مين القال الدنيا بخيلة وديمة تشيل أبداً ما بتدي
طبع الدنيا متِل ما قالوا زي الموجه تجيب وتودي
زي ما الفرح أيامو جميلة بتمشي بسرعة بدون ما تهدي
الأحزان تتنسي لحظاته وبرضو تقضي أيام وتعدي
حزنت كل الدنيا عليه لمان مات الحاج (ود احمد)
يتم خمسة صغار يتباكوا أكبر واحد إسمو (محمد)
بعدو (أميرة) و (أمجد) و (سامي) وأصغر واحد فيهم (أحمد)
رمَّل (فاطمة) الباكية عليهو ونار أحزانه أبت ما تخمد
قعدت ومسكت راسه تمنح وتبكي الزمن الجاير وأسود
كيفن أقدر أشيل الشيلة أصلو الحال سجمان ومرمد
وكيف يا خويا تسيبني برايا في نص ليل وأمواج ورعد
حست بي أيدين ضاماها وحركة زول قدامه قعد
رفعت عينه تشوف الحاصل كان قدامه وليده (محمد)
قالها يُمه أنا عاوزك تصبري وأعرفي أنو جد وقت الجد
ليشن زغردوا ناس الحلة لمان قالوا ولدتي ولد
صغير أنا يمكن بس لكين في الحارّه الشبل بيستأسد
بشيل الشيلة علي لا تخافي بس دعواتك لي َّ مدد
حيعود يا يمه الفرح الضاع مهما إتغيب وطالبو أمد
وفعلاً خلَّ المدرسة سافر وللأرزاق ما خلا بلد
و أجاب لي دعوات أمو بقاله وليده يمين وسند
وكان بت عمو (أمل) شايفاه فتي الأحلام وبطل الغد
وكانت أمل الكل في الحلة جمال متميز وفايت الحد
تحبو وكل ما مرت سيرتو بتلقى خياله معاهُ شرد
وكل ما تحاول تكتب ليهُ آخر لحظة تخاف تتردد
تقولوا إتكلم وريح قلبي أنا بت لاحظ وأنت ولد
وكيف البت تتطاول وتعشق ويبقى سكات الولد الرد
كيفن تسكت ولي تتجاهل ويبقى أخير ملاك السيد
الدرويش الزاهد وهامل لا عندو أهل لا عندو بلد
الدرويش الجابو الشارع وفي زاوية حلتنا قعد
يسقي الشتل الضال بي جوزو ولي أزيار الزاوية إتجند
تقولو تعال بخطبلك أملَ معاى أخدم يتخيلو جد
تلقى حرت لك إنقايتين وبوق وتيلن ومارن وسنَّد
ويومو اليبقى جعان ومفلس وسط الناس ينضارى ويشحد
وكلما شِلت صفيح للموية توتل جوزو معاي ورد
يحكي لي عن حبو وريدو وليهو سنين بس راجي الرد
وأنت سكاتك طال يا غالي وأنا راجاك مستني وعد
آخر يوم في إجازتو مشاله حكاله ظروفو وليها سرد
إنو الحالة مِتل ماك عارفه خليط ممزوج من فرح ونكد
يوم الفرحة تطير بالواحد ويوم أحزان وسهاد وكمد
وأول فرحة تعطر بيتنا يوم ما إتخرج وسافر (أمجد)
قال في الغربة بحقق حلمو وفيها طريق أحلامو معبد
بس نستنَ (أميرة) تكمل وأفرح بيك وبي حبنا نسعد
وتبقى الدنيا إبتسمت لينا وليك بتقدم وما بتردد
وخلي البينا يكون بيناتنا وسوي ضلوعك للريد سد
وسافر وعاد لي شغلو محمل بي إحساس أخضرَّ وفرهد
سنين عشرين من عمرو تمر مما سافر ويمكن أزيد
ما ضاق فيها حلات النوم ولا مرتاح فد مره هجد
وبنيت عمو هناك منتظرة والعرسان كل يوم تتردد
يناجي خياله يقولها أصبري لا ناسيك لا شوقي برد
قريب ألقاك وأبل الشوق ويبقى لقاي لي حُزنك حد
يوم جابولو جواب مستعجل فتحو ولي صفحاتو فرد
لقا جواهُ الما متوقع وآخر شي في عقلو ورد
سيل الدهشة جرف تفكيرو ولي لحظات بي عقلو شرد
طول الليل راقد سهران لا جاه النوم لا لحظة غمد
قرر بكره يسافر بدري ولما يعود حيكتب الرد
ولمن صبحت كان في اللوري حجز قدام في الكرسي قعد
وصل البيت الطوَّل منو بعد ما إستن وصبرو نفد
سالم خالتو وعمتو (زينب) وبالأحضان لي أمو قلد
حكى بالحاصل ليهم كلو ولي مضمون القصة سرد
إنو الجابو أمر مستعجل تفصح عنو رسالة من (أمجد)
كاتب قال نخطبلو بسرعة وحدد لي بت عمو قصد
قامت عمتو (زينب) فاتت لي بيت عمو تجيب الرد
أمل قالتلها خير يا عمة دون ما تفكر أو تتردد
ضمته عمتها قالت ليها إنشاء يكون بيت مال وسعد
إنتي جميلة بتملي العين وبرضو مهذب ورايق (أمجد)
سكتت لحظة وقالت تضحك عمتي غلطت قالت (أمجد)
(أمجد) مين يا عمتي صلي الإتقدم أخوه (محمد)
قالت عمته لا لا الدايرك ورسل خطبك (أمجد)
ويلا معايا براك بي نفسك شان ما نمشي هناك نتأكد
ولما (محمد) أكد ليها كان إنهارت وحيله برد
قالها (أمجد) فعلاً عاوزك ودمعو يكبكب فوق الخد
عشانو بضحي بأعظم حاجة ولو الحلم عشانو إتبدد
إنتي الروح بهديك إياهو وراضي أموت لو بيكي بيسعد
أنا المهدت طريق أفراحو كيف في يوم أجي أكون السد
ديل أخواني الأنا ربيتم وريدي أنا ليهم ما بتحدد
أنا خليت الدنيا عشانم وضقت عشانم ويل ونكد
ولو بتقسم فوقم عمري بقسمو فوقم ومابتردد
ونحن خلاص أصبحنا أخوان والموضوع بيناتنا أتعقد
كيفن ترفضي (أمجد) وترجعي عاد تنتظري (محمد)
واقفة (أمل) قدامو وتسمع ودمع العين في عينه جمد
كأنو إغتال الشوق العارم ولي أفراح جواها وئد
قالت كيف إتهنى بدونك وكيف في الدنيا بدونك أسعد
جرح الليد سرعان ما يبرأ وجرح الجوف كيفن يتضمد
وقلبي العشقك كده يستاهل إنو يعيش طول عمرو مشرد
وفاتت خلتو واقف ينضم ساهية وسارحه وباله شرد
وكان الريح تنهر بي بره هبوب وأمطار وبروق ورعد
والسكان من بدري إتلمو وكل واحد في بيتو هجد
ترجف وتبكي مباري الحيطة نص الليل كان قاصدي (السيد)
كان في الزاوية رقد هلكان راح في النوم لي إيدو إتوسد
متفرشلو دلق شوال جنب الحيطة رقد وإتمدد
صحتو قام مخلوع من نومو من قدامه بسرعة شرد
قالتلو رضيت بك وبكرة نعرس ما صدق بالهجمة قعد
وفعلاً بكرة بلا زغريد إتلمو الناس وعليها عقد
وبكت الحلة عليها هي حية وعاشت يومه دموع ونكد
وبكى بي حرقه وسافر وراجع جاري زيول الخيبة (محمد)
كتم الحزن العايش فيهُ وحكى بالحاصل كلم (أمجد)
قالو قسمت البت لي غيرك وكلو نصيب مكتوب ومقيد
خبر (السيد) وامل اتوزع بين الناس إنزاع واتردد
إنها عاشت في تعذيب والعبرات إنقلبو غدد
وإنو قليبه على الأحزان والالآم بالحيل إتعود
ويومه الفرحت وجابت بت حزنت تاني ومات (السيد)
ويوم الصدقة سمايتة كانت قالو الناس سموها (شهد)
وبعد سنتين إتحكى بالصدفة وفي ال ين كان قاعد (أمجد)
عرف القصة تدور حوالينو وقف الدم في جسمو جمد
كِره الدنيا وكِره الفيها وبكى وإتألم ولحق الحد
قاعد يبكي ويبكي ويبكي لمن غاب ولي وعيو فقد
كيفن أخوي الضحى وع عشاني إتبهدل وحلمو إتبدد
وكيفن أكون أنا سبب أحزانو وكيفن أكون لي فرحو لحد
دا المن قام ما غلط حاشا ولا بي حاجة على جحد
بعد يومين رجع دون إنذار أو سابق وعد
عانق أخوه عناق مشتاق لي محبوبو أحضانو فرد
قالوا أنا عايزك توعدني وتحلف وتقسم ولي تتعهد
إنك إنت و (أمل) تتراضو وعهد الريد المات يتجدد
وبينك وبينه يعود الماضي ويحيا شرار الريد الهبد
هِن حلين يا أرجع أسع ولا كمان في عقدك أشهد
أخيراً وافق أخوه وخاصة بعد ما العودة طريقة إتمهد
وعاد من تاني فتى الأحلام وللمحبوبة العود أحمد
عادو وعاد الفرح الغاب وعاد من تاني وإتجدد
وفوق راس بيتم غنَّ القمري رقص طربان غنَّ وغرد
ونخل الحلة رقص فرحان مال طربان سل وجبد
وقعدو سوا الإتنين في الكوشة وكان بيناتم قاعدة (شهد)
بسمته ضاوية أطراف الدارة وختت فوق كل واحد يد
رسمت لوحة حلم اللقيا بي تحنان في أروع مشهد
وكل الناس بالفرحة إتباكو وكل إنسان للتاني قلد
وكانت (أمل) القمر الضاوي وكل الشافه وقف وإتشهد
وكان الفرح الفي عينيها دون ما تحسبو غنَّ وردد
زي ما الدنيا أحزانه كثيرة الأفراح ما ليها عدد
مظلومة ليه دون البنات دائماً سعادتي منكده
وروني ما ذنبي الجنيت شان إنتوا تعملوا فيّ كده
محرومة من طعم الحنان في أٌسرة قاسية وجاحِده
وحتى الحلم بالخوف بقت خطواتي فيهو محدده
كل البنات في كون فسيح جنات طيوره مغردة
بلبل غٌناي صامت حزين إغتالوا في يومو الشدى
محبوسة في سجن العذاب محكومة فيه مُؤبده
محروسة بي جيش من هموم زِلة وحِراسة مُشدده
بعدوني منك ياعزيز ودروبي ليك مُسدده
ورغم الحزن طاراك دوام ذكراكَ فيِّ مُخلده
بطراكَ كل ماالليل يجن احسب نجوموا واعدده
وكلما نسيت ألقاها صورتك في خيالي مجسده
بطراكَ كل ماعاد حبيب سالم حبيبتوُ وقالده
تتباكى شان طول بعيد وفراقو مو متعوده
بطراكَ كلما إترنمت الحان مغازلة قصايده
وبطراكَ كلما إنساب نغم دغدغ مشاعري وهدهده
وبطراكَ كلما أشوف لي غايب عاد لأحضان والده
َرَّم الدموع وطفاله نار لوعة فراقِن وبرده
بنساك لو قدر الزهر ينساها حبات الندى
بنساك لو احلى الأغاني إتنكرت لي مربده
بنساك لو أفق الكلام ضاقتبو سعة المفرده
وكتيها بصبح في عداد الموتى جثة ممدده
ياغالي بكتب ليك حروف كيتاً تصيد كبد العدى
واجبر مسامع الناس علي كلمات غنايا واعوده
وأملا الدفاتر بي حروف كانت حبيسة مقيده
تشرح توضح حال قليب يادوبو للريد إهتدى
بين إني أموت وإتفَكَّ طال ما إني منك مُبعده
وبين إني أحياعلي امل لٌقياكَ عايشة مَجابده
أتحداك لو تنسيني أو لي حبي تلقى بديل
أنا الدرب الخطاي تمشيهو تعجز عن مشيهو الخيل
حبك ليا لو تخفيهو يظهر فى وشيك عديل
تبدأ ملامحو فى عينيك يقراها الكفيف بالليل
***
ما أتولد البسير فوق دربي والبخبر دروبي قليل
والدرب التطول ايامو بوصل ميسو في فد ليل
***
مابتنسينى مهما كان لأظنك تلاقى سبيل
والضاق الظلال فد مرة مابيرويهو حتى النيل
***
مابحزن عليك والله لو سالت دموعك سيل
جافة عيوني مما قمته مابتعرف عناق منديل
***
لو راجنى ارجع ليكى ماترجينى مدى حبل رجاك طويل
أموت والله مليون مرة أفضل من اجيك ذليل
***
برفض أطرا زول ناسينى مهما كان فراقو تقيل
لمن أريد بريد بالجد لمن انسي بنسى عديل
***
مابحزن على موت ريدنا بى أيدك كان أغتيل
والموت فى بعض مرات يكون افضل من العلعيل
***
لو كان الجمال غاريك بى احساسى ببقى جميل
لو معتادة يجرو وراك مابتلقينى من نوع ديل
***
حترجعى يوم براك تكتشفى انو هواى مالو مثيل
حترجعى لي حماي تكوسى في جنة غرامي ضليل
***
والبهدى لي لحن مثالي ابادلو جميع غناهو هديل
والحاول يمازح قلبى بلعب بى قليبو شليل
***
متأسف على إحساس اتخيلتى انو جميل
متأسف على أوهام سمينها عشق جميل
***
متأسف على أحلام بيني وبينا مليون ميل
متأسف لانى اهديت مشاعر ضوقتنى الويل
***
متأسف على شتلات زرعتها في الصحارى قبيل
أتخيلتا أنها تبقى واحة ريد ثمار ونخيل
***
ارتاح في ربوعا أنجما واحد من ثمارا أكيل
لكن ياخسارة زراعتي كانت جوه مجرى السيل
الزمن مهما كان عنيـد شكـل أفعالـوا وصـورا
برضو ننسى سواتـو ونقـول قسمـه والله مقـدرة
كل يوم يرويلنا بى فـن قصـة مختلفـة مغايـرة
بحكى من أفعالو واحدة بس مثال ما داير احصـرا
عاش منعم بيـن والديـن ريدتـو فيهـم متفجـرة
شبّ بين والد كان عطوف وبى حنان والدة مبطـرا
أسرة غرتو كل الحنـان وليهـو سقايـة محـدرة
***
ولـفّ دار دولاب الزمـن والقـدر يتـم ميسـرة
مات أبوهو الكان حنين وليهو كان الضل والضـرا
خلى لى أم ورثت الهم والنحيب ودمـوع ممطـره
خلى لى شابة اترملـت زهـرة يـا دوب منـورة
لسه فى ريعـان الشبـاب حلـوة أمـورة وآسـرة
فلته من عالمنا الضنيـن مستحيـل تانـى يكـررا
***
قررت تتحزم تقيف جـم وليـدا تكونلـو الضـرا
وتنسى إنو فقد أبوهو وتبقي هى الراجـل والمـره
رغم جو الهم والنكـد مهـدت لـو طريقـو يقـره
ورغم إنو زمانـا غالـى كـان بتقعدلـو مذاكـره
كان بتحلم بى وليـدا يبقـى كـان كابتـن طائـرة
والا يصبـح باشمهنـدس والا يتخـرج دكـتـره
***
والوليد اصبـح كبيـر وفاتـا يـا دابـو العاشـرة
والزمن غيـر كـل شـئ الا والدتـو مـا غيـرا
زادا فى نظر الكل سماح وفى عيون النـاس كبـرا
مرة يوم الحلى جاطت وقالـوا إنـو سعيـد دايـرا
كان سعيد راجلاً مهذب يملـك الجـاه والسيطـره
***
قام طلب إيد أم الوليد ونيتو صافيـة لبـن طاهـرة
دار يكون لها راجل أمين ويبقى والد لـى ميسـرة
حست إنو أماما إمتحان قاسي بيـن إتنيـن خيـرا
ختـت الشافـع أمامـا ومغريـا الكـون بـى ورا
بين وليدا الفارق كبير وبين قروش وحلى وأسـوره
رفضت الفكرة وبى أدب رسلتـو جـواب معـذرة
ورتو إنها داب وليدا وفى العـرس ماهـا مفكـرة
***
يوم سعيد نادى الشويفع رغبو وقال ليهـو واغـرى
جيب لى قلب أمك يا ولـد ولينـا طلباتـك آمـره
كان طلبت الشي المستحيل يبقى ممكن شان خاطره
كم فرح ميسره وإنبسط ولى ديارن فرحان جـرى
فتحت أمو احضانا راجا شان تضمو يطيب خاطرا
وبين ضلوع أمو الحنيني غزّ سكيـن لـى آخـره
***
وانتزع قلب أمو عجلان من محـل ريدتـو موكـر
وماتت الأم جم وليدا فوق دمـوم سالـت طاهـره
وشال قلب والدتو بين ايدى وزود السرعـة كتـرا
ومن كتر سرعتو قام وقعد وما عرف حاجه ومادرا
غير سمع قلب أمو ينضم وفيهو كم أنات عاصـره
بى كلام أشبه بالبكا ومـن حلـق ساداهـو عبـرة
يا جناى إن شاءالله طيـب بـى وقعتـك متأثـرة
***
كان كلام قلب أمو تيار فى دواخل الوجدان سـرى
رغم إنو يفيض محنه .. ضاق طعم كلماتـو مُـره
حس إنو فعـل جريمـه مستحيـل تلقـى المغفـره
سل سكين داير يموت وفى وسـط ضلعـو يوكـرا
دار يموت كان يرضى الضمير أو يكون للزيو عبره
الا تانـى قليبـا نـادا رجـع السكيـن لـى ورا
ولاتكتـل أمـك مرتيـن يـا جنايـا كفايـا مـرة
حاجة نفيسة
حاجه عجيبة
قصة طويلة يااطفال نهايته كان نهاية غريبة
حاجة نفيسة كلها طيبة
تشهد بي حنانه الحلة بي كل طيبتة وتهذيبة
كان حِبيْبه
حبوها الكبار والجهلة كان يحترموا فيها الشيبة
كانت عيبه
أنو دموعه دايماً سايله في الفال والحزن صِبّيبة
إلا غريبة
ديمة كمال معاند ليها كايس دمعته وتعذيبه
دون أخوانو منصاع ليها روحو الماقدر تهذيبه
ديمه يصيبه
بي اسهم لسانو السامه بي اهماله ليهو يعيبه
كان يوم داك ينهّر فيها لمن زاد عليها نحيبه
خافت إنو تدعو عليهو دعوى الأم من الله قريبه
دخلت جوة تبكي براها ديمه جناها كاسرو قليبه
فات لا جوَّة حسَّ الحمى بين أوصالو ساري لهيبة
في غير وعيو صاح وينادي يمه تعالي مني قريبه
حسَّ بإيده ماسكه جبينو شان الحمى بالِّي تويبة
أصلو الأم حكاية عجيبة لمَّ تشوف وليدة يعاني
ديمه تعيش وسط تعذيبة
مابيرتاح دقيقة قليبة
فوقو تقيف تشيل الليل وتبكي من الصباح للغيبة
زاد تعذيبه
انآت الوليد والآمو ما قدر إحتمالو قليبه
يوم شافوها جاري تويبه
تبكي وراها كل الحِلة لملموا في الايادي دريبه
باكيه كئيبة
همها كان كمال يتداوى ما خلت طبيب وطبيبة
عالي نحيبه
ودعت الأهل تتباكى قالت مابتطول الغيبة
سفرة قريبة
يمكن تلقى فيها الدايره يتعالج وليده حبيبه
قالت أسيبه
كل الدنيا ماندمانه والروح لي جنايا أفديبة
طالتَ الغيبة
شهرين من قيامه اليوم وماكان ترضى ساعة تغيبة
حالة صعيبة
والناس في الصلاة بيدعوله راجين لي وليده الطيبه
لحظة عصيبة
لمن عاد وليده براهو رجعت بس معاهو حقيبة
رجعه مريبة
حزن الدنيا في عينى ويجرجر في زيول الخيبة
غلبو يجيبه
أسئلة من كبار الحله وين أمك قدرت تسيبة
الشفع كمان يتباكو يأمروا فيه زي ما سقتها إنت تجيبه
صدمة رهيبة
لمن قال وسط دمعاتو ماتت أمي قسمته يارفاق ونصيبه
مقلو صبيبة
ردد كم جمل مطموسة كلمات ماقدر ترتيبة
وديك اللحظة عرف الدنيا
من غير والده خاوية ومابتساوي سبيبه
فات وينادي دنيا عجيبة دنيا رهيبة دنيا غريبة
طافش فيها بين أهوالة كايس للجراح تطبيبه
جاري وراهو حاج التوم الجنى عقلو صار مو طيبة
قام رشاهو بي كوز موية علو يفيق من الغيبيبه
فعلاً حسَّ – ( حس هناك مكان الحمى)
حلمه عجيبه
منها قام كمال مهجوم ويحمد في الله كان هضريبه
دخل الأوضة كابس أمو روحو تزيدو في تأنيبة
قالد امو فوق مصلاته يبكى زى العمللو مصيبه
دايرو عفوكي بس يايمة روحي فداكي لو ترضيبه
قالت في فزع مهجومة سم اسم الله علك طيبة
بين ايديها ضامه عليها قالت باكيه كيف الام تجافى حبيبه
[align=left]علاء الدين عبد الرحيم[/align] [align=center]
[/align][/size][/align]
ريدك بدايات الفرح لٌُقياكِ حد عُمر الشقا
حُبك امل لاح في الأفق كان للتفاؤل بارقه
بالله كيفن زي هناى في لحظة اقسى وافارقا
كيفن عيونى يجيها نوم وهي بي هناكا مأرقه
وصل الجواب شايل الفرح رايع حروفو منمقه
حلق بي في جو من هُيام ورجع بي لي يوم اللقا
بعد السلام أسرِع تعال الغربة سيبه وفارقا
خليتني وحدي بلا رفيق باكية وحزينة مقلقه
قالت لي ساو كيفن هناك والعيش بلاى كيفن بقه
والدنيا من غيرك جحيم لكن تراها مدردقه
سافرت خليت الدموع من عيني ديمة مدفقه
وخليتني لاموت لا حياة بينن صِبحت معلقه
ساعة الوداع شلتك حُضن وفضلت فيك متعلقه
ما خُفت من كل العيون الكان علي مبحلقه
ايديَّ كانت في ايديك ماكنت رضيانه امرقه
بي لهفة أطوّل في الوداع مذهولة ماني مُصدقه
وساعة خلاص حان الفراق ولمحت دمعة مرقرقه
فجأة إنفجر بركان بكاى رَجَّ البوادي وغرَّقه
بهواك عشق من نوع فريد هتك القوانين خرَّقه
لو قسَّموه علي الخلوق براحه اكيد بيحوقه
إنت الفرح إنت الأمل وإنت الأماني المطلقه
وإنت الهدف في كون بقت أهدافو ماها محققه
دونك ثواني الليل طوال ومعاك تمُر متلاحقه
وليلاَ يضمنا مابنحس بي وقتو لما نشرَّقه
نشرب سلاف الريد كئوس بيناتنا دايره مطبقه
نسكر نغبي من الهيام خَمرة غرامنا مُعتقة
مليت رصيف الإنتظار في أفقو ديمة مُحدِقه
وراجاك تراني علي جمر بي نار فراقنا مُحرقه
ملعون ابو الغربة إن بقت تسبي السعادة وتسرقه
وعيشتاَ تنسيك لي اخير قبال ده يحصل طلـقه
[align=left]علاء الدين عبد الرحيم[/align] [align=center]
[/align][/size][/align]
مخدوع فى مشاعرو ماعارف الحقيقه
وماقادر يسيبه ويبعد عن طريقه
صدق قلبو مره يوم فى الريد رماهو
عايش عمرو كلو ماشى على هواهو
مامن غلبو يبكى لكن من شقاهو
لم حبيبتو هدت لى كل البناهو
ماكل زهره فاحت تهدى الناس رحيقه
وماكل نجمه لاحت تأثر بى بريقه
خدعوك شان حنين ومشاعرك رقيقه
وماك داير تصدق انها دى الحقيقه
انت عشان رضاها ماخليت وسيله
طرت مع القمارى وغنيت فوق نخيله
راسم فى خيالك ليها صور جميله
ولسع برضو تحلم احلام مستحيله
انت غريب مسافر فى بلداً غريبه
ابداً ماحترسى الا بعد تسيبه
كل ماجيت تبعد تصبح ليك قريبه
ولما الشوق يجيبك عاد من وين تجيبه
نحنا قبلنا عزرك شان قلبك اسيرا
شان كانت خطاوى مكتوب ليك تسيرا
ماتعلق مصيرك يازول بى مصيرا
وخلها تمشى ترحل كتر الف خيرا
[align=left]رامي قسم السيد[/align] [align=center]
[/align][/size][/align]
الحب قـــدر
(حاج الخضـــــــر )
حاج الخضر عارفنو داك ورث القروش فيهن رتع
كل البريدو قريب منال طول عمرو ماقالولو لـــــع
فى الدنيا أكتفى بالحسن كان الحسن ولداً جـــدع
عايش سعيد بين والدين ريدم يفوق حد الدلع
قروهو ارقى الجامعات تم العلام بره ورجع
واصبح علم فوق راسو نار بى علمو واخلاقو ارتفع
كان من زمان رايد( رحاب) ريد البنيه معذبو
زمنو العنيد خلاهو راد والحب عن ناس ابو
واصلو البريد عارف اكيد كان ماضرب حايضربو
باح لى امو بى سرو الدفين داير زواجو يقربو
قال( الحسن ) وكان قولو صح داير (رحاب) بايً تمن
من غيرا مابقدر اعيش نحنا اتفقنا نكون وطن
عاد امو غطاها الفرح قالتلو ابشر يالحسن
كان خوفا من حاج الخضر يئد الامانى الخدرن
جات للخضر عند العصير شايلالو شاى والجو حلو
قالتلو دايراك فى طلب قام لف شالو وعدلو
(انشاءالله خير ياأم الحسن والقاسى ربى يسهلو )
ولدك دحين داير رحاب يكتب كتابو يكملو
حاج الخضر حرقو الكلام هاج لما قطع عمتو
وقال اصلو ماياخد رحاب انا داخرو لى بت عمتو
قارى الكتاب انا (للسرف)والذيى هيبتو كلمتو
والداير يخالف كلمتى لسه امو عاد ماولدتو
ياحليلا عاد ام الحسن قداما كل الكون رماد
ماقادره تمشى على الحسن والعبره حاماها الرقاد
جاها الحسن فرحان شديد من شافا تبكى ارتدا صاد
عرف الحصل من غير كلام كيف انو اتباع فى مزاد
رقد الحسن حزنان مريض لمن عرف دربو الودار
عرفت رحاب بى حالو جات مسكت اديهو بكاها حار
قالتلو اصبر ياحبيب انا غير هواك ماليا دار
لكنو كان ياحسرتى مو فارز اليل من نهار
أمو الحنينه بكت كتير وعقيلا بالاوهام شرد
راجى الخضر يرحم يلين لكنو ماغيرلو رد
الحقنا (ياود حاج ابوى ) بيك لله طالبين المدد
خايفه الولد يرحل بعيد والفرحه تسكت للابد
حاج الخضر قاسى وعنيد فى رأيو مابيقبل جدل
ابداً ولا بيكره جناه فى قلبو ريدو ولا يظل
عاد قلبو واجعو على الوليد لكنو ساكت ماسأل
(وا شرى) يأام الحسن كيفن نجيم ولدك افل
طول عمرو معتاد النجاح كيف يرضى يقبل بالفشل
قالتلو قول قول اى شى قول يالحسن ورينا حل
ليها ابتسم وسط الدموع لملم مواجعو.... وارتحل
آآه روحو فارقت الجسد والام صياحه صدى الجبل
ووووب يالخضر ولدك رحل وااااى يالخضر ولدك رحل
انهار ضياع امواج حزن دمعات تعشعش فى المقل
والواقع المر الاسيف الام تقاوم فى الشلل
مشتاقه لى ولده الحسن خطوات عشم ماأظن تصل
جنت رحاب بعد الحصل ياعالم الماشاف يشوف
تسأل عن الحسن النخيل.. الوادى.. والنيل.. والجروف
تبكى وتبكى اهلا الغبش لمن تقوم فى الحى تطوف
مسكينه كل الناس معاك ارجوحه فى ايد الظروف
من بينا روح يالحسن والجانى عاداتنا الخراب
مين فينا يحكم للقلوب؟ او حتى يفتح ليها باب ؟
مين فينا يمشيلو الشقى ؟ مين فينا يقرا الفى الكتاب؟
(واصلو اى زول لمن يحب يمشى الخطاوى بلا حساب)
حاج الخضر صح قلبو لان منو الدموع تنزل مطر
لكن بعد فات الاوان كل البناهو لقى اندثر
بالحسره والنوح والانين حاج الخضر فقد البصر
ضيع جناهو وضاع معا ماعارف انو الحب قدر
ماعارف انو الحب قدر
الحب قدر .. !
[align=left]رامي قسم السيد[/align] [align=center]
[/align][/size][/align]
[align=center]
لما شفتك ..
قلبي دقّ .. واهدى للزمن ارتعاشة
والعيون في عز خريفا عانق الاحساس دعاشا
الخطاوي تراها ماشة ماني عارف وين هي ماشا
والربيع فوح زهوري بانتظارك يا فراشة
غنى في اعماقي صوتك غنوة الشوق والصبابة
والبرق لاح من سنونك داعب احلام السحابة
الحنين الفي عيونك بدد الهم والكآبة
والمشاعر الشاردة جاتك ما رجيت ميعاد ايابا
يلا ارحلي توهيني فيا ألق الذكرى باقي
الحزن لمن افارقك بلقى في صوت السواقي
مدي ايديك وانقذيني مددي جسور التلاقي
داير القاك جنبي دايما تطفي نيران اشتياقي
بي صراحة الدنيا اجمل من نعيشا اسى وتجافي
شيلي وعد اللقيا واقع لي فجر يشرق تصافي
النخل قمريهو هاجر والنجم في سمانا مافي
والظلام يا حلوة خيم في انتظار انك توافي
لما شفتك نور امامي ما قدرت اديك قفايا
امشي وين عاد من عيونك وانتي أي مكان معايا
اعذريني اذا انتظرتك زهرة في عتمور شقايا
وسامحيني عشان بقولك طيري حلّقي في سمايا
[align=left]رامي قسم السيد[/align] [align=center]
[/align][/size][/align]
