اولاد المغتربين بين نارين

[moony]

الموضوع خطر لي لاني انا نفسي عانيت الامرين

النار الاولى نار الغربة عشت وتربيت اعرف عن اهلي صورهم وما يحفظني اياه ابي وامي
دي عمتك فلانة اها عندها منو عندها 3اولاد وبنتين اساميهم ...........................
المهم صور شرائط فيديو وكلام نحفظوا. كان الاهل بالنسبه لينا كده
ولا تتكلم معاهم في التلفون كلام عوير ومسيخ ولا تقرا ليهم نشيد المهم حركات بس تغيظ وانت شغال صوت بلا صورة .
لمن رجعت السودان لقيت كمية من الحنان المفقود فرحت وانبسطت لكن المشكلة ما قدرت اتاقلم كلام غريب ومصطلحات اغرب بقت علي نار التاقلم والاندماج.
ولو تصدقوا حاجة لي 10سنين من عدت نهائي ولسه في مصطلحات ما بعرفها مع اني قريت الجامعة هنا
وبرضوا شغالة هنا.والفجوه مازالت عميقة.!!!!!!

[roza]

والله يا moony ما عارفة أقوليك شنو..أنا برضو من المغتربين لكن أبد ما حسيت انو في فجوة بيني و بين البلد و كل ما أنزل اجازة مع الأهل السودان بكون انا و الاسرة دخلنا في الجو طوالي و بدون مقدمات و ابد ما بنواجه اي نوع من المشاكل في الاكل ولا الجو ولا الناس و لا البيئة زاتا.لمن أهلنا زاتم بنخلعوا هناك و بقولو لينا انتو مغتربين ؟؟ و بكون في وشهم في دهشة لما يقولو مصطلح و يلقونا عارفينو ول لمن يقولو كلمة يكونو دايرين يدقسونا بيها و يلقونا نقشناها سريع. و طبعا. و طبعا دا راجع لي أنو اسرتي في بلد المهجر و بالأخص الوالدة كانت ديما بتخلينا بي التصاق بالوطن الأم عن طريق التلفزيون و الازاعة و الصور و الحكاوي و التفسير للمصطلحات وكل مايمت بصلة للبلد و ناس البلد و كان ارتباطنا وثيق جدا بالبلد و الحمدالله.

[nourelsalam]

بسم اللة الرحمن الرحيم
الاخت moony
لك التحية والتجلى وانتى تفتحتين هذا الوضوع والطرح الرائع عن ابناء المغتربين وفلذات اكبادنا التى تمشى على الارض
انا اقراء موضوعك وفى راسى مليون اجابة ومليون طرح ولكن انا كتبت موضوع قبل كدة عن هل الغربة قد غيرت من سلوكيات الفرد السودانى اى كان من النوعين الذكر والانثى ولكن اقول لك اختى العزيزة
ان الغربة متل كل شي فى الدنيا لة إيجابيات وفيليها سلبيات
من إيجابيتها أنها بتزيدك معرفه وخبره بالحياة العمليه والعلمية وبتنور بصيرتك
فى بلاد الغربة بتشوف المغتربين من كل البلاد التانيه بتشوف الهندي والبنغالى والسوداني والمصري والتركي
والافغاني والفلبيني وووووووووووهلم من الناس بتتعرف على عاداتهم وتقاليدهم
وممكن كتير تتعرف على حكيهم وتأثر بالمقابل عليهم وتعرفهم ببلدك وتقاليدك
وهذة من محاسن و أحلى مافى الغربه
وبرضو أنو الواحد دائما يحسب حساب يعطي صوره طيبة ورائعة ومحترمة على بلده بكرمه وشهامته
وبرضو هذة الاشياء من محاسن الغربة والاغتراب
واكبرمابيعانى من سلبيات الاغتراب والغربة ما ذكرتى انتى اختى عن الاطفال ومعانتهم فى الغربة مابين اب مشغول عنهم طول اليوم يكدح ويشقى من اجل اسعادهم ومابين ام قد غابت عن الجيران والمناسبات والافراح وحتى الاحزان ومابين اطفال المغتربين واغلببهم فد سبعوا بكلراهية الاحوال فى السودان ومن المعاناة للاسر قبل الاغتراب ومن السجن داخل اربعة حيطان بعيدا عن الاهل والاصدقاء والمعارف وبعيدا عن الاجداد والحبوبات والتقاليد السودانية وينشاء هولاء الاطفال الذين لاحولة ولاقوة لهم الا الانتظار مع الاهل حتى تحسن الاحوال والعودة فى يوم من الايام الى الوطن وقد لاتكون العودة مدروسة وفيها خطة واضحة فتجد اغلب السودانين قد تطول غربتهم الى سنوات طويلة بحكم اننا فى انتظار الفرج وتحسين الاحوال فى السودان وبناء المنزل وارسال السيارة وغيرة من الاشياء التى تجعل منا نحن معشر السودانين اكثر الناس سنوات فى الغربة والاغتراب على غير بعض الدول الاخرى مثل المصرى والذى لة هدف معين فى سنوات معينة بحسابات معينة ولا يزيد عنها ولو ساعة
من المشاكل ايضا اختى مشكلة الدراسة الان فى دول السعودية والخليج وهى ان الطالب يولد ويعيش حتى بلوغ السن للدراسة الجامعية وعندها يجب على الاجنبى وخاصة السودانى ان يرسل الابناء والبنات للدراسة فى السودان
وانا فى نظرى ان هولاء العرب والخليجين قد احجفوا فى حق الاطفال السودانين خاصة واهلهم ايضا لان الاب يكون قد قضى معظم شبابة وسنوات عمرة الطيبة والرائعة وسنوات هى اجمل السنوات وهى ماقبل الاربعين يخدم فى هولاء البشر ويوكل لحمة عند قوتة وفحولتة ويرمى بة وباطفالة فى سن مابعد الخمسين واواخر الاربعينات وعلية فان الشعوب العربية والسعودية كان من الواجب ان تعمل تمثال مثل تمثال الحرية الى كل من خدم هولاء البشر لانة اعطاهم اجمل سنوات العمر وقد ضاع العمر ياابى واخى مع هولاء البشر وصارت من المشاكل مع كل مغترب هى حكاية المدرسه ودوختها ومعادلة الدرجات
ومصايبها من جهه وبعدين حالة المرض وهو ينخر بصدر كثير من المغتربين وانا اعرف كثير من العائدين من دول الخليج بفشل كلؤى وضعط دم وامراض السكرى وغيرة من الامراض
حتى اننى وصلت الى ان الكثير من المغتربين فى الخليج والسعودية يبنون بيوتا بعد عشرات السنين فى السودان ليدفنوا منها ويموتون مع اننى اومن بان الاعمار بيد الله تعالى ولكن فكروا معى واحبوا كم من مغترب قد عاد بعد سنوات طويلة وقد اكمل البيت وعاد نهائيا فلم يتمتتع بما بنى وبما عمل
لان هولاء العرب لن ولم يستغنوا عنك ابدا ابدا طالما انك فيك بقى عظم ولحم
وهناك وسلبيه تانيه هى انك بتعجز تربي أولادك على نفس الطريقه التى تربيت عليها انت ببلدك
اختى اكتفى بهذا القدر من الرد واسال اللة ان يرد غربة كل مغترب
وكما قال الكابلى غريب والغربة اقسى نضال غريب والغربة سترة حال
وربنا يصلح الحال فى السودان حتى تعود كل الطيور المهاجرة
مع تحياتى
نور الاسلام

[انا اميرة الورد]

[align=center]والله كلامك صح
الموضوع فعلا خطير
انا وحده من الناس بخجل
انا احيانن كتير ما بفهم
الكلام وبحتاج احد يترجم

بجد وبخجل جدا من نفسي
يعني انا سودانيه بالإسم بس
ما زرت البلد ولا مره
وما بعرف عنها حاجه
بس اشياء بسيطه

بجد انا في قمت خجلي وانا بقول كدا
وحاسه بجد
ان في فجوات بيني وبين بلدي
الله يعطيك العافيه على الموضوع
تقبلي
تحياتي
امنيرة الورد[/align][/size]

[moony]

الاخوه روزا واميرة الورد ونور الاسلام

مشكورين على المشاركة انا طرحت الموضوع لانو بالجد خطير وحاولت اشارك الجميع احاسيسي عشان تحس بالموضوع الجد ما ساهل.
وفي ناس ما بتجي السودان كل اجازة.
الواحد في الخارج تربى بطريقة معينة تجي السودان والناس هنا ما بترحم وزي ماقلتي يا روزا مخصوص بيعملوها.وفي اولاد حلال بالجد بيقيفوا وقفات ما ساهلة.
وفي النهاية كان الله في عون كل مغترب.

[حنضله]

والله المشكلة فى انو فى ناس بيكونوا مغتربين بس محافظين على العادات والتقاليد واللغة وكل ما يتعلق بالبلد وفى ناس بتنسى اول ما تطلع وتنصدم بالحضارة الاخرى وبيساعد على كدة عدم مبالاة الاهل ولهذا لم اسغرب ما قلتى ومعليش ان كان الكلام جارح او ما شابه بس ده ما منكك .

[ام الانبياء]

والله كلامك صح
الموضوع فعلا خطير اطفال المغتربين... والسجن داخل اربعة حيطان بعيدا عن الاهل والاصدقاء والمعارف بعيدا عن الاجداد والحبوبات والتقاليد السودانية وينشاء هولاء الاطفال الذين لاحولة ولاقوة لهم الا الانتظار
وربنا يصلح الحال فى السودان حتى تعود كل الطيور المهاجرة

[ahmed1994]

مشكورة يا موني
لكن انا الموضوع ما كان مروع معاي كتير
والواجد بنزل إجازة تقريبا كل سنة دي بعيش فيها مع أهله وبتأقلم معاهم
وانا لمن مشيت السودان صحي كان عندي مشاكل تأقلم في البداية مع المجتمع
وليس مع الأهل أما الأهل فتأقلمت معاهم عادي وما واجهتني أي مشاكل والحمدلله

تقبلي مروري

[SNGAM]

السلام عليكم ورحمة الله وبركاتة

اولا هذة مشكلة تحصل لواحد انسلخ من جلدة وبعد فترة عايز يلبس جلدة من جديد المشكلة من اسرتك
لم يتواصلو مع الاخرين عشان يكون فى توازن وخاصة فى دول الخليج هناك جاليات سودانية يمكن التواصل معهم ليكون التلرابط مستملر اما اذا كان فى اماكن مثل اوربا او امريكا فلة عذر ولا اجد مشكلة فى التاقلم مع الوضع الجديد ولايحتاج لمجهود حاولو انا طبعا مغترب لى حوالى عقدين من الزمان وابنائى يذهبون للدراسة فى السودان ولم تواجهم اى مشكلة فاذا كان هناك تواصل لامشكلة اما الذين ابتعدوا جسديا ورحيا فتواجهم مشاكل وربنا يكون فى عونكم




والسلام

SNGAM

[صلاح العجباني]

اسمعو وعو اللي في المنتدى تلاته ارباع المنتدى من المغتربين
والحناكيش اكترم من السودان يكونو مولودين في السودان وبعدين يمشو الغربه وبلقو الراحة وبتحنكشو لينا وبقولو بعدين اولاد المغتربين حناكيش

[صائغ الحروف]

يعنى معقول يااميرة الورد
الى الان
مامشيتى السودان
فجوه شديده حتقابلك
امل ان تتخطيها
انا من ارضك
ياسودان
ياارضا
رحيمه
شكرا على الطرح

[رهام الحضري]

فعال معظم المغتربين بعانو من الفجوة دي وحتى انا بحب السودان وفي نفس الوقت بحس نفسي غريبه ماعارفة حاتاقلم كيف مع الوضع هناك لمن امشي الجامعة غايتو الله يستر