قــمـــر الزمــــان مصــطـفــي سيداحمد

[MokhtarAlMokhtar]

قمر الزمان
صلاح حاج سعيد
كتبت ليك لابينى بينك ريده ...لا قصة غرام
اخترت ليك أجمل حروف وأصدق فواصل نادرة في لغة الكلام
لاقصدى ألهو معاك بي كلمات غناي
لا شعري ليك مرجيحة من شعر الغمام
وكتبت ليك والله يا قمر الزمان
شان جيتى بي زمن المحنة وشفت في عينك حس أهلي القدام
وكتبت ليك وأنا جاى من زمن الشقا
المرسوم على وش الثواني مظللة تتمدد الساعات سنين
تتفتح الأحزان غريبة ومذهلة
وأشتاق افتش نسمة في الزمن العذاب
وأيامي من كتر الأسى وكتر العزوف والاغتراب
صبحت حروف مترهلة لا فيها نبضة روح تموت لا فيها سكة زول يفوت
لحظات أسيفة ومهملة
وكتبت ليك ووقفت ليك لامن لقيتك جايا من قلب الطريق
ولمحت فيك راحة المشاوير البعيدة ولفحة النسمة الحنينة الجايا من جوف المضيق
حسيت عجائب الدنيا إتلمت بقت جايانى من عصراً سحيق
عينيك حس أطفال ينادو القمرة للغائب يعود
وجبينك الضواي حجا الحبوبه فى الزمن السعيد
وأنا فى قساوة الموحش الزمن المكهرب بالحريق
أنا حيلتى ايه قولى لى يا قمر الزمان
غير إتكى واحلم معاك
(م) وأحضن أماسى الصحوة والأمل البريق

[مرسال الشوق]

ياسلااام علي اغاني مصطفي سيد احمد
لها وقع خاص في نفوس كل السودانيين
ويختار اشعاره بعناية فائقة لذا نجد اللحن
الرصين والكلمات ذات المعني والدلالة
اخي مختار المختار نشكر لك طرحك هذا
ونتمني ان لاينضب مداد قلمك

من القلب تحية وتقدير

مرسال الشوووق ،،،

[ميرفابي]

سيظل/ الرائع /مصطفى سيدأحمد/فينا حياً
شكراً اخي مختار المختارعلى هذه النفحة من إبداعات الراحل مصطفى سيد أحمد ... وهو حياً فى وجدان كل الشعب السودانى بروائعه وتميزه الراقى .
رحمه الله رحمة واسعة بقدر ما أمتعنا وأرتقى بذوقنا الى آفاق رحبة من الجمال حملنا إليها بصوته .. ونسأل الله أن يسكنه الجنة وينزل رحمته على قبره .

[الماسة الخماسية]

إختيـــار رائـــع