الفساد الإداري أو سوء الإدارة

[ابوبكر]

[frame="7 80"]تختلف المسميات والمعطيات لكنها تحمل معنى واحد سوء الإدارة او سوء استخدام السلطات الإدارية في السودان اصبح شئً مروعاً ، يجب الوقوف عنده والتامل قليلاً في عواقب الوضع الحالي من فساد إداري وسوء في استغلال السلطات الغدارية الممنوحة بموجب الوظيفة او التعيين .
ولنمسك اي وزارة او مؤسسة في السودان ونتعمق داخل اداراتها نجد ان إدارات عامة كثيرة تدار بصورة دكتاتورية بحجة مسمى التسلسل الوظيفي او الهرم الوظيفي او الهيكل الوظيفي وحسب كلام اهل علم الإدارة انو هذه الهياكل أوجدت للتمكين من اتخاذ القرار المناسب وتهيئة بيئة العمل المناسبة حتى يكون القرار المتخذ سليماً ومعافى .
لكن مدراءنا العامين في السودان يسعون دوماً وراء مكاسبهم الشخصية من حوافز وبدلات ولجان حتى ان البعض منهم لا يصدق بحافز ان لم يكن اسمه ضمن كشف المستحقين لذلك الحافز حتى أصبح ذلك عرفاً متبع في كثير من المؤسسات لو أردت ان يتم التصديق لك بسرعة فيجب ان تضمن أسم مدير عام الشئون المالية والإدارية ومدير الحسابات في كشف الحوافز والا فعليه السلام .
بعض الإدارات تديرها السكرتيرات ، تخيلوا معي إدارات كاملة تمثل السكرتيرة فيها دور المدير بما تمليه عليه من قرارات وهو ينصاع مطيعاً لها من دون ابراز شخصيته او اي اسباب اخرى تخيلوا مدير مثل هذا ما الذي يمكن ان يصدر منه ، عفواً اقصد من سكرتيرته .
لا شك انه ستقرب فئة وتستهلك فئة وتستبعد فئة وهناك فئة ليس لهم الحق اصلاً في مقابلة المدير لن السكرتيرة لا يعجبها منظرهم او غير مستساقين لها او دمهم تقيل علي قلبها .
يا جماعة والله ده كلو حاصل في مؤسساتنا فوروني وين الحق ووين العدل ووين الناس القلبم علي البلد دي. [/frame]

[hesham aljamrey]

لكل هيكل حكم سلبيات وإيجابيات
ولكل صاحب سلطة بطانتان وهذا معروف من قديم الزمان
ولا نختلف معاك أن هناك فساد إداري ولكن هل هناك تنمية هل الدولة وهياكلها التنفيذية تمشي على خطط ام تخبيط ؟ وعند التقيم لابد أن نأخذ السلبيات والإيجابيات - مثل علم المحاسبة ( دبت وكريدت ) لنصل لربح أو خسارة وهنا لنصل هل هناك خطوات نحو التقدم والتنمية والنجاح ام لا .؟
وهل السلطة التنفيذية هي التى تديرها السكرتيرة أم شركات ومؤسسات فالمسألة تحتاج موازنة ولا ما نع من المراقبة والمحاسبة وليس كل الإداريين شرفاء معك كما أنهم ليس كلهم فاشلين وفاسدين .
ولك التحية

[صلاح يحيى سليمان]

الاخ ابوبكر.....البقره كلامك ده ...يطلع طوالى مظاهرة...!
الفساد الادارى اخى الكريم...مشكلة تعانى منها اغلبية الدول.....الغنية والفقيرة....!
انت اتكلمت عن السودان.....وانا اقول ليك كلامك ده كلو وعليهو زيادات لسع ما وصلت السودان
ينطبق على المانيا التى اعيش فيها منذ اكتر من 22 عام.
عجبنى تعليق الاخ هشام....وفيه منطقية بحته....!
خلاصة القول ....الضمائر هى التى تحكم البشر وتصرفات الانسان اينما كان.

مع تحياتى

[ابوبكر]

أخونا هشام جريمة واخونا المشرف العام
تحياتي الخالصة
حقيقة زي ما بقولوا اهلنا اصابع اليدين ما واحد وبرضو البطن بطرانة وزي ما في الطالح في الصالح والواحد لما يتكلم في موضوع زي ده حقيقة لانه حرقني شديد وغاظني شديد لأنه حاصل في بلدي انشاء الله لو من نفر واحد ونحنا كلنا عارفين أنو الوضع ده غلط والواحد ما برضاه لكين الناس بتشكي

[hesham aljamrey]

الصلاة والسلام على أشرف الأنبياء والمرسلين سيدنا محمد وعلى آله وصحبه أجمعين
اخو السارة
مشكور على التعقيب
حرقك شديد هذه من باب الجمرة بتحرق الواطيه .
عيش كثير شوف كثير

[سودانية نار]

المشكلةانو الواحد يكون اداري ومعلق ايات قرانية تحمل معاني التقوي ومراعاة الحقوق وعدم الظلم
ويعمل البلاوي البيتكلم عنها ابوبكر
تسلم اخي
بالمناسبة انت وين مختفي ليك مدة

[ابوبكر]

الصلاة والسلام على أشرف الأنبياء والمرسلين سيدنا محمد وعلى آله وصحبه أجمعين
اخو السارة
مشكور على التعقيب
حرقك شديد هذه من باب الجمرة بتحرق الواطيه .
عيش كثير شوف كثير

والله يا جريمة الواحد لو بيده يكون السودان ده احسن بلد لكن الله غالب والواحد محتار وما عارف الحاصل

[ابوبكر]

المشكلةانو الواحد يكون اداري ومعلق ايات قرانية تحمل معاني التقوي ومراعاة الحقوق وعدم الظلم
ويعمل البلاوي البيتكلم عنها ابوبكر
تسلم اخي
بالمناسبة انت وين مختفي ليك مدة

موجود والله يا سودانية نار لكين الواحد عنده نفسيات من البشوفه وبسمعه كل يوم
يا سودانيةنار انحنا بنهدر في ثرواتنا بي ايادينا
مشكورة علي السؤال وياها دي المحرية فيك لأنك سودانية عظيمة وعزيزة .

[hesham aljamrey]

الصلاة والسلام على أشرف الأنبياء والمرسلين سيدنا محمد وعلى آله وصحبه أجمعين
أخو السارة
مين أين أحضرت جريمة هذه
أسمي هشام الجمري
بالرغم من أن اسم أبوبكر للصحابي الجليل الصديق ورفيق رسول الله ( ص ) وأول من أسلم من الرجال وأول الخلفاء الراشدين ,,,,ألخ
إلا أنا جميع أصدقاء باسم ابوبكر بلاوي .. مع إحترامي لك ( أبوبكر سيد أحمد - أبوبكر عبد القادر - أبوبكر حسن - أبوبكر دفع الله _ أبوبكر أحمد )
والظاهر سوف أضيفك للقائمة أذا كان أبوبكر أسمك الحقيقي -
أتمني أن أتعرف بشخصكم الكريم اكثر.
heshamhessen@hotmail.com

[ابوبكر]

معليش يا ابو الشوش الظاهر اني قريت السم غلط ، عموماً ما تزعل وبيسعدني كتير معرفتك وصداقتك وإنشاء الله نتواصل اكتر عبر الايميل .

[ابوبكر]

الواحد يلقى نفسه مضطر يرجع تاني ويكتب في ذات الموضوع بالرغم من انه الصورة الضبابية الفائته لسع ما انقشعت من قدام عينين الزول وفجاءة وبدون مقدمات تداهمه صورة تانية ويحبطه واقع حاصل من سوء الإدارة انا لا اتكلم عن الهياكل وتنظيماتها انما اتكلم عن سوء استعمال الافراد لسلطاتهم الإدارية اليوم سمعنا عن اضراب عمال المستشفيات الحكومية والمراكز الصحية والسبب هو تاخر المرتبات تخيلوا معي مرفق حيوي وهام مثل هذه المرافق كيف تتأخر المرتبات بالرغم من ضالتها وعدم كفاية العامل المسكين لحاجاته المعيشية برضو تتأخر ، طيب ياخي دا ما قصور إداري ، طيب القروش الي بدخله المستشفيات والمراكز دي بتروح وين ، والقطع فيها شديد خلاص .

[ابوبكر]

يا ترى هل في واحد منكم جرب يوم طعم الظلم في العمل بواسطة محاباة أو قرار تعسفي وهل فقدت جزء من حقوقك بواسطنة الدهنسة والدهلسة والأنانية عند بعض الزملاء .
انا جربت ده وطعم العلقم لسع في حلقي والمشكلة الكبيرة اني ما بقدر اسكت وبشوف دي حقارة عديل وبواجها وما بخاف من العواقب .
المفروض أنو ينقلوني او يعني اتكلوني في أي حته مهمشة ، لكين الحاصل اني قاعد في مكاني وما عارف السبب شنو ، أنا عملي ده بأديه وما بخلي فيه ثغرة لكين التصرفات زادت عن حدها وبقت كتيرة .
وما عارف كيف اتعايش مع الوسط الي أنا فيهو ؟
هل ابقى انسان خاضع ؟ أم استعمل اسلوب الدهلزة واكون زي الباقين .
واقتل الحقيقة الوحيدة فيني وهي كرامتي ؟
وامشي مشوار الثعالب واكون فرد في القطيع ؟

[ابوبكر]

ونستمر برضه في مشوار الظلم الغداري والفساد الإداري ودولة السكرتيرات والقيادات الوسيطة التي تتحكم في اقوات صغار الموظفين الذين يعانون اصلاً من ظلم الحياة ومن القهر والكبت ، قصة حقيقية شفايفها بعينيه وعايشه باحساسي ، اعضاء مكتب كامل يتاثروا مالياً نتيجة لخلافات وحزازات بين واحد من افراد المكتب ومدير عام الشئون المالية والإدارية تؤدي لوقف استحقاقاتهم المالية لمدة اربعة شهور متوالية ومدير مكتبهم غافل لأنه استحقاقاته هو بتطلع والباقين بتعللوا ليهم بان الوضع المالي للمؤسسة غير مستقر والكشوفات نازلة الخزنة يومياً وبالملايين وصرف علي الفاضي عربات تمشي العفريته كل اسبوع بغرض الوجاهة وحتى نوعية العربات زاتها تعال شوفها مدير في الدرجة الثالثة او الرابعة تلقاهو راكب كامري وله كورلا وله كرونا اخر موديل واجهزة السي دي والمسجلات الحديثة تقول بق والفاتورة قيمتها دبل وبعد ده كله ياريت لو بدوا الناس حقوقهم سريع يجرجروا ليك ناس الورشة واصحاب العمل الي قاموا بالصيانة للمؤسسة لحدي ما روحم تتطلع وبعد داك يقسطوا ليهم المبلغ وهم مغلوبين علي امرهم والقروش كلها رايحة في جهات محدودة تقول هم بس الي بشتغلوا في المؤسسة .
المسئول الكبير صدق لمجموعة بمبلغ تحفيزاً ليهم لجهدهم معاه خلال سنة كاملة من العمل المتواصل اتخيلوا انو قروش الناس الكبار طلعت والصغار قالوا ليهم لحين ميسرة ، هم لو مالقوا حقهم في وقت ضيقهم تاني دايرين بيهو شنو مع ملاحظة انو بند العلاج في هذه المؤسسة والذي يتم استقطاعه من رواتب العاملين متوقف وقروش بتمشي وين الله اعلم ، صندوق الدعم الإجتماعي يستقطع برضو من المرتبات وبدعم في شنو ؟ الله يعلم ، بعرف واحد من العمال زوجته وضعت وحسب اللائحة بتاعت الصندوق من المقرر انو يصرفوا ليهو مبلغ 250.000 جنيه ( بالقديم طبعاً) والشئ المعروف ان ده حقه الي بيستقطعوه من مرتبه ووصلت بيه الحالة الى درجة القهر والحرقة الشديدة .
والله غايته ظلم وفساد اداري كبير جداً حاصل في مؤسسات بلدنا دي .
يارب متين يترفع عن كاهل البسطاء هذا الظلم .

[asool22]

صدقت والله والتغيير كبير ومشين هسي بقينا ما قادرين نفرز مين الصاح ومين الطالح
دي بقت صاطح والكل مسطح وزمن السودان بقى صعب وقصص الهلاك تبكي الكافر !!!.

[ابوبكر]

صدقت والله والتغيير كبير ومشين هسي بقينا ما قادرين نفرز مين الصاح ومين الطالح
دي بقت صاطح والكل مسطح وزمن السودان بقى صعب وقصص الهلاك تبكي الكافر !!!.

صدقت يا asool22 والواحد مهما اتكلم وعبر ما بقدر يوصف الحالة الحقيقية الحاصلة مثلاً واحد مدير لإدارة التدريب طبعاً الكورسات موجهة ومحصورة في جهات معينة حسب العلاقات الشخصية وياريت لو بستفيدوا منها وبعض الفرص بتروح ساي لأنه السيد/ المدير ما قام بواجبه بالرغم من انه هذه الفرص اغلبها مجانية فاتخيل معاي كم من الفرص بتروح علي السودان نتيجة لعبث هذا المدير وامثاله مرة واحده من الموظفات مشت ليه وقالت ليه ياخي دايره اطلع لي كورس عشان احسن من مؤهلاتي فاتخيل قال ليها شنو ؟ اكتبي لي جواب غرامي وبعد ما عملت كده طلعت طوالي الكورس ، ده كله حاصل لكن بالطبع ما ممكن ننسى انو في مدراء قامات وبيخافوا الله وهم بيمثلوا الأمل المضئ الي الواحد ممكن يتشبس بيه ويصبر عليه ويكون عنده شوية امل في مستقبل جديد.
شكراً لمرورك وتقبل تقديري واحترامي

[ابوبكر]

الصرف المالي في المناسبات الخاصة وتسخير موارد المؤسسة لخدمة المصالح الشخصية بدون وجه حق بقى صفة عامة موجود في كل المرافق بدون أي استثناءات الا من رحم ربي الصرف على المآتم والأفراح من المال العام ، ما الحكاية كلها جرت قلم والباقي بقوموا بيها الجماعة من مدراء مكاتب وصولاً لي مدير الحسابات وهلم جرا والأرصدة في البنوك تتضخم وتزيد ..... وتزيد !!!!!!!!!!!!والعامل البسيط يغرق في الديون اتراحه وافراحه واحد مافي اي جهة تواسيهو او تاخد بيده ،،،الوكلاء والمدراء يخصون من هو من جماعتهم يغدقون عليه بالأموال والهبات والبعض منا يتجرع مرارات الظلم .

[ابوبكر]

وبرضه المشوار مستمر حتى انو سمة الفساد اصبحت غالبة علي كل شئ في مؤسساتنا . وين الضمير الحي ؟ وين الأمانة ؟ وين الخوف من الله ؟ كلها تساؤلات بقت ما بتأثر في الناس لأنه جزوة الشرف والأمانة في قلوبهم ماتت ولأنهم نسوا الله فانساهم أنفسهم .

[امال الناس]

[frame="7 80"]تختلف المسميات والمعطيات لكنها تحمل معنى واحد سوء الإدارة او سوء استخدام السلطات الإدارية في السودان اصبح شئً مروعاً ، يجب الوقوف عنده والتامل قليلاً في عواقب الوضع الحالي من فساد إداري وسوء في استغلال السلطات الغدارية الممنوحة بموجب الوظيفة او التعيين .
ولنمسك اي وزارة او مؤسسة في السودان ونتعمق داخل اداراتها نجد ان إدارات عامة كثيرة تدار بصورة دكتاتورية بحجة مسمى التسلسل الوظيفي او الهرم الوظيفي او الهيكل الوظيفي وحسب كلام اهل علم الإدارة انو هذه الهياكل أوجدت للتمكين من اتخاذ القرار المناسب وتهيئة بيئة العمل المناسبة حتى يكون القرار المتخذ سليماً ومعافى .
لكن مدراءنا العامين في السودان يسعون دوماً وراء مكاسبهم الشخصية من حوافز وبدلات ولجان حتى ان البعض منهم لا يصدق بحافز ان لم يكن اسمه ضمن كشف المستحقين لذلك الحافز حتى أصبح ذلك عرفاً متبع في كثير من المؤسسات لو أردت ان يتم التصديق لك بسرعة فيجب ان تضمن أسم مدير عام الشئون المالية والإدارية ومدير الحسابات في كشف الحوافز والا فعليه السلام .
بعض الإدارات تديرها السكرتيرات ، تخيلوا معي إدارات كاملة تمثل السكرتيرة فيها دور المدير بما تمليه عليه من قرارات وهو ينصاع مطيعاً لها من دون ابراز شخصيته او اي اسباب اخرى تخيلوا مدير مثل هذا ما الذي يمكن ان يصدر منه ، عفواً اقصد من سكرتيرته .
لا شك انه ستقرب فئة وتستهلك فئة وتستبعد فئة وهناك فئة ليس لهم الحق اصلاً في مقابلة المدير لن السكرتيرة لا يعجبها منظرهم او غير مستساقين لها او دمهم تقيل علي قلبها .
يا جماعة والله ده كلو حاصل في مؤسساتنا فوروني وين الحق ووين العدل ووين الناس القلبم علي البلد دي. [/frame]

السلام عليكم ورحمة الله وبركاته يا ابو بكر وكل سنة وانت طيب اولاً الادارة تحتاج للشخصية القوية واي ادارة مديرها شخصيته غير قوية صدقني ما بتمشي لقدام وحتي العمال والمؤظفين يقولوا ليك ياخي سيبك منه بالله ده مدير ما عنده شخصية وزول سلبي ولكن المدير ذو الشخصية القوية وبهابوا كل العاملين بقولو عليهو دكتاتوري يا خونا العلاقات الشخصية والاخوية دي غيرالعملية يعني نحنا بدل نشوف لمديرنا عذر نقول ليهو دكتاتوري لا والله ما بصح . بعدين حكاية الحوافز يا خونا هو زول بديركم وشايل همومك المالية والادارية عازين تاخدوا الحوافز وهو لا ما بصح وده حتي حرام والبسكت علي الحق شيطان اخرس ولا شنو قلتوا بعدين السكرتيرات مالك معاهم يا ابو بكر ديل روح المؤسسات والوزارات بالمناسبة حقوا يطلقوا عليهم اسم المدير التنفيذي لمكتب المدير او العميد عارف ليه لانهم حافظين كل الاسرار المكتبية وهن علي عتقهم ما علي المدير نفسه في تجهيز الاجتماعات ومواعد المدير والزوار والطباعة والسيرك والتلفونات والي ...................الخ حقو نشكرهم بدل نقول عليهم كدة وربنا هو العليم بما في الصدور ودمت مع احترامي وودي

[ابوبكر]

[frame="2 80"]والله يا امال الناس الظاهر عليك ما عايشه الواقع الفي مؤسساتنا وله انسانة بريئة جداً .

اي انسان ربنا سبحانه وتعالى انعم عليه بنعمة العمل في موقع او مرفق وعزب في موقعه ده الناس يتأكد تماماً انو يوم القيامة مسئول وحا يحاسب وأي واحد اخد انشاء الله قرش واحد بدون وجه حق محاسب عليه .

بعدين حكاية اسماء المدراء في كشوفات الحوافز والمبالغ الخرافية الي بياخدوها دي شبنة والله في حقهم .بالمناسبة ناس مجلس الوزراء عندهم حاجة كده اسمها اورنيك ابراء ذمة بيجيبوهو للوزراء ووزراء الدولة قبل ما يتولى الوزارة ويبدؤوا عملهم فيها . ياريت الكلام ده لو يطبق علي كل المدراء وناس الأمن الإقتصادي وناس المباحث يتحركوا اكتر ويسالوا الناس ديل كل سنة جبتوا القروش دي من وين . وياريت لوكل واحد حاسب نفسو وبقوى عندو ضمير واتذكر الله وتاب .


واخيراً اختنا امال الناس بذكرك بمعنى حديث الرسول صلى الله عليه وسلم (امير القوم خادمهم)

وشكراً ليك علي المرور ،،،،[/frame]

[ابوبكر]

اجد نفسي مضطراً للعودة للموضوع القديم الجديد .... واريد منكم أن تلاحظوا معي أن كل مؤسسة سودانية بتقدم خدمة للجمهور اصبحت مرتع للسماسرة وكل مؤسسة قدامها ارتال من السماسرة (شجرة) وبقت سوق وتجارة عديل بل أن السماسرة بقوا شلل وجماعات وطبعاً عندهم علاقات بداخل المؤسسات ومسئولينا بيتحدثوا عن محاربة الظاهرة دي وهم الي بيديروها .