مختارات ايهاب الامين

[waya]

تشكرات تشكرات ..

جنتل الكلمات ايهاب الأمين ..

ليتك تدعنا نستمتع بتوالي القصائد في هذا المنتدى ( فنحن مريدون في حضرة الحروف الجميله )

[إيهاب الأمين]

أهديكم هذه القصائد بصوتي أتمنى أن تعجبكم
الرابط
قصائد لكم

[حافظ عوض الله محمد]

لاشك انها تعجبنا طالما انها منك انت ايها الرائع
ولكن
مايعجبنا اكثر وجودك بيننا

دمت بود

[إيهاب الأمين]

لكم أقدم يا أحبة هذه القصائد بصوتي....

المجموعة الأولى

المجموعة الثانية
أتمنى أن تعجبكم

[ibn batoota]

الاستاذ ايهاب الامين

نفخر بوجود من هو في قامتك بيننا

هنيئا لنا بشاعر مرهف حساس

يجيد تطويع الحروف ليخرج منها اروع الكلمات

واصل يا صاحب الحرف الراقي

[إيهاب الأمين]

لكل الأحباب في منتديات أنا سوداني أقدم لكم هذا التسجيل لإحدى القصائد بالصورة والصوت...
أتمنى أن تعجبكم

الرابط

وين ألاقيك

مع حبي

إيهـــــــــــــــاب

[إيهاب الأمين]

بتمـناك


بتمناك
يا مطراً زارنا
وصحّى موات الأرض البور
بتمناك
والهمس المطوي يدافر
جوة حناجر
شايلة صراخ أطفال مبتور
بتمناك
أنا قلبي النازف
كان بتحدى رحيل الغيم
عن ريداً فيهو النيل
زي أحلى عروس يتراقص
ومن أعماقو يطل النور
أغصان النخلة النايمة
تزور أحضان الجرف الباكي
تعدد في تاريخا الماضي
وعمق الحاضر... وفرحاً جاي
النيل بتباشر بالقمرية
وضل النخلة...
وكلمة عاشق...
بنسج ريدو غنا ودوباي
بتمناك
والقول ممدود أنغام وتحية
بتمناك
بيناتنا سدود...
بيناتنا حدود وسنين ضوئية
دمعة راحل فارق شمسو
وودع آخر نغمة ناي
القمر احتار
في الضلمة الجرفت
مد الحلم اليافع
وحس دلوكة تبشر بالأفراح
القمر النيل...
القمر العرب الرحل
أدى الناس أنوار ساحاتو
وراضي يفجر من واحاتو
وميض البشرى وطعم الكسرة
وحس طنبور
لا شمساً تحزن
لا عصفور يهجر أوكارو
تغني الدنيا ...
تغني النخلة وضل النخلة
وحلم النيل يتخطى السور
بتمناك
يا شغف الوادي...
وشرف أجدادي...
وخالد باقي دهور ودهور
بتمناك
يا مطراً زارنا
وصحى موات الأرض البور

5/3/1996


من ويـن معاك

من وين معاك يبدا الكلام
يا نور رحل...
خلّف مع الحسرات ضلام
يا انتظار خطوة أمل... يا انتصار
يا ليل ممدد
في شوارعنا النشف ريقا
وبكت بعدك سلام



كل النجوم نايحات تشيل
دمعات وجوم رافضات تسيل
ومشى المطر
مشوار دموع
ودع أراضينا اليباب
أنغام رباب...
أنانة ... حزنانة... وتموت
في حلوقا أفراح الوصول
ترحل تفوت
بعدك هجر عشو الوطن
عصفور يدغدغ
عمرو باللوعة الحزن
يا انتحار قمراً طلع
قبال زمن
يوم خاصم السما والغمام



من وين معاك
يا حرقة الأسى والأسف
يبدا الكلام
من وين معاك يبدا الغنا
وتبدا الحروف تحرق تواريخا القدام
الكان مسجلة في الأفق
من وين معاك يبدا القلم
ويكتب رحيل زمن الصدام
يا صرخة القرى والحقول
يا وجعة الموج والفصول
يا همسة الرحلة الأليمة
وقول قديم مزروع شتول
ترحل معاك ضحكة ضفاف
فرحانة بي
موجاً غلب مدو النشاف
من وين معاك
ترجع خطاوي الليل سكون
وتغيّب البهجة الألم والإرتجاف


20/2/1996


عيونك والمطر

لسة بسأل نفسي
عن سر العلاقة البين
عيونك والمطر
ولسة بسأل نفسي
عن سر التضاد
ما بين وجودك والخطر
ولسة بتساءل
شنو الخلى الربيع
ينحاز إليك
وينسج نسايمو غنا
ونغم أجمل وتر
إنت الفتحتي براكي
للغيم ألف باب
وبقيتي أنشودة صحاب
وهتفتي للصبح الأغـر
عصفورة بشويش غردت
فردت جناحا... اتمردت
جات قررت
دون سابق إنذار السفر
وجعتي قلب الليل
وبعزقتي النجوم
رجعتي للموج التساب
صالحتي مابين بوري يا بت
والسحاب
واحرجتي بالضي القمر
وأنا مندهش
ما بين عيونك والمطر
أشتاق ألاقيك سنبلة
يا وردة ... رقصة كمبلا
قدمتي للشوق ألف ناي
وأنا جيت براي
ما كان معاي غير الهواجس
والنوارس ...والكلام
الكان مسافر في الغروب
وجلبتي لي يا بت طيوب
علمتي نجماتي الألق
كرستي لعيوني الأرق
ورسمتي في اللوحة الشفق
شالتني موجات الحنين
فاجأني ضيك حين شرق
مديتي إيدك
وبيك نجيت من الغرق
وهواكي كان نازل مطر
نازف مطر
وأنا لسة بسأل نفسي
عن سر العلاقة
البين عيونك والمطر


12/7/2002


قـولـة أهـلاً

يا غيمات في الدنيا انشرت
يا خطوات الفرح الجافي
يا مجلية بنور العفة
ويا مكسية سماحاً مافي
هلت فوقنا بشائر منك
ختت غنوة ولحناً دافي
كلمة تكون في طول نخلاتك
أهلاً مرحب بيك وعوافي
كلمة بسيطة فريع وسبيطة
محنة وهيطة وبلسم شافي
حتحت شوقك حس قمرية
وشالت شوفك حلمة غافي
يا منسية في كشفة حالك
يا مستورة وحالك خافي
قولة أهلاً ياها المقصد
بقة نورك يوم تنشافي
إنت الزمن الكاسك جابك
دودر بينا فيافي فيافي
وإنت الزمن الكاسك جابك
يكتح رملو سوافي سوافي
يا مطوية في قولة أهلاً
أركزي أثبتي أوعي تخافي
بكرة بمد فرحك ضرعاتو
وبكرة النيل حايرجع وافي


25/11/1997



ربـك لطـف


ربك لطف
لاقاني بيك
في واحدة من أحلى الصدف
رجعني للفرح الزمان
أصلو الفرح طعمو اختلف



ومشيت بعيد
لامن لقيت سري انكشف
وغرامي ليك
الكنت داسيهو انعرف
احترت وين ألقاك... وكيف
في الريدة اتحاشى الكلف
إلا بس ربك لطف
لاقاني بيك
في واحدة من أحلى الصدف



قبال تجيبني الصدفة ليك
أنا كنت ماليني الأسف
وكتين حرق جوفي النويح
وكتين قمر ريدي انكسف
وأنا كنت في حيرة وظنون
ومعاها كم جرحاً نزف
إلا بس ربك لطف
لاقاني بيك
في واحدة من أحلى الصدف
رجعني للفرح الزمان
أصلو الفرح طعمو اختلف

24/9/1999

[إيهاب الأمين]

الـمهـبوشــة



ها مهبوشة
ترازي تزازي في ها دي الفنقة
ها مربوشة
تشري الغيم وتفوتي
تزرعي لينا غنيوة ريدك
شدرة منقة
ما ظنيتك هشتي ودشتي
وشلتي كلامك
بيهو ضربت الكلمة الجاتك
وكت الزنقة
تبدا تقرقر منك ضحكة
تقرقر بطن الواطة
وتمرق شدرة
تخلي الحال الواقف يقعد
خطوة وخطوة
يعود الحنّ وأنّ وغنى
حبيبة قلبو تشيلا الموجة
وعشم العاشق
عشم إبليس الداير الجنة
ها مهبوشة
مكان ما فتنا ووين ما كنا
ما لاقانا ولا صادفنا
دغشاً بحرق زي نار دغشك
سجم الخلا حريقو وفاتك
يوم الحبل الرابط حلّ
يوم ما جونا أولاد الحلة
عديل في وجهة درب الغيمة
عديل ضُلالة ونجمة وخيمة
وكنت براك في وسط الشلة
وكت صنقرتي
الجبل الواقف صنقر
كان يتلفت
عاين ودنقر
حت ما عاين
ما لاقالو وشيشاً غيرك
يشيلو ويقيلو...ويلولي مقيلو
ويقطع وش المطر الأسود
يقطع وش المطر الأسود!!
كان المطر الأسود حوّد
كان الفجر الناير دردق
بي قدامو الليل الهوّد
كان آ بنية عديلك عوّد
كان زغرودة خيرك دوّت
ها مهبوشة
ها تريانة تدفي عشوشا
ها فردوس بالخير مفروشة
مال الزمن الجاير غمتك
كسّر فيك جنحات الطلقة وعمتك
ها دفاية المات بالقرة
فرهدي حلماً يوصل بكرة
يراشي الناس الفقدوا البسمة
وطيبة الروح في حلو الكلمة
يا ستار من ها دي القسمة
يا مرسال الشفقة تهوّن
كلمة شفقة تشبّع جايع
ياتو كلام الشبع جايع
ياتو كلام الصلب أولادك
فوق خشبات العشم الضايع
كنا نشيلو سكاتك حكمة
كنا نشيلو سكاتك حلمة
يا ستار من ها دي القسمة
محناً شتى
تحاصر صيف الريد الشت
ها مهبوشة
زمنك غلبك حلبك
ضرعاً يشبع يرتع يمتع
ودايماً يجود
صبحك شدّ رحالو وبعّد
أريتو يعود
يقشقش ليك الدمع الهتف
ويفتح ليك كم باب مسدود
شان ما تلهلب تاني الضحكة
ونار الفرح البقى هبود
ها مهبوشة
19/2/1998


بجيـلك


بجيلك
من هدير الموج
ومن سكة مشي الضفة
ومن درب النزيف أسكب
غناوي أنيقة ملتفة
بجيلك
لما صمت الليل
يفوت حدو ويزيد لهفة
ولما الوردة
تلبس من حروفك توب
ومن مرض الغرام تشفى
محل ما شوقي يبكي عليك
ووين ما الدهشة تصطف
بجيلك زي شعاع النور
وزي برق المحبة العاش
يداري مجيهو بالصدفة
بجيلك قيف بحر زعلان
تغسّلو دمعة من عاشق
حبيبتو اتغابت العرفة
وقلبو النازف المجروح
بترسم عفتو العفة
تدور الدنيا زي ما تدور
وأقيف عندك
قصيدة خجولة لما تشوف
صفاك تصفى
عليك ذات الحقيقة سؤال
شنو الخلاك
تباري سحابة مجنونة
وبدون كلفة
تقيفي تعايني لي قمراً
سرق أنوارو من وشك
وشيّد همسو ليك غرفة

3/3/1998


صمت الكلام


منو البقدر يشيل صمتي
ويعبّر عنو بالأحرف
ويدونو في شعاع الشمس
بالكلمات
منو البقدر يكون أحلام
وياخد من دموع عيني
ويغسل أسايا بالبسمات
متين يا ليل...
صباح الريد يطل
في دنيا أيامي
تبارح لهفة الأحزان
تبلل شوق قلب ظامي
متين يا قمري إنت تهل
وتطوي ستائر الإظلام
وتبعد سطوة الأوهام
ويسيل المد...
يهد سد الحواجز هد
تعال يا ضو
تعال يا أملي في الماضي
تعال يا رمز حلم الغد
تعال يا رقة الأنفاس
وخت البشرى في الإحساس
وزح السد
عشان ما تزغرد الآهات
عشان ما تكتر البسمات
وتمتد في المدى وتمتد
تجينا البهجة تتشابك
تهاجر في المقل أفراح
وتنزاح الهموم تنهد
ونرجع تاني للأحباب
نهدّي النبض والأعصاب
ونزرع تاني جنب الباب
شجيرات الوئام والود
28/3/1994


سوناتا لعيون سعاد


بهواك
قدر ما تمدي إيديك للشمس
عفواً تمد ـ ريدة ـ الشمس
إيديها ليك
وأهواك
مداين من جمال
تدهش عصافيري وأطير
أحلم أرك ما بين عينيك
يا بت بحيرة وطرف ناعس
وقوس قزح
يا بت حديقة بتغرس
الريد في الضفاف
تهديني أكوان من مرح
عيد من فرح
زغرودة لي يوم الزفاف
بهواكي بي لون مختلف
ما شفت قبلك اختلاف
أديني رقراق من ولف
أديك عوالم ائتلاف
يا بهجة يا نور يا عفاف
يا همسة لامست الشغاف
يا موجة تتحدّى الجفاف
يا ضحكة بتهدّي الفؤاد
تقفل شبابيك العناد
تفتح مداين اعتماد
وكتين تطل تظهر
سعاد
والغيمة بتناجي الشمس
تفرد ضفايرا في البلاد
وأنا من أمس
من موكب التاريخ بحس
بيكي وأسافر في عيونك
وما بدس
ريدي وأبوح
يا غالية بي كل الكلام
بهواك
قدر ما تردي يا بت السلام
تدي الصباحات ابتسام
تنسجمي حد الإنسجام
ما بين تضاريس الحروف
الناقشة اسمك في الفؤاد
بيناتنا بس يفضل ميعاد
وكلام نقولو وما معاد
تنزل سحايب ريدنا غيث
تنده نجيماتنا البعاد
تنشر قصائد في سعاد
تنثر قصائد لي سعاد
تثمر قصائد يا سعاد
وأهواكي
يا بلبل بغني ومنشرح
يا عندليب زمني السمح
يا باقية لي إنت الحياة
يفصلني عنك إلا موت
يا رايعة يا كل البيوت
يا فارهة يا نور البيوت
ما طالما الليل ارتحل
حايبني وين العنكبوت؟
ما طالما الخوف ارتحل
حايبني ايه العنكبوت؟
وأهواك
قدر ما تمدي ايديك للشمس
عفواً... تمد ريدا الشمس
أنغام وصوت

[إيهاب الأمين]

وين ألاقيك


وين ألاقيك...
يا المسافر في عيوني
وصرت لي قلبي الشريك
يا الموهّط في الدواخل
منتظر لحظة مجيك
داير أضمك بي رحابة
ومن هجير الحر أضاريك
فجري بشرق من عيونك
تبسم اللحظة وأباريك
السما بتهديك نجوما
وتعزف القمرة المزازيك
والبنيات في الحواري
ليكا بتدق الدلاليك
وين أراضيك؟
الورود عنك بتسأل
وديمة تحلم لو تلاقيك
والضفاف في النيل بتزعل
إلا لو دايماً تماسيك
يبلع الموج ريقو مرة
ويجرف الساس والمداميك
والقصائد في الدفاتر
جوة في بطن الدفاتر
تستعيد أيامنا ديك
وين ألاقيك
حس غنيواتي الحزينة
انبحّ من كتر الكواريك
فيني شوقك كم تجدد
هل تجدد شوقي فيك؟
فيني شوقك كم تدفق
خش بالباب والشبابيك
حلمي دايماً إنت ترجع
موعدك يصبح وشيك
وين ألاقيك
وإنت ناسي الناس أتاريك
وين ألاقيك؟
14/2/2001
طـالـعـة مـني


يا طالعة مني…
وداخلة في جوف السحابة
زارعة في نبضي المحنة
وشاتلة في دربي الصبابة
طمني الناس البتبكي
وفرحي الفقرا الغلابة
المطر يوم بكرة بنزل
يروي واطاتنا ويبابا
بكرة بتغني العنادل
وتحتفل بي ضي شبابا
بكرة راح الفرحة ترجع
بعد ما كانت بتابا




يا طالعة مني...
وداخلة في جوف السحابة
طالعة مني وساكنة جوّاي
من سنين بعرف حسابا
من زمن ما القمرة فاتت
وكنت بسأ ل عن غيابا
بين رموش النجمة شفتك
غنوة بتزيل الكآبة
تبهج المحروم معذب
تهدي للمعول صلابة
تهدي كل طورية وردة
وتدي كل عصفورة غابة


20/8/1998




السمحة الشمعة الدمعة نزيفـا



[1]

الدمعة نزيفك
وجعك طال يا السمحة
وضو الشمعة السافر
رتل في الساحات
إنجيل الذكرى
وغادر قطرو براح الوادي
الدمعة نزيفك
شوفي خريفك
لون المطر... الخضرة
ونارو هجيرك
تحرق شرف الغطى رذاذو سمانا

[2]

دوام نلقاك يا السمحة غنانا
وغيمنا ضرانا
نقابل قمرك ساجد وسط الحوش
ودموعو تهتف
وين الصوت الطوّل صايم؟
وين القلب الكان بي نبضو
بصحّي الحلة
وينو صباحك ووينو عشانا؟
وحس أطفالك روّح وين؟
ديل أطفالك ناموا بدون أحلام
والحزن الخيّم...
وعد المطر الكان مكذوب
الفاتنا بدون ما يوصّف دربو
ودون ما يترك للغابات عنوان

[3]

نلقاك يا السمحة عوافي
بتطلع صافية نية
بتغشى الناس مرضية رضية
وتلقي رجاك أشجارنا صوامع
نحن القلنا عشانك
ندفق حبر الكلمة الشينة
وعاد نلقاك يا السمحة حمامة
لامن بيك يتلاشى
الخوف
ويتقطّع صبر الوادي مراكب

[4]


حتى الشارع كان عن جيتك
دايماً بسأل
ونحن نرد للشارع
رد الخايف ردو يزعل
ونخل الشاطي
الكان في يومن ما مابينا
الليلة يجينا
في إيدو رتينة
عشان ما يشوف السمحة الشمعة
الغالية علينا

[5]


الدمعة تسيل والسمحة تعاني
السمحة رؤانا وأسمى معاني
وزي عصفورة
تغني تغني تغني
وما بتهم
لو كان جنحاتا بقت مكسورة
السمحة صبورة
برغم الدمعة نزيفا
هجيرا وهبة زيفا
تقوم تتوهط
وتبدا تعيش وسط النجمات
مستورة

15/3/1996



صبرك علي


صبرك علي...
يا دابو أتعبني الشجن
يادابو موج العشق هاج
خايف أضيع في الريد وأجن
خطوات سبيلك سلسبيل
بي لهفة ليك خطواتي جن



صبرك علي...
في سمايا طلت نجمتين
بستاني مهجور من سنين
الليلة غنت وردتين
فكيني من قيد السكات
وأديني منك كلمتين
لسة التواصل مستحيل
وأنا بيني بينك خطوتين



صبرك علي...
أنا صدقي بي حبك وشى
أصدح مع الطير في الغصون
وأتغنى همس ووشوشة
وأزيد في ريدك كل يوم
وألقاكي بي ود وانتشا
يا الدربك إنت هوى وجنون
أنا عقلي في دربك مشى




شعري العنيد


وتكلت زرعي علي الرذاذ
ولا مرة من نبعك شرب
انهدّ حيل شعري العنيد
وانسدّ باب راحة القلب



مالك سقيتي الليل سهاد
وأنا صبري من صدك تعب
جرّحتِ قلبي المستكين
ضيّعتِ من خطوي الدرب
ملت مواسمي الإنتظار
ما لاقي جرحي معاكي طب



كم ليكي أخلصت وصبح
جوايا ريدك مستتب
وكتبت فيك أجمل قصيد
ضاع شعري عندك وما كسب
خشيت براي في نار هواك
وأنا كنت قايلو هواك لعب



أنا كنت بحلم بالفرح
بس وضعي بي سببك خِرب
لازمني احساس الضياع
موجوع وحاتك ومنغلب
لا يوم شفق قلبك علي
لا مرة حالي عليك صعب


***هذه القصيدة تغنى بها من ألحانه المطرب عصام محمد نور


ابتسمي

ابتسمي خلي الجو يروق
هدي العواصف والبروق
ينزل مطر ضي بسمتك
يروي البيادر والشقوق
ما بسمتك ميعاد عشق
طلة شمس عز الشروق

ابتسمي
لسة الشوق بفتش سكتك
لسة الظلال خافية الطريق
والنيل يردد غنيتك
والشارع الباكي الحزين
منو الموانع دستك
ابتسمي ما أحلى الصباح
وكتين يطل من بسمتك



ابتسمي يا أروع نغم
صحّى المدائن والحقول
اتحدى صمت الليل وسافر
عانق إيقاعو الفصول
طمّن الحرف المعربد
وعلمو يبادر يقول
تدهش النور ابتسامتك
وتعلن الفرحة الوصول



ابتسمي يا زولة
وتعالي نعلم الناس تبتسم
نتلاقى في الآفاق وميض
والغيم يناديك بالاسم
نتغنى للموج والزهور
ومواقف الريد تنحسم
ابتسمي ما لاقتني قبلك
نجمة يا بت تبتسم

[إيهاب الأمين]

لأصدقائي الأحباب
ومداً لخيوط التواصل
هذا هو رقمي الهاتفي الخاص....
بمفتاح السودان
0912682550
مع حبي

[إيهاب الأمين]

[إيهاب الأمين]

[إيهاب الأمين]

[إيهاب الأمين]

[إيهاب الأمين]

[إيهاب الأمين]

أقدم لكم أحبتي هذه القصائد الأربع المسجلة حديثاً بصوتي أتمنى أن تعجبكم

الرابط

السمحة الشمعة الدمعة نزيفا

ورأيكم يهمني كثيراً
مع حبي

[abode]

الاستاذ الشاعر الملحن ايهاب الامين
ابداع بلا حدود
واي شي يكون مرتبط بالجزيره ومدني يكون [size=4]مصيره بلا شك الروعه والجمال
التحيه لك يارائع[/size]

[إيهاب الأمين]

وهذه أحبائي قصيدة (عيونك والمطر) مسجلة بالصورة والصوت...
الرابط

عيونك والمطر

أتمنى أن تجد القبول

[ودالدرديري]

ربك لطف

إيها الأمين محمد

لا أدري ماذا أقول سوى ...
ربك لطف بنا و أوفـدك رسولاً نتغنى بحلو مفرداته
لكي ننسى بضع ولادات مشوهة عكرت أفقنا حين من الدهر
ظلت عيوني تتابع ماتخطه بكل حياد وشغف
حتى ساقني الدرب الى طرق ومنتديات شتى تشرفت بكلماتك
أخيراً وجدتك بيننا فـ ياله من شرف وحبور أباهي به الكل
إيها القامة السامقة ..
رجعت بي القهقري لسنين طوال خلت
هاجت الذكرى واشتد الحنين لمشاوير تعودناها
ودروب أدمنت وقع خطانا عليها
حكيتُ عنها للتلال و الروابي
وسجلتُـها بأحرف من نور على دفتر الذكريات
وكتبتُ فيها كثير من السطور
حتى صار بعضها توقيع لي يراه الجميع - هنا أسفله - ولا يدركون معانيه

الآن ....
أنشد تشريفي بقربي منك ..
فقد تتيمت الدواخل وهامت بإحدى بنات إبداعك
هي الحسناء ( ربك لطف )
هل هناك حرج أن أطلب يدها على سنة الحب والفن ؟؟
أم أن هنالك من سبقني وتشرف بخطوبتها ؟؟؟؟

أفيدني أفادك الله


يديك العافية وكل السماحة الفي الدنيا


وليييييييييييييييييييي قداااااااااااااااااام










و..................الباقي على الله

[إيهاب الأمين]

أهديكم قصيدة (سوناتا لعيون سعاد) بالصورة والصوت....

http://www.youtube.com/watch?v=SjTvmsKSPSE

أتمنى أن تنال الإعجاب