لما الشوق يهل ضيفا
على نيل البلد رقراق
يداعب في ثنايا الريد
ويرسل ليك أشواق
يتاوق بين مراكب الحب
ويرفرف ليك أشراع
بكون بهناك في زي زولا
حرق قلبو ونشف جوفو
بفتش سكة اللقيا
وخريطة دربك المضناك
يفكر كيف حيلقاك
ويملا الشوق حشى الوجدان
تخيلي كيف حيبقى الحال
وقت زولا يدور زولا
ويبقى الحظ معائر ليهو
يعافر بين عواصف الهم
ويحلم إنو بس يلقاك
تجي الأيام تبدل حالو في لحظة
ويرجع تاني زي أول
متيم بين بحار الحب
وراجي الحظ يحالف ليهو !!
زوحيهــ ..
الزول دا ما بخيل علينا يمتع الناس بهناك ؟
كل ما القي حاجة حلوة منه بجيبها ليكم هنا
في صمت مساءات الدنيا
امتزجت جل هياماتي
وبدأت أبعثر اوراقي
علي امتهن طريقا
يخبرني ماذا أفعل
هل أن الصمت هو المأوى
أم أن الهمس فناراتي !!
يخبرني قلبي أن أبحر
أن أرحل بين الشطآن
أتعقب نجمات الدنيا
في وجه سماوات البلدان
لكن الموج يعاندني
فأعود كما كنت قديما
شخصا في ذات المرفى
يعقبه حظا في الدنيا
وهياج للموج أمامه !!
تعال خاشي بالباب خليها المتاوقة بالشباك
واعمالك الحلوة دى كلها بنقلها هنا
بختلف همس القصايد
لما يطلع من شفايفك
ببقى زي عسل الأزاهر
لما يخمر بمشاعرك
وببقى زي صوت القماري
لما تشتاق في الضواحي
لغني الأطياف وليك
وببقى زي فرح المهاجر
لما يرجع بين صحابه
ولو شفت كيف ..
وقتين بيصدح صوت غناك
بين أهازيج المشاعر
ببقى طربان بغناك
ما أي كلمة انساق خطاها
و ليها من حسك منابع
بتأسر احساس الدواخل
ويبقى نفس الزول بعافر
شان يوم يجيك ويبقى طالع
أصلو همسك طعمو تاني
لما تجتاحو المشاعر
ويبقى صادح بالقوافي !!
كل الحال ما بشبه حال !!
يوم يصبح شافع يوم محتار
يصبح ويلقى الحال اتغير
وكل الكان في لحظة اتبدل
ضلة حيطة .. وحبة غيمة
ويبقى الحال زي نيل اتسرب
عب الحوش .. والبيت اتكسر
وكل القصة .. الغيم اتكتل
صبت مطرة .. وعبت جردل
وكل الحوش اتعب ودفق
صوت الحلة بنادي يكورك
ياخلق الله .. الحال اتبدل
وكل الكان اتهد اتبهدل
ناس ست امنة .. وحاجة أمينة
وناس الزين وكمان حاج أحمد
سابو الحلة وجرو اندسو
مابين قيفة .. وناصية حيطة
ورغم الحال الكان متهالك
وضيق النفس الكان ماطالع
راح الكان زي حلما زاهر
فيهو نضارة بلدا عامر
بروح ناسو وطيب أصحابو
وأصبح حلم الناس من تاني
ضلة حيطة .. وضحكة وهيصة
ولمة ناس في تحت النيمة
ونسمة عليلة تشفي الروح والهم الفيها !!
لمحتك .. غيمة في الزمن الهجير
ورسمت منك أحلى لوحة .. وحس هدير !!
وكتبت عنك كل خير ..
يازولة يا وطني الجديد
هميت علي حبك زمن
في كل لحظة بحس بيك
وجعا بشيل ..
صمت الخطى التواقة ليك
في كل سكة وكل طريق
وأنا من زمان عاشق خطاك
دربا سكن سنوات معاي
لا قلت بس ..
لا مره أرهقني التعب ..
وأنا لي عليك حاجات إذا
شان أبقى ليك القيف وطن
وأرجع أكون زي يوم بقت
خطوات تتشابى وتقع
وأهواك براك
لازولة تتبدل معاك
لا شوق هواي يعرف بدل
وزي ما معاك أنا عندي شي
ياك برضك ليكي شي
حب واحترام وكلام غرام
ما بضيره شي
لو حتى كدرنا القدر ..
أها قلت إيه ..
يابت معجنة بالدهب
معطونة بأشواق هواي
وكلام شعر
وصف المشاعر ووثقها
في حبك انت بلا بشر
أها قلت إيه ..
نرجع نعيد الريد إذا
زي ما بدينا زمان سوى
والا الظروف أصعب عليك
من قصة الريدة البدت
أيام زمان .. وحنينة في الزمن الوفي !!
حلوة كيف وقتين بتطلع
كلمة الريدة وحروفها
وسمحة كيف وقتين بتزهر
كل أمالنا وفصولنا
وانت يانبع المشاعر
يا قلب جوانا نابض
فيك دوزنا المعاني
وفي محاسنك قلنا أغاني
ليه بتبعد عن طريقنا
وتنتظر دمعة خديدنا
ماالدموع الفيك نزلو
بكرة يازول بحرقنك
لما ترجع تشتهينا
وتلقى ريدنا لقاهو غيرك
نسمة في عز اشتياقو
ماتخلي البينا يكبر
يبقى ترهات في طريقك
ما إنت عارف حجم ريدك
في قليبنا وفي الدواخل
وبكرة لما الشوق يعاودك
يانا نحن الباقي ليك
ومافي غيرنا بحن عليك
ما بكرة لما الشوق يعاودك
يانا نحن الباقي ليك
ومافي غيرنا بحن عليك !!
[align=center]جميل ورائع ما سطره يراعك الماسي كلمات من القلب ومكانها القلوب بشوق ولهفة انتظر جديدك القادم
بجد انت مدرسة قائمة بذاتها بتعبير السلس الممتع كل الود
[align=center]جميل ورائع ما سطره يراعك الماسي كلمات من القلب ومكانها القلوب بشوق ولهفة انتظر جديدك القادم
بجد انت مدرسة قائمة بذاتها بتعبير السلس الممتع كل الود
[/color][/size][/font][/b][/align]
اسعدنى مرورك ووضع بصمتك هنا
الزول دا بعيش الشعر
بس باخل علينا ساى
وشعرت بيك
حسا بيرعش في المنام
وهيام بزيد حس الوعي
زي التقول ما كان منام
دا زي الكإنو هو كان صحي
حسيت كإنك في المكان
في نفس حتات المنام
ماكان كإنو أضغاث منام
أنا زي عيوني لقت عينيك
ولمست حتات بين ...
ماتقولي لي أوصف وأعيد
أنا ما أظني بقدر وليك أعيد
حلما بزيد نبض الوريد
حلما سكن جوه القليب الكان بريد
زولا عظيم .. بشبه جمال لون المسا
ولقاهو في نص المنام
حلما جميل ..
ازداد معاهو الكون حلا !!
زولة ما بتعرف فرح
مشتولة بين نخل القليب
مرسومة بقوس القزح
كاوياني من تبيت هويت
بجور كلامها ونفرتها
وأنا كم شقيت في دنيتها
شان تبقى لي بلسم شفا
وتشيل معاي ألم العنا
مالزولة ما شبه الهنا
لا الريد بيسعد دنيتها
لا القلتو كان يوم بوصلها
وأنا ليا فيك ياغرام
من قمت تبيت وابتديت
أعشق أحب .. أحلام كتير
في كل يوم بلقاها غير
مرات أحسك بالعذاب
لقلبي ديمه بتنتشي
ومرات بقول أنسى وخلاص
لكن بقول ..
يمكن تعود في مرة ترجع تفتكر
أنو القلوب ما بتفترق
لو كان بضمها ريد وفي
وكل الكلام البينا دار
ما ليهو أصلا نختلف
أصلو العتاب روح الغرام
ما بيهو روحنا بتفترق
اتلخبطت كل الحروف
واتراشقت أسهم ضنى
في سكة اللوم والعنى
وأنا لي عذاب فيك ياغرام
من لحظة الزمن ابتدى
لا عدى فات من قلبي راح
لا نال معاهو الجوف منى
ماعدت عارف وين أفوت
أو حتى منك انزوي
قاسيت علي في كل شي
مابين ترانيم الهوى
المنشورة في سكة هواي
بلقاك معاي ..
في كل شوق بلقاك معاي
بلقاك معاي في أي شي ..
في ضحكتي وفي فرحتي
في كل ضل بلقاك معاي
وأنا حالي بعد الهم يزيد
بصبح بشفق كل عزول
في قلبو لي شايل ضنى
والليلة بعد الهم يزيد
ماببقى لي قلبا يشيل
هما يزيد الجوف وجع
ويرجع يقاوم في النزيف
من جور زمانك يا وجع !!
زولة كيف وقتين تدور
تقدر تخش جوه الفؤاد
ما بتنتظر ..
حتى السؤال لو كان بقول ماتدخلي ..
تدخل تهز باب الفؤاد المنتظر
من زمن هزة قليبها عشان تحس
وتكون هي زاتها الملهمة ..
زولة كيف بصعب عليك لمن تخش
تقدر تشيلها وتمرقها
ومن جوف فؤادك تطردها ..
ماهي أصلا ملهمة
وحسن الصفات جد ميزها
عن باقي بنوت الزمن ..
وبقت خلاص
زي زول محكر في الحشى
والشي المهم في وصفها
انو الحسان ما بتشبها
حتى الزهور اتهامست
في سرها ..
معقولة وحدة حتشبها
مالزولة من كتر الحلاهـ
زي التقول هي الأربعين من خصلتها
لا ليها حرفا بوصفها
لا ليها بعدها بشبها !!
وحلفت أبعد عن مدارك
واكتم احساس الدواخل
وأكسر القلم المعاند
في حروف وصفك يقاوم
ورجعت تاني أجيك أعيد
نفس الحروف الفي محاسنك ابتدت
وكتبت عنك كل خير
كل لحظة تلمنا
وتفضل خطانا تضمنا
ورجعت زي عاشق جديد
لا شاف عشيق
لا شاف وليفا يعشقو
وأنا حالي في وصفك وضح
إحساس قلم وربيع قليب
في حبك انت اختار يفي
ويفضل معاك طول العمر
مالبيني بينك جد كبير
لا يوم بروح
لا يوم بشيلو الريح يمش !!
