سافر..!!

[ود الثوره]

سافرعليك الله وشيل الأمانى معاك
وشوف البيبكى عليك أو حتى يترجاك
أنا آه تعبتا خلاص من جورك انت على
تزعل بدون اسباب ومن تانى ترجع لى
خليك معاى واضح لا يبقى قولك ني
يا انت تبقى معاى يا اما ماليك بى
رغم الحصل والكان ياما صبرتا عليك
كان العشم جواى تصدق معاى عينيك
لكن غرورك فاض كتل البراءة الفيك
خلاك تقول مجبور أنا بكره برجع ليك
اوعك تظن فى يوم أنا قلبى برض الذل
او يستكين هيمان ويرجاك عند الضل
انت الفتحت الباب وقت للخصام ادخل
وانت الزرعتا الشوك وقلعت شجر الفل
أنا فى النهاية إنسان مرهف رقيق حساس
وداير اعيش فى امان واصافى كل الناس
لكن إذا جاء الريد فوق الكرامه وداس
مجبور اقول القول القالوا (بوفراس)
فى شعروا قالوا كلام مدهش جميل يسبى
لا تملك الحسناء مهما تكون قلبى
أنا برضى زيو كمان أعلنت لى حربى
وعايش قليبى بقول يا اخوانا آيه ذنبى
والله يا المريود خليتنى فيك محتار
مرات بشوفك نور مرات بحسك نار
مرسالى وكتين جاك قابلتو باستهتار
وما تنسي أى حريق دائماً بدايتو شرار
يا قلبى اصبر اصلو الظروف قاصداك
معليش إذا جاء الليل وخيم على دنياك
عذراً إذا الأحلام اكبر من الإدراك
وعفواً اذا حبيت زول ماعرف معناك

[هجروك حبي وعملو السبب حبي]

وااااااااااااااااااو جد ابداااع وللامام يا عسلنا وسعيدين بي تجربتك الشعريه دي
وننتظر الجديد
تقبل مروري

[ود الثوره]

تسلمي والله..لك التحايا..

[الشاعرة]

أعجبتني قصيدتك
إنها جميلة
أغنية حزينة
مترددة
شاردة
تائهة
ولكني تذكرت
"فريد الأطرش"
عندما يغني قائلا:
"الحب من غير أمل،
أسمى معاني الغرام"

[kereisto]

كيفك ود الثوره
دى مااغنيت سافر بتاعت جعفر السقيد وكاتبها حاتم حسن الدابى
دحين كان مانى غلطان

[ود الثوره]

تسلموا ياجماعه ماقصرتوا..!!

[kemo]

عذراً إذا الأحلام اكبر من الإدراك

حقيقة عبارة مدهشة تقتحم الدواخل عنوة وتستوطن الإحساس وإن كان من مفتاح لهذه القصيدة فأنا أعتبره هذه العبارة

[حنكوشة كوول]

بي جد عجبتني
انا بهنيك على الابداع


تقبل مروري

[ود الثوره]

تسلموا ياجماعه..!!

[رهام الحضري]

والله ابدااااااااع وكلام جدا رائع يسلمووووووووووووو