مســـــــــــــــــــدار + مســــــــــــــدار

[شـهد الكلامـ]

بى فرحه بقراااا كلاما سمح دورييين
منظوم القوافى حلو المعانى بين زوليييين
واحد لافانى من وسط الجموع استقبلنى باهلن ومرحبتيين
والتانى المهند اريت بولادتو تعقر امات ما عليهن شين

[مهند عبد الرحمن]

شهد الكلام الله يديك العافية
كلامك سمح لابدور وزن لا قافية
من ما دخلتي مواضيعك شيقة ووافية
زودتينا بي الشعر ودواك جرعتو شافية

[احمد يس]

* الكتوف لو اتساوت يبقى على الدنيا السلام
* لكن القلوب لو اتصافت يبقى ده الكلام
* العين عمرها ما تعلى عن الحاجب الا فى الاحلام
* وده غايتو فكرتى فى الدنيا ..وآخر كلامى سلام

[مهند عبد الرحمن]

يا ود يس اخوي النفوس متطايبة
ما بتجيك عوجة ما بتصيبك صايبة
مابنخاف الدهر لوجانا بي كم نايبة
كلمتك ما بتقع واطة وما اظنها ترجع خايبة

[شبانــــــــــه]

اتواضع صحيح الناس تعلي مقامك
وإن غدرك زمن تلقي الكرام قدامك
الناس تشتهيك تتمني طولت ايامك
سوداني منتدي ماشوفت زي ناسك
ماشوفت يوماً تب جلاس زي جلاسك

[احمد يس]

والله منتدانا ده بيحير
مرات تفكر انت مسير والا مخير
لكن ما بتلقى اجابة وافية للامور وتدور
تقول اريتنى ما فكرت لكين برضو عقلك بيبقى مدور

[مهند عبد الرحمن]

المنتدى الليلة بشوف حركتو غريبة
وين الناس وين البزيلو الريبة

لا سارونا لاتوت ما شفنا ليهم حاجة
وبت ابوظبي كمان لا طلت ولا حاجة

شهد الكلام مالك الليلة وين مسدارك
راجين كلامك راجين جديد اصدارك

ود يس كمان ما تحرمنا من طلاتك
قول اشجينا قول وادينا من صولاتك
ماتقول خلاص كفاي ما تبخل بي ابياتك

[شـهد الكلامـ]

الليله كديس الشعر متفلت على بى شرطو وووو

والقول السمح رافضنى حد ما درتوووووووووو

خلا افكارى ضايعه ولى مسدارى رحتا هجرتوووو

زى عمنا داك لامن سحبو البساط من تحتو ووووو

بس بى وعدى بكره بعاود لى نضم الكلام لامن اسوى عقدتوووو

[شـهد الكلامـ]

وصف الحال خلانى انسى ارمى تحيه

لشبانه صاحب طريقى وروحو ديمه ابيه

نورتا يازينة شباب ربى قاصداك خلى العيون منو تبقى ختيه

اتفضل معانا فى راكوبه والجبنه تدور دور واتنين تقول دى تكيه

[مهند عبد الرحمن]

نحنا كمان نسينا ليهو شبانة
ما قاصدين بس افكارنا هي التاعبانة
مرحب بيك كتير مانت صرت معانا
قول ادينا قول ماتخلي شئ بي ورانا

[احمد يس]

الشعر انا كنت بعيد عنه بالحيل
شجعنى الحنيس لكن بدون تطويل
امكن كلامى ما موزون وبالقافية مشلول
لكن بحاول واحاول امكن فى يوم اكون شملول

[شبانــــــــــه]

أن مرق الصباح وأن كان رجع متمسي
نوم القليب إلا العقل متحسي
أن جات شهد الكلام يا نفسي مارق دسي
نشف رواك خلاك تقولي وتنسي


يا ود عبد الرحمن قمر السبوع البدر
الدرب العلي والله تب ما ودر
السر المصون في قلوبنا مد وخدر
لا بد نلتقيك كان الله هون وقدر

[مهند عبد الرحمن]

تركت الشعر لي مدة ورجعتلو تاني
علشان منتدانا الفي القليب مساني
من مادخلت خفت الكلام ياباني
بس لقيتكم انتو وتاني ما هماني

[الاغبش]

سوداني الحبيب بيت يسعنا جميعا
نقعد في الارض ونحل العقدة
ونرضي للزعلان والخوة تب تتمدا
اصلو الحب في الله ما بخلي الامور تنقدا

الكرم الاصيل وارثنوا وراثة
في سوداني ديل درسوهو دراسة
نتعلم منهم ونصبح ساسة
ونفهم طوالي دون قلم او كراسة

يا ناس البلد بالحيل دايرانا
نمسح للامية ونعلي شانا انسانا
ومن سوداني تطلع قوافل اعانة
نعمر ونبني لمن نرفع راسا

[احمد يس]

ثبت كلامك ياصاحبى اوعى ترجع فيه
وصر على طلبك من غير ما تجرح بيه
ولو ما اتحقق مرادك اوعك تبكى عليه
واوعى تزعل بسرعه دا كله عشان ايه

[شـهد الكلامـ]

وضاقت بى دارااا كبيره كنت ناويه اقيل
ومشيت اعاين للبحر الكبير وكتييين يهدل
ورجعت لى الضل الضليل فكرتا فيهو اقيل
وفضلت اسال روحى ياربى وين المنزل
امشى قدام ولا اتوقف هنا ولا ياربى ارحل

[مهند عبد الرحمن]

استهدوا بالله وختو حملكن عليهو
ما في زولا قادر يسوي الليهو والماليهو
الا ساعة يقولها كوني حرم ما بتعصيهو
اسألو الله يفرجة وكل زول ييشوف البيهو


الزول غير خوة دنياهو تبقى ضلام
شقيش ما يقبل بتضيق عليهو تمام
مد ايدينك وما تنسى تبدا بيها سلام
تلقى الناس معاك وما بحوجوك لي كلام

[احمد يس]

عندى سؤال يا ابن عبدالرحمن
ليه الحروب والمعارك سببها نسوان
هى دى فطرة فيهم والا غيرة انسان
اسباب بسيطة جدا ؟يمكن لون فستان
والا لون ريميل بطلت موضته من زمان
والا خاتم سولتيير مكنش فى الحسبان
والله دى حاجة تحير الحيران

[مهند عبد الرحمن]

يا ود يس اخوي معروف اصلو شغل النسوان
من الحبة يسوو قبة وحتمال اكبر شوية كمان
بس سببهم ابونا ادم فارق درب الجنان
وربنا من فوق نزل عليهم قرآن


(مع الاعتذار إذا مسسنا اخواتنا بنات حواء بس الهدف المنازلة)

[شـهد الكلامـ]

مهند يا قيمة شعريه موعـــــــــوده
كلماتك ترد الروح المشـــــــــــروده
بعد كنتا همدتا جات حروفك ممدوده
مدت لنفسى واحيت الطـــــــــــــايوقه