناه وارهبناه. وجضم الشئ اى اجاده واتقنه، والفطور عندهم اسمه فاطمة الحاج والغدا القدمبلية، والعشاء هو عشمانة. وسيرة العرس هى سيراليون. والحفلة هى طربانة او التربيزة. وجرَّ نور أى نظر لمدة طويلة. زول ما ناقش مسطح أي اهبل. وفلان مجنتر او فاطي سطر او مولع، تعني ليس في كامل قواه العقلية. والصعوط هو الموبايل، وفلان متكل في ترطيبة متشرشح أى مرتاح.
وفلان كسح وفتح وقد سلك رقد صوف، تعني كلها الهروب، والشماسة هم الشرامة . ودا كلوووو والله عشان الناس ماتتدبهل بعدين ويقومو يطلقو عليهم المصطلحات ديك .

[السودانى الاصيل]

ههههههههههههههههه
تمام يا عمك
دا موضوع قسيس حنك ابعاد
لمن بى غادى
بس الطاره لو كبست بتجازف للكابوره خليك يا مالللللللللم
يا

[ادهم]

والله يالاصيل انا حانى لى ناس الشهاده العربيه ديل لما يرجعو السودان

الواحد فيهم بكون زى الاطرش فى الزفه

[السودانى الاصيل]

ماشين اشتغلوا اكياس ولا عتاله هم
ديل يا اخوى ادهم هنا شهاده عربيه
وبمشو هناك كمان بكونوا شهاده عربيه
ديل ترطييييبه وحاجه عجيبه
ما تشيل هم

[همسة عطر]

أدهم

مشكور أخي عرفتنا على قاموس (شماسي) العجيب والذي يحوى معاني الكلمات الشماسية التي تمرغت بشمس وكتاحة البلاد .. وعلقت بثيابنا الناصعة البياض والتي يصعب تنظيفها بما لحق بها من درن .. ونأمل أن يكون البركة في ناس الشهادة العربية .. يعيدوا الأمور إلى نصابها والكلمات إلى أمجادها .. أي يعيدوا صافي النبع إلى مجاريه النقية الطبيعية .. بعد أن تلوث بمياه المجاري .. واختلط الحابل بالنابل ...
مصيبة وجريمة فيما يحدث للغة العربية في دولة عربية بهذه الصورة فاللغة العربية هي : لغة القرآن .. ولغة أهل الجنة .. فهل نسمح لأنفسنا بأن ننساق وراء الجهلاء والشماسة وبدل أن ينساقوا وراء الكلام الصالح .. والتهذيب .. قمة الخطأ مجاراتهم .. وفي البداية يكون الموضع ضحكاً .. ولكن لا ضحك في ذلك لأن العواقب قد تكون وخيمة .. قالواجب أن نصون اللغة العربية ونعيد أمجادها ... ويعلم صغيرنا كبيرنا ..
كان الله في العون .. ودمت أخي في خير ونعمة ....

[إطلالة قمر]

مشكووووووووووووووووور يادهم على القاموس العجيب دى
لكن انا ماسمعت قبل كدة منو الا كلمة شاكوش ومقحط والجكس
ديل الكلمات الي بسمعهم لمن امشي السودان في الاجازات

[سوداني وحش]

والله الله يعينا على حفظ هال القاموس

[ريناد]

تسلم على الدكشنري ده

[شاهيناز]

بالجد تسلم لأنه موضوعك رووووووووووووووووووعة
صراحة أول مرة في حياتي أعرف الكلمات دي
ودمت بألف خير

[hooma]

يسلموووووووووو عــــــــــــــــــــــــــــــــــــــلي

الموضوع الرائع ربنا يديك الصحه والعافيه

[hooma]

الموضوع كتير حلوووووووووووو
ويسلموووووووووووووووووووووو ربنا يديك العافيه وتجينا بالجديد

[sma7a]

يسلمو يا ادهم
لاكن ما تخاف على ناس الشهاده العربيه
لاكن وين القاموس ناقص
دا شماسى 2008
انت الظاهر ما مر عليك 2009
ناس طحنيه بس
وحشمار
وحشتاك
وعشتار

وايامك يا معلم

تسلم على البوست تانى

[المقدام]

حنكك سنين يا معلم

[ادهم]

ياشباب هسه انتو حتقولو ادهم ده شكلود كده شماسى
انا غلطان براى جبتو لى نفسى

هههههههههههههههههههههههههههههههههههههه

مشكورين على المرور الرائع

[kholoud]

"" مشكور اخي ادهم صراحه خوفتونا يا جماعه انتو لي بتتريقو على الشهاده العربيه كده كمان نحنا سودانين وبكل فخر وديرين يعني كلام شماسه اوكي ""
1- شطه في المحطه
2- باسطه يا فرده

3- كركددي وما عرفته لي
4- كيس نايلون والهواء شايلو

وفي كتير لكن انا ما دايره اعقدكم صراحه ............. انتو الشهاد عربيه بالجد

[al_beyankonery]

خلود باين عليكي سحسوحه لمن بهناك تعالو نسمعكم بعض كلام الكلام العامي
اشخت شخيط واقيف بعيد وهيي يا هيي وتاني هييي عندكم كلب ولا نجي بالدرب اطفر ولا بدفر ابوك لا راضي لا راضي كيسك فاضي ولا نمشي القاضي

[ادهم]

"" مشكور اخي ادهم صراحه خوفتونا يا جماعه انتو لي بتتريقو على الشهاده العربيه كده كمان نحنا سودانين وبكل فخر وديرين يعني كلام شماسه اوكي ""
1- شطه في المحطه
2- باسطه يا فرده

3- كركددي وما عرفته لي
4- كيس نايلون والهواء شايلو

وفي كتير لكن انا ما دايره اعقدكم صراحه ............. انتو الشهاد عربيه بالجد

ياخلود ده موضوع خطير وانا العامل نفسى قال عارف كلام الشماسه لقيتك خطيره يابت

[صلاح العجباني]

يسلمووووووووو على الموضوع الجميل



مع حبي .............

[ادهم]

يسلمووووووووو على الموضوع الجميل



مع حبي .............

مشكور ياود العجبانى ومرورك اجمل

[kholoud]

مشكور اخي اخي ادهم :
# عذاب في الاغتراب دي مهمه لانو عايشينهاا