الــشــيــطــان

[abu rawa]

منقول من صفحة مهند اسماعيل
45 45

الو ,,مهند انت في البيت ؟
اي ..
انت ساكن برااااك صح ؟؟
للاسف الافيس ااااي والله زي الشيطان الله ورقبتي !!
ظابط ياعمك.. ود عمي جا دبي حيقعد معاك يومين تلاتة عشان بيتي ضيق و معاي اولادي لحد ما اشوف ليه صرفة يجيني هنا ابوظبي
ابشر بالخير ياهندسة اساسا انا براي وعايز لي زول يونسني ..
الراجل اواخر الاربعينات علامة صلاة و حركات .. وشيب وقار يعني وكدة .. جاء تعبان من المطار سلم وغير هدومو و عشرة دقايق ونسة السودان كيف بلاي و الاخبار و نام خلاني بتكلم معاو .. حركتو خور بس ما حنك
وشكلو زول كيوت كدة واصلو ما حسيت انو ماياهو... المهم انا مرات مرات كدة بشغل قران و بنوم و هو شغال .. شايف ليك علامة الصلاة قلت اعزو ليك بي كم سورة كدة و اخلى القران شغال للصباح .. لزوم الود ايمانو قوي و حركات .. و انا اساسا يخربني , حركة اشغل القران دي ما استخرتة فيها كولو كولو لانو الراجل طلع راكبو جني !!! و انا على غباي ما جايب خبر ...
قال اعزو قال !! ياخ دة عزاني عزة .. المهم فتحت القرأن من الصب هوفر .. بي صوت بسيط و رااااقد ماسك التلفون مفسبك ... و موتسب و سايط البلد و البلدين ,,فجأة الراجل الوديع اب علامة صلاة واااارمة قام يتنفض.. !! انا قلت دي انشراح وقعدتة اضحك فيه ’’ الرجفي زاد ... !! انا ركزتة معاو لانو بقا يشخر لي شخرة مااااااياها !!
ترااااخ رفس ليك السرير بي كرعينو لما كسر السرير... انا هنا نططة عيوني .. بي امانة كدة !!! بعدين السرير دة غالي يعني !!
بقا راقد في السرير كده دماغو لي فوق و كرعينو تحت... راقد سيافي و برجف من تحت بس من بطنو ولي تحت !! .. فوق ثابت و مغمض عيونو .. صاريهن صرة العدو انا نسيت موضوع القران الكريم الشغال دة .. !!! انا راقد و متغطي لي نصي بالبطانية وماسك التلفون و بعاين في المصيبة دي .. اصلا ما اتخيلتة انو الزول دة متلبسو جن و القرأن اشتغل معاو .. و قلب لي اذاعة هنا برمودا الساعة الراجل صرخ .. و رفع كرعينو الاتنين و شتحن و قال بب بب وقعد ينبح زي الكلب هو هو هوو وحركات ماوكلي .. هنا انا عرفت انو وش البامية مااااا ياهو .. و دي ما انشراح و لا ابو الكباس و لا شي ..لالا ده الجن الكلكي شخصيا بعديين دي ما شتيحة بني ادمين كولو كولو ولا دة صوت هيومن بين زاتو , دة جن جاي من السودان الكلاكلة بالتحديد و كاتمة فيه و بتكون الكهربا هناك قاطعة و جاي مسخن وقافلة معاو و كلكم نظر يعني ...
طرش لي في الطربيزةالفيهاالجزلان و الساعة و المفاتيح عطنهن لي عطنة السواد وعاين لي وقال لي هو هو ,, طوااااااالي احترمت نفسي وجريت البطانية غتيت من شعر راسي لي الضفر الصغير دااااك و قفلت علي البطانية كربتها كريبة صح و اتخذتة وضعية الجنين .. دة جن .. اوكي ؟ ما ونسة يعني ,, شوفو انا بي امانة مشهود لي بالشجاعة و الاقدام .. انا مكر مفر مقبل مدبر معا زاتو ... لكن .. جن ، شواطين ، بعاعيت و الناس البموتو و يقومو و الحركات الارعة دي .... مااااا بتنفع معاي كولو كولو جيبو اسد ، تمساح ، اي مصيبة زمان ممكن نتكومج زي التريب لكن شيطان و جن و شي انا ما شايفو !!! لا لا .. انا اسف يعني
المهم بقت المشكلة انو عشان اجري من البيت مفروض امر بي سريرو و الزول دة مشتح كدة معناها ح اهبشو .. و اتخيل لي دة ما وقت هبيش يعني ..
حتلت تحت بطانتي و مقفل ليك بي كرعيني البطانية طبيها طبة صح و تحت راسي غامتة و بالجنبات طابيها بي يديني ملصقة مع المرتبة لحام و هو بهناك برجف و انا بي جاي برجف .. حيرنا السراير زاتو ههههه الصوت بيعلى مع ايات محددة و بقول لا لا لا بي صوت كعب كعب .. فيه حشرجة و لا هي شحرجة ؟ المهم الصوت الجاي من الحلق داك ,اب بحة
بعديها غنى لي ,,, ليه ياوزة ما بتعومي شايفك في الجنينة تحومي ,,, اوباااااااااااااااااا
ومعاها كلام ما مفهوم
يا اخوانا دي مصيبة شنو ...
انا ,, انا تطير عيشتي انا
يعني انا البني ادمين مرات بجهجهوني جابت ليها كمان منتشة شواطين !!
و في بيتي و السرير الجنبي ؟ ياخ عيب يخ,
اخد ليه صنة كدة .. قلت براااااااحة كد اعاين اشوف الطلس شنو بي اطراف اصابعيني فتحت طرف البطانية القصاد عيني بالظبط ..برااااااحة القا ليك منظر ماااا بسر لا عدو لا صديق .. الزول دة قبل ينوم كان لابس عراقي عميق كدة جديد ومظهر و مكوي ... فجاتن اتفاجا انو رافع العراقي للحجاب الحاجز الرئتين فوق و بلعب بي صرتو و راقد في السرير المكسور من طرف واحد بالعرض و رافع كرعينو تاكلهم لي في الحيطة .. وبقول بب بب و بفرفر يدو التانية دي ما المشكلة .. المشكلة هو راقد وراسو للسقف و انا بس شفت المنظر دة الساعة المدة ليك رقبتو بالقلبة كدة و فتح عيونو و عااااين لي انا .
.. يعني يا مهند شااااااايفك ..
احــــــــــــــــــــيـــــه
ركبي ساحن ... و قلبي زي تلاتة ثواني كدة بطل . انا كنت سامع صوت نبضي بقيت ما سامع اي شي و شايف دخان دخان . و جسمي بقا بااااااااااااااارد ...
بي كل ادب و احترام و هدوء بي طرف اصبعي رجعت البطانية مكانها و غتيت وشي .. و تحت البطانية عضيت اصبعي .. عضة حارة يعني,, الليلة سجم امك يا مهند الليلة الترابة في خشمك يا مهند ... ما باقي لي الا هناي .. دة جني جني ,,
و النور مطفي و التلفزيون شغال صامت و عامل اضاة خفيفة مرعبة زاتو ... بعدين السديس زاتو عاصر ليك ايات كلها عزاب و نار و دة كل ما يجيبو ايه عزاب اسمع ليك السرير يتهز بي صوت عاااالي ..
يعني يا السديس و الله ما عارف اقول ليك شنو زاتو ؟
وين ايات الرحمة وين جنة عرضها السماوات و الارض يعني ربنا دة ما رحمتو كبيرة يخ يعني حبكت تعصر الجني ده بالشكل دة و انا جنبو ؟
انا بي امانة كدة قلت اقوم اقفل القرأن .. بقت المشكلة انو الريمود ضايع معناها اقوم اقفلو براي . .
بلاي ؟
شان بطلع من تحت البطانية ! كان اطلع ما عارف بعدين انا قلت القرأن دة الحاميني كان وقفتو احتمال يلقا فيني فرصة و يقول ليك هاك ده .. لالا ما بقفلو ومن سريري دة ما زاحي بعدين السماعات فوقو ما يقفلو براو عامل لينا فيها جني و بتاع .. المهم جات سورة يوسف ... نص السورة قراها مع الشيخ وبدون فرفرة وما سامع اي سكسكة سراير .. سكت في النص التاني ..ماف اي صوت هدوء قاتل صوت القران بس .. قلت امد راسي تاني اشوف الحنك شنو احتمال شتت .. نفس التكنيك الغبي بتاع المرة الاولى برااااااحة و انا كاتم نفس فتحت طرف البطانية ... القا ليك الملبوس راقد في السرير صح بس عكس اتجاهو بقا راسو لي تحت مع الارض و كرعينو الجهة التانية ورافعن رفعة مريبة كدة .. و اتلفت تااااني عاين لي ... مما شافني قعد ينضم و يلغلغ .. كلام ما مفهوم و كرعينو مااااا هناي يعني رجعت تحت بطانيتي و بكل عمق و هظو مع اعتذار في سري , حللت رفعة كرعينو بالشكل دة واحد من اتنين يا اما جنية انتاية عايزة تولد لانو دي رقدة الولادة زااااااتها المابتغباني يا اما جني ضكر عندو بواسير ... و الاتنين اوجع من بعض وانا الليلة واتطاتي اصبحت ... فجأتن فكرتة احتمال القرأن حرقو في حشاو و عايز يطلع ؟؟
و اكيد داير يطلع بالحتة الخشة بيها ودة عدم عمق منو طلع من هناك معناها حيخش وين ؟!!!
قلبي قال شحححح
غيرت وضعية الجنين لانها ما عملية وفيها ثغرات .... امنية ,, ورقدتة ضهري مع المرتبة لحااااام بي كوع كرعي سيطرتة على البطانية و نصها تحت راسي و قفلت اي خرم فيني خشمي طبيتو بي شلاليفي و بي كوعين يدي مثبت البطانية و اي اصبع في اضان نفسي زاتو كتمتوما عايز اتنفس زاتو اها نشوفك حتخش بي وين ؟
و بقيت اتحصن و نص القران الحافظو طار لي بقيت في الصورة الصغيرة ناس سورة الفيل و الضحى و ويل لكل همزة لمزة ...صدق الله العظيم ..
بس اسمع ليك صوت الباب اتفتح ... بس بس معناها اتخارج ... قعدت احمد الله و ادعو ياربي انا و الله بي خبوبي دة انت عارف انا زول كويس و مني امل يعني يكون طلع الجني و معاو الزول زاتو .. فجأتن طططب يد مسكتني من راسي جبهتي بالتحديد انا شهقتة .. و روحي بدت تطلع انا لحقتها اخر شي منها في طرف اصبعي الصغير رجعتها بالرجالة .. و اتبلمت لاني سامع صوت نفس اخينا الملبوس هنااااك في مكانو زاتو و في يد عبارة عن طالوش قابضة جبهتي و بلولح فيني طبعا انا تحت البطانية نشلت موية و انا بي امانة كدة كنت ماكل نص بتيخة و كمية عنب و متطوطر بي لترين موية وكان لزاما علي امشي الحمام لكن الاسد القاعد لي دة .. فشنو ... البلل دة انا ما عرفتو كان عرق كان شي تاني ... ودة ما موضوعنا اسي .
اليد فكتني .. وحسيت النور ولع و تاااااني اليد اليد بقت تقابض .. و انا بقيت اقول لا لا فك فك انصرف بسم الله بسم الله ... جاني صوت من ورا البطانية مألوف .. مهند مهند ياهنو وبضرب في كتفي كدة و قلع البطانية من تحت راسي قلع .. مغممممض وصاااري وشي قلت كان فتحت ح اشوف قرون و عيونو حمممور و اضنين مطاولات و طلس شواطين و طوالي ح اركب الشارع ...
ابيت افتح كولو كولو و صااااري لزوم بهرش في الجني و بتاع و انا قلبي يضضضضرب لب لب لب لب .. مهند مهند في شنو ؟؟
دة صوت رامي صاحبي !!! فتحت ياهو رامي ما عرفت احضنو و ابكي و لا ارشو كف للخلعة الدخلها فيني و بقيت اعاين ليه و هو مستغرب .. مالك يازول مهند انت شديد ؟ باشر ليه بي رقبتي و الولحها ليه يعني لا لا انا ما شديد ,, و اصلو ما داير اعاين على سرير الشيطان الرجيم قعد جنبي وبقا يعاين للملبوس .. قال لي بقيت تشغل قران كمان و الله ياهنو خطير لكن ..ده طراش ؟؟؟؟؟ . دة منو دة ؟؟ و الكسر السرير دة شنو و الزول دة مالو مفنقس كدة ؟؟ هس هس هس ختيت يدي في خشمو شان ما يتكلم زاتو .. بي صوت واااااطي ده ضيف قريب صاحبي .. طيب مالو عامل في روحو كدة و اشر لي للسرير التالت مايرقد هنا ؟ قلت ليه بي نفس الصوت الواطي كسرو هو زاتو ..و خليه خليه احسن ما يقوم ... و داك مغمد و يشخر .. فجأة جات اية اصلو ما بنساها ... بسم الله الرحمن الرحيم .. تلفح وجوهم النار و هم فيها كالحون .. و لهم مقامع من حديد . صدق الله العظيم ..
صاحبنا شغل لينا الهزاز ..
رامي : ياهنووو الزول دة مالو بترتر كدة ؟
دة نايم و لا صاحي ؟
نايم صح ؟ و قرقرقر قام يضحك انشرااااااح يا ... قلت ليه اسكت هسسسس دي ما انشراح دة ابوها زااااتو ,,, بلاي ؟ المعلم الكبير شخصيا " خلا الوسوسة و الحركات و بقا زائر ليلي ؟ .. ابو الفلس لابو الكلب الخلاه يشتغل شغلتين .. رامي بتظارف و بخفف دمو و ما عارف الكلام جد حمرررت ليه و اشرت ليه على القرأن .. الملبوس الرجفي زاد و فجأة وقف من الرجفان و قبل رقبتو عاين لينا و فتحعين وحده بس .. رامي قال ليه السلام عليكم .. طنش رامي و بقا يعاين و ما برمش و بتنفس بي صوت عالي .. رامي مالو مابرد السلام ياهنو ؟
يا رامي .. الزول دة مستحضر فيه جني ..
كيف يعني ؟
اسألو هو ما تسألني
انا جني جني يعني ؟
ااااااااااااااي
بتهظر صح ؟
اقسم بالله العظيم جادي مما شغلت القران الزول دة بتنفض من الساعة تسعة اسي الساعة حداشر و كسر السرير و من قبيل برجف كدة و انا ما قدرت اجري شان لابس ردة و فنيلة وما ينفع اطلع الشارع وانا طرزان كدة فشوف لينا صرفة ..
رامي : طيب يا هنو انا استأذن
جا داير يقوم طططب طبيتو ليك من حزام بنطلونو اقسوووم بالله ما تمشي . .. وهو يقول اقسوم بالله ما اقعد ..
اللحظة دي شيخ السديس سخن القراية و الملبوس قعد ينبح زي الكلب .. هو هو كدة وبشكل هيستيري انا طبعا عارف نفسي بمشي وين و قريييب اساسا البطانية في رقبتي ... زي ابو القدح طوالي خشيت تحت ,,, الخلعني انو و انا جوة البطانية لقيت في سفنجات جوة معاي !!! بي كرعيهن !! اتاري رامي خش معاي جوة بي سفجاتو .. عكسي بهناك وضعية الجنين الما بتغباني و سفنجاتو في وشي كدة تاخ .. حيرني زاتو دة خش متين ؟ كل ما السديس يعصر بهناك النبيح يزيد و انا جوة البطانية اسمع صوت شششششش كدة زي الدبيب الصوت ما طمني اصلو تاني الراجل هو هو هو هوو هوو اسمععع ششششش اتاري دة صوت شعر كرعين رامي !! جلدو بكلب هههههه قطع لي قلبي الله يأذاهو المزعلني انو كان بجرجر البطانية شان يغتي نفسو ودي انانية و حب ذات ...
اساسا رامي جبااان مولود هنا في الامارات و حنكوش و النوع المسبسب شعرو و جنو جكس بجيي كل شهر شهرين يتنونس و نتعشى و كدة بس وما زول حارة كولو كلو .. دخلتو معاي البطانية دي انا متأكد انو الجني حيكون انفقع بالضحك و الاهبل الخواف دة احرجنا مع عالم الجن اسي يقولو بني البشر ديل هناي ساي
المهم ..
بعد فترة الراجل الملبوس براااااو قام فصل الكهربا من الصب هوفر و صلح هدومو و رقد في السرير التالت الاباه رامي و ضايقني في سريري ... للصباح .. نفس الرقدة اصبحت لقيت رامي ماف .انا بي امانة مع اذان الفجر شيطاني انا نومني. قمت بي صوت الملبوس بكابس يصلح في السرير الكسرو قال لي صباح الخير بلعت ريقي و قلت ليه صباح النور .. قال لي معليش كسرت ليك السرير .. السرير هين يابا .. انت كسرت قلبي زاتو ,, قال لي انا ح امشي على ابوظبي الليلة .. في سري قلت ليه برررررررركة .. اساسا انا و انت تاني ما بنبيت في حتة وحدة .. دة قي سري و جهرا قلت ليه يازول مالك مستعجل .. عرفني بجامل و بكضب .. و ضحك قال لي احسن امشي .. و مشى السؤال المهم باقي ليكم رامي تاني بجي هنا ؟
و اخيرا .. بلاي تاني ماف زول يقول بي زول يبيت معاك تبيتو في الخلا..اي زول يبيت في بيتو في الشارع انا ما مستعد للوهمات دي تاني
رسالة ال الجني شخصيا : ما تتخيل اني خفت منك او هناي لا لا احنا كبني ادمين بنكرم ضيوفنا بس وما حبيت اقوم اتوهم فيك احنا لو زعلنا زعلنا كععععب بعدين في الحسبة كده سيدنا سليمان ده جدنا لزم ,, فأحسن تخلي الوهمات دي و تمشي عديل شان ما اقفلها معاك فاهم ؟؟
بلا لمه شواطين بلا كلام فارغ نحنا لمن نقوم صعبين
في الختام : اللهم انا نعوذ بك من همزات الشياطين و نعوذ بك أن يحضرون

[السنبلاية]

45