راكب الرقشة تسطيحة
أفهما طايرة تلميحة
فهلوي جد وتفتيحة
أقِلْب المنقا بطيخة
****************
أنا الجكنيب أخو الفُرَّاس
مدردح من غير علم كرَّاس
وفردة تمام لغم برتاس
أدُخْل السوق يمُرقوا الناس
****************
أنا الجايِط في الدُنيا
أنا المن زمان مُنْيا
أنا لحناً حزين غُنية
أقِلب التنكا ليك فونية
****************
بسوق العَجَلَة دون بدال
أصابق بيها ألف غزال
أقِلب الرايحه ما في مُحال
وأجيبلك موية في الشوال
****************
أنا الأسد النتر في قيدو
أنا الماسك البعوض من جيدو
أنا الفرس العنيد لي سيدو
أنا المجنون بطبو أقيدو
****************
كاسح شاقي الطريق كداري
حاري الوصول لي هلنا بدري عصاري
مشتت في رعاية الباري
أقِلب الجِقر ليك حباري
****************
ياني الترس ماني المعجن خيخة
زول الحارة تب ماهو البخاف من سيخة
والقاصدنا داك بلفاهو أقلبو فسيخة
أنا أخو الحنان الخاتا فوق المقادة صفيحة
****************
أبعد بعيد لا تدخل وسط الفوارس ضُمه
لا يفضحوك وفي الحارة تعقد تورك يُمه
ماك المتلي عاد مشهود بعلو الهمة
من صغير درفون مشنق طاقيتي من دون عِمه
****************
أنا الفهمان وماني أضينة
أعدل المايلة من كرعينا
وقت الحارة يود تلقينا
مضمخة بالبارود إيدينا
وأهدى هذه المُشاركة بصفة خاصة لسعادة الأخ المشرف لعام عله يجد لنا مخرجاً من هذه الدبرسة التراكمية
وله ولكم جزيل الشكر والعرفان ويديكم العافية
(قويه دي).. 
(قدر ده؟؟؟؟؟؟) 
