أرائكم في قناة السودان ؟ خاص للمغتربين

[همسة عطر]

اخوتي الكرام .. الحمد لله .. نحن في خير ونعمة .. وتلفزيون السودان وبحالته الراهنة يكفى أن شهد له الكثيرون من أخوة لنا في الدول العربية ودول العالم الأخرى والغيورين على الدين الإسلامي وحسن الأخلاق ، وهو يعتبر من القنوات الفضائية القلائل التي تقدم برامج مفيدة للمجتمع .. مع قلة الامكانيات المتاحة لهم ، أما عن سؤء المنظر وما قاله البعض .. فالتلفزيون مرآة الناس والمجتمع يظهر الغث والسمين والصور القبيحة والجميلة .. يظهر الحال الواقع ، وهذه حالتنا وحالة أهلنا حيث الكثير منا من يسكن في المساكن الشعبية وبيوت الطين وغيرها ومن يسكن المساكن العادية والفاخرة .. وهذا ليس عيباً والكل لابد وأن يحمد الله على ذلك ، وكثير من دول العالم في حالة يرثى لها وقد تجد هنالك دول غنية ولكن عندما تتوغل داخلها تجد بها أماكن سيئة وقذرة لا تتناسب مع تلك الدول وغناها وموقعها ، والكل يحمد الله على أفضاله التي لا تعد ولا تحصى .. وإننا نفتخر ببلادنا وتاريخنا وحضرتنا الانسانية ونعتز كذلك بها امام كل إنسان ..
تلفزيون السودان عريق وهو من أوائل الدول التي بثت التلفاز في الدول العربية وغيرها.. وإن كانت توجد بعض السلبيات مثل الديكور والملابس والاضاءة وغيرها فهذه الأشياء بسيطة جداً نأمل من المسؤولين تلافيها .. والسعى لتقديم الأفضل وليس الأردى ، ومشوار الميل يبدأ بخطوة.. والكمال لله وحده ..
ودمتم بخير ونعمة

[queenfadwa]

bad
لا تقدم اي شئ مفيد starting from الأخبار لغاية talk shows + cartoon
مخجلة جداوجيراني بيفتحوها عشان يضحكو علينا
am sorry 4 that,but

[ود مالك]

انا والله من المتابعين لقناة او تلفيزيون السودان باستمرار وهي بكل صراحة قناة ملتزمة من ناحية ديننة
وبرامجا مش بطالة واتمني ان تتطور اكثر ومهما تكون دي قناة بلدنا لازم نرضي بيها ولا اويد من يقولون بنخجل من صورة بتعرض في قناة السودان
اشكرك علي هذا الموضوع اخي العزيز

[المصرداني]

لي مأخذين علي ناس التلفزيون

اللي مابيعرف يلبس بدلة وكرافتة أخير ليه يلبس العمة والجلابية
أنسب وأجمل
يا ليتهم يريحونا من المسلسلات المصرية العبيطة

[حنكوشة كوول]

بالنسبة من النحية الدينية فهي ممتازة
من النحية الاخرى محتاجه تجديد في المزيعن
والديكور..........الخ


اما بالنسبة ليك فشكرا على طرح هذا الموضوع الجميل

تقبل مروري وتحياتي

[Hoomy]

والله أنا بتابع برامج محددة فيه
برنامج دنيا جميل يوم الاربع لأنه من عمق المجتمع السوداني بعدين منوع
شواهد النبوغ برضو حلو
لكن من ناحية سهرات كنت بتابع من الأمس فقط
لكن عندنا مذيعين أعوذ بالله لا ثقافة - لا شكل - لالباقة
مثلا أسامة الخليفة - يحاكي في اسلوب جميل عازر في الجزيرة حيث يكرر أأا - اااا
التأتأة الماليها لزوم متناسي انه جميل عازر يكرر ذلك لمفاجأة الضيف بسؤال أكثر من زكي
فلماذا لا يملك مزيعينا شخصيات منفصلة ومميزة
المزيع السوداني مقتدر بدليل مزيعي Bbc أيوب صديق وغيره
وحتي محليا كان متوكل كمال - حمدي بدر الدين - محمد طاهر- أسحق إبراهيم وغيرهم
لكن مزيعين الزمن دا كلهم واسطات
بقو مركزين على 4 وجوه مكررة
الله يعينا

[عزيز]

مشكلتنا في عدم التلقائية يعني بنحب نقلد أكثر ونحب نعمل مثقفين ،، جد ده حالنا ؟؟
اديك مثل بسيط وانت لاحظ ده بنفسك : إذا تلفزيون السودان قدم اي استطلاع بتشوف في كتير من الناس يعمل ليك فيها مثقف وبيتكلم لغة عربية كويس ،،
تعال شوف في اي قناة الواحد بيتكلم بلهجة بلدو يعني ما هو مسؤول عن تطور اللغة العربية ،،،

إذا نحن التزمنا بالتلقائية والبساطة صدقوني حنتقدم في أي شيء ،،، لكن نحن بنحب نلعب بأنفسنا يعني
مثلاً : في تلفزيون السودان يستضيفوا ضيف ويسألوه أهـ لقيت السودان كيف ؟ يعني حيقدر يقول شنو غير والله جميل ؟؟؟ وهكذا نلعب بأنفسنا يعني نحن بنحب بصراحة يشكرونا اكثر شيء ...

[الجموعي]

كلنا نفتخر بسوداننا الحبيب وتلفزيوننا القومي ولكن هناك سلبيات لابد من تلافيها من قبل المسؤولين في القناة
1 ــ الديكور لابد من التجديد والتحديث واختيار المناسب لانه اصبح هو الجازب للمشاهد
2ــ البرامج المسجلة لابد من منتجتها واخراجها جيدًا في احد البرامج كان هناك ضيف وكان هنلك ذباب يظهر والكامرة جابت ذلك واضح في اللقاء وهذه المشلكة والله العظيم تشاكلت بسببها مع واحد سعودي وقال لي انتم متخلفين هذا برنامج مسجل والله مباشر فقلت له مسجل فقال لي كيف تظهر هذه اين المخرج فتحججت له بحجج واهية ولم يقتنع وحتى الان ماسكها عليَ .
3 ـ هنالك بعض البرامج تكون مباشرة ويكون هناك فاصل غنائي من الارشيف فتظهر كلمة مباشر فوق في الشاشة وهذه ايضا كان لي فيها موقف وجدل كبير مع بعض الاخوة .
وكان ايضا هنالك فقرة فلم كرتون في برنامج على ما اعتقد برنامج البيت السعيد وكان البرنامج مباشر وعرضت الفقرة حوالى 5 دقائق واخينا المخرج واضع كلمة مباشر .
4 ــ برنامج البيت السعيد هو برنامج مفيد وجميل لكن ممل من المفترض ان يقلل من وقت البرنامج
لانه لا يمكن الى اي شخص مهما كان وقت فراقه ان يجلس ويتسمر على شاشة التلفزيون ساعتين متواصلتين .
5ـ برامج القناة القومية نسخة طبق الاصل من قناة الشروق مين بقلد مين ما ندري
ياريت على المسؤولين ان يتداركو السلبيات لاننا والله نحن المغتربين عايشين في حرب مع بعض الاخوة العرب لكن باذن الله سوف نكون فخورين بوطننا الغالي

[فتى السقاي]

والله انا لمن يغيروا على قناة السودان بحس نفسي تلقائيا بقوم لأنو مافي حاجة تجمسك انك تتابع فيها حاجة لا ولا المكيفات ما في كل البرامج تلقا المذيع شايل المنديل في يدو وكل دقيقة يمسح عرقو:D ولا اكان مافي منديل بي يدو ساي بس نعمل شنو نقول ربنا يعين.:D :D




يوجد دائما من هو اشقى منك فأبتسم


http://www.alhnuf.com/230/

[مواسم]

صراحه فى برامج حلوه وفى برامج ما كدا لكن الحنين للبلد بيخلينا نشاهدها والى الامام يارب

[اميرة بكلمتي]

انا بحب قنات السودان واي حاجه من ريحتها
بس اي بلد حتي لو دا واقعنا بتختار وتعكس افضل مالديها
يعني لما يصورو ناس مامرتبين دا بيعكس علينا ماقلنا حاجه
يجيبو الناس البساط او الشينين لاكين كمان يجيبو العكس
على الاقل يعرفو ان فيها وفيها ونفس الشيء في مناظر حلوه
شديد في السودان طبيعيه يعني ماعايزه امكانيات ممكن يجيبوها ..
في الحاجات دي انا بيعجبوني المصرين بيظهرو احسن ماعندهم
وبيناقشو المساوء كمشاكل ويشوفو حلولها من خلال مسلسلاتهم او افلامهم
لاكن لما بيتكلمو او يجيبو عن مصر تقول بيتكلمو عن الجنا او المدينه الفاضله ..
سوري اطلت عليكم بس فكرتي كلها المفروض ان يصورو احسن ماعندهم احسن ..

[ضـــوء القـــمــر]

انا بحب قنات السودان واي حاجه من ريحتها
..

[grade="00BFFF 4169E1 0000FF"]مساء الخير والخيرات ذو الاحساس المرهف رنيم[/grade]
بكل صراحة ياريت لو كل الناس بتفهم وبتنقد نقد موضوعي وانا متاكد الناس البتقول انو قناة السودان مملة اقول ليهم بكل صراحة انتو طولتو من قناة السودان حاليا قناة السودان تمتاز بمجموعة من البرامج انسي:برنامج البيت السعيد_برنامج ساعة شباب_برنامج مراسي الشوق_برنامج عناقيد_برنامج تراثيات_برنامج لغة العصر_برنامج شئون قانونية_ وطبعا دة كلو كوم وبرنامج شواهد النبوغ والمجلة العلمية كوم.........

اما انو الديكور قديم فشوفوا دى اغنية لعافية حسن من برنامج مراسي الشوق وشوفوا الديكور
تخريمة: يا رنيم رايك شنو في عافية دى ما صاقعة وجات واقعة
[web]http://www.youtube.com/watch?v=sfmOr1zF1Y0[/web]
http://www.youtube.com/watch?v=sfmOr1zF1Y0

[hdma]

بصرااااحة
قناة السودان دي ماقناة ..
تعباانة شديد..
عاملة لينا زحمة في التلفزوون ساكت...
المذيعين حالتهم حالة ..
تخيلووو ..
مررة في رمضان جايبين فنان قاعد يغني ليهو ساااعة ماسك الميكروفون ..
بنشووف حركة شفايفو ..
لكن ماكنا سامعين حاجة ..
اتاري المكرفوون خرباان ..
ولما اكتشفوو الخراب ده ..خلووه يعيد الاغنية .. ولا اعتذروو حتى ..
ياليتهم لو يتعلمو من باقي القنوات .. حتى اخبارهم البينقلوها .. اخبار باييتة ..
عاملين لينا فضييحة ساااكت..

[nizar]

احسن وانظف قناة بشهادة الجميع . وكل من يقول غير ذلك فهو من بتاعين الفديو كليبات وقناة lbc , ودريم والقنوات الكثيرة ومسيخة دي ....

[سيرينا]

اولا: حابه أشكرك على الموضوع الرائع دا،
ثانيا: أنا شايفه كلامك كله صح يعني بالعربي (صح لسانك) والحقيقة تلفزيون السودان بايخ،وأنا أسفة لو زعل كلامي زول.

[زوبه]

صراحة الموضوع حلو جدا ومن زمان عايزه افتحو انا بالنسبه لي ما بفتح القناء دي نهائيا الا اهلي
ولو ملاحظين خطبة الجمعه اصلا ما خطبه كلو سياسه في سياسه زي الاخبار نفس الكلام ينعاد اسبوعيا امريكا واسرائيل ودارفور وفلسطين والدول العربيه ماصارت خطبع دي ده شنو وغير كده القناء غير ما شوهت وفشلت ما سوت شئ smiels0:

[أبو عمر]

[frame="2 80"]السلام عليكم ورحمة الله وبركاته
حسه يا جماعة عليكم الله دايرة رايكم بالجد
ما لينا حق ما نشوف التلفزيون السوداني
وروني فيهو شنو جديد
ليالي النغم كل مرة بعيدو الفنانين
مراسي الشوق .... اوكي
والبرنامج بتاع وليد زاكي الدين ؟؟؟ والله نسيت اسمه
فيهوو حاجات حلوة لكن المقدم مرات شوية بعمل حركات
ما لايقه معاه
الرحيق المختوم .... والخ ؟؟
بجيبوها لينا بعد المغرب ؟!؟!؟!؟! احنا المغتربين نعمل
شنو عليكم الله ؟!؟!؟! احنا بنفضه بعد المغرب نتفرج
شنو عليكم الله دايرين نتفرج السودان
يمسكوا ليك البرامج الدينية من بعد المغرب لحدي النشرة
صح انها برامج دينية لكن وقتها ما صح
الرجاء كن اي زول يزعل من كلامي يوريني سبب الزعل
لكن انا ما شايفة انه التلفزيزن فيه حاجة حاجة كده الزول يتفرجه
مشكوووووور والله يعطيكم الف عافيه[/frame]

قناة السودان قناة قومية رسمية هي قناة الدولة الأولى يعني محاسبة على كل الأعمال التي تقدمها .. لذلك تحرص كل الحرص على أن تكون المواد التي تقدمها مواد ثقافية وعلمية وحوارات مع كبار المسؤولين في الدولة لإيضاح بعض النقاط الهامة للمواطنين ونقاشات هادفة بين الحين والآخر حول أمور تخص البلد .. ولذلك يشعر الناس بملل من عدم انتشار روح الدعابة في قناة السودان ويعتبرونها قناة ما حلوة وبالعكس ممكن تكون دي من أفضل القنوات الموجود على الرؤوس النووية المنتشرة .
ولذلك نحن نعتز بها ونفخر بها وببرامجها وربنا يوفقهم وزيدهم من العلم والثقافة حتى ينتفع أهل السودان بمزيد من العلوم والثقافة الدينية والدنيوية وجميع العلوم الأخرى ..

والناس اللي عاوزين الطرب والضحك والقهقها الفارغة .. يمكنهم مشاهدة قناة هارموني .. فهي مليئة بفنانين الطرب والبرامج الفاضية والتي تهدف إلى عكس ما تهدف إليه القناة الرسمية السودانية .

وهناك قناة زووووووووووووووول فهي على نفس النهج والدرب اللي ماشية فيه هارموني .

[البرنس السودانى]

السلام عليكم
غايتو ما بذكر متين فتحت القناة السودانية مرور الكرام بس

[ريناد]

والله بي صراحة القناة السودانية قناة ترفع الضغط لانو مافيها برامج حلوة حتى المذيعين يرفعو الضغط الواحد تلقاهو لابس بدله اكبببببببر منو وشينه اثار المكوة ظاهرة فيها حتى الاستديوهات حقتم قدييييييييييمة اما العجب العجيب الافلام الاجنبية اللي بيعرضوها قدييييييييييمه وسخييفه ياخ ماممكن يعرضو ليك فلم اول ايام العيد بصراحه اتمنى انو يهمتمو بالموضوع ده لانو بيعكس للناس برة صورة السودان

[$$ الملكة الهادئة $$]

والله عندك حق يا ريناد وفعلاً يعني أسي أنا في السعودية هنا الناس كلهم بيضحكوا على السودانيين ودا كلو من القناة السودانية والله لو صلحوها ولو الحكومةأ همت فيها شوية حا تتصلح بس عايزة اهتمام
وحتى المذيعين لازم اهتموا بيهم لأنو هما اللي بيمثلوا السودانيين قدام العالم ....