هذه الاشياء فقط في السودان

[الحزن النبيل وبس]

[frame="1 80"]«®°·.¸.•°°·.¸¸.•°°·.¸.•°®»[align=center]لو........ وان لو تفتح عمل الشيطان

سوداني عجيب قال الكلام الحاصل قلت
انقلو ليكم ..ولانها الحقيقة

لو ولو ولو ولو ولو
لو بحثت عن خط (عبور مشاة) أو (أمامك مدرسة) أو(منحنى) فى كل (العاصمة) ولم تجده ...تبقى أكيد فى السودان
*****
لو إنت فى بلد فيهو سنه سابعة وسنة تامنه ابتدائى… تبقى أنت أكيد فى السودان
*****
لو طالعت إعلانات لشركات (مسئول) كبير وهو لا زال (فى الخدمة)… تبقى أنت
أكيد فى السودان
*****
لو (لبد) ليك شرطى (مرور) فى نهاية شارع (إتجاه واحد) وخلاك لمن دخلت وجاك بى (دفتر إيصالاتو)… تبقى أنت أكيد في السودان
*****
لو لقيت فى بلد ما فيهو (معينات البحث العلمى) وكل يوم الجامعات تناقش(خمسين) رسالة دكتوراة و(ميتين) رسالة (ماجستير)... تبقى أنت أكيد فى السودان
*****
لو أنت في بلد وزارة الصحة فيهو قالت (الدواء) ده (فاسد) أحظروهو .. وبعد شويه قالت (ما فاسد) خلوهو .. وبعد شويتين قالت (فاسد) أمنعوهو …. تبقى أنت أكيد في السودان
*****
لو لقيت فى بلد (الصحف) بتتقفل بى (مادة) فى القانون (معموله للمطاعم) …تبقى أنت أكيد فى السودان
*****
لما تلاقى الترزي كاتب على باب المحل بتاعو آية بتقول ( وفصلنا كل شئ تفصيلا) صدق الله العظيم … تبقى أنت أكيد في السودان
*****
لما تخلص موضوع فى مكان ما، وتجى تركب عربيتك وتلاقى (المساحات) مرفوعه عشان تعرف على طول انو فى واحد مسحها ليك وح ياخد منك واحد جنيه … تبقى أنت أكيد فى السودان
*****
لو قرأت الصحف فى 1987 أو فى 2016 عن (إنتهاء قطوعات) الكهرباء ولقيت نفس الكلام فى صيف 2030 … تبقى أنت أكيد فى السودان
*****
لو زوجة الوزير مليانة دهب بتتجدع بيه بالعلن في الشارع من غير حساب وأطفالها بيملطشوا اولاد الجيران... تبقى أكيد إنت في السودان
*****
لو أهم (كبرى) فى عاصمة البلد صيانتو عاوزة ليها (سنتين)… تبقى أنت أكيد فى السودان
*****
لو بهدلوك في اي مكان واشتكيت للشرطة قالوا دا مش اختصاصنا امشي اشتكي في الثروة الحيوانية ... تبقى أكيد أنت في السودان
*****
لو لقيت أنو وزارة الداخلية عندها مؤسسات (تعليمية) ووزارة التعليم عندها مؤسسات (صحية) ووزارة الصحة عندها (شركات إنشائية)… تبقى أنت أكيد فى السودان
*****
لو دخلت (الوزارة) وأنت مؤجر في (زقلونا) وطلعت وعندك عمارتين في (قاردن سيتى )..تبقى أنت أكيد في السودان
*****
لو اشتغلت في الخدمة المدنية 30 سنه وأدوك معاش شهرى يساوى 6 كيلو لحمة ...تبقى أنت أكيد فى السودان
*****
لو توقفت (الحركة) إثناء ساعات (الذروة) وإكتشفت أن السبب (كشه)... تبقى أنت أكيد فى السودان
*****
لو عدمت (التعريفة) وكمان دخلت فى (ديون) للإيفاء بنفقات (فراش) قريبك الذى توفى إلى رحمة الله... تبقى أنت أكيد فى السودان
*****
لو وجدت أن (ترخيص عربتك) يساوى (ربع) قيمتها …. تبقى أنت أكيد فى السودان
*****
لو تقدم إبنك (المهندس) لشغل وظيفة وكان (الإنترفيو) عن (صلاة الجنازة)... تبقى أنت أكيد فى السودان
*****
لو (فجأة) إكتشف (المسئولون) أن (الخريف) على الأبواب)... تبقى أنت أكيد فى السودان
*****
لو عندك (الكلية) اليمين متعطلة وعاوزين يشيلوها ليك قامو (إستأصوا) الشمال السليمة لأنو الدكتور كان ماسك الأشعة (بالمقلوب)... تبقى أنت أكيد فى السودان
*****
لو مكث (مرتبك) معك (تلاته ساعات وإطناشر دقيقة) هى الفترة من لحظة إستلامه من الصراف إلى حين عودتك للمنزل... تبقى أنت أكيد فى السودان
*****
لو فاز فريقك الذى تشجعه على الفريق الخصم فى مباراة الذهاب 8/صفر وخسر فى مباراة الإياب 12/صفر…. تبقى أنت أكيد فى السودان
*****
لو لقيت لوري التراب وكومر البلدية من سنة 50 شغال بالاضافة للركشة في نفس الشارع... تبقى اكيد انت فى السودان
*****
لو وجدت أن رؤساء (الأحزاب) هم (رؤساء) مدى الحياة... تبقى أنت أكيد فى السودان
*****
لو وجدت أن نسبة الفقر تزداد بإزدياد (معدل النمو تبع الحكومة) …. تبقى أنت أكيد فى السودان
*****
لو ضربتك عربية حكومة و مشيت القسم و طلعتا انت الغلطان... تبقى اكيد انت في السودان
*****
لو خشيت مؤسسة حكومية ولقيت الموظفين مافي اثناء الدوام.. تبقى اكيد انت في السودان
*****
لو طلعت مستحمي و متريح وماشي عرس و دخلت العرس زي الكأنك كنت بتلعب كورة... تبقى انت اكيد و اكيد في السودان
*****

لو ماشي مشوار 20 كيلو متر و وصلتا في 4 ساعات... تبقى انت اكيد في السودان
*****

لو لقيت مطعم وقدامو دورات مياه... تبقى اكيد انت في السودان
*****

لو مشيت الحوادث و قالو ليك لو (عندك رصيد اضرب للدكتور لانو نايم)... تبقى انت اكيد في السودان
*****

لو شغال في السوق و قالو ليك ادفع ضريبة ميزان ... تبقى اكيد انت في السودان
*****

لو لقيت اجنبي وعواطلىو عندو صلاحية اكتر منك و الناس كلها تحترمو... تبقى انت اكيد في السودان
*****

لو اعلنو عن 3000 وظيفة و مشيت تقدم في اليوم الاول و قالو ليك (تعال بكرة لانو لجنة المعاينة ما اكتملت) و جيت تاني يوم و لقيت التقديم قفل... تبقى انت اكيد في السودان
*****

لو لقيت حي ساكن فيهو مسؤول كبير و الكهرباء فيهو ما بتقطع نهائى... تبقى اكيد انت في السودان
*****

لو محتاج حاجة و لقيت اقرب حتة تجيبا منها على بعد 3 كيلو متر... تبقى اكيد انت في السودان
*****
لوقريت الكلام دا وما علقتا ولا جنيت وكنت بارد شديد ومستسلم... تبقى أكيد أنت من السودان
*****
ولو ما مرت بيك اي حاجة من الفوق دي... تبقى اكيد انت ما من السودان
__________________[/align]«®°·.¸.•°°·.¸¸.•°°·.¸.•°®»[/size][/frame]

[emad ahmed]

] الكلام ده كتبتو واحدة سودانية متأمركة ( يعنى عايشة فى امريكا )

بمنتدى سودانيزاون لاين

وردوا عليها رد شاااافى وبعدها حردت المنتدى [/size]

[هوبة]

تسلم اناملك ياالحزن النبيل ,,,,,,,,
والله يهدي الكاتبة دي
المفروض فخرها يكون وطنها
وشكرا ليك يا عماد على المعلومة

تقبلوا مرووووووووووري يا مبدعين

[البوسنوى]

القال ليك منو ما حاصل, واكتر كمان....
تقبل مرورى يارائع...
الله يصلح بلدنا

[الحزن النبيل وبس]

شكراَ علي مروركم الطيب

[السودانى الاصيل]

الحزن النبيل وبس
هذه البوستات من فتاة مسيحيه وكتاباتها معروفه وضد السودان
فهل يا اخى من كل البوستات الجميله وجدت ان تنقل وتنشر مثل هذا الكلام
ان كنت لا تحب السودان فارجو ان تراعى لمشاعرنا وانا شخصيا تالمت جدا
من هذا البوست لانه يذكر اشياء وناخوذه سطحيه والسودان فيه اشياء مستحيل توجد
فى اغنى دوله فى العالم وفيه ناس مستحيل يوجدوا فى اى دوله فى العالم
ونحن نفخر بالسودان وحبه يجرى فى دماءنا
نصيحه من اخوك الكبير لا تتبع من يظهر مثل هذه الاشياء عن بلدك
ولو اخذناها واحده واحده لوجدنا لكل منها ظروف خاصه به
فارجو منك ان تعمل لعكس الصوره الجميله عن البلد الذى اتولدت فيه واهلك فيه فانا
متاكد لو جاء اجنبى واخذ هذا البوست من هنا وقال لك انت سودانى تقول نعم وانهال
اساءة فى السودان وقد حفظ ما كتبت ما هو ردك حينها

[gadora_968]

أما آن للناس أن تفوق
ياأخي الكريم أرجو أن تغرس في نفوس السودانيين حب السودان أكثر فأكثر
بدل من أن تقول مثل هذا الكلام . وشكرا

[الحزن النبيل وبس]

«®°·.¸.•°°·.¸¸.•°°·.¸.•°®»السلام عليكم
الاخ العزيز السودانى الاصيل
السؤال يا عزيزي الغالي ما نوع حبك ؟؟؟
ان كان حبك له علاقة بالحكم القائم في وطننا الحبيب فليس ما اجاوبك عليه.....

واذا كان حبك للوطن للحب والعشق النبيل فانا مقتول مثلك
تماما في حبه فقط ثمة اختلاف بيني وبينك في درجة الحب
فانا الاحظ من كتاباتك بانك تحب الوطن حب اعمي
وهو ما يحجب عن نظرك سلبيات الحبيب فليس هنالك وطن
بلا سلبيات ولا شعب بلا سلبيات ولا انسان بلا سلبيات

هنا تتمثل السلبية في الحب الاعمي وعدم رؤية السلبيات «®°·.¸.•°°·.¸¸.•°°·.¸.•°®»

[السودانى الاصيل]

الحزن النبيل وبس
حبى للوطن هو حب للبلد الذى ولدت فيه وحبى للاب الحنون الذى احتضننى
حتى كبرت وعلمنى من خيره حتى تعلمت الاساءه امام الملاء فبدات باساءته
تقديرا لما قام به من تربيه وتوفير الخير
انا حبى للوطن واتبرا ان يكون حبى للوطن مثلك كما تذكر فانت مقتول فعلا
ولكن ليست بحب الوطن بل مقتول من قبل اعداء الوطن
امثال الحاقده التى كتبت هذا المقال ولكن
انا لا انكر بل اشد ما يضر بلدنا هذا ليست الامريكان ولا اليهود بل ابناء الوطن
العاقيين فاحذر ان تكون منهم
وان كان حبى اعمى فهو اشد من ذلك وان كان لحبيبى سلبيات فسانظر فى كيف استطيع
حلها فهل وجدت انت ان تنقل كلام فاجره وتنشره بالشبكه العنكبوتيه هو حل
ارجو ان تراجع نفسك ولا استطيع ان اناديك بيا اخى حتى تتراجع عن هجومك لوطننا الحبيب
ولو اصريت فلن تضر شيئا فانت وغيرك من اعداء الوطن فلنحن من اولى بابادتهم
وانا يا لا انتمى لحكومه او حذب من ولادتى حتى كتابة هذه المرافعه ودفاعى عن الوطن ليس له
علاقه بدفاعى عن الحكومه فيجب ان تفرق بين الوطن والحكومه
ننتظر حذف البوست والاعتذار لشعب السودان وقبل ذلك حذف الافكار الخبيثه من راسك

[sunni]

الأعزاء،،،

هناك شيء واحد في السودان أسوأ من كل ما قلت يا عزيزي (الحزن النبيل وبس)،،، وهو أننا كسودانيين (وليس هذا بالكلام المطلق) ننظر دائما للجزء الفارغ من الكوب،، ونحن أمراء في الهجاء،،، ولكن قليلين منا من يساند الكلمة الطيبة، ومن ينظر للجزء المليان (وهو الأكبر) من الكوب عشان يشوف العيوب الفي محتوياته ويساعد في تنقيتها،، ويخلي دور تاني لي واحد تاني في البحث عن مصادر لملئ الجزء الفارغ بدل ما نتشدق ونستهزأ بفراغه،، مع إنه هذا الفراغ يعيبنا كلنا.

سؤالي لكل من يقول مثل هذا الكلام (أينما كان)، وبإفتراض ان كل ما قاله صحيح.
1. ما هو دورك في تصحيح هذا الوضع؟
2. بحكم إنك سوداني،، أكيد تعرف بعض من أسباب هذه الأزمة،، هل حدث لك أن ناقشته؟
3. هل ترى أن توادد السودانيين وتراحمهم،، ضعف يعيبهم؟ أم فخر يسمو بهم؟
4. أين الهدف؟؟ هل هو السودان؟؟ أم المواطن السوداني؟؟ وما الفرق بينهما؟
5. هل انت منتبه لأنه هناك إثنان لا ثالث لهما،، إما كونك من المصلحين،، أو انك ترس في آله الهدم.
6. هل انت مستعد لوضع يدك في يد من يخالفك الرأي إذا كان الهدف هو صالح البلد؟
والأسئلة كتير،،، قبل ما يحاول أي مننا إجابتها،، عليه الإجابة على السؤالين التاليين

1. هل انت إبن/ة عاق/ة؟
2. هل تتقي الله فيما تقول؟ فكل منا محاسب على ما يقول

يديكم العافية

[ملك زمانو]

يا جماعة الكلام ده صح مية في المية ,

[ملك زمانو]

طبعاً صحيح إلا:
لو طالعت إعلانات لشركات (مسئول) كبير وهو لا زال (فى الخدمة)

لو لقيت فى بلد ما فيهو (معينات البحث العلمى) وكل يوم الجامعات تناقش(خمسين) رسالة دكتوراة و(ميتين) رسالة (ماجستير)

لما تلاقى الترزي كاتب على باب المحل بتاعو آية بتقول ( وفصلنا كل شئ تفصيلا) صدق الله العظيم

لو بهدلوك في اي مكان واشتكيت للشرطة قالوا دا مش اختصاصنا امشي اشتكي في الثروة الحيوانية

وغيرو ....
والله يهدي الكتبوا لأن الكلام ده أغلبوا ما صحيح

[شمعة امل]

..........

[المقدام]

الى الاخوة والاخوات والى (( الحزن النبيل وبس )) والى (( السوداني الاصيل)) ، ما تخلوا الموضوع ده موضوع خلاف شخصي بينكم .كلنا مهما كان اخوان.


وفي موضوع البوست / كلنا سودانيين رضينا او ما رضينا ، والسلبيات وبصراحه كتيره في السودان ، مع وجود اللايجابيات طبعا .

وبكل صراحه المكتوب في البوست دا اغلبه صحيح ودا اللي شايفينه بعيوننا .

وكلنا بنحب السودان يكون احلا واحسن بلد في العالم . واليوم اللي يسألنا فيه غريب عن السودان بنقول: والله السودان احسن منه مافي :

وفي سؤال محيرني "" ليه في السودان الزول ما بيرتاح؟؟ والله تقول دي ما بلدك اي حاجه بتصعب ؟؟



وفي النهاية انا

[الحزن النبيل وبس]

والله مشششششششششششششششششششششششكور علي مرور الطيب من كل قلبي

[musa_it]

المهم جدا ان نستطيع ان نعي الفرق الحقيقي بين السودان الوطن والسودان الحكومه

[musa_it]

المهم جدا ان نستطيع ان نعي الفرق الحقيقي بين السودان الوطن والسودان الحكومه

[أبو أحمد]

يا جماعة الخير دة كلو حاصل و الله و أكتر كمان
و أنحنا كلنا سودانيين و بنحب بلدنا شديييييد

[الحزن النبيل وبس]

شكرأَ علي المرور الطيب

[gadora_968]

ياخ الكلام الأنت كتبتو دا بقول أنك مبسوط وأنك كتبتو

كان من الأحسن تكتب الكلام دا بصورة تاني

مثل
ياسودانيين تعالو شوفو الناس بتقول عن السودان شنو أرجو أن تناقشو هذا الموضوع و عرض الحلول لهذه .
يجماعة ما الذي نعملو نحن لحل المشكلة دي

واقتراحات لتعديل الوضع.
دا بس الكلام المفيد أما ان تتجه أنت في نفس التيار وأن تعرض هذا الموضوع
أرجو أن تتقبل مني هذا الكلم
[glint]تقبل تحياآآآتي العطرة[/glint]