إحساسك ..... شنو ؟؟؟

[الملثم]

ما هو إحساسك
لما زول بتعرفو يحب حبيبتك
بي وراك
و لمن تلاقيهو يبدأ يشرح عن
هواهو الكان هواك؟؟؟؟؟؟؟؟

أعز شيء أن تكون صلباً و قادراً
على تحمل ضغوط الآخرين عليك
حتى تستطيع أن تتخز قراراتك الصارمة
و بكل ذكاء.

و أنا حبيت أكون إنسان مكون من ملامح زولة
تكون علي مسامات الشجون شان تنسد و ما تنوح
زولة أكونا و أكون ظنونا
ماتكون حلوة و لا جميلة
بس بتمرق من وجع حزن المسافة
لكين أقدار الزمان حجبت مداخل تلك
الإنسانة لتميل عن دروب حبي
التي بنيتها بأفراح براكين المشاعر
و جعلتها إمبراطورية تحيا بإسم الحب
و الكيان المحب, و للأسف تركتني وحيداً
لا تجاوب و لا مجاوب......
و لكنني إتخذت القرار الصائب.....

آخر قرار

آخر قرار إني ما أتذكرك
لا أحن ليك لا حتى أمشي في سكتك
و إني ما أعشم أشوفك لا مشيتك لا بسمتك
و أشيلو ريدك من حنايا الجوف
و أعيش متوسد الآهة البقت من فرقتك
يالسمحة النورا منو القمر في يوم خشع
كنتِ لي فرحة قلب فيهو الغرام دوبو إنتشى
أحلام منام أنا منها
سكة سفر كان الحزن ما بعرفا
يالغصتِي فيني حنين أمل
ريدة و كمان لمحة بصر
اتذكري رغم الصعاب
إني في دربك مشيت و وصلت ليك
لكين عيونك لي جفن
و أبعدت ظن فرقة عيونك و أبقى تايه في المحن
إلا قلبك خان عهود الريد زمن
* * *
يا لحن وتر الموسيقى
و بهجة أحرف علي سطور أجمل قصيدة
آخر قرار .... بالغلط سيرتك وحاتك ما بجيبا
كنتِ لي نجمات تغازل في القمر عز الخريف
قطرات دعاش فاقت خيال الاندهاش
و قعدة صفاء فيها سيرتك محور الناس في النقاش
لكين حمم نيران صدودك فرقت ما بين حنين ريدي و فؤادو
و ما بين حنينك و سكة الريد المشيتا
نسمات تمايل في الزهور
و عطور تفوح ذي البخور
* * *
و في الساعة ديك لما القرار أصبح مهرول بين ذكرة
عيونك و البعاد
كلمت قلبي عن العذاب الكان ملازمو زمن طويل
إلا قلبي اللحظة ديك قال: يا حنين أصدر قرارك
و ما تكون عايش علي نار الاحتمال
و خلينا نبعد من أسى الريدة و نعيش في دنيا تعرف قدرنا
و تقييم الحب بالحنان ... ما تبقى ظالمة تذمنا
دنيا فيها الريد كمان شوق و إشتياق
تسأل علينا وبي إيديها تضمنا
و يا وطن ما شفت فيهو بلا العذاب
قعدت يوم متردد أبكي علي الفراق
و في النهاية عايذك إنتِ تعرفي حاجة
إنو ريدك هو البداية
و إنو جرحي لسة ساكن في الحنايا
و أصدرت ليك آخر قرار
إني ما أتذكرك لا حتى أسمع ضحكتك
و إني امشي وحيد حزين
أحسن كتير من تاني أسلك سكتك......ز

[ابوالدهب]

كلماتك معبره وحزنك علي محبوبتك حزن نبيل و اقول ليك انت انسان طيب القلب ولكن غير متمسك بما تريد لابد من الوضوع ونيل ما اردت عنوتا وان تخطط وتنفذ لامجال للانتظار وانصح كل العشاق الا يتوانوا في الظهور لمن احبوا بكل ما اوتوا من قوه لكي لايتحسروا علي باقي اعمارهم والطرف الاخر كأنه لايعلم
ولك التحيه
هيا ابدع