موسوعة الشعر الشايقى

[ودعلبوب]

يديك العافية وشكرا على مروركم الذى يمنحنى الدافع لمزيد من العطاء

[شـهد الكلامـ]

امــــــــــــــــــــــــــــى

ياكلمة لاتحتاج الى تفسير

هكذا عرفتك قبل كل كلمه نطقتك بلا فهم

هكذا كانت بدايتى مع الكلمات

ان قلت امى بالفطره

امـــــــــــــــــــــــــى ادمنتك بحبــــــــــــــــــى

اتمنـــــــــــــــى ان افنى قبلك كى لا افنـــــــــــــــى بعدك قهرااااااا

التحيه لامهات بلادى

والرحمه لمن رحلووو عنا الى دار الرحمه باذن الله

وربنا يرحمهم كلهم حييين وميييتين

ابنتكم : شـــــهد الكــلامـــ

[عمران عوض]

عوده لشعر الشايقيه

رضعتك في لبي الامات
ود بادي

رضعتك في لبي الامات
وشلتك زفة في البيشان
وفي اللمات نميتك غني وأنات
هسع وفي صباي الفات
وهزيتك نصايص الليل بوارق والذكر تهليل
وشلتك فوق عواسي الخيل
مجرتق والرقاب شارفات
واريدك ياعزيز الشأن واناديبك
ونادهك في البلاد سودان اهاتيبك
وكاتمك في الفؤاد اشجان الاهيبك
وشايلك في الكتف نيشان اباهيبك
واناديبك واهاتيبك واباهيبك والاهيبك
مولقدة في لهاليبك
وشلتك لوح ادون في نورات الفجر
اتهجأ في الاخلاص
وارتل لوح ونسماتا دغيش بتفوح
تتاوق في رواكيب الفريق
تنكب تدلق في النفوس الروح
ومجروح السواقي تنوح
مدد مدد ياشيخ
ياود التويم انا مجروح انا مجروح
وكان الشيخ ينزل في الورد
ياسبوح وياقدوس
وبالاشواق مشيتك في مشاوير
العشق ساساق
وكانت ألفة ما بين الضراع
اخضر والشتل مشتاق
وعتلة الجزيرة ام خير وقناديل المقد
تحمي رقابا وكان زرع العيوش افراق
ويافرح الحصاد
والحبة تمرق من سراديب الشتاء
والجرف المخنوق
يفارق قيدو والخناق
وانحنا نكيل قمحا بلا دهب الخليج
ساعة الوزن دافقنوا في الاطباق
كم عرق الترابلا الندا علا في الهامات
وصبا علي الارض نقناق
ومن شمسا بتقلي الحبة تمرق وتبرد في المقيل رقراق
من الفجراوي والعشاوي
من دمع السواقي السال
غزيز دفاق بيمرق في الحصاد خيرا
ينسّي الفات
ويابخت المشيل زملو
فاق وارتاح من الساساق
وباكر من غزيز الدمعة نوقد في المواسم شمعة
ويابهجة ليالي الصيف
هما راق و دما فاح
يفوح الصندل المعقوف
يسقي الوادي عطرا يشرق العشاق
ويصحي الليل يلمع فوق عرسنا هلال
يشلع قرمصيص الفـأل
حرير في ليل الزفاف براق

[nunoosa]

[grade="32CD32 008000 2E8B57 008080 808080"]الدكتور محمد ود بادي

في رائعته

هوي يا وليــــــــــــد

هوى يا وليد يا دلوعة يا مرنوعة
أعدل إيدك المفدوعة
واتلحلح واقيف دغرى وواس صدرك
مع صدرى واتشدّع


ليك الحق
شان ولدوك فوق اسفنج
وحتى أول جديد سوهو ليك بالبنج
وهسع هوايتك إنك تلعب البنق بونق
وليك الحق عشان فطموك بعد مازدتا فوق سنتين
وفى سن عشرة نومك كان على الليدين
غطاك بالشاش وفرشك بحرير الصين
والبتدورو كلو بتلقى غاب قوسين
ابوك مليان وجيبو سمين وقلبو سمين
وفاتحلك حساب فى البنك والتأمين

وليك الحق
عشان ما خضتا فى وحل المطر والطين
ومن الترعة ما سويت شراب الهين
وما قيلتا فى ضل دومة بى فرعين
وما شاققتا عرق النيل مع الوزين
وليك الحق
عشان ادمنتا عيشة اللين
مشي الاسفلت ما جربتو بالكرعين
ركوب اللورى فى شمساً تصر العين
وما عانيت وقوف الصف وراء التموين
عشان يا انتى ما بتدرى سجل ابواتك البدرى
دحين اسمع .. أقيف واسمع
سماك الباكى مجدو الزال
يا ما كانوا تحتوا رجال
ابوخنجر وابوشوتال
والصقر البجيك خوجال
صوتن كان يمين جلجال
ومكسيين كمال وجلال
لكن الزمن اسرع
سيفن بلحس الفقره
وما كان برضو بالحقرة
وكانوا بضبحوا الشقره
وكانوا بضوقو العادوه نوم الكوع
وكانوا بموتوا فى شان حرمة المفزوع

الجعلى اب شرابا حار وقالوا بعدى يومو خنق
والشايقى البياكل النار وفوقو نحاسو متخنق
ودرفون البجا الصقار وحاقب سيفوا ياكل الشق
والغرباوى عينو شرار وكضب القالوا عندو عرق
والنيلى البعرفوا كتار على كتل الأسود جرّق
والبطحانى والشكرى وغيرهم من أهل فخرى
ومنهم أصلى لا بشبع ولا بقنع

هوى يا وليد
حصل جربتا كب السارية
فى القلعة وخلا العتمور
وشفتا بروقه تترقص وتتحرقص
تقول مطويه فى قرقور
وعاوى الزيفة ينفخ فى جبال النقعة زى الصور
والحصحاص يجرفوا السيل
يكنسوا على مهاوى الخور
وقلب الصاقعة يتطرقش
يكب النار دمار وشرور
وشفتا الحال عرق مقلوع
جبل متروم فرع مكسور
جمال غرقانة بى حالا وحد المويه فى الغرغور
ود ابن ادم المسكين نجاتو تحت قرون التور
والعوتيب يجيك يجرى يشيلك وانتى ما بتدرى
وما بيرفع

هوى يا وليد ...
حصل سادرتا بالديداب
وقدامك مراحك وراكب الخباب
ودربك طولوا يملا العين
سحاب وغبار ومويتو سراب
وهوى كرباجك البكاى
يبكى على ضهور الضمر الانجاب
وتسرى الليل وما تضوق هجدة
لو كان النجم ما غاب
وبعد أيام تجيك لفته
ويلوحلك فى البوادى سحاب
وتكرف من دعاش العينة تملا رئاك
عطر وأطياب
تلقى الوادى خضر زى تقول
ماكان خراب ويباب
وبت ام ساق تقييل من ضحاها
على المعالى ونسمة الهباب
وتفرش ليك حزمة نال تحت
سيالة تريانة فروعها قراب
وتنفخ كل آهاتك مع المزمار
تصوغ الحان ملانة شباب
وتنسي الدنيا كل الدنيا
ماعندك معاها حساب
خلاف برقا يشيل حرقاص
أو رعدا تقول رصاص وكت فركع

هوى يا وليد ...
حصل صحاك عز الهجعة
صوت شتماً بعيد مخنوق
وجاتك شخرة الطنبارى مشتاقاً يسوى القوق
ونومك طار واتقسم والرشرش صبح مفروق
واتلفحت نص من توبك الجرجار
على الدلوكة سايق سوق
وتلقى هناك بنات بلدك ولاد بلدك
يعلو الصفقة تقدح فى القلوب الشوق
ونغم الفال ابشرن يا بنات بالخير
والجنيات تطير لا فوق
وكم زغرودة تتفجر تفور بالناس بعد ما تروق
يعوم الوز صدورو تشابى للمجهول وما بتضوق
تميل زينوبة زى البان يمين وشمال تودى الطوق
واخوان ام شلخ ينكبو جوه الداره
زى صقرا نزل من فوق
ضرب الصوت والركزة بيفرق الناس
عشان زينوبة ما بتحوق
وعاد تتحزم الجنيات وتتنظم تقيف في روق
وكل واحد يهز ضرعاتو والحجبات تزح لافوق
جفير الخوسة فايت الكوع
وسيرو مع العضل مطبوق
والطاقية تحت الحاجب المعقود
هدية أم زين وما مشرية من السوق
ويتقدم عريس السمحة رافع صوتو
كان بسوقوا بيهو النوق
والعنجاوى ينزل فوق ضهورن
بس تقول منشحطة فيهو بروق
يبدا مجرو بالترقوة ويتحدر
مع الضلع القصار ملصوق
واحمر عين يشم الدم بعد ما يرش بنات
عمو ويزيدن شوق
وثابت حيطة لا بتهز ولا بتلز
وصارى جبينو كلو عروق
وقال بعد العقد طلقانة ما يحجزوهو
إلا يخلو ضهروا شقوق
هناك الحال مغير جد وهيجة الناس تفوت الحد
وكان حجازو مد الليد بتسمع كع

هوى يا وليد ...
حصل شارفت دغشا بدرى
فوق حجرة مخانق النيل
فى سنة تساب والشرقي
حزم القيف وطفح الكيل
وشوفتا الهيبة فوق اسيادا
والشخرى البكتل الحيل
وشفتا الجارى يحفر فى جروف كوكبنا
بس داير يشقو عديل
يجيك بي صدرو متحزم ومتلقف صفوف فى صفوف
يحاكى الخيل
ومويتو الهايجة تبلع جب
وتجقم فى مدالق السيل
وفوق الرملة مشرور العشارى طويل
معشعش بين نوايبو الطير
حليلو جزايرو جاها النيل
وحالف ما يخلى شبير
حزم اطرافا يكسر فيها
بالهدام وينحر فيها بالقرقير
وبكرة يموصها يشرب طينها
يزرع فيها شلالات هدير وهدير
وتكسح مركب النواتة عايمى
على قرون الموج جناحها كسير
رواسيها مالى اصابعوا فى المجداف
يقوم لافوق ويجى من تانى فوق الدفة
رافع ايدو ينده جملة الصلاح واهل الخير
هناك الموت يمين شافوهو شوف العين
ومافى شفيع ومافى مجير
تقول الزول يعرف اجلو
ومكان موتو لولا إنو ما كشفو الإله لى غير
عاد ما دام رقاب الموج تمد لسناتا
فوق للقيف تكب الصير
وشن فضل بلا الغرق البدور ناعى
وفعلا كانوا يا هو مصير
ومشيت المركب الغرقاني بين موجتين
طفروا منها النواتا بطن اللجّة قالوا اخير
تماسيحاً يقالدوا الموج يصارعوا
عتاوة العرق الكتالو مرير
ساعة يعومو بالضرعات وساعة فج
صدورن ضمة مااتبلت ولو قطير
ديل يا وليد ولاد النيل
رضعو الهيجة من صدروا
ومن الطيبة رضعوا كتير
الواحد فعايلو كتر ونضمو دقاق
نهرتوا يمين تسوى الفاق
ومراً أصلاً لا ضاقوه لا بنضاق
كفاك يا وليد بلاش فاقة
خلاص أنا تهتا فى الاشواق وما برجع
وهسع ضمة لا شايفك ولا بسمع
.... [/grade]

[عمران عوض]

حـــواء


كابى المقنع الجرجار على موية الوجه يا حوا كابيه
وزازى الدمعة منك بى طريف التوب
احزمى حشاك واكربيه
خيراًً ولى مو مدخور ،
رزق الليلة داب الليلة
والباكر تشابى وما بتجيبيه
ويا حوا الوكت مرواح وزمنك راح
امسكى ضرع شويهاتك احلبيه
ليش ماك حامدة ليشن جاحدة
والرزق العليك هطال شربتى التانى فوق بكريه
محمود الغنى ومشكور
غيارك فردة من نسج الكمالى
والتانى توب جاراته بنغالى
ومحمود الغنى ومشكور
وعاجك فضة من دق وتبيد الغالى
ومحمود الغنى ومشكور
نارك موقدة ما عونك ملان مو خالى
ومحمود الغنى ومشكور
وابوزينوبة ناهض فيها ماهو الخملة عنقالى
ومحمود الغنى ومشكور
وأحمد قلتى نور عينيك مختَر
فوق بطان الحلة خوجالى
عصاية الصبينة المكسية بى جلد
الندف والخامة سرهيته
وسرج المرقة سنارى ومسمَر
فوق سراة البانى سنكيتا
وجزلانا مجنزر وطية رزماً
من بطون الطينة مبحوته
ولازم الفنجرة اتبشقت سبع خمسات تصل
حاكت حجول المارقة من بيتا
ومتلفح كساوى الساكوبيس
صوبان وظهرة تقيلة تبرق سنو سوميته
جيداً جيت وجيدلك
حوا بى جنس الجنا القارى
وجيدلك حوا بالولد البعوم الشبكة سدارى
متلك حقو لا تنضامى لا تنلامى لا تتضارى
وانت ولدت للبلد البجيب راس العشارى
عدلك هادو فى كُم الرجال أحمد يمين مقنع ولايا
وفى دارة البنات زينوبة فرقت
منهن فرقة كتيفها من الفداية
عصارى الوردة فوق المشرع
اب مسكا دفق روسن وقايا
وسون قدلة الوز الرطن
صباحى شاقات اب شراية
تبين زينوبة حين تتوقى شعراً كاب
بعد ما انساب على الخد المرايا
عصارى الفزعة والفازعات يجن بكراً تنايا
ويات من تبقى حازمة
التوب على النص القناية
تبين زينوبة حين تتحزم الخصل الشرابهن
صندل الناس الغنايا

شن معنى الكسوف يا حوا
والحزن البجيب ليك الشماتة
وكنزك فى الكنوز زينوبة وأحمد
كل يوم زايدين قيراطين فوق تلاتة
نجوم السعد فوق حجرك تباسم
وانت شارفة ترمى فى ودع البخاته
شتول الفرحة تتفتح قبال
تتمد ليك الليد ومالاقية التفاتة
اقطعى الزند البقودك
من فلاة الخير على بلد الدراهم
واقلبى الطوف إن كسح بك
من جروف الخير على جزر المراهم

يا ديار حوا المراقدك فى رويس عبدلّه وينك
يا المشاوير المشيتك يا المشارع السالكة وينك
بالى فيكى إلا درب العيشة باعد بينى بينك
يا لبينة المغربية النازلة من أطراف سعينك
يا السرابة الحبلى كل الناس تعاين لى جنينك
يا السبايك الساوى شيلك
ولا طويرة الجنة تسكر من مدينك
يا السواقى النايحة زيك
زى حنان اماتنا فى حرقة حنينك
يا بنية طرية طامرة كنوزا بى طرف الطريحة
يا نسيمة رشة باردة تجينى
ساعة اشيّلك موية الصفيحة
يا مليحة
. يا العقيد النام موسد راسه حبات السبيحه
يا صباح الرحمة يا الروح
البتلفى حوارها تمرق من ضريحها
يا حزيمات القمح منشرة فى زمن الحصاد
يا رياح الشتوى هابة على مساجين
المشال بالفرحة والفرج القريب
يا نزيل قمر التمام الحشو
فى شيلتو السناجك والارابيب

يا ولد نقرات تقيك الفى الحصاد
عاقباها بعد المسرة نقرات الدليب

[عمران عوض]

الرســـــالة

بت الخير يجيك الخير
وصل جوايك الكاتباهو للولد الحتالي
وكان الظن ترسلي ليه هين هينين من البركاوي
داك الطعمو حالي
ولو بالقل شخاليب دوم
وهنا والله ني ومسيخ وغالي
سؤالك يمة عن احوالي
كان شفتيها تغنيك عن سؤالي
انا اتوكرت في قلب البنادر
زي غريب شرقان مدلدل في الدوالي
جات شايلاني حرّة جوف
انا اتحديت مجالا مومجالي
مصايب الجامعة اكبر من جميع الشفتو
ولا سمعتو في ايام الخوالي
قعاد الكرسي كان شفتيهو
ورم ساقي زي سيد الزلالي
اقلب في الدفاتر من صباحا بدري
لامن تمسي ما بنسي انشغالي
اسوق الليل تحت ضوء الكهارب
وديمة هارب من فراشي
وهادو حالي
ده كلو عشان اجيب نمرا
انافس بيها واستر بيها حالي
والله عاد حالة ما بتسر البال
ومن يوم ما هديت ما انسر بالي
سلاطين العلم يايمة
ينسوا العشرة في فد يوم
يدفروك بره زي دفر الطبالي
وخايف من اجيك مرفود
وهادي الفكرة من ما جيت
معشعشه في خيالي
واخير افتح اضانك
قبل ما تلقي فوق اضني
ملويات حبالي
وكان حصل القدر يايمة لا تلوموني
لومي علي البنادر نورا اقوي من احتمالي
بناتا فيها رويانات جسومن بالدهون
تلصف بلا جلود السحالي
سبيبن ديمة بالحزم الكبار مبهول مردم
فوق قفاهن..وا حلالي
صدورن طامحة زي موية الدميري
الهايجي تكشح في العوالي
عيونن واسعة تبلع مية
زي ولدك تشرك للموحد والضلالي
وحاتك ضُمّه ما بقدر عليهن
ساعة اقيف قدامن
انكس راسي بي قدري وجلالي
مشيهن سوا زي سرب الغزال
لكن نفورن مو غزالي
عدادن مابخبرو
الا وين ما امشي الاقاهن قبالي
وقصاصن ينقّر بي عصاتو
ومايفرّق دربهن
من بين دريبات القماري
بخورن في سماء البندر
يدوخ متل مسك العشاري
رقيصن ينهزنو بلا الفلو
الّلماتو غابن منو في ضل الضهاري
يجمّع في قفاهو وينطرح
يتمطّى تتحتحت مفاصلو
وده ياهو الفاك جباري
دلالكين تجيب الضلّ
علي متاهات الضهاري
غناين اصلو ما سمعنابو
كنت بقول ليكي الا هسع ما ني طاري
وطنبورن مبرقع وحسو فاقع
لا في كنتر لا ودع فوقو بيراري
عشوقن في الرقيص
يتلوي متل سيد المغص
يوم يبقي في حالة طوارئ
والمداين ديمة فايري
زي وحوشا في البراري
والمـآسي كتيرة حاصلة
والمكضب يلاقي بوليس السواري
عاد دي حالتا بقدر اتستر معاها
خلاف احاكي الناس واجاري؟
وانتو راجيني يوم اجيكم بشهادتي
وينبسط ضهري وكباري
وبرضو خايفين من اجيكم بي غربية
وفي خجل قايد صغاري
والقدر بي غادي كاتب ليه شيتا
لاني حاري ولا ني طاري

حاجة واحدة تكون في علمك
اني جايي وتاني راجع لي دياري
وياني حمّيد القديم
الا بس فاقد حجابي وراح سواري
يمة كتري من رضاكي
وسلميلي علي المعاكي
وقولي لي حبوبة زيك
نحن شبنا وماك براكي
سلميلي علي جروفنا وحتى وزينا البكاكي
سلميلي علي بناتنا
وقولي ليهن ماني ناسي
طاري شلاخا مواسي
زي شقوق بيتاً سداسي
طاري نقشا فوق خدودن
بين ضفايرو وشوفو قاسي
جسمي في البندر ممدد الا بينكم بي حواسي
سلميلي علي البكادن والبشتت في التقاوي
في الكرد محراتو قالع
وصوتو فوق تيرانو عاوي
ماحزم بقجة ثيابو وقام فجر لاحق اللواري
اخيرو يحفر في جروفو
مالو مال حفر المجاري
سلميلي علي الضرايح
والفضل من الخلاوي
والفقير الفوق حصبرو
يكتب البخرة ويداوي
مع السلامة ودعتك الله
ولي وصيتك ماني ناسي
لي شفقتك مافي داعي
وابقي عشرة الراعي واعي
في بحور اهل البنادر من زمن طالق شراعي
كان نحجت بجيك غانم
وكان فشلت بجيك ضراعي

[استارو]

[grade="FFA500 FF6347 008000 4B0082"]اعزائى الاعضاء
اغانى الشايقية من الاغاني المحببة لدينا ومن محبتنا اليه قام الكثير من الاعضاء بانزلها
لنا فى هذا المنتدى وعلى مقدمتهم العضو ود علبوب واخرون وددنا بأن نقوم بجمعها فى هذه الموسوعة
فلنبحر معاً على تلك الاغانى الجميل الحنينة التى تطورة حديثاً وجعلت الشعر الشايقي ينتزع مكان له وبقوة وسط الشعر السوداني عموماً..

وعلى كل محبى الاغانى الشايقية بذل المستطاع من الجهود لجمع الاغانى على هذه الموسوعة[/grade]

[شايقية و افتخر]

رهيييييييييييييييييييب انت ما في زول قدك و تسلم على الشعر يا الغلا

[محمد عثمان محمد حسان]

والله كلامنا الشايقي دا أصلو مافي زيوو أبدا

[عمران عوض]

سامحني واصفح ياحبيب ساقوني منك بالغصب
ندمانه ليه سبتك براك تتباكى في نص الدرب

طمني حالك انت كيف والبي يهون مهما ماصعب
انا اصلي زول احساس ومات من بدري معتادي الضرب
كم مرة شانك يامناي من حنضل الالام شرب
من خشمي تتقاطر دماي لو ينطق اسمك بالكضب

نفوني من نص الديار يوم عرفوا اني ليك بحب
لكنو كل مازاد بعادي .. لقيته شخصك لي قرب
سجنوني بين اربع حيط زربوني من جيهتك زرب
لكني شايفاك كل يوم هل طيف خيالك يحتجب ؟


طالوني باليد واللسان مافي شيتأ ما سُلب
غير حبك الما قدروا يوم يصلوهو .. ماساكن القلب
واغرب شىء اني انا بي وراك بنزل واتهان وانضرب
لكني في لحظة لقاك بنساهو زي الكان لعب

وريتم اني انا لي حبيب لو خنته بشعر بالذنب
ساقيني راويني المحبة ومن حنانو كمان شرب
ياخوية زي ريدك وليداك وبرضي للمريود بحب
والله لو حاس بالعلي مابترضى بيتنا يتخرب

زي ماب تدورلهم السمح لي برضوا خير الدنيا حب
لكني القى الدايره وين من ناس معين خيرن نضب
بالشورة زي بيعة الملح باعوني في السوق بالجلب
وماراعو لي امي الدوام تتباكى شاني وتحتجب

باريت لي زول بالجتة بس .. بارنك الروح والقلب
انا قلبي لو فارق ضراك ما اظنه من بعدك كسب
متحملي الام براي شايلي الهموم ما بتتحسب
ومالقيت لي زول حس العلي قاسمني همي معاي تعب

عرفت صح الم الضرب مابحسه زول غير الضرب
الغربة كيف وعذابه ما ما بيطراه الا المغترب
فوضت لي الله الامر وكتين من التحنيس غلب
مظلومة والمظلوم دعوته من الاله ما بتتحجب

بكتبلك اسع يالحبيب مصبرة وماسكى القلم
بكت لك اسع والقليب مجروح يعاني من الالم
مكتوبي من شهر العسل شهرالمرض وشهر السجم
ملفوفة بي كفن الزفاف والحنة في ايديا دم

مرقت من سجن الطغاة وقعت في الذل والوهم
قبلت بالواقع المرير امنت بي امر القسم
قبلت بالدايرنوا لي كم قبلي مظلوم انظلم
ويئست من عيشة عذاب راماني في زول مارحم

انسانة صرت بلا طموح بلا مبادى بلا قيم
قنعت من الرحمة تب بس فيك ماتقطع العشم
ولازلت ياك مالك القليب رغم انه امري انا انحسم
ولازلت بفخر بيك واقول انت الحبيب في كل ملم

ولازلت بي اسمك بصيح لو حتى ساكت اتهجم
وبقوله قدام اي زول ماخايفة اصلو الموت هو كم ؟
واخر رسالتي بطمنك ارجوك ماتشيل ليا هم
خليك في عهدك معاي ارجاني لا تفوت بالسأم


احفظني في جواك فرح .. بلسم تداويبو الالم
زي حفظي ليك بين الضلوع انت وقليبي انا جم وجم
اخواني سيبهم يفرحوا انا جرحي لسع مالتئم
يمكن ضميرهم يوم يحس ويعرفو اني ان انظلم
ويعودوا شان يبنو الوقع كيفن بيبنو الانهدم؟


ديل ناس هوايتم الظلم ديل خلوا عيشتي بلا طعم
وما سوو بي حكم العقل ما بيندم الليهو احتكم
الناس بتنقاس بالعقول ما بالجلاليب والعمم
وانا ماسكي في حبل الصبر في الله املي انا ما اتعدم

[عمران عوض]

صدقني .....

انا باكيه بالدمع التقيل

ماناسيه للعهد القبيل

وريني كيف يسعد قليب

زفوهو بالنوح والعويل

بين التباريح والحزن

عايش سواد ليلو الطويل

اعذرني يا عشق الخلوق

مابييدي اخترت البديل

اختارو لي اهلي الكبار

ملعون ابوالمال البحيل

انا كنت دايراك في اليمين

والدارة طربانا وتميل

في الحنه والزين والضرير

قايدني للشبال تشيل

الا الاهل حرمو القلوب

من فرحة العشق النبيل

[عابد]

نريد قصايد الذي يحفظ يا جماعة ما يبخل علينا انا بحب قراة الشعر

[ودعلبوب]

جينا راجعين ليكم من تانى

[snitch]

لطالما سمعنها في التلفاز والراديو ولكن عندما نقراْ كلماتها نحس انها ابيات من الحكمة


عـــافــيـــة مــنــك وراضــيــة عنــك سـو رضايـا
ومـــا بـيــخــــيـــــب الـرضــا والـدتــو يـا جــنـايـا
أنت مـن يـا دوب صـغــيـــر مـن زمان دايماً مـعايا
أنــت ديـمـه أمـامـي سـايـــر مـا بخـليـك بـي قـفايـا

ما بتغيب من عيني لحــظـة ولا حصـل سبتك ورايا
لا من الله يشيـل أمانتوا أنا بـبـقي خاصاك بالرعـاية
ليَ يــرعــاك الـبـيـــرعـي لـيَ بـيــك يبـــرد حشايـا
أصــلـك أنــت هـديــه مـنـو والله بـيـك أجزل عطايا

جيـتــنـي واحـد مـالـي تــانى رحمـه في آخر صبايا
قـبــل مــا أفــقــد قــدرتـي وقـبــل مـا تنـهـار قـوايـا
جيـتـنـي ذي بــدر منـور وفجـأة طلـيــت فـي سمـايا
انـت لــمـا خـلاص كـبـرتـا دار تسيبني أعيش برايا

دار تـفـارقـني وتـسـافــر والـحــزن يصـبــح جـزايا
كيف يـهـون لك تحـزن أمـك شـان تحـقـق ليـك غاية
كان مسـافـر شـان عـلاجي بـلـقي في شـوفتـك دوايا
وكان عشـان تـســقـيــنـا نهـلك نحـن بي حنـك روايا

كان عشـان كــرعــيــنـا راحـل نحن بي بـعدك حفايا
كان مهاجـر شــان تـعـرس خـيـر أبـوك مالي التكايا
خـيـرو وافـر أبــوك يحـمـدوا مراحو مليـان بالسعايا
وبالـقروش الجـيــب مـجكن ولسه برضو الجايا جايا

بـرضـي مــنــك مـا بـقـصـر بـحـفــر أديـــك المعـايا
كــان ده كـلــو كـمــان شُـويّ بـتلقي في دهبي الكفايا
أصـلـي مـن ســويـتــو نــاذرا إبـقـي لــي أيـام قسـايا
خـاتـــا للــزمــن البـعــانـد لـي سعــادتــك يــا عشـايا

أنـت مـن شبـيـت صـغـيــر راسـي مـا بتحتاج وصايا
مـا حـصـل خيـبـتــا ظـني ولا فشــل فيـك زين غنـايا
لا تسـيـب أمــك تـهـاجــر يـمـه محـتـــاجــي الحـمايا
لا تسـيـبـني وراك تـرحـل إنـت يـاك ضُـلـي وضرايا

أنـت فـوق الـحـوبــة مـقـنــع إنـت للـمـكشـوف غطايا
دايري مـنـك تـبــقـي جنـبي . جنبي في فـرحي وبلايا
دايـري كـان قحـيـت اتـبـنـك ارفـع اقـســمـلـك غـتـايا
أنت سـاعـة تـبـقي جنـبـي تـبـقـي ضُـلــي وتـوب قفايا

ومـا بخــاف ظـلـم الـلــيــالي وأنـت يــاك عكاز عمايا
دايـري أقـضـي عـمـيـري جنـبـك أصـلو قارب للنهايا
خـايـفـي كـان ســافرتـا ترجع تلقي فـاضي البيت بلايا
حـيـنــا مـا بتـنـفـع قـروشـك وما تجـيــب لك أم سـوايا

مـاني عــارفـي سـبــب رحـيلك يـا وليدي شنو الحكاية
إلا تبـقي بـــراك شــايـف فـي فــــراق الــوالــدة غـايـه
ما بعاتبك وما بلومك لو رحلت بلـقي في الأمثال عذايا
عـلـي حـجــر دايـمـاً قليـبـك وقليـبـي كـله عليـك جنـايا

[ريناد]

مشكوووووووووووووووووووووووووووووور مشكووووووووووووووووووووووووووووووووووور
مشكوووووووووووووووووووووووووووووور
يسلموووووووووووووووو والله يديك الف عافيه ان شاء الله ونتمنى منك المزيد تقبل مروري

[ريناد]

يسلمووووووووووووووووووووو على الكلمات الجميله واتمنى من كل شايقي يشاركنا هنا والله يديك الف عافيه تقبل مروري

[ريناد]

حبى أنا ليك كان زادى وكان جـوة الحنايـا دفيـن
كتّ بضارى من الناس وخايفة عليهو مـن العيـن
عليهو أنا كت بصوم وأفطر عليهو بكابـد الناريـن
كت بحسب سنين الغربة لما تعـود تجينـى متيـن
وكت برجاك فوق النار لمـا وكـت لقانـا يحيـن

نونس فى براءة أطفال وفى الحب نروى ننهل زين
وكلما يوم يزيد البينـا لمـل بقينـا قـاب قوسيـن
اتارى أنا كت فيك مخدوعة وكم من زيى مخدوعين
ما قايلاك بتلعب بى تعيش اللحظـة بـس والحيـن
وما قايلاك حبيـب آلاف وقلبـك قبلـة للضاليـن
وما قايلاك بتنسى حبيب صبر راجيك ستـة سنيـن
وساهر كم ليالـى طـوال يتقلـب شمـال ويميـن


كيفن هان عليك تنساهو زولاً كـان عليـك حنيـن
وتشغـل بالـك الأشـواك لمّـن تزبـل الياسميـن
كت دايراك بسمة عريضة فى وجه الزمان الشيـن
وكت دايراك ساعة الحاجة تبقى لىّ دخرى خزين
كت دايراك مقنع حوبة وكتيـن المضـارى يبيـن
وكت دايراك فارس أحلام تشاركنـى ونتـم الديـن
وكت دايراك أمل بسّام يزيل ألـم البعـاد والبيـن
كت دايراك شريك الروح واخدمك حافية القدميـن

وكت بحلم بك إنت معاى مجرتق بالعديـل والزيـن
جنبك فى يمينك قاعدة نسمع فـى دقـر يـا عيـن
تبشر زين مع الأصحـاب وتتشبـل مـن الوزيـن
أنا الأبحرت راكبة الموجة أكيد مرسايا بين موجتين

وداعاً يـا زمـن ظالـم وبالأفـرح علـىّ ضنيـن
وداعـاً يـا قلـب قاسـى لا بيحـن ولا بيلـيـن
وداعاً يا سراب خداع محال مابيـروى عطشانيـن
وداعا يا كلام معسـول حـدو ومكمنـو الشفتيـن
وداعاً يا سحابة صيف شايلى مطر ضليـلا رهيـن

تبشر بى خريف جايينا ياما النّاس رجوهـو سنيـن
كل زولاً يفكـر فيهـا مـا معروفـة تنـزل ويـن
وألف سلام عليك ياقلبى المسالم وديمة طبعو حنيـن
يتاورو الشوق ويلعب بيهو تنحر فى حشا السكيـن
تعاودو الذكرى تنتر جوا حالـو يحنـن المسكيـن

أخيراً منى ليك سلام وقبل ماتجف دمـوع العيـن
وقبال منّـى ماتعـدى وقبـال الفـراق مـا يحيـن
بخيت وسعيد عليك ان شا الله يبقالك عمـار وبنيـن

وقلبى أنا خلى فى أناتو بعدك يامـا راجـى أنيـن
ولو كان يا قلب حبيت بعـدو بعـد قسمـت يميـن
ما ينتمّ ليك مـراد لا تضـوق لا حلـو ولا زيـن
وتفضل طول حياتك تبكى طول عمرك تعيشو حزين
وعمرك ما تجيك سعـادة مـا تتهنـا قـول آميـن
وتانى الحب عليك حرمان ووعد الحر أمانة وديـن

[ريناد]

مرام هي طفلة في الرابعة من عمره خرجت من البيت لكي تزور الجيران خرجت وهي تركض خرجت وتلك الابتسامه العريضه مرسومة علي وجهه خرجت فقط لكي تلعب مع اطفالا في عمرها . لم يغفر له عمرها الصغير ولم تغفر لها تلك الابتسامه نعم خرجت مرام لكنها لم تعد .فقد قابلت مرام في الطريق تلك الذئاب انها للاسف ذئاب بشرية انهم اربعة شباب تتراوح اعمارهم بين تالعشرين والثانية والعشرين نعم انهم شباب لم تعد في قلبهم الرحمة ولا الوازع الدين الذي اشتهروا بها اهلي هنا في السودان لم يغفر لها انا ابنت الاربعة اعوام ولا تلك الابتسامه فهجموا عليها واغتصبوا تلك الطفوله اغتصبوا طفلة لم يتعدا عمرها الاربعة سنوات بوحشية وبعد ان فعلوا فعلتهم قتلوها قتل تلك الابتسامه العريضه قتلو تلك الطفوله الجميلة . نعم انهم ذئاب بشريه .طلعت مرام علي الجيران لكنها لم تعد . طلعت مرام علي الجيران لكنها لم تعد.
************************************************** **********
كلمات الاغنية
رثاء حاتم الدابي للطفلة مرام
بصوت الفنان جعفر السقيد
مـرام ما جات
مرام مرقت علي الجيران ومرن ديل كم ساعات
غابت نجمة الضــيفان واكتست الأرض ظلمــات
حكايتـا كان ويامــاكان
حــكايه تشيب الولــدان
حيرت الأنــــس والــجان
وبرهنت انــو مافي امان
رجع وأد الطفــوله زمان
زمــن عبــدت هبل ومناة
*****
بعد لبست جديد فـي جديد
مـرام مرقت تبارك العيد
وقفت سمعتــنا نشيــــد
حلاة موبايلا الفـي الليد
مع التسريحــه والباندات
*****
اتاريهو القــدر منصـوب
مسطر ومـافي منــو هروب
برغم رضانــــا بالمكتوب
ده غـدرا ماوراهو سكات
*****
بدون إنذار بـدون اسباب
مرام غدروها جمب الباب
مرام هجمت عليهــا ذئاب
طباعم من شريعة الغــاب
ملاكا حـــولوهو رفــات
*****
قلوب لا رحـــمه لا إحسان
مدبجه بي صفات شيـــطان
وظهرت قـــــدرة الرحمن
محل اسنانه هو الإثبات
*****
دريبه عــلي الأرض منقوش
سريره مــن العصر مفروش
معالمه باقيه وسط الحوش
ملابس الروضـه واللعبات
*****
بعد شمس العصاري تــغيب
مرام كانت تودي تجيـــب
عنــدها بسكــويت وحليب
في تــــلاجتن راقــدات
******
وحيدة اخوانا والوالـدين
عليها يخافــوا مـتمنين
تتعلــــم تتم الـــدين
وليها يوزعوا الشربات
******
ياصاحباته وينه مـــرام
سماح يادوبو فرهــد قام
عمير ماتم خمس اعــــوام
ملازماها البراءه سمــات
*****
عيال الروضـــه ياسمحين
لمن جيتو متـــــماسكين
ماشفتـــوها راحـت ويـن
مرام سرقت منــام العين
مرام حرقت حشا الأمــات
*****
وليه بنقول مرام ماجات
مرام كلما وجيها يلوح تبق جـوانا إحساســـات
مرام بقت القلب والروح سحابه تخدر الـبلدات
مرام غصــــة حلق مجروح تقوقيها القـميريات
مرام صفحة كتاب مفتوح يقروا الطلبه والطالبات
مرام عصفور يئن مزبوح ما شفعلها الدمــــعات
مرام جزء من محمد ونوح تبارك وعم والنازعات
مرام شربة محايه ولوح وفي ساعة المغيب بخرات
مرام دعاء للجميع مسموح بعد ماتكمل الصلوات
مرام حتظل سؤال مطروح جــوه بيوتنا والطرقات
مرام حتظل سؤال مطروح وسط اولادنا في الجامعات
مرام حتظل سؤال مطروح موجه للشباب بالـــذات
ليه بدت السماحه تروح إرث اجدادنا والعادات
*****
أخيرا داير اجيــــــز القول منــو المسؤول
ماالكاتل قصاد مكتـــــول دي مــــاها حلول
إذا الوالد صبــــح مشغول منـــــو المسؤول
ومابنقدر نلــــوم زول بس بنقول منو المسؤول
نقول دي ثقافة البترول وسيف العولمه المسلول
الديجتال مع المحمــــول افلام فاضحه والمسكول
عموما بيوتنا في فك غول مخيـــــف اسمو الفضائيات
************************************************** ***********

[محمدالرشيدمحمداحمد]

شكراً ودعلبوب علي هذه الروائع ونطمع في المزيد .

[ودعلبوب]

رينااااااااااد
شكراَ على مرورك اولاَ
اهنئك على حسك الشعرى الفنان الذى أحسب انه قد تعدى مرحلة الاطلاع الى مراتب أعلى وهى موسقة الاحرف
تسلمى ومزيد من التواصل