ريحة الدعاش أسامة تاج السر

[مي نور]

حرَّك صهيل خيلك غناي
يا بت مناي
يا مارقة ذي نغَمة شجن
من عمق ناي
يا باسقة ذي شجر النخيل
يا رعشة في نقر الأصابع
وواحة في عز الهجيرْ
من بسمتك
خجلت جميع المفردات
لامن أقيف قدام عيونك
جد بيغلبني الكلام
ببقي قدامك صنم
خاشع وبحلف للجميعْ
ما في زيِّك ومستحيلْ

إنت دنياي لما أهرب
من مخالب الواقع المخزي المخيفْ
والدنيا كلها دون عيونك
فصل صيفْ
والناس عطاش
وإنت ذي ريحة الدعاش
لي زول بيحلم بالخريفْ

اشتقت ليك
يا بت بلا الخدرة الدقاق
مزروعة في بطن الجروف
والشوق طمح
ماليني خوف
وانا بيك ماليني الفرح
رغم الظروف

بتذكرك
لما الشمس
ذرفت دموع الشوق وداع
ساعة الرحيل
والكون لِبس طعم الضياع
الساعة ديك
غالطني فيك لون الأصيل
خطوك بلا مشي القطا المقرون
دقاق
لكين تقيل
فاطرك يلا القِبلي الشلع
وغمامو شايل
ياما شيل

اشتقت ليك
واشتقت للقهوة البِكِر
في الضحوة
في الراكوبة
في الضل الحنون
البن بلا الشعرالمسبسب منسدل
مليان بلا وتر الكمان
وكتين يرسِّل في اللحون

اشتقت ليك
والريف امان
رغم الظروف
النتاس بتفرح بالضيوف
وعيونا ينبوع من حنان
وكمان بتتفقَّد بعض
عم فلان يا ناس مريض
والناس تمِش
ناس قعادن عنقريب
ناس في البنابر والبرش
وكمان تساعد في بعض
يا ناس فلان عامل نفير
والناس تمش
لا مقاولة
لا قِرش
ما الخير بعم كل الفريق
ما الكل
اهل
والكل صديق

يا حليلا أيام الفرح
وحليلا ايامنا الزمان
كنا ذي نجمين قراب
والحب بيدينا المان
وكبرت يا شمس الفرح
ورحلت لي أبعد مكان

شايفك وما قادر اطولك ياغناي
يا بت مناي
يا مارقة ذي نغمة شجن
من عمق ناي
اشتقت ليك