قالت لي بحبك .. بنت آخر زمن !!

[M.Hadad]

ابو احمد للتعبير مليون طريقه وطريقه ممكن الواحده تعملها بس تكون متاكده انو دي الطريقه البيفهمها ولو غلبت ممكن تقولها صراحه
وبالمناسبه حتي الشاب لما يجي يقول كده للانسانه البيكن ليها المشاعر دي
بتكون حالتو حاله بس لانو المجتمع فرض انو هو اليقول وعشان ما عاوز يخسرها هو البيصرح
يبقي ما فيها حاجه لو هي عاوزه تحافظ علي الانسان الحبتو

[الشاعرة]

أنا ما بنصح أي وحدة تعترف بحبها لواحد إلا
لو كانت متأكدة إنو بحبها
مليار في المئة، والأنثى ذكية جدا وبتقدر تعرف
بسهولة.
بالنسبة لي أقول لواحد بحبك وهو ما بحبني يعني انتحار،
إن شاء الله ما أقوم بعده بصراحة يعني.
موش جهل مني، لكن الحب من طرف واحد، أنا ما بحس بيه أساسا.
الحب من طرف واحد كيف حيكتمل، يعني أنا أحب واحد ما بحبني،
وأجري عليه وأضمه وهو واقف لي زي الحيطة ويا ريدها مايلة.
لا ده عشم ابليس في الجنة،
الرجل بميل للمرأة الصعبة المنال، ده الأنا لاحظته.
بعدين يا أخي أبدأ إنت وقول بحبك، والباقي علي
والحكاية ما حكاية كرامة.

[queenfadwa]

بصراحة يا الشاعرة كلامك لخبطني في الأول كلامك ادى ايحاء انك موافقة انو هي تصرح لماتكون متأكدةانو هو كمان بيحبها مليار في المية,وجيتي في الآخر قلتي(بعدين يا أخي أبدأ إنت وقول بحبك، والباقي علي)

والحكاية ما حكاية كرامة.امال شنو؟حياء برضو؟ ولا بس عشان الناس اتعودت انو هو يبدأفابالتالي لو هيا بدأت هي تبقى خرقت العرف الجميل دا!!

(بالنسبة لي أقول لواحد بحبك وهو ما بحبني يعني انتحار،) دا فعلا صح ما دام انتي عارفة و متأكدة انو ما بيحبك فكدا كدا اعترافك ليهو لا هيقدم ولا هياخر و ما ليهو لازمة



(الرجل بميل للمرأة الصعبة المنال، ده الأنا لاحظته) فانتي بتفضلي انك تفضلى تحلمى باليوم اللي هايجى يقول ليك انو بيحبك,ولو ما جا؟؟فلنفرض انو ما عندو الجرأة,وانتى اللي عندك الجرأة هتتخلي عن حبك عشان فكرة زي دي ؟؟ يعني هي كلمة بسيطة بس اثرها كبير ممكن تخليكى تخسري انسان بيحبك او تكملي حياتك مع الانسان اللي انت اخترتيه مش العادة و العرف اختارو ليك.
فشوفي انتي و اختاري ؟؟

thanks a lot 4 passing on it

[الشاعرة]

أنا بقصد إنها لو كانت واثقة إنو بحبها مئة بالمئة
تقول ليه لو كانت حاسة إنو ما قادر يقولها لسبب أو لآخر
وأنا بوافقك في النقطة دي و أنا معاها، بغض النظر إذا كنت أنا حأعمل
كده ولا لا، لأنه التصرف ده حيكون حسب الموقف وفي الوقت المناسب.

"الرجل بحب المرأة صعبة المنال"
كل قصدي من الجملة دي، إنه الرجل بحب يسعى وراء المرأة ويتعب شويه،
في نوع من البنات بلاحقوا الشباب في أي مكان، الواحد منهم لو قبل أي ناحية
يلاقي نفس الوش في شغله قريب من سيارته
عند الكافيتيريا ووووو، الله وكيلك يخاف خوف.
أنا بفتكر إنه البت لو حبت واحد، ممكن تخليه يحبها وكل واحدة وأسلوبها.

وكلامك الأخير صحيح

[نفسيات]

الملكه فـــدوى من قمنا مافى بنت بترح بحبها الا لو كان لعب وما اكتر
لكن البنت لو حبت بجد ما بتقدر حتى تعاين فى عيون حبيبا
وانا راى انو البنت مهما بلغت من درجة الحب ما تبوح
لكن ممكن تلمح فى كلامها او الرسائل


thank u 4 this subject
jojo man wish 2 u everything good

[queenfadwa]

نفسيات يعني رايك انها لو صرحت تبقى بتلعب ,ولو بتحبه با لجد ولا حتى تعاين فيى عيونو.
دا تعقيد للمسائل ,و لو لمحت يبقى عادي ها . دا انا بشوفه لف و دوران وتعب ع الفاضي احسن انها تقول عشان تريح نفسها وتعرف طريقها .
thanks

[دعاش كردفان]

الأخوان و الأخوات /
دة موضوع جميل و مهم جداً جداً ... بس يا أخ حداد الموضوع دة الصراحة
فيهو مهمة أيوة .. لكن بعد ما الولد يبادر بالخطوة الأولى ... يعنى هو يبدا و
و هى تتم الباقى ... لكن حكاية إنو البنت هى التبدا بالخطوة الأولى دى ما
عندنا هنا فى السودان ... البنت لو ما بقت تقيلة قبل الزواج دى ما بتكون
سودانية مية المية عشان أهم حاجة فى بناتنا إنهم خجولات .

اختي الغالية / فدوى
لك التحيه ومشكوره كتير على الموضوع الرائع
انا مع الاخ ابو احمد فى رأيو لأنو احلى حاجه بتزين البنت
هو حياءها وصدقينى لو عملت البت شئ عكس طبيعتها وهى اللى بادرت اتخيل لى
حتحس انها محتقره نفسها وبرضو بتحس انها فقدت احترامها عندو
وانا بفتكر الكلمه دى ما من حق اى انسان بس ((الزوج)) هو صاحب الكلمه دى ما غيرو
وبكده احس انى جوهره قدامو وبحس بقيمتي وعزة نفسي
ومشكوره مره تانيه
وتقبلى مرورى
مع خالص تقديرى
اختك دعااااااااش

[ادروب كايرو]

((هل تعتبر هذه الفتاة جريئة عديمة الحياة .. ام انسانة تملك الحب روحها فوجدت البوح ملاذها !!))
اولاً الفرق شاسع بين الجرئة وانعدام الحياء دى نقطة دايرين نثبته اول الجرئة صفة ايجابية فى الرجل والمراة انعدام الحياء هو الشى السلبى فى الجنسين

ثانياً باقى لى فى ازدواجية فى المفاهيم كيف نكون مقتنعين بقيمة الحب وانه سمو بالارواح وانه ما مجرد كلمة ونقول انو البنت لمن تصرح باحبها بتكون قللت من نفسها وقدرها
التصريح بالحب ما مجرد كلمات تقال هو مشاعر واحاسيس بتنعكس على السلوك كلام ومواقف وردرود افعال وعمر التصريح باللفظ فى الحب ما بيقلل من المصرحِ ويرفع من المتلقى

التعبير بالكلام ما هوه الا اداة للتعبير منا من يجيد استخدامها ومنا من يتعزر عليه ان يعبر عن مشاعره بالكلام
يعنى انسان بيحب حب صادق حبه واضح فى نظراته فى همساته فى مواقفه وردود افعاله لكن جرئته ما انصفته انه يصرح بالكلام ويعد التصريح من المستحيلات لان طبيعته حتمت عدم قدرته على التصريح باللفظ

اعتقد ان ما من العدل اننا نجهض علاقة سامية ومشاعر بتنبئ بحياة مثاليه كلنا بنتمنها فقط لاننا بنتمسك بحق الولد بالتصريح وتمسك الفتاة بانتظار الفرج وحل عقدة اللسان
ونقعد نشوف منو القال ومنو السمع

[queenfadwa]

دعاش شكرا على مرورك



لو عملت البت شئ عكس طبيعتها وهى اللى بادرت اتخيل لى
حتحس انها محتقره نفسها وبرضو بتحس انها فقدت احترامها عندو

لأ خالص,لأنو لو هو فعلا بيحبها بس ما كان عندو الجرأة ما هيفكر بطريقة زي دي ويقللل من احترامها ,ولو هي كمان بتحبو seriously عمرها ما هتحتقر نفسها,لأن ما في سبب يخليها تعمل كدا,و هي ا هتكون غلطت في حق نفسها,زي ما إنو الحب ما عيب للبنت,كمان التصريح بيهو ما عيب,لانها بنى أدمة و بتحس و العاطفة عندها كبيرة.


بفتكر الكلمه دى ما من حق اى انسان بس ((الزوج)) هو صاحب الكلمه دى ما غيرو

هيا ما ماشة تطلب ايدو,بس هتعترف بحبها.بس الزوجة(المرأة) عندها مشاعر, و الرجل من حقو ان يسمع الكلمة من شريكة حياتو.

في الآخر انا بحترم رايك,و اسعدني مرورك

[king]

هل الحب من طرفين دا اولا وثانيايجب علي الشاب التاكد من ان الفتاه صادقه من ناحيه المشاعر ما يبقي حب بتاع مصلحه او هفوة عابره وثالثا الحب في راي يحس اكثر من ان يقال

[queenfadwa]

يا كنج ما هو لازم يكون من طرفين و الا ساعتها التصريح ما ليهو لازمة و هنا نقدر نقول انها قللت من نفسها لانو تصريحا لا هيودي ولا هيجيب

شكرا على مرورك

[هاميس النوبه]

السلام عليكم ورحمه الله وبركاته
اختى الغاليه
شكرا على ردك
بس ده راى الشخصى وانا مقتنعه بيه
تقبلى مرورى وشكرا

[زول دكتور]

بصراحة ...




أتمنى ان أسمعها منذ سبعة سنوات .....لكن بصدق ..


فقد سمعتها كثيرا ..لكن بكذب ونفاق !