رســالة هامة من أوتوفســتر لجـــمال الــوالــــــى

[حموودى]

والله ياجماعه



انحنا لسه ماقعدنا نتفرج وحارس الصفاقصي ما لبس جونتياتو زي الناس والحكم لسسسسسه مانزل يدو



وتوووووووووووووووش



قول واحد



وبضرب لي خالي عشان اكاويو


توووووووووووووووش


التاني




و.........................




تووووووووووووووووووووووووووووووووووش





لم قالو الروووووب


وبين الشوطين قالو الوالي مشي حنس المدرب واللعيبه




حتين بردو شويه

[ابن الخطاب]

أمبارح لقيت في تلفوني 4 مسكول ومسجين



فتحت المسج لقيت مكتوب فيها: عزيزي المشترك لقد تم تمديد إستقبالك إلى يوم 4/2


والله يا ناس المريخ غايتو



شرفتونا ورفعتوا راسنا

[حموودى]

فتحت المسج لقيت مكتوب فيها: عزيزي المشترك لقد تم تمديد إستقبالك إلى يوم 4/2

لا لا لا




دي



باااالغته فيها



وكاااك شديييد

[ودعلبوب]

الاخ السنى
افتقدناك
وافتقدنا ردودك وامثالك الرائعة قلت لى الجمل مالو......

[Suhaib]

ندعو السيد عوض احمد الجاز وزير الطاقة والتعدين بعقد جلسة مشتركة مع السيد عبد الكريم النفطي خلال زيارته الكونفدرالية للسودان تتعلق بتوصيل[mark=FF0000] اربعة[/mark] خطوط نقل بترولية من هجليج الي ميناء بورتسودان وكدا !!


بورسودان بس بشائر لا :D


التنمية واجب وطني والرياضة ممكن تساهم ف تنمية البلاد !



،،

[هتان]

تكوسو كواسا
تلقوهو بلازا ,,,



ما عارف لكن من قبيل بغني في المصير ,,
ليه بنهرب من مصيرنا
نقضي ايامنا في عذااااااااب ,,,

[حزن السنين]

سبحان الله ،،،،

انتوا اس ما بتخجلوا من كلامكم دا

نحن اتغلبنا من فريق ليه اسم في افريقيا

لكن كعب الناس تتغلب من فريق لسة يا دوب بتعلم المشي

ما بتخجلوا سوريا الما عندا لا اسم و لا فريق تغلبكم

و الله نحن بي هزيمتنا دي بنخجل ليكم

و بعدين لمن يكوون عندكم ولاء للشعار لابسنوا بعدين ممكن الواحد يرد عليكم

و برغم الهزيمة مريخنا فوق ،،،،،

[ودعلبوب]

بعض المصادرالقريبة من الحدث اكدت وقوع اشتباكات داخل القلعة الحمرا وذات المصادر شاهدت بام عينها اصابة ابوهريرة حسين( بنيران صديقة )من قبل البرازيلى باولينوا
فى هذا الاثناء يبدوا ظاهرا للعيان مظاهر تمرد داخل القلعة مما ينبئ بكارثة أكبر لاسيما وان الوصيف مقبل على معارك لا قبل له بها ولا يزال الموقف يكتنفه الغموض

[استارو]

نجمه : الو ورده ازيك.
ورده : اهلا وسهلا يا نجمه كيفنك .

نجمه : شنو قاطعه اخبارك .

ورده : والله قاااااعده . اليوم داك كنت بسمع في قصيده سوقني معاك يا حمام بتاعت حميد طريتك طوالي
نجمه : يطراكي الله بي خيرو يا اختي بس ما فهمتك ليه حميد بالذات عشان بيناتنا التميز قاسم مشترك مش ؟ كتر خيرك .

ورده : هييي تميز شنو انتي قايله نفسك هلال ولا شنو انا قاصده لما سمعت كلمه حمام اتذكرتك مش انتي مشاركه في دوره الحمام ولا انا غلطانه .

نجمه : اه اه اه اه ليه يا ورده جبتي سيره سيدي وتاج راسي انتي قاصده تعذبيني ولا شنو.
ورده : هاهاهاهاها انتي لسا مكسره في هلال دا ولاشنو ياختي اخجلي دا اصغر منك بي تلاته سنين وبعدين هو طموحو اكبر منك .

نجمه : ليس كل ما نتمناه ندركه كفايه اني بحبوا انشاء الله ما يعاين لي كفايه انو مالي عيني .
ورده : انتي باكيه فيه من متين يا الثقيله .
نجمه :والله من زمن كنا بنحوم حفايا وعرايا في سوق القش .

ورده : والعاجبك فيه شنو .
نجمه : اه اه يا ورده كيف ما يعجبني دا 78 سنه مكسرني عاجباني رجولتو ومكانته في المجتمع كفايه انو طرد الاستعمار .
ورده : خلاص عندي ليك حل يمكن يعيرك شويه اهتمام .
نجمه : الحقيني بيه ياست الورود انا خلاص اتشليت بالتفكير.

ورده : اعملي ليه عمل .

نجمه : هدا حلك كان غيرك اشطر . يا ريت لو ينفع انتي نسيتي انو رمزالاسلام وربنا حافظوا .
ورده : طيب الحل في رأيك شنو يانجمه ?.

نجمه : اه ياورده الله يصبرني بس . احسن نتونس في موضوع تاني ما تزيدني مواجع .

ورده : هييي انتي قروش الحكومه دي لو محرقاك انا مافاضيه خلاص اقفلي .
نجمه : عليك الله دقايق عايزه افرق شويه من الامي العلي دي .
ورده : خلاص اختاري موضوع . بالمناسبه حتعملي شنو مع صفا التونسيه في الكندفراليه .
نجمه : اول حاجه اسمها الكنفدراليه تاني حاجه ما خاتا ليها اهتمام زيها وزي الفاتو .
ورده : هيي اوعك تفتري صفا دي ما زي الحمام ديك .
نجمه : انتي شنو شابكاني حمام حمام انا ماقابلت حمام .
ورده : ما حمام شنو والله ديل شافو الطياره بعد 2005 غايتو ثقفتي المواطن السوداني شويه .
نجمه :والله الحمام انتي ديل فرق كبيييييييره .

ورده : انتي ما بتقدري تقولي علي حمام لانو لسا الصيني قاعد اتذكرتيه . بعدين يالحليوه الفرق دي والله يقابلها الهلال في يوم واحد من 8 صباحا لي 8 مساء يفرتقها كلها وبعد المغرب يشيل الكاس .
نجمه : انتي مالك .
ورده : تتململي وانتي نايمه يالجنك (نوم) .
ورده مره اخري : وانتي علي مر التاريخ ماجبتي فريقا شادي حالو في البلد دي والفرق البجيبها الهلال انتي في التلفزيون ما بتشوفيها .
نجمه : علي الاقل مشاراكاتي مستمره ياطيش .
ورده : طيش العرب ؟ _ سكتي مالك يا بتاعت رجاء رافع اقصد رجاء راقد .
ورده تااني :ومابتخجلي كمان تتبجحي يالساقطه عربي من زمن نصر ود حسين ود الدايه . غايتو زي ما قلت ليك انتي بس ثقفتينا عرفنا لينا دول ما موجوده في الاطلس _ عرفنا ريونون وسان لويزن . المعطت ريشك هنا جوه استادك اتذكرتيها ؟ كمان تتكلمي عن الطياشه يالمغلوبه من نادي في دوله مساحتها 2000 متر _ حاااااحا _ قالو سان لويزن دا لما يكون متمرن سكان ريونون كلهم بكونو عايمين لحدي التمرين ماينتتهي . وما عارف قطن تشاد عليك الله ما بتخجلي فريق من تشاد يبهدلك . القطن دا قالو مدربوا سايق موتر ورئيس النادي عندوا رقشه وما مرخصه ورئيس الدوله عندو اتوس متجدع يا دنيا مافيكي الا انا .
نجمه : شنو ما سمعتك قلتي شنو ؟
ورده : انا لي ساعه بتكلم ما سامعاني .?

نجمه : والله كنت سرحانه في سيد الكل اه يا قلبي العليل من عذاب سيدي التقيل .
ورده : دقايق اطمم بطنك مره واحده انا كنت عندي علاقه بي هلال قبل كده .

نجمه : يعلقوك في بوابه عبد القيوم يا سجمانه اي حاجه يا ورده ولا تقصي لي في هلال والله اسلط عليك ناس بجبج فقراء ساي تبقي زي ابو عنجه .
ورده : فقراء يا جاهله انا ما بؤمن بي حاجات زي دي يابتاعت تيس الفتيحاب .
نجمه : قبيل ما كنتي مقتنعه خلاص اختصري وتاني ما بضرب ليك ياطيش
ورده : اكسبي زمنك يا بتاعت الصيني يالشايله اربعه من اوتالي الكيني.

نجمه : هييييييي يالعدمانه يالسجمانه نسيتي البوليس الكنغولي .
ورده : لالا متذكراهو وعارفاهو نديد لوبوبو الطيرك يا ام تاريخا شين يالاتمسمرتي من الصادق ويو وهيثم الزين .
نجمه : انتي نسيتي الخمسات يا المستواك ناس شمبات .
ورده : الخمسات زي بتاعت الاهلي والهلال السعودي وكانون ابو خمسه عيون .
نجمه : انتي قله ادبك دي كلها عشان هلال ما تقولي انو مكسرك برضو وانا اقول كسير التلج دا شنو هاك صالح عبدالله وفتوح في الدوري وانا واقفه لي حلقي .
ورده : اي بس موتي مغصه عاجبني ومدشدشني وما بخلي ليك . بعدين انتي بتدرني مع تريعه البجا عايزه هلال يحبك .
نجمه : انتي يا ورده قليله ادب . **
بعدها قفلت نجمه الخط في ورده واتصلت علي امل في عطبره .
نجمه : ازيك يا امل .
امل : اهلا يانجمه كيف اخبارك . من قبيل بضرب لي ورده تلفونها مشغول هي بقت تحب ولا شنو .

نجمه : تتصوري يا امل طلعت باكيه في هلال عليك الله ما بتغش في روحها .
امل : سجمي ورده باكيه في هلال ؟ يا نجمه قوليلا انا والله هلال دا عايزاهو لي نفسي ولما يكون جاي عطبره بكون فارشالوا شارع التحدي دا كلو ورود لما الشاعر استغرب وقال:
لما الهلال قرب يصل بهرتني صوره عطبره
وتحيه للنادي الكبير جيت لي بلاد متحضره
ونزلت ماشي علي الرصيف اشوف عظمتو واقدرا
لقيت امل معاها حق تكون سنين مكسرا
نجمه : فارشالو عليك الله دا اسلوبك وعايزه هلال يعاين ليك _ فار شالو ولا كديسه شالتو والله غلطانه كوني اتصلت عليك لكن بوعدك انك السنه الجايه لاعبه في دوري الاولي مع الثوره الشعبيه الدامر .
امل : دا اسلوبي كدا وبفخر بيه احسن من اسلوب الرشاوي يا بتاعت الحكم البتسواني ويا الكتلتي الصحفي التنزاني .
نجمه : والله انا لما اتكلم معاكي بنزل من مستواي ياموهومه . سيدك هلال انا ما عاين لي يفكر فيكي انتي .

امل : انتي عندك مستوي يا طيش العرب يا بتاعت السته والموز ابو نقطه
نجمه : تفو عليك .

قفلت نجمه الخط وهي في غايه الاسي بعد اكتشافها انها ليست وحدها معجبه بسيد البلد هلال ولم تجد امامها سوي ان تتحمل ما يحدث في انتظار الفرج وصارت تفكر في الكيفيه التي يمكن بها ان تلفت انظار سيد البلد هلال الذي علي مدي عمرها تمني نفسها به ومع تفكيرها صارت تدندن :
ازرق هدر .. تاريخ ندر اسمو الهلال .

وتقاطعها ورده باتصال هاتفي ونغمه موبايل نجمه
** العرضه عرضه شمال وين يا ناس
فيها سيدي هلال انا وين يا ناس
فيها سيدي هلال وييين يا ناس
هلال عسل يا ناس انا وين يا ناس
امدرمان لذيذه خلاص ** .
نجمه : اها تاني دايره شنو .
ورده : تقفلي الخط في وشي انا يا عديمه الزوق .
نجمه :انتي بتقولي في كلام بفور دمي كيف ما اقفلو .

ورده : دا كلو عشان قلت ليك هلال عاجبني ؟ هي بقت علي العالم كلو بحبوا وانتي بتضيعي في زمنك اخير ليك حاولي مع عمك ميرغني في كسلا يعني انيق وخدوري وحليوووني .
نجمه : انت بتحاولي تنرفزيني والله الكلام معاك خساره يا المامقبوله يالنازله الاولي .
ورده : نزول بي شرف افضل من مشاركه بالشحده والنتيجه قون ذو القعده .
نجمه : كويس يا ورده انتي تسخري مني التسجيلات حتقرب وحتجيني والله اطردك طرده ابو بكرعبدين .

ورده : انا البجيبني ليك شنو وسيد البلد قاعد والله زياره واحده من الصبابي لي كافوري اسجل تشكيله كامله واعمل نشيد ملحن كمان .
نجمه : يلحنو ليك في كافوري والله الا يقولوا راجل المورده حلو حلا.
ورده : لالا حيغنو لي يا بلال زورني مره اقصد يا هلال زورني -- حاااااااااااااااااحا--
ما تفرحي والله هلال دا ما بزورك الا ويدفنك في حفرتك دي ويوم 29 قرررررررب . بالمناسبه دي انتي السنه دي لا بطوله افريقيه لاعربيه لا دوري ممتاز ولا كاس السودان ودرع الانقاذ بتشيلي بالقرعه .
نجمه : حقد طبقي ناتج عن خزينه فاضيه عقدين من الزمان .
ورده : احمد ربي اصيله وعريقه لا اسستني قبطيه لا اتقال علي ورده فكتوريا يا ربيبه الانجليز .
نجمه : انا ما بنكر اصولي الاجنبيه وعشان كدا انا الوحيده الدخلت كاسات البلد دي .
ورده : هييييي وتاني هييييي كاساتك كاسات السمايات دي بتسميها كاسات .
نجمه : كيف يعني ما فهمتك .!!
ورده : عمرك كلو ما بتفهمي يعني اي امير يجيب بت ولا ولد يعمل بطوله في السمايه و يعمل دعوه ليك ولي ناس باريس غاليري وكهرباء ابوظبي تمشي تشيليها وتجي تتجدعي هنا علي الفاضي وما بستبعد السنه الجايه يدعو الاهلي صابون اريال ومنتخب عصير داناو .
نجمه : عندي كاسات تانيه يا حاقده يا جاحده نسيتي مانديلا وسيكافا.
ورده : ياتو كاس بتاع الرشاوي وقرش لي يا ابراهيم عطا ولا كاسات البروتاريا الدخلها ما بغطي المنصرفات .
نجمه : المهم كاسات يالثقيله يا المشاركاتك قليله .
ورده : هيييي ثقيله انا طيب اديني من خفتك حته يا بتاعت التوالي السته .
نجمه : التوالي السته بتذكرني بي السته بتاعتي فيك .
ورده : وبتذكرني برضو بالسته بتاعت صديق منزول يالعملتي للقطن معركه ذات الطبول .
نجمه : خلاص اختصري وتاني ماتضربي هنا .

ورده : والله انا ذاتي غلطانه لو قلت اعدد فضايحك الا يحولو لي الرصيد بتاع 4444 كلو
نجمه : خلاص ياختي مع السلامه .
ورده : يلا سلام -- دقايق قبل ما امشي تاني ما تجي شاارع عبيد ختم بالليل لو دايره هلال يعاين ليك بااااي يا بتاعت التسعه بطعم الزغني البشعه .

منقـــــــــــــــول

[ضـــوء القـــمــر]

ههههههههههههههههههههههههههه
قوية والله
ينصر دينك ياستارو

[مواطن ص]

والله فعلا جثمان عديييييييييييييييييييييييييييييييييييييييييييييييييييل كدا
وبالمناسبة ياناس النجمة
تعالو نغني
نجمة نجمة الليل نعدو
انت عارف بهاءك لما يرقد وين بودو
وين وين وين بودو


وكمان بدون مناسبة
بتاع الخضار الجنب بتاع اللحمة الجبن بيتنا
ليهو كم يوم كدا ما قادر يفرز بين الحاجات
طوالي قاعد يكورك
بطاطس صفاقس
بطاطس صفاقس

[عزاب]

اها ياحازم و ياود علبوب كسبتوا ليكم محارب جديد انشاء الله ماينفعكم قولو اميييييييييييين

[مواطن ص]

لكن يا ود علبوب خسارة
والله اكبر خسارة
قول لي كيف
كيف

عشان وزارة الطاقة خاطبت وزارة الخارجية عشان تخاطب وزارة الخارجية التونسية عشان هي كمان تخاطب وزاررة الشباب والرياضة حقتم عشان يخاطبو نادي الصفاقس عشان يدوهم عبدالكريم النفطي عشان يستفيدو من خبراتو الطويييييييييييييييييييييلة فيث مجال .. اخوانا ناس النجمة بعرفو كويس

[حزن السنين]

اغنية الهلال بعد تعديل كلماتها للوضع الصحيح ..


صدق النطق ونضم وقال
العيش والفحم في الهلال

***
المعز بعز ملايينو
الشريف الطيرنا وينو
الهلال مطلعين عينو
ديل منتهين ديل بُطَّال

***
جاستن بالغ في اندفاعو
داريوكان شات كراعو
مرق انكسر والكوتش باعو
داك جوليط الحالو مال

***
البرنس ما حبابو
هيثم خلاص كمل شبابو
الله للقبقبة والسمسرة جابو
جابو لي كشف الحال

***
شوفو كرنقو بعيد بدون أسباب
علاء جبريل سبب العذاب
بحمودة الكاس ما جاب
عمر ويوسف ما عايزين الهلال

***
بسبب الهلال دوام بساهر
بي عيوبو انا بجاهر
داك مساوي سوؤو ظاهر
داك مهند للأحمر ماشي قال

***
داك قودوين قريب بطير
هنا كلتشي عايز ايفوسا الخطير
بلا عبد المنعم بلا كبير
سير تعيس مهموم البال

***

اللوم على الادارة
الله لا يطفيها الفتنة نارا
شوف ريكاردو يا خسارة
بكري مقلب مافي شطارة
فوزي هو سبب الانكسارة
الطيب مات حسرة ومرارة
دولة من اسباب انحسارا
البرير أسوأ إدارة
طه سابنا للشتارا
عبد المجيد مولع شرارة
لصلاح ادريس عبارة
انت وهمة وربربة بدون أفعال

***
صدق النطق ونضم وقال
العيش والفحم في الهلال
صدق النطق ونضم وقال
جبين عريسنا خاربو هلال
صدق النطق ونضم وقال
أسوأ حاجة فريق الهلال
صدق النطق ونضم وقال
في رمضان اتبشتن الهلال
صدق النطق ونضم وقال
العيش والفحم في الهلال

[شـهد الكلامـ]

احلى حاجه مقولة الراحل المقيم
مهدى الفكى عليه رحمة من الله لاتنقطع ولا تنبتر

ليك على ياحزن
نسجل الشعر دا اغنيه ف الوست الواعد
شهد الكلامـ للانتاج الفنى :079:


موباااااااااااالغه
اكتر شئ عجبتنى

هيثم خلاص كمل شبابو


الناس ديل قلبهم مقطوع ودوهم معسكر خارجى :079:
لابطال افريقيا ما سفروهم
الله يثبت القلوب ياهلالاب
السفر مابطير الرجفيبه

[عزاب]

تسلم ياحزن
وقبل كدا قلنا
نهوااااااااااك يامريخ في كل الظروف
بس بيني وبينك كدا نحن مهند دا مادايرنو
لو بجينا المعلم عمر بخيت من الهلال بنرضى بيه بس

[حازم جمال]

تسلم ياحزن
وقبل كدا قلنا
نهوااااااااااك يامريخ في كل الظروف
بس بيني وبينك كدا نحن مهند دا مادايرنو
لو بجينا المعلم عمر بخيت من الهلال بنرضى بيه بس

عزاب
عمر بخيت دا دايرة محلى
ولا نلفوا ليكى فى كيس
عشم( ابليس)
يسكن فندق من فنادق الرد كاسل (بلازا )

[حافظ عوض الله محمد]

هيثم خلاص كمل شبابو

العجب ، ابالو ، اليجا ازانا ، مجاهد ، طمبج ، دامر ، باولينو ، بهبوهى ملوص ، علاء طيارة ، الزومه البومة ،
بس عندكم سفارى
واحد فيكم يقول لى الاعمام اعلاه خارج التشكيلة الاساسية للوصيف
انتو اخبار الانتر شنو

هيثم خلاص كمل شبابو

ماشاء الله عينا باردة على بالطلاق كنا خائفين فى اتفاقية نيفاشا الحركة الشعبية تقول عاوزاه يلعب فى الجنوب 175 يوم
كفى

[عزاب]

عزاب
عمر بخيت دا دايرة محلى
ولا نلفوا ليكى فى كيس
عشم( ابليس)
يسكن فندق من فنادق الرد كاسل (بلازا )

شكلك كدا ياحازم ماسمعته اخر خبر مش جاينا
والله الا تجروا ولا تقولو مادايرين
مش زمان قلنا ليكم القروش بتعمل كتير
هاها ها ها هاها

[حزن السنين]

احلى حاجه مقولة الراحل المقيم
مهدى الفكى عليه رحمة من الله لاتنقطع ولا تنبتر

ليك على ياحزن
نسجل الشعر دا اغنيه ف الوست الواعد
شهد الكلامـ للانتاج الفنى :079:


موباااااااااااالغه
اكتر شئ عجبتنى

هيثم خلاص كمل شبابو


الناس ديل قلبهم مقطوع ودوهم معسكر خارجى :079:
لابطال افريقيا ما سفروهم
الله يثبت القلوب ياهلالاب
السفر مابطير الرجفيبه

شهود الغالية ،،،

انتي لسة شفتي حاجة
المريخ العظيم ،،، مش حتقدري تغمضي عنيك

دمتي بود يا ستي