تداعيات إجازة السبت ... النظرية والتطبيق

[اصيله]

بالامس الاحد كان اول يوم للعمل بعد تطبيق إجازة السبت وزيادة ساعات العمل اليوميه لتصبح حتى الساعة الرابعة والنصف مساء

كل واحد ممكن يدخل ويورينا رايه فى هذا الموضوع وتجربتة

[اصيله]

احكى عن تجربتى انا شخصياً

اشجب واندد وادين بكل ما املك من قوة إجازة يوم السبت لانه اصلاً لايعقل انه الانسان يطلع من بيته الساعه سبعه ومايرجع إلا اذان المغرب طبعاً زمن الخروج الرسمى الساعه اربعه ونصف ولحدى ماتصل الموقف عاوز ليك نصف ساعه كدا الساعه بقت خمسه وتقيف برضه نصف ساعه عشان تلقى حافله كدى الساعه بقت خمسه ونصف ومسافه الطريق مع الزحمه بالميت بتاخد ليك ساعه يعنى كدا الساعه بقت سته ونصف يعنى اذان المغرب .
لايعقل ابداً انه واحده متزوجه تصل منزلها اذان المغرب من طلعة الصباح اكيد حيكون وراها طبيخ ونظافه وشفع راجعين من المدارس منتظرين ووو........... بالجد حكايه صعبه شديد
المفروض يكون فى استبيان قبل هذا القرار لكن نقول شنو بقينا حقل تجارب قال تجربه لمده سته شهور وقبل كدا برضه البكور كان تجربه ومستمره لى يومنا هذا

[M.Hadad]

تجربه البكور ما هي الا عكس للتوقيت الشتوي والصيفي الشغال بيو العالم كلو ومفترض في الشتاء تتوقف
اما حكايه اجازه السبت فهنا المعضله
الاجازه دي مشكلتها محلوله من ضمنها يعني انتي عندك يوم ترتاحي فيو والتاني تجهزي بيتك وتطبخي للاسبوع وما تنسي انو العيال برضو زادو ليهم زمن الدراسه.
ولا انا غلطان؟؟؟؟
دول كتيره جدا شغاله بالنظريه دي وناجحه فيها شديد بس نحن بطبعنا مابنحب التغيير طيب نحاول نكيف نفسنا عليها يمكن نلقي حسناتها اكتر من سيئاتها (يوميييييييييييييييييين اجازه تقدري تعملي الدايراو وبالذات ناس الاقاليم بقدرو يمشو يشوفو اهلهم بارتياح)

دي وجهه نظري وده ما بيعني انها صحيحه وما ممكن تتغير لو لقيت روحي غلطان


تحياتي


واحترامي

[المياسة]

السلام عليكم ورحمة الله وبركاته
اختي الغالية / اصيلة
انا شخصيا ما عندي مشكلة في الاجازة لانو انا ما عايشة في السودان بس اساسا يوم السبت عندنا اجازة فشايفة الامر عادي جدا اما البعض يمكن يكون مستغرب من الفكرة لانها حاجة جديدة عليهم .
بالنسبة للمواصلات دي برضو مش مشكلة لانو البلد الي انا فيه موفرة لينا المواصلات.
اخيرا شكرا ليك على الفكرة.
والى مزيد من التفوق والابداع اختي الغالية.............................

[ابراهيم الجيو]

أصيلة,, ياوطن,,,

الإجازة تطبيقها أمتد أيضاً للسودانين بالخارج كالسفارات وتنظيم الجاليات والجهات المعتمدة رسمياً من قبل الحكومة,,,

تغير الإجازة جاء في غالبية الدول بناءً على الفروقات المالية والإقتصادية بيننا وبين دول العالم الأخرى,, لكن نحنا كلنا اجازات,,,

النصيحة يا أصيلة,, مكتبك أنا شفتوا,,,:D

يعني ممكن تجيبي معاك حلتك ومفراكتك وتجي تقعدي بدل ما اليوم كلوا نايمة ف الكنبة,,,:D

مشتاااااااااااقين,,,,

[اصيله]

النصيحة يا أصيلة,, مكتبك أنا شفتوا,,,:D

يعني ممكن تجيبي معاك حلتك ومفراكتك وتجي تقعدي بدل ما اليوم كلوا نايمة ف الكنبة,,,:D

,,,,

لو جبت معاى حلتى ومفراكتى دى تبقى صورة مقلوبه يعنى يتحول المكتب لى مطبخ ودى واحده من السلبيات
وكمان لمن اعمل حلتى اكيد ح اعملها فى الهيتر ودا استهلاك زيادة للكهرباء ودى سلبيه تانيه وبدل مايكونو عاوزين يوفرو الكهرباء يكون الاستهلاك زاد بالطبيخ وينطبق المثل البيقول جاءو يكحلوها عموها :079:

[اصيله]

الاخت المياسه
شكراً لمداخلتك بس نحن هنا بنعانى من مشكلة المواصلات فى المقام الاول ودى اكبر معضله بتواجهنا

[اصيله]

الاخ/ تمبرللى
بالجد المعاناه كبيره فى زمن الخروج المتأخر (دا خراب بيوت مستعجل)
ويوم الجمعه بالرغم من انه ما مكفينى لكن برضه اخير لينا يوم واحد اجازه ولا يومين وشحططه بقية الاسبوع كله


وبعدين ناس الاقاليم ديل ناس تنقوشى اصلهم ماكلين الخميس والجمعه يعنى بقت ليهم زيادة الخير خيرين

[حافظ عوض الله محمد]

الاشكاليه
انو القطاع الخاص لسة مادرس امكانية تطبيق العطله
السبب انو العمل لن يتوقف وبالتالى زيادة ايام العطلات تزيد تكلفة العمل الاضافى
اتحاد اصحاب العمل السودانى بصدد دراسة القرار والتقرير حوله يوم 29/1/2008

انتاجيه العامل السودانى ، وتقليل ايام العمل

اما بالنسبة للمواصلات دى اصلا مشكلة مزمنة والحل يكمن فى تنظيم مدينة الخرطوم بصورة مثاليه
من حيث السكان ومداخل ومخارج المدينة ، للحديث بقية

[M.Hadad]

الاشكاليه
انو القطاع الخاص لسة مادرس امكانية تطبيق العطله
السبب انو العمل لن يتوقف وبالتالى زيادة ايام العطلات تزيد تكلفة العمل الاضافى
اتحاد اصحاب العمل السودانى بصدد دراسة القرار والتقرير حوله يوم 29/1/2008

انتاجيه العامل السودانى ، وتقليل ايام العمل

اما بالنسبة للمواصلات دى اصلا مشكلة مزمنة والحل يكمن فى تنظيم مدينة الخرطوم بصورة مثاليه
من حيث السكان ومداخل ومخارج المدينة ، للحديث بقية

الحقيقه يا حافظ القطاع الخاص ده مشكله مع العطله دي انا مثلا شغال في قطاع خاص ومشكلتي اننا ما مقيدين حتي بي اجازه الجمعه وشغالين شفتات 8 ساعات في اليوم 6 ايام في الاسبوع والعقد بتاعنا بينص اني لازم اشتغل 48 ساعه اسبوعيا طيب انا لو عندي اجازه يومين في الاسبوع حشتغل كم ساعه؟؟ والشفتات حتتقسم كيف؟؟ لازم اشتغل حوالي 10 ساعات يوميا لكن اليوم مابيكفي ال3 شفتات بتاعتنا طيب الحل شنو ؟؟؟؟ انا شايف انو الاجازه دي ما مفترض تكون علي كل المستويات
يعني مثلا في الامارات في نفس الاجازه لكن بس للدوائر الحكوميه والبلد شغااااااااله

[عاشقه الحب]

الصراحه انا شايفه انو حكايه السبت دي حكايه كويسه وحلو شديد وانا بقول كده لانو انا اصلا ما عايشه في السودان واحنا عندنا السبت اجازه رسميه من زمان وكمان حكايه الموصلات دي حكايه بسيطه وبكون ليها حل لو بقت المشكله بس في الموصلات .......
اتمنى ليكم التوفيق .........
يسلموووووووووووو ياعسل

[شمس الغربه]

السلام عليكم ورحمة الله وبركاته


أخيتي الكريمه / أصيله
والله حاسه بيك :)

أنا أصبحت أعتقد فعلا اننا شعب كسول ،،،
بظن انو مافي أي داعي للأجازه ، لأننا لانعتبر من مصافي الدول المتقدمه
ولأنو كمان ده بضغط على المواطن والموظف ، لأنو عليه أن يعمل لساعات
أكثر باقي أيام الأسبوع.
وكمان نحن محتاجين لكل ساعه عشان نتقدم مش جازه كأنو الأجازات السنويه لاتكفي
من شم النسيم والكرسمس وراس السنه الهجريه ، وو ... الخ
على العموم الله يكون في العون


كوني بخير وبارك الله فيك
تحياتي وتقديري

[sunni]

بالعكس يا شمس الغربة،، الموضوع ما موضوع إجازة 5 أيام وعمل 7 أيام. أنا شخصياً من مؤيدي الإجازة،، وخليني أقول ليك أسبابي

أولا،،
ثبت علمياً إنه عطاء الإنسان بيكون أكثر في هذا النظام،، عشان كدة أغلب الدول طبقته،، وإذا كان الموضوع زيادة ساعات عمل،، فهل معني كدة انه لو شغلنا الناس 7 أيا، في كل يوم 10 ساعات،،، إنتاجيتنا ح تزيد؟

ثايناً،،
من أسباب الرفض هي حقيقة معروفة للكل،، وبالذات للسودانيين العايشين برة السودان،، وبيحتكوا بأجناس أخرى،، وبتتغير عندهم بعض المفاهيم. والحقيقة دي اننا كشعب ما من الساهل أن نتقبل التغيير أو التجديد. ودي عندها إيجابياتها وسلبياتها،، فمن الإيجابيات، إننا واحد من الشعوب القليلة المحافظة على كم هائل من تقاليد الآباء والأجداد،، ومن السلبيات، إنه تطبيق أي سياسة إصلاحية جديدة، يقابل برفض قبل تجربته.

ثالثاً،،
نحن شعب معروف بالإجتماعيات العالية والترابط الكبير،، وهو واحد من الأسباب الصبغت علينا صبغة الكسل،، لأنه السوداني ممكن يعطل العمل عشان يمشي المستشفى يزور أم زوجة زميل جار له،، فهل معقول الكلام ده. إذا،، بوضع أجازة يومين ممكن نوفر وقت كافي للمجاملات والإجتماعيات،، وبكدة (لو إتفهمت صح) ممكن وضع الضوابط للخروج والدخول والتأخير في العمل.

ما عاوز أقول انه دي النقاط المهمة،، ولكنها جزء منها حسب رأيي

[ابراهيم الجيو]

[quote="sunni"] عشان يمشي المستشفى يزور أم زوجة زميل جار له،،[/quote]



أمسسسسسسسسسسسك قووووووي،،،،

[ودالدرديري]

ياجماعة نحن مابرانا في العالم دا
وكل حاجات وتفاصيل بلدنا مربوطة مع العالم الخارجي زي باقي خلق الله
وكثير من الدول - والعربية بالذات - بتعتبر السبت عطلة رسمية
وأنا رأيي كمان نعطل السبت والأحد ونخلي الجمعة نصف يوم عمل أو يوم عمل كامل
ودا اسوة بالعالم الخارجي عشان المصالح المشتركة
يعني لو رفضنا السبت وقلنا نعملا الخميس والجمعة حنكون معطلين تلاتة يوم عن العالم الخارجي
يعني حتكون خميس وجمعة حقتنا وسبت حق الناس البرا المرتبطين معاهم بأشياء مهمة
ولو رجعنا وخليناها بس الجمعة حنكون شغالين السبت على الفاضي
وطبعاً مصالح الدول (النايمة) الزيينا ماحتمشي في حالة زي دي
وعشان الكلام دا يتفهم صاح هاكم مثلاً : شركات الطيران والسياحة والفنادق العالمية
ممكن تحجز لأي واحد على خطوط اوروبية مثلاً أو حتى خليجية رحلة داخل اوروبا أو خارجها
او الى الخليج او اي دولة من المعطلين يوم السبت
والحجز دا لازم تعمل ليهو ري كونفيرم قبل 24ساعة من موعد الرحلة
ولو مواعيدو الاحد يبقى لازم السبت تعمل الري كونفيرم النهائي
طيب كيف حتلقى طريقة تتصل بالشركة المعينة مادام اصلاً هم معطلين ؟؟
والمثال دا حتى في دول الخليج
دا مثال بسيط جداً وحيفهموهو أكثر الناس الشغالين في مجال السفروالسياحة
اذن على المثال دا نقيس باقي الحاجات زي البنوك الدولية ودي طبعا بتتعامل مع الحكومات
والشركات والمنظمات الدولية وجميع الكيانات الاعتبارية التانية
ممكن نرفض عطلة السبت في حالة واحدة وهي اننا نكون مامرتبطين بالعالم الخارجي أبداً
ودي طبعاً مابتبقى الا لو قررت الحكومة إغلاق دولة السودان الى حين اشعار آخر
ان شاءالله تكون الفكرة وصلت

يديكم العافية



ولييييييييييييييييييييي قداااااااااااااااااااام











و...................الباقي على الله

[sunni]

ود الدرديري،، أديك مثال حي ومعايشه انا هنا في مسقط

فأنا بعمل في شركة تأمين،، وللما عارفين شركات التأمين ليها علاقة قوية مع معيدي التأمين، وأغلب شركات إعادة التأمين الكبيرة أوروبية. طيب،، أخد معاي الحسبة دي

نحن بنشتغل أيام السبت وحتى الأربعاء من 7:30 إلى 2:30
وبنشتغل يوم الخميس من الساعة 7:30 وحتى 1:00 ظهراً

وانا كموظف في شركة في سلطنة عمان،، فعملنا محكوم بالوضع الجغرافي، والمعرف على أساس انه +4 غرينيتش. مع المعاملات دي لاحظ انه لما تبدأ الشركات في أوروبا العمل، بتكون الساعة عندنا 12 ظهراً. وبحسبة بسيطة بتلقى الآتي

عدد أيام العمل المشتركة من السبت وإلى الأربعاء هي أيام الإثنين والثلاثاء والأربعاء فقط (3 من 5)
عدد ساعات اليوم الواحد في هذه الأيام هي من 12 ظهراً وحتى 2:30،، يعني ساعتين ونص فقط
إذا عدد ساعات العمل المشتركة من السبت وحتى الأربعاء هي 3 × 2:30 = 7:30 ساعة
عدد ساعات العمل المشتركة يوم الخميس هي من 12 وحتى 1:00 ظهرا،، يعني عدد الساعات الإجماليه هي 8 ساعات ونصف فقط،، يعني يوم عمل واحد فقط. أما لو طبقنا النظام المذكور،، وح تبقى عدد ساعات العمل هي كالآتي بعد ما نأجز يوم السبت،، ونشتغل في الأيام العادية حتى 5 ظهراً مثلا
الأحد حتى الأخميس = إثنين، ثلاثاء، أربعا، خميس = 4 أيام
عدد ساعات العمل المشتركة في اليوم الواحد = 12 ظهراً وحتى 5 = 5 ساعات في اليوم
عدد الساعات الإسبوعية = 5 × 4 = 20 ساعة
أيهما أفضل؟؟

[sarona]

العزيزة أصيلة .....

أكيد أي تغير في بدايته صعب ....... لكن مع الوقت الواحد بيعتاده

وبالتالي بيرتب نفسه وطريقة حياته على كده ......


والعالم بقا مربوط ببعضه بشكل رهيب لدرجة انه هنا في المملكة دار نقاش كثير

على المستوى الرسمي عشان تكون الاجازة الاسبوعية على الاقل جمعة وسبت

بدل خميس وجمعه بسبب الخسائر المهولة في سوق الاسهم .....

على الاقل على مستوى الدوائر الحكومية .....

أصيلة ده بداية التغيير ما تشيلي هم ......

والمايكروويف ح يغزو البيوت بشده ........

بعد شوية ح تدخلوا في الهوم دليفري وتحلو مشكلة الطبيخ ............:D

المربية أو (والدادة ) الله يعينها على العيال ........

كل ده .........

وتطلعي اخر الشهر مديونة ..........


تغيير كبير ح يحصل في المجتع وحكاية الاجازة دي البداية ......

وربنا يدينا خير الجاي ......

والله يعيينك لغاية ما تتعودي .............

.
.

[صلاح يحيى سليمان]

الاخت اصيلة

الزمن ده مافى حاجة اسمها اجازة اسبوعية...الاوربين بشتغلوا الاسبوع كلو...احنا كمثال فى الشركة الانتاج والماكينات شغالة 24 ساعة يوميا...364 يوم فى السنة.....وانتو عاوزين تتناقشوا الجمعة والسبت ..او الخميس والجمعة...والاحسن ياتو؟؟؟؟
ودالدرديرى ما ذكرتوا عن شغل وكالات السفر ده تاريخ ..انتهى زمان....اليوم الحجز بقه اون لاين والدفع
اون لاين ...وبعد ما البرنامج يديك الاوكى ...تطبع التذكرة بتاعتك ..وفى المطار تتم باقى الاجراءت.
تصور انا يمكن ليه اكتر من سنة ما مشيت الى البنك....الاون لاين بانكنق ..سهل لينا كل الاعمال المالية.
الدفع فى ايه مكان بقة بكرت البنك.
الكلام ده ياشباب ما فنجره....وما استعراض فيكم....!!!
العالم بقه ماشى كده اليوم...اما الدول المتخلفة ..وطبعا على رأسها الدول العربية غير مواكبة لما يحدث من
حولها عالميا....فما هو الحل؟؟؟؟
نكون جادين ونبدأ فى التغير فورا ...ونحاوللللللللللللللللللللل مواكبت الحاصل ...وله نقعد نناقش فى احسن الجمعة والسبت وله الخميس والجمعة......يا عالم اصحوا....!!!!

سؤال اخوانا المسيحين حا يشتغلوا كم يوم ...وهل اجازتم الجمعة..السبت والاحد وله كيف؟؟؟؟ وله الموظفين
الاقباط يوم الجمعة يجوا يشتغلوا براهم ؟؟؟؟

وشكرا