ود الأغبش - في الفخر

[وليد عبدالرحمن]

فينا شهامة من ولدونا جات من الله
وخيل الفرسة حالفين منو ماندلا
نحن ونحن يابو المرضي اسكت خلا
نحن بندفر الداهية ونقيف في محلا

***
نحن نفسنا للخير خير وفيو نتعلا
ونحن ان جينا للشر شر ومانا اقلا
نحن عقابنا للقاصدلو ضر ومزلا
نصو بنجدعو الكوشة ونص في السلا

***
نحن الدارنا والمادارنا حر ومخيير ..
نحن نحل مكان الجن وكت يتحيير ..
غباشتاً فينا لا بتزول ولا بتتغيير ..
صناديداً نموت واقفين وامرنا مسيير ..

****
يا اب رصعة المفتفتة للحجار والصبة
قولو نفسنا مي ساهلة لي البلعبا
ان قلت المكارم كاسنا ديمة معبا
لكن في الشوامة اخلاقنا عادمة الحبة

***
اخوان حواء واسياد كرامة وعزة
والارض ام جبال بالنهرة ساي بنهزة
من ولدونا مارضعنا الحليب بي لذة
كانو بكبو موية النار بديل في البذة

ودالاغبش

[بانه]

اهلا بيك استاذ ود الاغبش

في انتظار المزيد من الابداع

يديك العافيه

[ابو الملكات]

وليد عبد الرحمن ود الاغبش
فعلاً ديل نحنا وان شاءالله ليوم الساعة
كلمات مكانها القلوب من القلب شكراً
كل الود

[ابراهيم عباس]

ابشر بالخير المبدع وليد بداية قوية الف مرحب بيك فى هذا المنتدى الرائع وانتظار المزيد من ابداعاتك