في محراب الانتظار

[عشوقة]

إهداء للغالي,,القريب..البعيد


"1"

صابر عشان في يوم أشوف
فرحة عينيك..
وأطريك بلحظة شجن
وأرحل إليك..
يا غنوة هاجت من لحن الهوى
بخاف عليك..
يا إحساس دفين ساكنه القليب
أنا كلي ليك..
يسري فيني الحنين وأقول بتين
أحضن إيديك..
إتولد بجواي عشق جميل
عشتوه بيك..
كيفن يقدر شوقي الزاد أنيني
يجي يحتويك..
أنا يا غرام عذبني أبيع دنياي
باللي فيها واشتريك..
وأهدر دموع عمري البيفنى
لو بيرضيك..
وأقطف ورود درب الهيام
عشان أهديك..

"2"

لغة العيون البيننا
من غير حروف..
حبنا اللي عاش طول الحنين
رغم الظروف..
قليبي بعد الفراق المحزن
بيجيك ملهوف..
يا ما اتمنيت لو اشغل فكرك
وبيوم تشوف..
لانك ملاك بين البشر
لانك عطوف..
غامرت بغابات هواك
تهت بكهوف!!..
حبيت شهد عيونك وإتخارجت
عن كل مألوف..
ترجمت حكاوي عينيا وبقيت
بالهوى فيلسوف..
لين ما لعبة غرامنا الصغيرة
بقت عالمكشوف..


"3"


نظرة عينيك حركت فيني
كل الحواس..
بعد الغياب شوق الحبيب
ما ليوه قياس..
سافرت لمدن أماني الغرام
من غير أساس..
هويت..جنيت..فتشت عنك
بعيون الناس..
حصنت نفسي من أسى غرامك
ومات فيني إحساس..
لقيتني برسم حروف اسمك
في كل كراس..
وأزف كل أحلامي ليك
يا تاج الراس..
وألمح ظلال خطاك تجيني
يا شبه الماس..
أشعل في رحيل وجودك
بقايا نبراس..
بذكرى لقانا بشرب عشانك
زوايا الكاس!!..


"4"


يا منايا..يا هوايا..يا أسايا
يا دمع مسافر..
يا جرح الوحدة الكلوه أنين
باليوم الماطر..
يا بحر الآنه الجافي بتسكن
قلبي الحاير..
يا نور العين..وقمر الليل
وفجر الخاطر..
يا مطره بتغشى أراضي الحسره
بليلي الساهر..
يا درة عمري المار بقسوة
وبرضو صابر..
ياليالي برودي..وسبب وجودي
وحبي النادر..
يا واحشني وانت معايا..من
إحساسي حاذر!..
يا جنون ريدي الجواي مدفون
ليه بتشاور..
ياللي بناديك ولو بعيد بتجيني
وتقول حاضر..


"5"


لو مالقيتك.. دوم حاشوفك
بكل الأمكنة..
وأواقات فراقك لحظاتها ليه
بتمر سنه!!..
كلماتي ليك ضاعت سراب
زي الغنا..
وأطياف أحلام لقاك بتمر
عبر الأزمنة..
نسمات عبيرك تدور بدرب
ليك انحنى..
لو تسأل قمر العشق من بهواك
حيقول انا!!..
ارحل بالماضي البعيد وارجع
بتلقاني هنا..
لهفة شوقي بتطريك بغيابك
وترسم منى..
ورغم أقدار عمرنا التايهة بنضل
أنت وأنا..

[احسان]

[grade="FFA500 FF6347 008000 4B0082"]يا سلام سا سلام

بصراحة كلماتك رائعة

خليك في الانتظار

تسلمى على البوست [/grade]