روائع محمود الجيلي

[سمر علي]

عشانك تقيف الغناوي و تصفق..

عشانك بتفرح عيون الدموعن تتاوق ترقرق.

. عشانك نجمع حروف المحنة

و نشيل من عبيرك لغيرك نفرق

.. عشانك نقطّر مسام التصافي

و نيلين تدفّق.

. عشانك بتمرق حروفنا السجينة ..

و تفتح شبابيكا تلك المدينة .

. تدخِّل شروقك و و سيرتك تمطّق..

و صوتك ينطّق جبال الحقيقة ..

و نورك يمرّق ضلام الكلامن يشفّق..

عموما تخيل بلادك بدونك ..

غباشاً يضهّب عيون اليمامة

و صوتاً يجرّح حلوقنا و كلاما..

أكيد في غيابك كتير البيفرق.

. تصّدق لقيت صورتك إنت بتحاكي الشمس لما تشرق.

لا بالعكس جدا

لقيت الشمس مادا أيدا بتشابي

عليك و تنادي و هيهات تلحّق..

عموما تخيل وشيك في المدارس

و في كل شارع وشوقو البحرّق

.. دي كانت بلدنا بتكون واحدة تانية

و نكون نحنا غيرنا نطير أو نحلّق

[سمارا]

بعد عودت نفسي عليك
و ردتك و بالعيون همت
شفتك في الحلم راحل
أريت لا نمت لا حلمت

جبينك أصفى من النور
و من شمس الصباح اللاح
و بسمة محيك البسام
تزيل آلام و تشفي جراح
و خديك أندى من ازهار
و لون الحُمرة فيها وشاح
حنينك هدّ حيل الليل
صباحك مافي زيو صباح

بعد عودت نفسي عليك
بقت عزالي أحلامي
و انا البسعدني بس طيفك
و تسعد بيك أيامي
أنا الأدمنت نور عينيك
و عينيك مصدر إلهامي
و لما أشوفك انت معاي
بشوف الجنة قدامي

شفتك في الحلم راحل
و تاني النوم علي حرمان
و ما بقدر و لو في النوم
أقاسي اللوعة و الحرمان
و ندمان إني بحلم بيك
تفارقني و تفوت ندمان
بدونك ما بعيش دنيا
و لا ببقى المكان ده مكان

[سمارا]

على قدر الحيرة الفيها .. بين صدك و حبك وقفة





رضيان بي حكمك و جورك .. لو مرة تميل الكفة





تهديني النار بي إيدك .. يا النارك أبرد و أدفى





و تعكر فيني الدنيا .. بي ضي عينيك بتصفى





عينيك سهام مسمومة .. و حيات رمشك لو رفّ





سرحان بين صدك و قربك .. ما بين النيل و الضفة





و جواي القلب يتلفت .. زي الأطرش في الزفة

[بانه]

البعرفك بجهلك ..أصحاب و أحباب من زمان .
. ما بحسو بيك في وجعتك .. و لا عن همومك بيسألو
و أغراب عليك يبقوا الحنان .. بالطيبة يمسحوا دمعتك..
حزنك تعيش و تكملو
الصدفة ذاتا مقدّرة ..و آخر طريقك من زمان
..معروف بيكون من أولو
عادي البيلاقوك ثانيتين.. و بعيشوا جواك بالسنين
..في ذكرياتك بفضلو
و عادي البيكونو معاك قراب.. يمكن تكون عشرة سنين .
.في ثانيتين يتحولو
خلي البعرفك يجهلك ..و المابتعرف حبو ليك..
في الدنيا أوعك تجهلو
الدنيا فيها محطتين.. في قلوب بتركب في الطريق..
و قلوب بفوتوا و ينزلو
و عيون تشوفا توصلك .. و عيون بحر عاتي و غريق
.. أصلا محال يوم توصلو
الدنيا ياها دي حالتا.. مستمتعة تحير قلوب .
. في ريدا قالو و أولو
و إنت البتسأل عن حبيب .. المشكلة بتنسى العليك .
.و الما عليكا بتعملو

[سمارا]

شنو الخلاني يوم أشتاق .. لي زول عمرو ما بشتاق

ولا بيفرق معاهو حنين .. ولا بيفرق معاهو فراق
...
عليك الريدة كان ماساي...بيقولوا علينا ديل عشاق

غايتو بحب ليّ حبيب.. غريب في الطبعة و الأخلاق

شنو الخلاني أتورط .. و أشتاق ليك ليل و نهار

و عارف في هواك جزاي ...بضوق طعم المرار و النار

غريبة بكون معاك مبسوط..و أعاني من الفراق الحار

و عارف قلبي بيك ولهان ..و ما بيقدر سواك يختار

مناي أفهم حكاوي الريد..و أفسر كل قوانينو

و أعلم قلبي كيف يكره ..و كيف يجرح محبينو

و يكون في الدنيا في حالو.. و ما يلخبط موازينو

يدفّق في الوريد الدم.. ده كل النحن عايزينو

[سمارا]

على حس إنك جاي بعدين .. نفضّنا الروح من باقي الهم .. و شدّينا ملايات العينين

ركّبنا ستاير في الأشواق.. صفّينا الشربات جوه الدم.. و القلب إتقسّم لي أوضتين

في أوضة بترقد و تتمدد.. ترتاح من المشوار تنجم.. و في التانية نضاير شوق و حنين

[Control 3]

شكرا سمر على لهذا التوثيق الجميل
دوما في انتظار ابداعاتكم

[سمارا]

مرات بتعاين ليّ .. و بشوف للفرحة مواسم

و مرات بحتار في أمرك .. بين فاهم و بين ما فاهم

بتلّون في كلماتك .. و الريدة معاك عوالم

مرات بلقاك أفراحي .. و مرات بلقاك مأآتم

بي عيونك ترسم شوقي .. و بي عيونك ترسى دموعي

بي كلمة بتنفي حياتي .. و تقرر كلمة رجوعي

بهواك يا شوك يا وردة .. بتفرهد جوه ضلوعي

و يشهد بي ريدك ريدك .. هو العارف قدر ولوعي

على قدر الحيرة الفيها .. بين صدك و حبك وقفة

رضيان بي حكمك و جورك .. لو مرة تميل الكفة

تهديني النار بي إيدك .. يا النارك أبرد و أدفى

و تعكر فيني الدنيا .. بي ضي عينيك بتصفى

عينيك سهام مسمومة .. و حيات رمشك لو رفّ

سرحان بين صدك و قربك .. ما بين النيل و الضفة

و جواي القلب يتلفت .. زي الأطرش في الزفة

[سمر علي]

[blur]كلما تحس بالمواجع و المدامع في المقل

كلما تبعد تسافر و تبدأ تشتاق للأهل

كلما يجفاك حبيبك و يلقى لي قلبك بدل

و كلما تحس إنو بلدك إنو ما أجمل محل

أسقي روحك بالتمني و أملأ عينيك بالأمل

.......................................................

لو طريقك كلو ضلمة ..من قليبك سوي ضي

ولو بحور الدنيا نشفت.. الحنان الفيك ري

ولو ورود الريدة ماتت .. الضمير جواك حي

أملا بالآمال مدائن .. ألف شارع و ألف حي

.................................................................

بالأمل في العين بتشرق .. ألف ضحكة و إبتسامة

و يبقى باكر أحلى موعد.. و الشمس أكبر علامة

بكرة حترد فينا روحنا .. و بكرة حتطير الحمامة

شايلا بين جنحينا لهفة .. وشوق توصلو بالسلامة[/blur]

[سمر علي]

[blur]شدة و تزول و العين دي ربنا يبعدا

وأصلو العزول ما داير أكتر من كده
>>>>>>>>>>>>>>>>>>>>>>


عين السواد الخلت البيناتنا راح
عين الرماد الما بتجيب غير الجراح
هي دي عين شنو الخلتني في البكا و النواح
عين السواد و الله دي تب ما عين نصاح

.......................................

أدونا عين في الريدة و الحساد كتار
عين العدو التاعبانا بالليل و النهار
هي دي عين شنو الخلت قلوبنا القايدة نار
تبعد من الريد و الحنان و بقت مشاعرا إختصار
..............................................
شدة و تزول و بكرة بنجيب للريد حجاب
و بحصنك من العيون من الجفا و طول الغياب
هي دي عين شنو الجات تفرق ناس قراب
شدة و تزول و عين العزول فيها التراب[/blur]

[سمر علي]

نومي و صحيني معاك بكرة

مع اول خيط منسوج من ضو

صحيني و قولي صباح الخير

و تخلي الطير يرقص في الجو

ولو انك عارفة صباحك كيف

ما بقدر أعاتبك حتي ولو

[سمر علي]

خت نفسك مكاني


بعد سافرت منو .. عشان أبني الأماني


إتحملت بعدو.. و ما إتحمل عشاني


هدم أحلام كتيرة .. و أيامي و حناني


جيت و لقيتو روّح..و فتش ريدة تاني
.............................................

الغربة و سنينا.. براي قاسيت شقاها

ولا هماو عذابي.. آهه وراها آهه

و كلو علي هيّن..عشان روحي و هواها

ولا يوم كنت قايلو.. وعود الريد نساها

..................................................

خت نفسك مكاني .. ولف الدنيا طوف

و سافر سيب ديارك.. و أطرد أي خوف

وغير عينين حبيبك..محال عينيك تشوف

تجي و تلقاهو باعك.. ويقول ليك دي الظروف

.....................................................


شن فايدة غيابك.. و ريدك ضاع وراكا

و شن فايدة رجوعك..وماف زول في رجاكا

و شن فايدة قصايدك..و شن فايدة غناك

بتشقى العمر كلو.. و تتعذب براكا

[بانه]

خت نفسك مكاني


بعد سافرت منو .. عشان أبني الأماني


إتحملت بعدو.. و ما إتحمل عشاني


هدم أحلام كتيرة .. و أيامي و حناني


جيت و لقيتو روّح..و فتش ريدة تاني
.............................................

الغربة و سنينا.. براي قاسيت شقاها

ولا هماو عذابي.. آهه وراها آهه

و كلو علي هيّن..عشان روحي و هواها

ولا يوم كنت قايلو.. وعود الريد نساها

..................................................

خت نفسك مكاني .. ولف الدنيا طوف

و سافر سيب ديارك.. و أطرد أي خوف

وغير عينين حبيبك..محال عينيك تشوف

تجي و تلقاهو باعك.. ويقول ليك دي الظروف

.....................................................


شن فايدة غيابك.. و ريدك ضاع وراكا

و شن فايدة رجوعك..وماف زول في رجاكا

و شن فايدة قصايدك..و شن فايدة غناك

بتشقى العمر كلو.. و تتعذب براكا

[الريحال99]

كل القصائد جميله جدا

تسلمى ومتابعين

[سمر علي]

تيربتو براي

و رويتو غناي
...
حاحيت الطير و الغير بي جاي

ما ضاق الصيف سويتلو خريف و سحابو سماي

و انا ما نسااااااااااي

حافظاني خطاي

بمشيو مشوار و بقول ما جاي

عارفني براو انا زول سواي

و كلامي معاو ابدا ما ساي

تيربتو برااااي

علمتو يقوم فوق النخلات

وريتو و كان قمري الضواي

و أريتو أكان ضاريتو معاي

شاف روقة الناس و لقاني (هناي) ...خلاني براي

خلاني أنوم و حصدوهو وراي

تيربت أزاي و البن و سجار و أنا كنت زمان ما بشرب شاي

تيربتو براي و بقوم مشتاق في نص الليل و الريد صحاي

و ألقاو مبسوط نايم في القيف من جاي لي جاي

وراني زهور و أنا قايلو معاي

تاريهو أكان راقد فوق راي

تيربتو براي

لكني خلاص التوبة خلاص من كل عناي

لا حب مزروع لا هم لا دموع لا قليب بكاااااااي

تيربتو براي

[سمر علي]

كنت مستنيك وصابر و إنت غائب و فيني حاضر

يوم لقيتك كنت حاسس انو في لحظة بتسافر

بس ما خطر في بالي إنك تبقى تاجر للمشاعر

... و رغم إنو البينا أصبح زي جرح كل يوم بتاور

ما بسلم بي رجوعك و بقدر أنساك أيوا قادر

و ما بقول في يوم ندمت و ما بكون في لحظة خاسر

و انو مهما يطول عذابك برضو حيطل فرحي باكر

انت إخترت إبتعادك و إنشغالك بي المظاهر

شيل معاك كل ذكرياتي و خلي لي بسمة بتكابر

يا مشاوير من عمرنا يا زمن في السكة عابر

يا قلب أوعاك تنشف أوعى من الريد تهاجر

اكتب الريد في الشوارع و المحطات و التذاكر

أنشر الريد في النسائم و الغمائم والبيادر

و عادي كل ما تزيد في ريدك تنغرس فيك الخناجر

بس تأكد انك أحسن و لسه جواك ألف شاعر

ما عشان جارت ظروفك تبقى بي كل ريده كـافر

[سمر علي]

أيام و عدت يا حزن .. أيام و عدت ياجفا
..لاقيت حبيب الروح خلاص ..و إتبدل الهم بالصفا.
...
. و قعدنا في أجمل خميل.. في لحظة يا ما ألطفا.
.ورسمنا للأيام دروب..مليانة بالريد و الوفا

أيام و عدت يا شجن.. راحت من العين الدموع..
.و البسمة نورت المكان..و القمرة عاودت الطلوع..
و الحيرة فينا إتبددت..و رقصنا في ضو الشموع..
أيام و عدت بي لقاك ..مبروك علي بيك الرجوع

آي نعم مرت علي .. أيام من البكا و الفراق.
.لحظات من الشقا و العذاب..حيرة و هواجس لا تطاق..
و اليوم بيمر زي السنين..كل يوم بيضيق بي الخناق...
.والضحكة بين الناس كذب.. و البسمة من غيرك نفاق

ندمان علي كل الجروح..الكنت فيها أنا السبب.
.ندمان على كل الكلام .أنا قلتو في لحظة غضب..
ندمان على تجريحي ليك.. .في كل خظاب ليك إنكتب.
.يا أسمى آيات الجمال..يا آية في الذوق و الأدب

[بانه]

سمر كل عام وانتي بالف خير

غياابك طال