السوق أب شدوووق ( حلمنتيش )

[محيسى]

[align=center]الليلة دة السوق اب شدوق بقّت نارو
فى الزيت والبصل فى لحمتو وفى خضارو
فى الجار العزيز اتحكمّت اقدارو
بس قول لى كيف الزول يمد لجارو ؟

السوق اب شدوق يا شمتان علّى وانا كاتم
ياخ امرك صار بضاعة تلبسنا ساعة وخاتم
الزول فى الفرح لو جابلو قفة طماطم
فى الجود والكرم بيكون سبق ناس حاتم

السوق اب شدوق آلمنا ازية
ياخ قرصتو فى الجيوب
زى قرصة الزردية
معقول يا صحاب
مابين صباح وعشية
فى كيساً صغير الزول يكب ماهية ؟

السوق اب شدوق مهما تزيدنا ازية
ياخ بقيت سلاح فى ايد بليدة غبية
لاكل القرض عزمنا النية

الليلة هاك اخبارو
فى كل الجهات تلقاهو
طالق نارو
كيف يا اخوانا نحمى
لهيب اسعارو
والفلس اللعين
فى راسى فرررر
فرارو

السوق اب شدووق يا اخوانا شوفو ازيتو
من يوم حرروهو واخد حريتو
اتجّرس فقيرنا وقام حرد ماهيتو
اتحرقت سلوكو وطرشقت أٌميّتو [/align]

[شـهد الكلامـ]

اخوى اضحكتنى اضحك الله سنك

ياريت تواصل لينا فى الحلمنتيش محتاجييين ليو فى المنتدى قد نقسم ليو قسم معين حاليا اجتهد معاى وبنثبت البوست دا ويبقى للحلمنتيش

بانتظارك اذا عندك قدرات تجمع او تكتب حلمنتيش

[احسان]

بصراحة شعر حلمنتيشى حلو شديد وبيضحك كمان
شكرك على البوست الجميل والمشاركة الاجمل

[حافظ عوض الله محمد]

العرس العرس
نويت العرس
ياابو فاطنه هوى تجيب القرش
ومافى طريقة مع النسيبة
ودى مصيبه
احسن تسيبه
سيب الهترشه والهضريب
وكلو واحد ليهو نصيب
والراجل راجل
مش بالجيب
مش مهم مهم البيت
كان قطيه وكان راكوبة
وكان برنده جنب حبوبه
تعرس واحده تكون يادوبه
لطيفة ظريفة
كمان محبوبه
تغير حالك وتقلب هوبه
ابدا ابدا ماتحلم
اقفل خشمك انت انطم
ابعد ابعد روح اتلم
قبل مايزعمطو راسك ويكب الدم
وتجيك نسيبتك المسخوطه
تحلف قاسمه ماتخش بيتها
الا بشنطه قدر الحيطه
وتعمل بارتى وتعمل زيطة
وتعمل حفله فى كل ليله
وبالحفلات يطول السهر
وبالدولار تجيب المهر
تمشى اوربا تقفل شهر
ومن ماتصل من شهر العسل
يسقط بطل اه الحصل
ده العريس فصل
ابدا ابدا ماينفعش
بنات الجامعة بايركس
بنات المكتب بايركس
بنات المنتدى بايركس
اما الجكس اكتر شى
وده كلو منك يانحسى
اريتك انتى بالتاكسى
يدوسك لورى بالعكسى
يرطرط عضمك وتنبرشى