رفيقي وراك نجيم الليل بعد كل الخلوق نامو
غتايا تملي توب الويل يفك في جوفي الامو
قليبي يعاكس الاقدار يغني يهدهد الامو
يعيق افكاري بالهلواس انوم متوسد الحلمه
لكن مصيبتي اين اللفات اين اللفات تكتب وداع
حتي القلب الفيّ مات رافض رافض كمان الاقتناع
سايقني فوق طوف الامل رغم انو قدامو الضياع
شلال وموج والقيف بعيد وشقاوتي اتكابت ضلمه
[align=left]محمد سفلة[/align] [align=center]
[/align][/size][/align]
اشبه ذاتي بي ذاتك لقيتك انا
لقيت نفسي وعشقتك زي تراب وطني
ونقشتك فوق جدار الليل
همسة شوق ملبده في دموع شجني
لما رحلت في عينيك اهازيج غنوة التذكار
وغفرتلك الاسي الجواي
ودبتا علي الوتر غنوه
اتوسد خيالي ونم سمعتك في الدليب والناي
تقوقي ضياعي للرحل شوفتك سالي شوقك سيف
تقطعي من لحم جلدك وتلتقي في جراح قلبي
اتمنيتي زات اللحظه اكون مارد اجيب عرشك
عرش بلقيس واجدد فيك اسطورة عصا موسي
ومالك الجن وامرقك من صدي التاريخ
جمال بابل من قلب الصدف دره
واحاوربك زمن اطرش منو العلمني
منو العلمني اتبسم وقت يصل الحزن حدو
منو العلمني اتشتت شعاع محبوبتي في كل الشوارع زي ضي
منو الخلد نجومو شتي في كل شئ زي النفس لا في المروق
لا في الدخول بنحسبو لكنو في عاين لي زين اشر علي واصل يقول
اقطع كلامو قبل يتم اسوقك امش اخاف اجري اكل
اقعد واقنب بالتعب الهث واتمدد بلا احراج وبي يصل الحذن حدو
والاقيك بي حرف بكاي ...الميس بعيد الليل دخل
دسيني من الظلمه فيك لميني ساعة الهجعه بيك
قبال يسابقنا الزمن ويلحق يكـــتل فينا صفقات الخريف
موعد غناوينا الزمان تصبح خيال يتجادعا الموج
وترسي في وادي الضياع من غير ا نبقي مشردين
[align=left]محمد سفلة[/align] [align=center]
[/align][/size][/align]
أهواكي غصباً واحتمل ويلات هواكي جنس جنس
أهواكي طوعا كونو انو هواكي لي نبضا وحس
أهواك موهدب بين صراع اللقيا والخوف والوجس
أهواك قدر مكتوب علي كيفن من القدر احترس ؟!
***
وآضيعتي وضيعت فؤادي الفيهو حبك متغرس
ضيعت رسايلك واحرفه المن قلبي ما ختت الطمس
همسات غنيواتنا الزمان الكنا نسمعا بي همس
تحت الشتيله نناجي نحن الريده نحلم بالعرس
***
وآحسرتي وحسرت عيون ذرفت دموعا علي أمس
علي صفاكي وروعتك وحديثك العذب السلس
من بعدك الايام خلن والعيشة فيها بلا نفس
كيفن يضوق طعما ويروق زول فصل الاحزان لبس ؟
***
ذرّت أمانينا الرياح خلت عقاب حظي النحس
في دنيا ما تفرحني يوم فيك تاني ترجع وتتعكس
ارجاها بالحلم الضحوك تظهر لي بالوجه العبس
سدس السعادة تقسما وتحسدني في باقي السدس
***
عزيت سهادي علي المنام شوقرت طرفي الما نعس
بالشوق كويت جرح الفراق مع إنو تب ما بيتلمس
في نيتي اصبر والصبر للمتلي فوق طاقة النفس
إلا الصبر جواي مات يوم ما بقيت بهواكي احس
***
شايل عذابات السنين والجوة في الجوف يتحبس
واقف اناشد في الديار يا دار انطقي بعد خرس
قالتلي ما نست العهود ماها التبيع الريد بخس
الا الله يفعل ما يريد وابقي انت للتانين درس
***
كان الله فيك قسم النصيب ما كان شقيّ الحال تعس
البحبك مابيقوليك حقو انت تحس براكا
الله يعلم ياحبيبى روحي تشتاق لى لقاكا
يبقى ما عارف الحقيقة وقلبى كيف عايش هواكا
وماكا عارف فى غيابك حالتو كيف تصبح بلاكا
يبتسم يضحك يقابلك ويبكى بالدمعات وراكا
ويقرا فى عينيك سعادتو وسر ودار روحو وهلاكا
***
كلما أشرق ... صباحو تلقى لمّ اشواقو جاكا
وانتظر فى لهفة يسأل فوق دريب البص رجاكا
دار يقولك كيف صباحك ياحبيبو وطاب مساكا
وخوفو ما يقدر يقابلك ويبقى شال اللوم معاكا
***
لما جيت ليه مارجيتو ورحت فايت بى هناكا
ولاّ إتغيرت انت وحزروكا وما براكا
ولاّ شوقك ليه جابك إلابس خفت المعاكا
جيت شان تشرح ظروفك عارضك خجلك حماكا
***
لو صحيح قاعد تريدو متلو كان الشوق براكا
وكت ما بتقدر تفارقو ذى ماهو دار يوت يراكا
ممتثل خاضع يقولك ياحبيب داير رضاكا
ليه نسيتو ورحت نايم عارفو وا سهرو ان طراكا
***
تانى بعدك وين يقبّل ما بطيبلو العيش سواكا
ما بطيق .. يحمل فراقك وما يطيق يقدر قساكا
طرفو ساهد ربه شاهد حالو بالمر ما غباكا
ولِسّ جارى وراء حقيقتك ما استراح من يومو داكا
***
ما امتحنتو وشفت صبرو ماخلاص جرّب كفاكا
أوعى شيشك بى بشيشك ماكا عارفو جريح تراكا
لا تعذّبو .. ماهو مذنب أرحمو وخفف عساكا
ولو قسيت أو كان نسيت هوّ لا زال فى رجاكا
أديني أمانك .. أديني
واحات الريد ألفي عينيك
قوديني عليهن .. وديني
***
جاييك مرسون بي رسن الشوق
قايدني هواك من أرض النوح
شلت خطواتي قيود .. الهم
إتوطي علي قلبي .. المجروح
يا أمنيه لسع ميسها .. بعيــــد
في دابا صبر صابرينا .. يروح
ما دام الله سواك لي .. روح
هيا أسري في جوفي وأحييني
أحييني عشان أنظر محياك
ما خالقو أهداكي سماح الكون
وأهداكي عيون تحي .. وتكتل
وإن رادت شئ بي أمرو يكون
فتشت نواحي الدنيا وجيت
مالقيت لي شقاي من غيرك عون
علمتيني العشق المجنون
جالسيني وفي شرعو أفتيني
***
أفتيني في حكم الهوي بالذات
في نص المادة الفيهو تقول
(يظلم من حبا ولو مظلوم
لا شاهد لا دفعاً .. مقبول
ولو قتل الحب عاشق عمداً
العدل مع القاتل علي طول )
طيب ما ذنب المات مقتول ؟!
ما تردي علي .. حيرتيني
***
حيرتيني وحيرتي .. معاي
ناساً في الريد كان ليهم باع
شلتك جواي أشواق أشواق
وأبعد ما تكوني عن .. الملتاع
لو هنت عليك وهانتني أيام
خليني أجابد الأمل الضاع
يمكن يفرد للفرحة شراع
يعبر يم حزني ويرسيني
***
يرسيني علي شاطئ الأحلام
في عالم ما بحدو الإدراك
بهرت ألوان روضه طيورو
وغنت للخلد .. وما أدراك
نزلت أنجم ليلو أزاهر
أزهارو نجوم صبحو الضحاك
أهرب من ريدك وفيه ألقاك
ألقاكي وتاني تلاقيني ..
أديني أمانك أديني
لقيتك في زمن وخري بعد ما أتربت فيك رجاي
طلعتي من القدر نفحة وسماح قدراً يجيبك جاي
***
صباحك .. ياربيع مزهر نهارك .. ياخريف بكاي
ومساك..وكت يمسي الشوق علي هدب النجوم ناجاي
وأشيل طمبوري أنقنق لك عشان ريدك بقيت غناي
ده ريدك ألف ليله وليل وطول الليل علي الحجاي
***
رجيتك بالسنين ودنين أدودر في الصبر تالاي
وكت ضهر الصبر يتقص أقيف وألزم همومي براي
وأشوفك بين غيوم الشك بريق شايل الأمل ضواي
أشابي عليك مطير ينزل يغسل في دواخلي أساي
***
رجاك لا كان ميعاد بيناتنا لاعرفه ووصف هداٌي !
سوي صورة مجهجة فكري ترسما نزعه من جواي
وأقيف ما بين حنين رؤياك وجن العاشق الغواي
أمد إيدي علي المجهول عساي تصدف يداك يداي
***
أغنيك قبلما ألقاك وتخيل فوقك قوافي غناي
وألاقيك ياشديرة الحن بعد دردح غناك بلاي
شميسن في نهار واحد قدرة الخالق السَواي
شمس ضلاً سماي فيها وشمس حجبت علي رؤاي
***
لقيتك لاني حان للماضي لا ندمان عليه صباي
محطات العمر يمضي , وكمان , عجل الزمن جرَاي
سماحة الدنيا في عينيك ولقاك علي المودة جزَاي
جزاي علي الأقل شفتك وكت شوفتك علي كفاي
قبل الآن أنا وين لاقيتك .. حسة عافي وراحة بال
إتمنيتك .. وإستنيتك .. رغم البين والأمد الطال
***
من وين جيتي ولي وين ماشي ؟! قبل إذيك وكيف الحال
قبال تملي مدارك عقلي .. وتدخلي باب الخاطره سؤال
وتطلعي من أفكاري قصيده .. تندا أشواق عبر الأجيال
تروي فصول أياماً ضاعت .. وسر الريده الما ينقال
***
يارب وين نحن إتلاقينا ؟! .. أبدا يوم ما كنتي خيال
ياها عيونك وصفرة لونك .. وفرة فاطر البسم الشال
ياها هداوتك حين تتهادي , تتهادي وينهادي هلال
كان ودرتك كنت أودر ذاتي .. ذاتي بلاكي بقاها محال
***
إتذكرتك بين بنوتنا .. وناس حلتنا وساحة الفال
الحوليك شالوك غنيوه .. وجاريه مشاعر الناس شلال
ترقصي يا الرقصتي قلوبنا .. وميلتينا يمين وشمال
قولة سيْ ما انقطعت منك .. إلا جنا الغزلان جفال
***
إتذكرتك رغم الواقع .. وطول أحزان ما بينا مجال
تسري سراة الليل ما تهجع .. تصبح وباقي الهم يتكال
كان الذكري تقرب نازح .. أو من حالي .. حال
أو قد مره يطاوع حظي .. وأصل النجم الماينطال
***
أيوة عرفتك .. وأتحسستك وصوتك في الأعماق لازال
أبداً صورتك ما بتغباني في أحلامي وفي الآمال
في الجايات والفاتن وعدّن .. من غنواتي وفي الموال
إلاّ كمان من يوم ما غبتي .. ما عرّج منك مرسال
***
وحسع جيتي زماناً وليّ .. وباكيه شموسو علي الأطلال
تنادّي خيوط الذكري الأولي .. أنا كم للذكري نسجت حبال
وإسترجعت طيوف أحلامك .. إلاّ شنو الفضل في البال
كل آمانينا وأحلامنا .. كان مويةً في غربال
الشوق غلاب .. والوعد سراب
في بعدك يا اغلي اماني
وآحشاني عيونك وآحشاني
***
يانسمة صباحية انسرقت تتخلل من صيف أحزاني
في أرحب واحة ريد أنزل فوق أرضها واكتب عنواني
يا الله عليك وانتي بعيدة اعجاب ومتجددي آمال من تاني
***
مدهشة يا شمساً تشرق علي قامه وابداع رباني
لا تثيري عواقب الريد جواي لا تصحي همومي واشجاني
وأنا بين الحاضر والماضي لا زال بتعذب إنساني
ضميني إياب نسيني عذاب خلي الأفراح تتلقاني
***
أنا جيتك من واقع مذري وعالم مليتو وملاني
لا تسألي عن كنه حياتي أنا جسداً وروحاً غلباني
أرسم للناس الكون بهجة وطرباني وما بينهم أغاني
ما رمت خطاب الا وجاب أنا شاعر لو صح بياني
***
تاتيت الريد لامن دفق وخايفلو من الزمن الجاني
شيليه علي صدرك رأفة وختيه علي حنك تاني
حجيه حجا فاطني السمحي والفارس الروياها أغاني
وياما الأحباب يوم يبقو قراب الدنيا تزغرد من نشواني
***
يا شامخي علي كل الدنيا يا وحي الشعر الإنساني
جد روحي تفتش لي روحك وما كان لقياك في حسباني
ما فاكرك من صبري تمرقي وتختالي علي أوتار ألحاني
والأمل الغاب طول ما جاب الليلي ألقاه وبيلقاني .
*يا زماني أحكي ليهم .. عن غرامي أنا كل مشهد
*أحكي ليهم في الليالي كيف هو عاش طرفي المسهد
*أحكي لي نخلات فريقنا .. لي طويراً فيها غرد
*للجداول .. والسواقي .. وللدريب الليها ممتد
*لي بحرنا .. ولي جروفنا .. للخدار الفيها فرد
*وللديار العشت فيها .. أنا فبلما أصبح مشرد
*لي قويزاً شب يغازل .. في القمر طول ليلو يسهد
*للجدار الراح يصارع .. في الزمان ما راضي ينهد
*للرحل فارق غصونو .. وللضغار في عشو غرد
*لي نسيمات يهاجرن .. من شمالن يحملن رد
*أحكي للساجعات حكايتي .. وللعيون الليلا هود
*للبنوح طول عمره باكي .. وليه جمر الفرقه مرقد
*وللبضم الشوق يسافر .. وليه دار أحبابه مقصد
*لنجيماتن يساهرن .. لما ليل الغربه يتمد
*أبقي زي وتراً حنين .. لصداه القلب ردد
*غني مره وأبكي مره .. وأروي قصة حبي وأشهد
*أحكي كيفن راد قليبي .. بسمته وخدو المورد
*وكيف عبد بالشوق عيونه وفي دناهن عاش مشرد
*كم صدح بي أسمه غني .. ردد الألحان وأنشد
*في شقاه يقول غناه .. ومن غناه الناس بتسعد
*يرسل الآهات حزينه .. وبي هموم الكون موسد
*ليتو كان آهاتو تنفع .. لي جروحو الما تتعدد
*تاه مع الأوهام مسافر .. في طريقاً غير محدد
*عمره شمعه وزادو دمعه .. وبي حمول الشوق مهدد
*ده السبح في لجه قارب .. وفي بحور الريده أبعد
*لو يموت بالشوق تراه .. برضو لي أشعارو خلد
اتمددى اتسربينى أدخلى من كل المسام
اتوهطينى معاى فى الصحئ فى المنام
واحتكرى فينى الزاد براك واتحكرينى
غـــــرف غــــــــــرف
وتاوقى من جـواى من كل الشبابيك
والشـرف
ح تشوفى ايـه غير عزتك ملكــــه
وقصر محفوف وجودك بالترف
داخل وطن مليــــون ســــــــلام
كل المدن كل القرئ كل الشوارع
زحمه بيك كل الملامح ياها زاتا
اتمددى كونينى بالطول بالعرض
ياكى السماء وياكى المــــــدى
وياكــى الارض
اتسربينى ادخلى من كل المسام
من غير كلف نتجرد الانتى وانا
وانا زأتى اظهر من خلالك دوزنه
زى ازدجية الشعر واللحن فى
شــدو الغنــاء
اتسربينى عقيده فيك يامؤمنة
وأتعمقى الاعماقوا كل الامكنه
وحتى الجدار اطليهوا بى انتى
وانـا
اتسربينى ادخلى من كل المسام
كل الدخل منك وحاتك مامرق
جوآى اسير واصبحت من شوقك
وكت اتنفسك اكسجينك مابيتأكسد
زفير
مأاجملك داخل وطن فيهو كل الناس
رسل شعبك ملأئكـــه وانببـــاء
لافيهو آمر لاأمير لاقمره جهجهت
النجم واتنكرت لى عشها لافى
وشنا ح نلقى يوم شمش الله
صـرت وشهـــــــــــــــا
عندك جوازانك تكونينى واكونك
واى فجــه نخشــها
من غير خرط من غير حدود
بتحدنا ماانا ونتى فى الاخر
وطــن يامؤمنـــــه
ماأنا وانتى فى الآخر انــــا
[align=left]محمد سفلة[/align] [align=center]
[/align][/size][/align]
[align=center]
عزة نفسي
لو خايفالي من آهاتي وأحزاني البعيشها وراكي
أعرفي إنو عزة نفسي أكبر من مدار إدراكي
وتاني لا بتهزني ريده ولابرجع بجيك متشاكي
قادر حتي افارق ضلي بس رمشي أنا ما يدمع باكي
من جور الظروف إعتدت في كل خطوة اشوفو هلاكي
أيه يعني إن قسيتي وجرتي وإتنكرتي ليهو هواكي
لا الدنيا بتقيف كان فتي لا روحي بتفوت بي وراكي
لا قلبي العليه إن دهدهتي قادر لحظة يستناكي
الدنيا العبوس بي خيرا إياك من تظني إياكٍِ
ياك قمر الزمان في سمانا يالسمحة إتخلقتي براكي
عذرا لو عليك قسيت أو مات في دواخلي غناكي
عفواً ما بقت تسكرني النسمة اليجيبا شذاكي
وشكرا منك إتعلمت أرفع راسي فوق لسماكي
وأهلا بالضياع والوحدة لو رفقت خطاي خطاكي
وما ندمان علي ما ضينا وايامنا اللي راحو فداكي
وما عشمان اعود من تاني وارجع من جديد القاكي
ولو قايلة بتزلني ريده واتحمل غصب يا ملاكي
خاب ظنك وحاة البينا هاكي قليبي واتحداكي
[align=left]محمد سفلة[/align] [align=center]
[/align][/size][/align]
