يا المغتربين الكلام ده صحي

[moony]

انا كتبت البوست لانو الكلام كتر بالجد
وحاولت اعكس صورة
انا معاك اخ محتار انو الكويس في والكعب في
والسودانين مشهورين بوقوفهم مع بعض لكن الاتغير شنو ده الدايرين نعرفوا
ومشكور على المرور العزيز

[قمر ام درمان]

ياود الدرديري ... ويادفع الله .. انا معكم في كل كلمة اتقالت .. وكل مغترب عاش في جدة
بالتحديد مر بهذه التجربة .. والمغترب السوداني الذي يعيش في جده ( له وضع خاص) ..
حتى ان بعض الاجناس قالوا عننا السودانيين مابحسوا .. الشقق المفروشة دي عملوها لمنو
نعم انا مع كرم الضيافة والترحيب بالقادميين .. لكن ان تستضيف الحجاج والمعتمريين
اكثر من ثلاثة اشهر في شقتك التي لا تتعدي غرفها الثلاثة اكثر من ثمانية اشخاص هذا
كثير .. تاتي للمنزل بعد ساعات عمل اكثر من عشرة ساعات لا تجد الراحة والهدوء
تقابل بالضجيج والفوضى والشنط وكوم الجزم .. اعزكم الله خارج الشقة .. تلقى
العيان عاوز توديه المستشفى .. وزيدكم من الشعر بيت مستشفيات خاصة .. والفاتورة
تقصم الظهر ..والعاوز يمشي السوق .. والعاوز والعاوز..
ياجماعة ماتلموا الناس قبل ان تعرفوا ظروفهم .. زي ماقال ودالدرديري واظنة حكى
تجربته .. انا اعرف ناس في جدة غيروا سكنهم .. قطعوا تلفوناتهم .. بسبب ناس العمرة
والله ماكعوبية لكن ظروفهم.. واعرف اسر طردت من شققهم بسبب كثرة الضيوف ..
واعرف اسر الجيران قالوا ليهم بنجيب لكم الترحيل ... والله هموم المغترب اكثر من
من شعر راسه بالاضافة على البيوت المفتوحة في السودان التي يصرف عليها المغترب
انا مرت بينا تجربة .. ان احد الحجاج توفي عندي في البيت بعد الحج .. والله لا يوريكم
الظرف المرينا بيه ..

[اسامه خضر محمد على]

السلام عليكم والله الكلام دا صحيح وما صحيح فى سودانين الواحد مكشر بدون سبب وبى سبب وفى واحدين تعبانين وهم زاتم عاوزين مساعده وفى واحدين بفتكروا انو اى سودانى جديد حيشيل راتبوا بس السودانيين الموجودين فى قطر معظمهم واكرر معظمهم اخوان بنات وناس حلفته مدفوعه ويمكن دا عشان ظروفهم احسن من باقى المغتربين والعايز يعرف الفرق يركب االخليجية ويشوف ناس الدوحه مميزين كي وى النهايه السودانى الاصيل لايمكن ان تغيروا غربة او وظيفه اوبلد ودى حاجه عارفها كل الشعوب والسلام

[مزيج النيل]

اخى نورالاسلام لقد اوجزت رغم الافاضة بما فى جعبتك من تجارب واثقلت على الورق بنقيض افرازات الشواز من البشر فى كل المجتمعات نحن بشر والبشر خطاؤؤن0
لانعيب زماننا والعيب فينا !!!!!
والنرجسية طبع من طباع البشر والمثالية كذلك ولكن الايمان بان الكمال لله وحده حتمى على كل مسلم ان يومن بها
المتغيرات سبب من الاسباب والمبادى صفة راسخة يتغلب على المتغيرات 0 ومن له مبدى ثابت
نوصفه بابن البلد ومن هزته المتغيرات نعتبره من من صدمتهم الحضارات المعولمة بمفاهيم التحرر الخلقى
ليس كل من اوصد الباب بوجه اخيه دليل على سلبية المجتمع باكمله بل هو فرد يمثل نفسه وسوف يجنى ثمار ما اغترفته يداه وذلك عندما يعود ليندمج فى المجتمع الذى انكره على نفسه0
لذلك نخص نفرا من الناس باغترارهم بالدنيا من باب الجهل بان وصف الرجال ياتى من باب الترحاب الحار وليس من حلاقة الشعربالموضة وارتداء ثوب الخداع من الاناقة لاظهار الثراء والتبهرج امام الناس بان له شاءن وقد بخلة على اخيه ببشاشة سودنتا المعروفة
فالعتبى لك حتى ترضا 0نحن نوادر الشعوب ان وصفونا بالنفايس اجحفوا وان مدحونا عند الشعوب لم يفلحوا

[spanisheyes]

اخت موني موضعك فعلا مهم
يعني هو في ناس كدا فعلا وفي ناس
لا
في ناس يشوفو سوداني يعملو نفسهم ما بيعرفو
فعلا وبتحصل هنا انا ما حقول ليكي لا
لاكن في ناس والله يشيلوك فوق روسينهم ويخدموكي
والله تحسي نفسك في بلدك ما في الغربة

[ام الانبياء]

ابدا الكلام دا ماصحيح
وانحنا مما نلاقي لين سوداني
محتاج لي مساعده بنتمنا ان نخدمه بعيونا

اصابع اليد مازي بعض

[اساور]

الغالية مونى سلامااات

انا بفتكر انو الكلام دا صحيح بس مش بالمعنى الواضح للجميع انه دي كعوبية مننا بس اوجز في شيئين اولاهما الاوضاع المادية وهنا في دبي معظم الناس ساكنة في غرفة واحدة ولو بالغو غرفة وصالة وذلك نسبة للغلاء في البلد يعني بالواضح كدى مافي مكان يبيتو فيهو الضيف ما عدا الناس الاوضاعهم جيدة فمثل هؤلاء بالجد كعوبية منهم اما الشيء الثاني الناس دواماتها طويلة يعني لا تقدر تزوغ من الدوام ولا تقدر تطلع بدري فهنا ما ذي هناك الناس خايفة على اكل عيشه يعني مثال يضرب لي قريبي يقول انا في المطار الساعة 7 صباحا طبعا اكيد ما حاقدر امشي ليه لانو عندي دوام طيب يقول المساء واقول لازم انام لاني بصحه بدري لكن لو جاء في اجازة الاسبوع ومامشيت ليه بالجد تكون دي كعوبية مننا وطبعا الزول البجي داير يطلع ويشوف البلد وعايز واحد يكون مرافق له وانحنا في بيت الكل فيه بيشتغل اخيرا والله انحنا ما كعبين بس الظروف صعبه وصدقوني بنحب الناس ونحب اللمه لكن برضو اعزرونا.
مع عظيم ودي،،،،

[زوول زط]

خوان مهند و Sarona
انا معاكم انو الناس بتكتر وتستغل حسن الضيافة استغلال سئ للغاية
والله يعينكم يا ناس جدة

الاخوة
علم الدين
جذاب وما كذاب
osama77
بنت ابوظبي
الممشى العريض
ود الدرديري
هبه
استارو
ش

[نيرمين]

والله الظاهرة دي كتيرة وشنو لما ما تجيبي ليهم حاجة يزعلوا منك سبحان الله

[ود الريح]

يااخوان الكلام ده صاح لكن لماذا طيب الواحد فينا بطلع الدوام الساعة سبعة بجى راجع ستة مافيهو نفس الى اى شى

[Sudani_w]

والله ياموووني الشباب ماقصرو في الرد

بس ناس جده ديل وانا واحد منهم ..........نحنا حاله خاصه زي ماقالت الاخت(ام العشره) نحنا حاله خاصه

الله يعينا يا ناس جده

...............يتبع

[emadbaan6]

!!!!!!!!!!!

[أبو ياسر البطحاني]

يا إخوان ....
الشعب السوداني ... مشهور بسماحته ... وجوده وكرمه ...
وبصراحة صفات كثيرة لا توجد بأي بلد عربي ثاني ....." وأنا أراهن "
فلما يكون في شخص جاي السعودية مثلاً جديد .... هو بلا شك ينظر للسودانيين في السعودية نظرة مختلفة عن السعوديين .... ولما الواحد كدا يمشي ساي وما يسلم عليهو حتى ..... بياخد في نفسو ... لأنو دي ما طباع السودانيين ......
لكن يا جماعة البعض معذور ..... يعني دي بلاحظا في مكة عندنا الواحد يكون في جهة حكومية أو في مكان عام ... ويجيك واحد ينظر لك نظرات غريبة تلفت الانتباه .... وهو في ملابس رثة .... ووضع غير لائق ......وللأسف يكون الأخ دا من السودان ..... أنا بقول للأسف .....
وفي وجه الخصوص بحكم إني بمكة .... فأنا أزور .... مخيمات الحجاج ... السودانين .. واتطمن عليهم واسئل عنهم ... وليس هناك أي جفاء بمكة أو تجاهل للسودانيين ... فيما بعضهم البعض


احترامي ..

[سمل ود الولياب]

هههههههههههههههه والله موضوع رائع جدا : سمعت والله قالوليك

[سوداني2010]

لا لا الكلام دا ماصح
والله عموما عن نفسي لسع مالاقاني سوداني كعب هنا في الغربه بالعكس والله الواحد يكون راكب العربيه ومامنتبه يسلمو عليك لمن تحتار ياربي دا بعرفني ولاشنو وبالذات في الجوامع يسلمو بالاحضان يمكن في اعتقاد البعض في كعبين لكن ماكلهم
تقبلي مروري

[أوتاشو الحلفاوي]

شكرا موني على الكلام الحلو
انا مريت بظروف ما عارف كيف هي
دي كان قبل سنوات واخر قبل شهور
وهي ان كنت اجلس في مكتب مر امامي سوداني ورجع وقال معلش انا ما افتكرتك سوداني
قلت له حياك الله خير ؟؟ قالى والله انا لي اكثر من ساعتين بفتش على مكان سوداني قريب لي
ما حصلته للحين قلت له انا اعمل في هذه الجهه اكثر من 5 سنوات واعرف كل السودانيين القريبين مني
وسالته اسمو منو المهم قام جاب لي اسم ما عرفتو طيب اي تلفون او جوال قال والله انا اعمل خارج لرياض
الرياض وما اعرف له عنوان الا انه يشتغل في محطة قريبة من هنا المهم قلت طيب الزول دا ما في هنا
لكن انت داير اي مساعدة قال ايوة انا جيت من خارج الرياض وراجعت السفارة ودفعت كل المبلغ المعاي والان اريد ان اعود الي محل شغلي خارج الرياض وما عندي حق التذكرة قلت له كم يكلف .. قال مائة ريال المهم اديتو الميه بنفس راضية وانصرف شاكرا بعد يومين وفي السكن ونحن كنا ثلاثه ...
المهم انا قلت للشباب والله مر قبل يومين سوداني مضيع ليه زول قام احد الاخوة اوع يكون السوداني الحرامي دا قلت حرامي شنووو قالي دا حرامي يروح اي مكان فيه سودانين ويقول ليهم انا قاعد افتش سوداني ويجييب اسم وهي الخ ثم كانت المفاجاة والذي ادي ان نصدق الموضوع ان اخونا الاخر
مر عليه نفس الشخص وحكي له نفس الموضوع اللي حكاه لي واعطاه ما جادت به يده ..
نفس السيناريو تكرر معي مرة تانية في الرياض ..دول هما السودانيين اشباه الرجال
للأسف لطخوا وجه السودان المشرق
واليكم قصة تانية قريبا

[سمل ود الولياب]

ازيك قريبى اوتاشو وينك مشتاقين كتير اشكر صاحب البوست بالصراحة موضوع جميل

[المـاني]

خوان مهند و sarona
انا معاكم انو الناس بتكتر وتستغل حسن الضيافة استغلال سئ للغاية
والله يعينكم يا ناس جدة

الاخوة
علم الدين
جذاب وما كذاب
osama77
بنت ابوظبي
الممشى العريض
ود الدرديري
هبه
استارو
ش

مافاهم حاجة

[اولاد كركوج]

والله العملية الشينة دي لاحظتها بوضوح شديد في مدينة أبوظبي



ملحوظة: يا بت أبو ظبي ماتجي تغالطيني.

انا قاعد فى ابوظبي لي 6 سنه بل تحديد السودانين الشقالين فى ابوظبي ما زي الامارات التانيه
اول اوضاعهم سمحه شديد ومتعاونين شديد
1- لانو وضعو ميه المي
2-مافارقه معاهو حاجه
3-90% من السودانين الفى الامارات مقيمين اسره
يعنى عزابه نادر
4-لو مااوضاعه تمام فى الامارات ما كان عيشين فيها
معروفه اقل بلد فى الخليج
بعدين نسيه السودانين الفى الامارات اقل نسبه من الجنسيات الاخر