قول لى بس في داعي بس للبشتنة ؟؟
ما نحن كونا كويسين والليلة جاي تخربا
كسرة وفطيرة ولقمة حارة مكربا
نملا الكريشات
أ كان أم رقيقة ولا قرع
و ( ام تكشو ) زااااااااتها نجربا
ما عرفنا الجداد ام كريعات
لا كُفتة .... لا همبرجر
و لا التونا لينا نقربا
@ @ @
زمان الجداد كان في وئام
و الغرفة بينا نتقاسما
و الليلة لو شافك من بعيد يندسى منك
و يتغابى فيك المعرفة !!!
ويقيف محتار بيسأل
يا ربي بس الحصل شنو ؟؟
الناس جنت ولا شنو ؟؟
تحاحي لينا وتفتش علينا
ولا إمكن .... دي العولمة ؟؟
(Cook Show) ، اكلات عربية
وإنجليزية مترجمة
مالو الخروف ؟؟ البقرة ام ضَرِع
ما كان بياكلوها لو هَلكانا ولا حتى
ضُلوعها واقعة ... مسجمة
كان نحرس الصينية بعد الأكل
قبل الكديسة تمر عليها
والباقي منها تلهدما
والليلة الكِديسة المِسيكينة بقت بعيد
خائفة ذاتا... يقوم الشويفع ينخشما
و غايتو دي قناعة مني
ما دام الناس بقت وحوش! تاني
ولا بيضة مني ما بدردما
وحياة الدلع الزمان ... الليلة تب بخاصما
@ @ @
كدا يا زمن بعد اللحمة بالكيلو
بعد الكبدة والسنكيت
بعد البامية بالقُفة والمولوص وفك الريق
بقينا نساكك في جداد الناس
زقاق لزقاق
نفك الضيق
نجابد ربع الكيلو نتحرفن
ندس الموية في الإبريق
نترقَب الكهرباء ما تقطع
عشان لو قطعت...! نفسبك كيف ؟؟
و اصحابي ... يقولو شنو ؟؟
زول طغيان ؟
عامل مخفى
اكيد مخفى !
و ما عارفين الخفاني شنو
الخفاني كتير
شيتا ما بتشيلو صحف
ولا بيو لسان بحكي
تجربة في الشعر الدارجي الحلمنتيشي اتمنى ان تنال إعجابكم.
...سوء ظن 
