هل اولاد المغتربين حناكيش؟؟؟؟؟ ادونا رأيكم...!!

[دحدوح المريخابى]

واللة ماحناكيش لكن البيئة والنشاة التى ترعرع فيها تجعل تصرفاتو بنظر السودانين حنكشة
لكن هناك فى السودان نفسة حناكيش اخير المغتربين منهم!!!!!!!!!!!!!!!!!!

[أبو عمر]

أنا مقيم في السعودية في جدة .. وشفنا ولاحظنا أولاد وبنات المغتربين كيف عايشين بعضهم يخجل وما يستحق يكون أهله سودانيين وبعضهم أصييييييييييل أولاد بلد ذي الدهب الأصلي ما بتغيييييييير .
لاحظنا تغير في الكلام في العادات والتقاليد وفي بعضهم يشمئذ من السودان ولو على مراد ما عاوز يرجع ومخالطين أبناء البلد السعوديين وما دارين بهم الدنيا ودي المشكلة .. والبنات كما وللأسف الواحدة عاوز تتزوج سعودي أو إماراتي حسب بلدها عشان ما ترجع السودان وشايفة أحسن ليها تكون متغربة وعايشة كدة من ترجع السودان وبعضهم لديه عقد من السودان ماعارف الأفكار دي جابوها من وين بالضبط.
ياأخوان والله بلدنا مهما كان كعب ومهما كان ظروف ومهما كان وكان .. أحسن وأفضل وأجمل مليون مرة من تعيش في بلد غير بلد بغض النظر عن السعودية ولا اي بلد آخر .

[ولدفله يلعب سله]

معليش يا جماعه انا حرد عليكم انا واحد من اولاد المغتربين
انتو بتقولو الولاد المغتربين حناكيش ليه ادوني السبب
عشان عندنا قرش في ناس في السودان عندهم قروووووش كتر مننا
ولا عشان مغتربين ولا كلمه مغتربين والله الي في السودان احسن مننا حتا الفلاته ديل احسن عاشان قاعدين في بلدم ويديكم العافيه

[همس المشاعر]

انا اوايد اخوي الغالي ولد فله وافول ما كل اولاد المغتربين حناكيش المشكله هي انوا نحن نشئنا في بيئه تانيه مختلفه حبه لاكن اوصولنا وجذورنا هي ذاتا ما اتغيرت وبا العكس احنا بنحب السودان لانوا بلدنا الام وانا شخصيا عمري ما فكرت اتزوج واحد سعودي با العكس انا اعتز بشبابنا السوداني الاصيل المشكله هي في الفكره الماخدينها ناس السودان عننا انوا احنا حناكيش وعلى قولتكم في حنا كيش في السودان اخير منهم احنا وشكرا

[البساط الارباب]

كان زمان اولاد المغتربين حناكيش.. ولكن اليوم انقلب الحال... ..

[عمر زمان]

الحاجة المستغرب ليها _ انا مقيم في الرياض السعودية _ تلقى هنا اولاد منفوحة مثلا عاملين فيها اشفت الشفوت وتفاتيح للاااخر .... اها يمشو السودان يبقو طير ساااااااااكت !!! السبب شنو ما عارف

[lord of murder]

بسم الله الرحمن الرحيم

تحياتي لك المشرف العام
صراحه انا اسم الحناكيش بصفه عامه اسم غير لائق في نظري
بعدين انتو في السودان بتسمو الحناكيش على الما ذايق طعم البهدله او البشتنه والعايش في راحه تامه على رايك
اما انا عن رأيّ في ناس في السودان مرتاحين وعايشين كما لو انهم في السعوديه مثلا
وما لازم تسموهم حناكيش
الحنكوش زي ما بتسموهم بالظبط هو اللي بيتدلع

ملاحظه
(( على فكره ما لازم يقول ماما وبابا ))


على الفاضي يعني
وبنلاحظ انو اكثرهم بناات
فأنا لو علي احذف مصطلح الحنكوش من السودان اصلا لكين للأسف شكلو ما حيحصل لأنو اصبح منتشر في السودان للأسف with my love
your friend
(( lord of murder ))

[محمد نعيم]

اول مره احاول ان اقرأ هذا الموضوع لاني (كاشي) منو والكلمه دي الحناكيش ما بعرفوها
يا سيدي موش اولاد المغتربين بس جوه البلد يوجد ما يسمي بالحناكيش ومن ناس الاقاليم كمان
لما كنت طالب كنت بتعمد احكي للشباب الحاسي انهم حناكيش باني اكلت اليوم (ام بقبق) و(ام تكشو) و(ام شعيفه) و(موليته)
بقولي اني رطاني لما يسمعو الحاجات دي فالحنكشه متواجده في كل محل
وبعدين في حاكيش وفي متحنكشين
احكي ليكم موقف مره بي
كنت في كافتيريا الجامعه معاي زائر عزيز لي اثناء بنشرف في العصير صاحبي شاف واحده من جماعتو وهي تتحنكش وتتكلم بالحنكوشي تقول للشباب اللي معاها :- بابا وعدني يشتري لي تيكو لما انجح في العام الاول وحيوديني القاهره في العام التاني ولما اتخرج ...........................................وهي تحكي وتشرب في البيبسي والبيبسي ما قاعدة تشوفو الا وعندها قبضه
باختصار قرابة الساعه البنت بتحكي بلغة الحكنكشوش يعني حنكشة في الفاضي
الود اللي معاي زعل ومشي ليها وناداها علي جنب ولما شافتو قعدت ترجف وبدا يتكلم معاها بهذه الطريقه (يا بنت القروش بتاعت لقيط القطن كلها كملتيها في البيبسي حرا م عليك ابوك الشمس طلعت عينو علشان يرسل ليك وتكوني مستوره والله لو ما مشيتي من اولاد النعمة ديل لافضحك واجيب ليك دفتر ابوي بتاع الحواشة لان اسمك مسجل فيهو انك لقطي 12 قفه (قفه )دي وزن للقطن
من قال ليها الكلام دا تقريبا سنه كامله ما شفتها حايمه بكفتيريا علوم بجامعه النيلين وهي كافتيريا مشهوره بالحناكيش
اسف اذا اطلت ولكن هذه نهاية الحنكشه ويا متحنكش وما قدر الحنكشه احسن تبعد حتلقي ليك واضح يفضحك خليك خشن
مع امنياتي للجميع بالرقي وليس الحنكشه

[رومنسي ومنسي]

ماعتقد حناكيش

طبعا انا منهم هع هع

البيئه والمكان الذي عاشوا فيه اتغير تعاملهم مع الناس وتغيرت لغتهم الى حد ما

ولكن لا ينطبق عليهم كلمه حناكيش زي مابتقولوا

تقبلوا مروري

[الزعيمة ذات العزيمة]

[frame="10 80"]

لقد صعب علي لكثرة ما كتبتم و كثرة عددكم أن أستشهد أقوالكم هنا فكتبت ما كتبت عامة عليكم:

خلاصة القول و قد قرأت كل ما كتبتم:
1. المغتربين منهم الحناكيش و منهم من لا ينطبق عليهم الوصف ذلك مثل اختلافهم نساء و رجالا
2. السودانيون في أرضهم أيضا يختلفون نساء و رجالا إذا فمنهم الحناكيش و منهم غيرهم
ما يحدد أن فلان حنكوش هو ما قاله بعضكم تصرفاته و سلوكه فقط أما ما يرميه بعض الغير مغتربين في السودان من أوصاف على المغتربين فذلك يرجع إلى أسباب :
- التربية: من الوالدين أي أن يحسد المغترب و يتمنى مكانه فيطلق عليه الألقاب أيا كانت شفاء لغله
- الوراثة: و هذه لا دور فيها فالإنسان لا يرث الأخلاق و الصفات
- البيئة: و هي تناصف التربية في تأثيرها فهي أيضا تحدد سلوك الفرد يميناً يذهب أو يساراً

و عليه فإن كل من حدد صفة عامة للحناكيش و أطلقها على المغتربين عامة أو غيرهم عامة فهو يفكر تفكيرا استقرائيا أي كأن تتأخر الحافلة فتقول: جميع سائقي الحافلات يتأخرون، كلهم مهملون. و هذا قد يوقع صاحبه في مشاكل في كثير من الأحيان فانتبهوا (( ما يلفظ من قول إلا لديه رقيب عتيد ))

أرجو أني أجزت بقدر ما يحقق الفائدة


[/frame]

[the golden boy]

انا مع الجماعه مش كل العايشين بره السودان حناكيش
وانا شخصيا اشتقت للشكل مع الكمساري في نص القيمه

[عجباني]

يا ×?°][®][^][®][«®°·.¸.•°°·.¸¸.•°°·.¸.•°®»أخوانا الحنكوش حنكوش من يومه«®°·.¸.•°°·.¸¸.•°°·.¸.•°®»][®][^][®][×?°

[دلوعة النيل]

والله ما أي زول مغترب يعتبر حنكوش وأنا واحدة من الناس قاعدة خارج السودان وما بعتبر نفسي حنكوشة بدليل إني لمن مشيت السودان السنة الفاتت عشان أمتحن شهادة صاحباتي قالوا لي إني ما جاية من السعودية لأنو ما عندي حنكشة برة وكأني عايشة في السودان من زمان

[walead gamal]

المشرف العام المحترم
الموضوع بالفعل عاوز نقاش لانو بالجد فيه تجني علي الناس الاتربو
خارج الوطن وتمتعو بكل تلك الرفاهية التي ذكرت واكثر
بس انت ماذكرت الحناكيش اسياد الاسم
والاتربو في السودان في مستوي معيشي يفوق ابناء المغتربين
بمرحل لانهم ديل حناكيش اولاد حناكيش
انا اتولدت خارج السودان واتربيت خارج السودان بس ماشايف نفسي
انتمي لتلك المجموعة فانا والحمد لله ابن بلد بكل ما تحمل الكلمة من معني
والفضل يعود للوالد الذي كان وما يزال يفتخر بكل ماهو سوداني اصيل
ولو كان بايدو كان ودانا المدرسة بي كارووووووو!!!!!!!!!!

[da king]

اتمنى من الله التوفيق في اول كتابه لي بالمنتدى

بعد التحيه اود ان اعرب عن اعجابي الشديد بالموضوع رغم بعض التحفظات و اظن انه لكي نكون نعلم من هي الشريحه اللتي يستهدفها الحوار ان نقوم بتعريف من هو الحنكوش
فاذا مان الحنكوش هو من يقول بابا و ماما اعتقد ان هذا التعريف خاطئ جدا كلنا نعرف ان الحناكيش هم مجموعه من الناس اصحاب اصوات وحركات وتصرفات غريبه او شاذه بمعنى ان كل من يشاهد هذا الحنكوش حيقول عليو حنكوش .
ولكن ان نقول ان الحناكيش هم ابناء المغتربين فهذا ظلم انا مثلا ابن مغترب او كنت لاني انا الان مغترب ولكن كنت اشاهد بعض من ابناء الداخل اذا صح التعبير (كلمه حناكيش شويه عليهم) .
واشان الموضوع برضو ما يبقى شخصي انا مثلا لما كنت صغير ابوي قالي قول بابا و ماما ز
لكن برضو قالي البحمر ليك قدليو عينو
اشان كدا ما بقدر اقول اني حنكوش لكن مثلا مره في الجامعه جاني واحد من ابنلء الداخل قالي شنو
تخيلو طلب مني اني اشترك معاو في النادي (ما متزكر ياتو نادي امريكي الماني المهم) قلتا ليو بي كم قال 3 مليون في السنه بكل بساطه قلتا ليو يــــــــــــــــــــــــــــــــا بلاش والله انا لما كنتا بلعب في الجم لعبتا في نادي الشاطي
وبرضو تقول لي ناس برا حناكيش
بالمناسبه انا كاتب بالون الازرق اشان هلالابي

[ود النيل]

والله أولاد المغتربين ماكلهم حناكيش لأنو
في السودان في اولاد وبنات حناكيش اكتر من المغتربين
والايام دي عندهم حركات جديده الجيل وكوي الشعر والكوافيروإلخ
وأرجو من كل أعضاء المنتدى أن ما يظلموا أولاد المغتربين لأني أنا زاتي منهم ولكن
ما حنكوشي

[Sudanes 4 Ever]

[a7la1=CC6633]السلام عليكم[/a7la1]

دي أول مشاركة لي و لأنو الموضوع مهم يمكن أطول عليكم شوية
أعتقد إنو الحنكشة ما خاصة بالمغتربين لأنو في حناكيش بالجرادل و هم ما طلعو من البلد شبر واحد
و مسألة اختلاف المعاملة شي طبيعي, أنا جيت السعودية في سابعة ابتدائي و كان عندي مشاكل كتيرة في التعامل في البداية و بعدين بقى كل شي عادي, و لمن رجعت امتحن ما كان في مشاكل نهائي بس أسبوع كدة و كلو بقى 100%
و الغريبة إنو برة نحن سودانين في نظر باقي الدول 100 % و أي زول في راسو حاجة على السودانيين بيجي يلفها معانا لكن لمن نرجع السودان الناس تقرب تعاملنا على إننا لاجئيين.
مسألة الراحات و الترطيبة دي مسألة مفروغ منها لأنو الزول لمن الله ينعم عليهو أكيد ما حيرفس النعمة و لا أنا غلطان؟
بعدين في واحد قال 2500 تعيش الزول عيشة تمام, أنا اتحداه في كدة , الناس دي مفتكرة الدنيا هنا بتمطر ذهب و فضة.
أما مسألة إنو ولاد المغتربين ما بيعرفو شي عن بلدهم فدي حاجة ما ممكن تتعمم على الكل و في ناس في السودان ما بيعرفو غير المنشية و كافوري.
و لنا عودة
و السلام خير ختام.

[مواسم]

انا بقول ماما وبابا بيقول على حنكوشه لا انا من قمت اتعودت على الكلمه دى ولقيتها احن واحلى ماباكل كسره قالو برضو حنكوشه لكن باكل اى شى حتى الملوحه المابعرفوها الحناكيش وعشت اغلب عمرى فة السعوديه لكن بعرف حاجات بلدنا البعرفوها اللى عايشين فى القرى عارفين ليه لانى كنت بزور السودان كتير واهم شى عشان اولادنا يتعرفو على تراثنا وعاداتنا انه مايطولو من السودان وبالمناسبه ماكل المغتربين حناكيش فى ناس عايشين على الله ويقولو مغتربيت ويجو يتفلهمو او يتحنكشو الله يعينو معليش طوبت عليكم

[سهويا]

حضرة المشروف :
الاعضاء الاحباء من منظاري قد طال الحديث والنقاش في هذا الموضوع ......

اين هي الحلول ؟

كيف لنا ان نغير تلك الافكار التي بنيت على اسس واهية؟

من هم الذين يطلقون هذه التسمية؟واين هم من نوافذ الحياة؟!

ولماذا نعيرهم اهمية؟!

وهل هناك من يتعايش مع هذه التسمية وهو راضيآ وراغبآ؟

[الديامى]

ولله هم مش حناكيش حناكيش بس الدلع الزايد والقروش والتعويده هى المظهراهم متحنكشين


بس هم اتعودو على كدا