سودانية نار كتب:الغربة قرار يتخذه الانسان ولعدة اسبا ب لكنه في نهاية الامر قرار البعض يتعب بعد تنفيذ القرار والاخر يسعد بتنفيذه
والحياه دروب وطرق والانسان مفروض وين ما يكون يسعي عشان يعيش الحياة البيمناها ( لا اقصد حياة المال والرفاهية )
فاذا ما عجبوا الحال مفروض طوالي يغير قرارو وما يصبح اسير لحياة رتيبة مملة
والسؤال اخي منير هو انتو يالمغتربين وتعبانين من الغربة الجابركم شنو
اذا كان فرص عمل وحياة مستقرة وراضية فالسودان الان ملئ بالفرص خاصة بعد الانفتاح والاستثمار
واهو نحنا والله شغالين وراكبين عربات والحمدلله ، والبلد ما بتتغير وتبقي احسن الا لمن يجوا شبابها ورجالها المهاجرين فيلا يالطير المهاجر اذا عشك في الغربة ما مرتاح ليهو ارجع لعشك الاصلي المنتظرك
كلامك جميل يا سودانية نار ولكن الواقع والحقيقة غير كدة ... وصدقيني يا عزيزتي الغربة عذاب ما بقدر احكيها لأنوا ما بحسوا إلا الجربوا ... صدقيني نحنا عايشين في عذاب يومي بل كل دقيقة ولكن لما نجي السودان النار بتولع فينا عشان البلد بقت حقت ناس معينين وبقا خيرها لناس معينين والله الواحد يعمل ايه ما عارف وانا بقول اخير ازل بره بلدي وما ازل جوه بلدي لانو في بلدي ما برضا الذل ودي المشكلة الكبيرة لك التحية والشكر على المداخلة وياريت نقدر نصل بالبلد لما تتمنيه عزيزتي !!
فنونه بنت المدينه كتب:ممكن سوال يا منير
انته حسي لو في السودان قاعد بدون قروش بتقدر تعيش وتعيش اولادك معاك
ما اظن انك تقدر
لكن هنا والله لو قاعد في الشارع قاعد عاطل خيرك بيجيك
وممكن ترد على السوال
تسلم على الموضوع
مع تحيات
فنونه بنت المدينه
شكراً يا فنونة الامورة وتسلمي يا صغيرتي ولك التحية ويمكن انت كنت صريحة وبديت تجاوبي السؤال لك الشكر مرة أخرى ويلى كونوا ذو شجاعة ذي فنونة وجابوا على السؤال::
أما سؤال يا فنونة فإجابتي هي لا اخير لي هنا مما اكون عاطل في البلد وما قادر اعيش أولادي!!
الاغتراب هو السفر الى بلد خارجى بقصد تغير الوضع المالى فى فترة زمنية محدودة ليست بالقصيرة ولكن ازا استمرة الغربة الى فترة طويلة بدون تغير الؤضع المالى يتحول زلك استمرار فى الغلط وهزا يصبح اكبر مشكلة هزا الكلام من واقع تجربة سابقة
دا كلو كلام مامنطقى
نحنا اتغربنا من اجل الوضع السئ البنمر بيهوا
منو العاجباهو الغربة ومنو المسكتو الذل
المواطن السودانى من مائسى فى حياتو الدراسية او العملية
اتغرب تفتكرو عشان يبنى عمارات اويركب سيارات
لا لا لا لا؟؟؟
تفتكر لى لا
ماتردو
اتغرب عشان يعيش مستور الحال
عرفتو كيف
فى الغربة ورغم مايواجهنا من امتحانات الواحد بيتجاوزا فى النهاية
ويكفى كدا عشان مانفلت
ونتمنا الوطن يعيد ابناءه
والماعاش فى السودان مفروض مايرد على الموضوع؟
وبرضو نقول السودان فى حدقات العيون
يعطيك الف عافية
اخى
منير
على الموضوع
تقبل تحياتى
انا سودانى
تحياتك مقبووووولة يا سيدي استاروا ولك الشكر على المداخلة وقد أصبت فيما قلت !!
سودانى معذب كتب:والله يااخ منير أشكرك على هذا السؤال المهم وتقريبا كل يوم بنسال نفسنا هذا السؤال
المهم زمان كنا وانا ما زول عجوز زمان يعنى فى أخر السبعينات وبداية الثمانينيات كان البغترب بيغترب عشان يعمل ليهو حاجة مميزة عمارة.........سيارة فارهة..........زواج بمستوى عالى ولكن البقية عايشين مستورين ومبسوطين وكان المغترب أول ما يكون ماشى السودان بنتابه شعور بسعادة غامرة لانه حايقابل اهله واصحابه اما الآن المغترب بكون شايل هم كبير لعودته للسودان كما ذكر الاخوة من تحسن الاوضاع بالداخل وتدهور اوضاع المغتربين بالخارج وبعدين الصورة الحقيقية للمغترب ما بعكسها للباقين حتى يتجنبو الوقوع فى فخ الغربة لكن ياجماعة افظع شئ انه تحس بالغربة داخل الوطن والله بقيت لمن امشى اجازة مثلا تكون فى وسط الخرطوم بيجينى احساس بالخوف الناس سلوكها اتغيير اصبح كل واحد همه ياخد وبى اى طريقة معليش ياجماعة كلامى قاسى شوية لكن دى الحقيقة كنتا اتمنى انى ارجع السودان نهائى واعلم اولادى هناك لكن اتفاجأتا بتدهور التعليم - زمان كنا بننظر للبدخل مدرسة خاصة بانه مجموعه ضعيف وما أهله يدخل مدرسة حكومية (وكانت المدارس على مستوى عالى )اما الان اصبح التعليم بالمدارس الخاصة طيب هل كل اهل السودان قادرين على التعليم فى المدارس الخاصة والله السؤال بيقود لى اسئلة كتيرة ولى تفاصيل كتيرة وما عاوز اطلع بره الموضوع اكتر من كده لانه الجواى كتير بسبب هذا السؤال
السلام عليكم ورحمة الله وبركاته الاخ منير السبب الرئسى للاغتراب هو سوء الحال فى بلدنا
وانا اظن لو بلدنا وفرت لى كلو واحد مننا عمل ماكنا طلعنا برى
واكيد كل واحد طلع عشان هدف انو نعمل حاجة ونرجع
بس اقول اسال كل واحد منكم اغترب هل هو عمل حاجة
تستحق الغربة دى كلها يعنى نحنا بطبعنا السودانين لمن يغتربو
مابقدرو ينسو انو اهلو ظروفهم تعبانة ويقعو فى موال
انو نص تفكرنا اواوكلو فى اننا نساعد اهلنا فى سودان وننسى
الغرد الجنا عشانو صراحة الغربة ضياع زمن فى الفاضى ربنا يرجعنا بالسلامة لى بلدنا الحبيب
عفراء كتب:السلام عليكم ورحمة الله وبركاته الاخ منير السبب الرئسى للاغتراب هو سوء الحال فى بلدنا
وانا اظن لو بلدنا وفرت لى كلو واحد مننا عمل ماكنا طلعنا برى
واكيد كل واحد طلع عشان هدف انو نعمل حاجة ونرجع
بس اقول اسال كل واحد منكم اغترب هل هو عمل حاجة
تستحق الغربة دى كلها يعنى نحنا بطبعنا السودانين لمن يغتربو
مابقدرو ينسو انو اهلو ظروفهم تعبانة ويقعو فى موال
انو نص تفكرنا اواوكلو فى اننا نساعد اهلنا فى سودان وننسى
الغرد الجنا عشانو صراحة الغربة ضياع زمن فى الفاضى ربنا يرجعنا بالسلامة لى بلدنا الحبيب
أختي عفراء لك التحية والتقدير على المداخلة وانا معاك في كلامك كلوا خصوصاً ان الغربة ضياع زمن !!
موضوعك جد مهم وبيمس أغلب السودانين لانو كمية من السودانيين مغتربين بره بلدهم
وبيعانوا من الشبح القاتل الاسمو الغربة
لكن أوقات بسمع من سودانين اغتربوا ورجعو السودان انهم ماقادرين يتأقلمو مع البلد لانو نص عمرهم ومممكن اكتر عاشوهو بره, فبيقولو انو السودان احلى بس يعيشو فيهو فترة الاجازات وبعديها يرجعو للغربة.
طبعا دا ما كلامي لانو انا بس بنزل السودان اجازات وبحس بي فرحة كبيرة وراحة مبالغة لكن ما جربتا افعد فترة طويلة.
انتو شنو رايكم؟؟
الاخ منير موضوعك جميل وموضوع نقاش جد
نحنا بنتغرب من اجل تحسين الوضع المادي
بس مشكلتنا ما بنضع حدود لغربتنا ومع الايام
بتلقي الوقت سرقك والمشكله انك يتكون ضيعت
اجمل ايام حياتك واكيد هي في النهايه تضحيات
وربنا يرد غربتنا كلنا وانشاء الله ما نحتاج لاي
سبب من الاسباب لان نتغرب
سؤالك الاجابة علية بتكون شخصية...
ولكن و الاهم هل الغربة بتحقق اهداف الانسان ؟
يعنى شنو اترك اهلى شان فى النهاية اصاحب حبشية ودى صفحة فتحتها الاخت عفراء...
ويعنى شنو اتغرب شان اشتغل بى راتب لايسمن ولايغنى عن جوع...
ويعنى شنو لمن غربتى تطول وتفوت الحد واكون ضائع لاام ولا اب ولا اخ ولا زوجة ولا صديق...
ودة كلو شان شنو عشان الدرهم فليذهب الدرهم الى الجحيم غير ماسوف علية ...ويبقى الانسان عزيز كريم مخلص وفى يحترم الناس والناس تحترموا ويحفظ الله ويحفظة الله..
واقول لى اى انسان متغرب لو مامستفيد من غربتك او غربتك ماحققت اهدافك..
ارجع لى اهللك واهللك قبال تهللك...
ودمت...
