روائع محمود الجيلي

[سمر علي]

[indent]قالوا وما تلك التي بيمينك أعطينا جواب؟

أهي عصاتك في زمان السحر؟

والقول الملفق؟

و احتمالات الصواب؟

أم صورة تهفو إليها كلما جارت بك الأيام

تخنقها وتوليها العتاب ؟

أم بعض ماضٍ قد تداركت احتضاره

قبل أن يهوي إلى قاع الغياب؟

أم ريشة أخذت أناملك الرقيقة مسكناً

فرسمت طيفاً من شقيقات العذاب ؟

أم كان أزميلا لتنحت في صميم القلب أغنيةً

من الحس الشفيف

وضوء شمعٍ

و أنتساب؟

قالوا وقد كذبوا ولو صدقوا فهذا ارتقاء

هي ارتياح الروح من دون النساء

هي لهفتي ومحط قلبي من تباريح العناء

هي من توكأت عليها

حين ضنّ الناس واعتادوا الرياء

هي وجهتي

هي مهجتي

هي بهجتي

هي من أهشّ بها على حزني

إذا عمّ الشقاء

هي واحتي

هي ساحتي

هي مسرحي

هي مطرحي

هي ملفحي دوماً إذا عصف الشتاء

هي محض عشقٍ دافقٍ في القلب ليس له إنتهاء
[/indent]

[سمر علي]

يا قماري الحي يلا قوقي .. أبكي هجراني وأحكي شوقي



أصلي من ما سافر عشوقي .. طرفي باكي و غلبو المنام



...............*...............*...............*...............*......



كلمي النسمات عن حنيني .. و عن تباريحي و عن أنيني



لو خبر من جيهتو بيجيني .. روحي تشفى و تجفا السقام



...............*...............*...............*...............*.



زي فريع البان كان قوامو .. طيبو يوصل دائما أمامو



الجيوش تتزلزل أمامو .. كيف لا و في العينين سهام



...............*...............*...............*...........



في خديدو ورود الجناين .. وفي جبينو كهارب المداين



من وسط الآف وشو باين .. مكسي هيبة بدر التمام



...............*...............*...............*..............



الحرير حردان من حريرو .. و الورد بغران من عبيرو



قلبي ليهو و في الحب أسيرو .. راضي بي التعذيب في الغرام



...............*...............*...............*.........



العوازل رضو بي هوايا .. و حنو لي تعذيبي و بكايا



قالوا لي خلاص دي النهاية .. يوم حبيبك نوى للقيام



...............*...............*...............*...........



الغزال الفارق ديارو..في القليب الهام قايدة نارو



مالو طوّل راحل خبارو .. شيلو يا نسّام السلام

[سمر علي]

نورت بيتك و مطرحك..حسينا بالدفا و الامان
...
رجعت معاك كل الورود..و البسمة و الريد و الحنان

نورت عيني الحبتك...يا حليلا راجياك من زمان

نورت بيتك و مطرحك..يا دوبو انتعش المكان
...............*...............* ........

نورت يا غالي الديار ..و القلب من غيرك حزين

ملهوف يشوفك مرة طيف..يرتاح من الشقا و الأنين

الليه جيت و الكون صدح .. و الشمس طلت مرتين

و الله مشتاق ليك شديد..و الله ليك شوق السنين

...............*...............* ...............*.....

حرمان على الوردة العبير .. حرمان على الطير الغنا

من يوم غيابك يا حبيب..في حرقة الهم و العنا

راجياك تطل يوم الرجوع..يوم رجعتك يوم المنى

بالله شوف الليلة كيف..غناك كل الكون و أنا
...............*...............* ...............

نورت بيتك و الطريق..شايل خطاك و نشوتو

خائف من الايام عليك..ما تكون قليبك قستو

لكن قليبك كان حنين.. طول السنين ما نستو

ورجعت في عينيك شوق..كل القلوب فيك حستو

...............*...............* ........

نورت بيتك و مطرحك..حسينا بالدفا و الامان

رجعت معاك كل الورود..و البسمة و الريد و الحنان

[سمر علي]

مريت اشوف بعد الغياب..كيف صورتي في مراية الزمن

انا تهت مني و ما لقيت.. لي روحي في جواي سكن

انا ما انا.. لا فرحة لا شوق لا شجن

انا ما انا.. لا صورة لا صوت لا وطن

ما عرفتني.. و لقيت ملامح زول غريب

ما فهمتني.. و أفكاري بتودي و تجيب

ما شفتني.. في ذاتي مليان بالنحيب

أنا ما أنا.. لا من بعيد لا من قريب

انا وين مشيت.. و بقيت أصارع في الظنون؟

أنا ما أنا.. تاهت ملامحي من العيون

ألقاني وين.. ألقاني كيف.. أنا وين أكون؟

يا مراية حار بي الدليل ..ما بين أكون أو لا أكون

[سمر علي]

مرات بتعاين ليّ .. و بشوف للفرحة مواسم


و مرات بحتار في أمرك .. بين فاهم و بين ما فاهم


بتلّون في كلماتك .. و الريدة معاك عوالم


مرات بلقاك أفراحي .. و مرات بلقاك مأآتم


بي عيونك ترسم شوقي .. و بي عيونك ترسى دموعي


بي كلمة بتنفي حياتي .. و تقرر كلمة رجوعي


بهواك يا شوك يا وردة .. بتفرهد جوه ضلوعي


و يشهد بي ريدك ريدك .. هو العارف قدر ولوعي


على قدر الحيرة الفيها .. بين صدك و حبك وقفة


رضيان بي حكمك و جورك .. لو مرة تميل الكفة


تهديني النار بي إيدك .. يا النارك أبرد و أدفى


و تعكر فيني الدنيا .. بي ضي عينيك بتصفى


عينيك سهام مسمومة .. و حيات رمشك لو رفّ


سرحان بين صدك و قربك .. ما بين النيل و الضفة


و جواي القلب يتلفت .. زي الأطرش في الزفة

[سمر علي]

جيت متين قولي هسه .. عشان تقولي تاني راجع

جيت متين و عيوني لسه .. شايلة من بعدك مدامع
......................................................................

.يعني بالساهل تسافر .. حتى ما بتفكر إنو

بي وراك الروح بتمرق .. و القلوب بالشوق بيجنو

و ما بيكون في بالك أبدا .. المحبين كيف بيحنو

جيت تودع بي بساطة .. يا الحبيب المشتهنو ؟

........................................................................

ماشي وين ما شبعنا منك .. و القلوب ليكَ بتنادي

ماشي وين و متين لقيناك.. يا الحبيب الما إعتيادي

كنا مستنين رجوعك .. و فيك جمال الريدة بادي

عادي هسه تفوت و تمشي .. و الغرام تناسهو عااااادي؟؟

............................................................................

لو كبرت على المحبة .. و قلت أحسن ليك تفارق

كنت ترحم شوقنا حبة .. و الغرام اللينا حارق

كنت تتذكر وفانا .. ولا أصبح ما هو فارق؟

و كنت تتذكر غرامك .. من زمان لي قلبي سارق

[سمر علي]

في نفس الحتة و ذات البيت

دروخني نسيم طراني هواك خلاني بكيت

حرشني الشوق ارجع لي الريد و اتناسى جفاك لكني أبيت

و قعدت معاي في ضل الروح ونستني بيك و مشيت ما جيت

طيب ما دام الريد إحساس ..مالك بي ريدك ما حسيت؟؟

مادام بتحوم في جوف الناي.. مالك بي صوتك ما غنيت؟؟

ما دام طوفانك هد الكان ..مالك بي المركب ما عديت؟؟

ما دام بتقول بتحدى معاك ..مالك للعالم ما اتحديت؟؟

مادام...مادامت ريدتك لي.. مالك في صدك ما اتماديت؟؟

ما دام حرمت الفرحة علي ..مالك في فرحك ما اتهنيت؟؟؟

[سمر علي]

إستغفر الله العظيم من البكا و من النخيج

إستغفر الله العظيم من السكاليب و الضجيج

قشيت دموعي من الحروف..

بقّت مسامي الحُرة نار

يا الله لو قتلوا القصيدة على الحلوق

مين في الخلوق غيري البيجيب لي دم قصيدتي الميتة تار

و الله شينة و تب علي

وسّخ هدومي البيضا عار

قاعد بلملم في البشيلو الفاتحة و الشاي و الشمس مكشوحة في نص النهار

ناسي القصيدة و دمها

ناسي الحبيبة الما نست.. همي البتجعلو همها

ناسي القريبة الما قست.. دائما حروفي تضمها

ناسي القصيدة و من زمان

ياني الأبوها و أمها

و نسيتا و الليلة الفراش .. كيف إني بكرة ألمها؟؟

أنا عندي تار

أنا لسه قاعد في البكا؟؟

شايف حزن ناس الفريق زي الكضب

حزنم عليك قرقر بعد أكل الغدا و حكى قصتين

لاك السياسة و إنتكى


حزنم كضب

لا فيهم البيعرف صبابة ولا غرام .. لا فيهم الساهر معاك و ما تعب

لا فيهم العشق التراب لا فيهم الزول البيحب

ما بعرفوك

ما حسوا كيف تمرق قصيدة من العدم.. تمرق من الأضلع نسيج.. تمرق من الأفكار فهم

ما حسوا كيف تمرق قصيدة من العدم.. تمرق حنان إنسان..و حس فنان وصوت نمة و نغم

تمرق جنين يصرخ من الشقى و الألم

ما فيهم أصلا زول عرف طعم القصيدة و حرقتا

ما فيهم أصلا زول عرف لون القصيدة و رقتا

ما عرفو إنو البسمة و النسمة التساسق في الجروف

في الدنيا أصلا حقتا

ما عرفوا إنو قصيدتي حافظا الحلة

و الشفع بنات الفزعة

و اللالوبة و المهيوبة

و المعدولة و المقلوبة

و المليانة و المشروبة

و المكروهة و المحبوبة

و الطاحونة و القطية

و السلوكة و الطورية

و الدلوكة و الصبحية

و الكنداكة و الصقرية

و الطمباري و الجراري

و الحدادي و المدادي

و المنكورة و المشكورة

و الطبشيرة و السبورة

ما عرفوا القصيدة الصورة


...................................


أستغفر الله العظيم

أنا يا قصيدة غلبني تب

يا ربي أبكيك و أنتهي

و أنسى الشدائد و سِكتا

و أرجع و أقول

عارف لو الوضع إنقلب

أصلا محال تنساني هي

صوتا بيطول ما كان في راجلا سَكتا

بتكون معاي لو معاي

و بكون حضورا و سرحتا

بتكون حكاياتي و غناي

و بكون عيونا و نظرتا

بتكون زهور عمري و صباي

و بكون عبيرا و نشوتا

بتكون مع الأيام خطاي

و بكون معاها على الطريق

إيقاع مشيها و خطوتا..


يا حليلا قتلوها الكلاب.. قبال تكمل ضحكتا

أنا عندي تار

يا خوفي أرجع مني فوت

أنا ياتو يوم خليت قصائدي وراي تموت؟

أنا عندي تار

بمرق براي

لكن بسد عين الشمس

لازم أرجع كبريائي و دمي حار

و أمنع حروفي من الحبس

بمرق براي

ما عاوز يكون آخر جزاي

صيوان عزاي مدقوق علي بيت العرس

[سمر علي]

بلسان حالها :

محتارة يا ناس أنا محتاره.. و الدنيا عنيدة و دواره

محتاره يا ناس أنا محتاره .. ما بين نورا و ما بين نارا

محتارة أغني مع الدمعات.. ولا أغرِد بين أطيرا



محتارة أموت في حزني الفات.. ولا أفرهد بين أزهارا

محتارة يا ناس أنا محتارة

محتاره أشيل في الدنيا حبيب.. و السكة سكاكين غداره

محتاره أقرب منو قريب ..و الريده بيتعب مشوارا

محتاره أعوم في بحر الشوق.. و الموجة بعاكس تيارا

محتاره أكون محتاره معاك ولا أكون ما محتاره؟؟

[سمر علي]

[justify]أنا لسه بتذكر قعادنا على السحاب .. ما بنقفل الشباك.. و نفتح لي المشاعر ألف باب..لسه بتذكر ضفورا وكت تخش

فيهن.. و كيف البت تذوب لمان بتشعر بالعتاب .. لسه بتذكر غناها .. لسه بتذكر صفاها .. لسه بتذكر وفاها .. لسه

بتذكر جفاها .. و رغم صوتا الهسه مافي .. عمرو من همس المسامع مرة غاب...

لسه بتذكر عيون لمان تغير .. لسه بتذكر جنون بالريد يطير .. لسه بتذكر ضفايرا في الهوا .. لسه بتذكر كلاما عن

الهوى .. لسه بتذكر دروسا و حصّتا.. لسه بتذكر هدوما القصتا.. لسه بتذكر دفاترا و الورق .. ترتيبا ليها و رصّتا..

أنا أحكي ليكم قصتا؟

في مرة كانت بت أميرة و بت ملوك..في قصر علي و سور كبير

كانت بتمرق كل يوم زي الشمس .. بتطل علي الناس بي نداها و بي العبير

كانت بتمشي مع النسايم .. أو بالأصح كانت تطير

لمان تمد إيدا بتشيل كل الشقا و كل العذاب..

و أنا كلما أجي أحكي ليكم قصتا

أنا تاني بتذكر قعادنا على السحاب

طيب نواصل يا شباب

لو دايرا كل الكون يجيها و يبتسم

لو دايرا كل الفرحة حالا تترسم

لو دايرا أحسن زول و قسمتا تنقسم

تتحقق أحلاما و تفوز و الفارس المغوار يحبها بالإسم

بس للأسف أنا كم سؤال في بالي ما لاقيات جواب

و أنا كلما أجي أحكي ليكم قصتا

أنا تاني بتذكر قعادنا على السحاب

طيب نواصل يا شباب

عينيها في الصيد و المها .. و جبينا بالنور و البها .. و الطيبة أبيض قلبها .. بس لسه محتار في حبيبا و حبها

كان زول بسيط لا عندو ثروة و لا أمير .. بس كان غناهو كرامتو أبدا ما فقير .. من أشجع الشجعان دوام .. لكنو لي الريد كان أسير ..

و شايف الأميرة بعيدة منو .. و طيفا ذاتو رهاب رهاب .. و أنا كلما أجي أحكي ليكم قصتا .. أنا تاني بتذكر قعادنا على

السحاب

كان البسيط .. كان حاسي بيها بدت تحبو و تعشقو .. و كانت تشابي عليهو دائما تلحقو .. لكنو كان خايف شديد ..

رغم إنو كان حلمو المناهو يحققو .. لكنو كان خايف شديد .. لا بتشبهو .. لا بشبها ..حاسي السبب.. لا بيقدر يهديها

النجوم .. لا بقدر يكسيها الدهب .. و خايف كمان من الرياح .. تبعد قلوب و يتفرقوا .. و تصبح حياتو مع السراب..و أنا

كلما أجي أحكي ليكم قصتا .. أنا تاني بتذكر قعادنا على السحاب

بس المهم .. قالت عيونا و نظرتا .. لو كنت في قطية أو بيت من حصير .. قالت حروفا و دمعتا .. لو كنت عامل أو غفير

.. لو كنت مالك أو أجير أنا بعشقك و محال أبدل غير حبيب العمر غير .. كان البسيط دايب غرام .. غلبو التجرد عن

مشاعرو مثلما غلبو الكلام .. كانت عيونو الفي عيونا.. يدمعن بسمات .. و يفيضن بالهيام ..

أيام تعدي و تنتهي .. و الريد يزيد .. بالحب منوّر و برضو هي ... و الشوق شديد .. يصطبحو بي باقات ورود .. و ينوموا

بالقول و الوعود .. من غير حواجز أو حدود .. الفرحة و النجمات شهود .. بس للأسف أنا كم سؤال في بالي ما لاقيات جواب

و أنا كلما أجي أحكي ليكم قصتا

أنا تاني بتذكر قعادنا على السحاب

طيب نواصل يا شباب

آخر الكلام .. أنا إغتربت و فتهم .. خليتم آحلى إتنين.. قبل ما أمشي في الكون شفتهم.. و رجعت هسه و كلي شوق

أعرف حكاية ريدة كانت من سنين .. مسقية بالشوق و الأنين وين الأميرة الحلوة و الزول البسيط وين الحنين الحبو

أكبر من محيط وين صاحبي وين ؟؟ عرّس حبيبتو ..و بالسعادة رحل يطوف؟ .. و عمل زفافم بالطبول و السيرة و الفال

و الدفوف؟.. ونشر عبيرو علي الدواوين و القصايد و الحروف؟.. سكتت جميع الكائنات .. ماف زول نطق .. ما ف زول

بجاوبني و بيقتل فيني خوف .. سكتت جميع الكائنات .. خائف من الرد و الظروف..بس للأسف أنا كم سؤال في بالي

ما لاقيات جواب

و أنا كلما أجي أحكي ليكم قصتا

أنا تاني بتذكر قعادنا على السحاب

طيب نواصل يا شباب

في وقفتي جات الأميرة مع الحرس .. و معاها راجل في فرس .. ما كان بسيط .. كان مختلف في الطلة و الروح و

النفس .. كانت بتضحك ضحكتا زي لما كانت زي زمان .. و كأنو ما كان و إنهدم .. كانت بتضحك ضحكتا زي لما كانت زي

زمان.. من غير دموع حسرة و ندم .. و أنا هسه ضائع في الخلوق .. و فقدت في الريد الأمان .. و أنا لسه بسأل عن

صديقي الغالي وين .. و مين غيّر القلبين بعد ما حبو مين؟؟ .. خليت هموم الواطة للبوم و الغراب.. و قعدت أرسم في

صديقي علي السحاب

و كان بحكي لي .. قصة حبيبتو الرادتو .. يا حليلو غطاهو التراب

ويسرح و يقول :أنا لسه بتذكر قعادنا على السحاب .. ما بنقفل الشباك.. و نفتح لي المشاعر ألف باب..لسه بتذكر

ضفورا وكت تخش فيهن.. و كيف البت تذوب لمان بتشعر بالعتاب .. لسه بتذكر غناها .. لسه بتذكر صفاها .. لسه

بتذكر وفاها .. لسه بتذكر جفاها .. و رغم صوتا الهسه مافي .. عمرو من همس المسامع مرة غاب...

لسه بتذكر عيون لمان تغير .. لسه بتذكر جنون بالريد يطير .. لسه بتذكر ضفايرا في الهوا .. لسه بتذكر كلاما عن

الهوى .. لسه بتذكر دروسا و حصّتا.. لسه بتذكر هدوما القصتا.. لسه

بتذكر دفاترا و الورق .. ترتيبا ليها و رصّتا.. أنا أحكي ليكم قصتا؟؟[/justify]

[سمر علي]

و قريت خطوط الكف

..

شفت الضمير مقبوض.بي صوتو إتكتّف..

شفت الفريق غرقان.. بي موية ما بتنشف

..

شفت العمر محتار..ما لاقي أي هدف

...الحالة تعبانة..ما بين هموم و قرف

..بقت الشهامة شعار..زي الصور في الرف..

حتى الحمامة بكت..قالت بكل أسف

..كيف الحمامة تطير .. وجناحا إتنتّف

[سمر علي]

شنو الخلاني يوم أشتاق .. لي زول عمرو ما بشتاق

ولا بيفرق معاهو حنين .. ولا بيفرق معاهو فراق
...
عليك الريدة كان ماساي...بيقولوا* علينا ديل عشاق

غايتو بحب ليّ حبيب.. غريب في الطبعة و الأخلاق



شنو الخلاني أتورط .. و أشتاق ليك ليل و نهار

و عارف في هواك جزاي ...بضوق طعم المرار و النار

غريبة بكون معاك مبسوط..و أعاني من الفراق الحار

و عارف قلبي بيك ولهان ..و ما بيقدر سواك يختار


مناي أفهم حكاوي الريد..و أفسر كل قوانينو

و أعلم قلبي كيف يكره ..و كيف يجرح محبينو

و يكون في الدنيا في حالو.. و ما يلخبط موازينو

يدفّق في الوريد الدم.. ده كل النحن عايزينو

[سمر علي]

.بعد صليت ..دعيت رب العباد و بكيت.

.يفكنا من قيود الهم..و يقرب للقلوب تتلم.
...
. ونزرع في ..حياتنا عشم..و نتكلم.

. ويحرك في نفوسنا ضمير..

و ما يحوجنا يوم للغير..ويا رب العباد ترحم.


بعد صليت .. دعيت رب العباد و بكيت..

يمسِّكنا الطريق الصاح.. و يدينا المحبة سلاح.

.نحارب بيها ظلم الناس .. ينوِّر في ضلامنا صباح..

و يا فتاح عليك رزق الفقير معدوم.. ورزق الفي القصور مرتاح..

تديم نعمك علي عبادك.. نجيب عز الوطن كان راح

[سمر علي]

تسألني مشتاق قدر إيه.. و أنا الله عالم يا حبيبة .. الشوق ده ما قادر عليه

تسألني غائب عني ليه .. و أنا ذاتي محتار سبت قلبك .. و كل جوارحي تحن ليه

...............*...............*...............*...............*...............*...............*...............


تسألني ما فارق معاها..و أنا كل حياتي بعيشا ذكرى .. و ياما غنيت لي رضاها

تسألني بتعذب وراها..و أنا كل يوم خانقاني دمعة .. و كل يوم قاتلاني آهه

تسألني عن عيني و بكاها .. و أنا عندي شاهدين للنحيب ..منديلي و النجمة ف سماها

تسألني هل حبيت سواها .. و انا لو معاي مليون قلب .. ما أظن يكفوا عشان هواها

...............*...............*...............*...............*...............*...............*...............*......

تسألني بعيونا و تجاوب .. عن زمان عشناهو فرحة ..و عن مشاوير المغارب

تسألني بي لهفة و تعاتب .. ليه نسينا بعضنا مده..و الحنان حاضر و غائب

تسألني و الشوق فيني دايب..و الظروف حاكمة المشاعر .. و الزمن بي طبعو لاعب

تسألني و الريد فيني شايب .. لسه ولهان يا حبيبي؟ .. أيوة ولهان و الله غالب

[سمر علي]

بتتدبر

ولا يهمك.. إله الكون بفرّج همنا و أكتر

بتتدبر

ولا يهمك .. و شمّر ساعدك الأخضر

و أطلع زي شمس في الناس

ضلام الهم بيتكسّر

بتتدبر

و وزّع بسمتك للناس

يشيلوك في العيون و الراس

و مادام الرزق مقسوم

على شنو الناس بتتجبّر

بتتدبر

[سمر علي]

من دواعي سروري .. تبقى بيك أيامي.. و تبقي ناري و نوري.. يا حبيبة الروح
...............*...............* ...............*...............* ...............*...............

... من دواعي الفرحة..تبقي ديمة معاي.. و نفسي بيك منشرحة .. زي بلابل الدوح

خايلة فيها الطرحة..و الخصل نازلات..و الخصال السمحة.. و السحر مكشوح


...............*...............* ...............*...............* ..........

السلام بالعرفة..غير تمد الأيد..بالدلال و العفة.. الغرام مفضوح

خاتية من الخفة..زي غمامة الصيف..في القعاد و الوقفة..العطور بتفوح

...............*...............* ...............*...............* ...............*..

في المحنة حنينة..و العيون قاتلات.. و الرموشا سنينة..زايدة لي جروح

و القوام وزينة.. في مشيها تميس..ضو ليّ جبينا..و الجبين مطروح

...............*...............* ...............*...............* ...............*.

نافرة من الشينة..يا سماحة اللون.. و الطباع الزينة..زي قمر بتلوح

إلا بس مازينا..يوم غيابك نار..بيهو ما تجازينا..روحي فيو بتروح

...............*...............* ...............*...............* .........

بت بلد حبيتا.. بت من السودان..والمحا*جر بيتا..باني ليها صروح

في العيون دسيتا.. من عيون الناس..بي الرموش ضاريتا..و القلب مفتوح

[سمر علي]

وعدتك و عمري ما نسيتك و لا بنساك محال أبداً.

.و مهما تغيب عن الميعاد..بقول يمكن يجيني غداً.
...
.و أستجدي الشمس تشرق .. و نيران شوقي ما همدن.

.و لمان شفتو حن علي.. حاسدات الغرام حسدن.

.ظهر لي طيفو نص الليل..و أعراض المحبة بدن.

.شفتو جميل خفيف الروح..ملاك من فوق و حل بدن..

و وسوس لي قلبي كتير.. وقال لي بكرة بتحسن.

.حبيبك لسه بشتاق ليك.. ده أصلا كان دلال و عجن.

.فرحت و رحت لي بيتو.. ويا أسفاً عليو أسفاً..

رحل ساب المحلة خراب..ولا عادت بلادي وطن.

.وسال دمي و كتبت حروف..على بابو الملاني شجن..

حضرت و عشمي كان ألقاك.. حضرت و لم أجد أحداً

[سمر علي]

الناس الزينا نحن من محنة تقع في محنة

الشقا في عيونا يتاوق و الهم في الدم و السحنة

...............*...............*...............*...............*.

عايشين ضدين في واحد .. بنعكر روحنا و نصفى

و نعاتب مرة ضميرنا ..و مرات بتميل الكفة

بنهم من بكرة يجينا .. لا علاج لا حق مستشفى

و نتذكر ربنا تاني .. و نقول يا رب سامحنا

الناس الزينا نحن من محنة تقع في محنة

الشقا في عيونا يتاوق و الهم في الدم و السحنة

...............*...............*...............*...............*........

قابضين النار في إيدنا .. و يوم عيدنا يعدي علينا

لا نحس بالفرحة معاهو .. ولا بسمة تشاور لينا

لا عين تدينا رضاها ... يا حليل أفراح عينينا

و أيامنا السمحة الفاتت .. سرقت من روحنا سمحنا

الناس الزينا نحن من محنة تقع في محنة

الشقا في عيونا يتاوق و الهم في الدم و السحنة

...............*...............*...............*...............*......

بي أبسط حاجة بنفرح .. بي كلمة و شوفة صاحب

و بي أبسط هم نتجرّح .. بي الغم و ضمير الغائب

عايشين و أرواحنا رهيفة .. و نطير لو جونا حبايب

بنحب في ناس جافونا ... لو جونا نكون إرتحنا

الناس الزينا نحن من محنة تقع في محنة

الشقا في عيونا يتاوق و الهم في الدم و السحنة

[سمر علي]

قبل حبر الدمعة ينشف في ورق خدك و يجفْ

و قبل عينيك ما تحتحت باقي حزنك لو تَرِفْ

كنت حاسس بيك حترجع و باكر الأيام تلِفْ

أمشي بالدرب اللي جابك دمعي من بعدك نِشِفْ


قبل ما دموعك تحرك فيني ذكرى و أعترف

إني لسه بحن ليك و شوقي ليك ما بتوصف

...............*...............*...............*...............*...............*..

قبل ما يعاودني ريدك و أنسى كل القلتو فيني

و قبل ما عيونك تفتش و تعرف الداساهو عيني

قبل دمعاتك تطفطف نار بتحرق في سنيني

أرجع أحسن بي طريقك خايف يغدر بي حنيني

و ألقى روحي مسامحة تاني وليك نزيف الريد وقف

و ألقى قلبي يجيك خائف من حنانك يرتجف
...............*...............*...............*...............*...........


كنت مهموم إني أنسى .. بعد نسيتك جيت تعاني

و كنت محتاج إني أقسى..يوم يعاود بيك زماني

بس عشان خاطر كرامتي.. و كبريائي بقولا تاني

يلا أرحل مني و أمشي..قبل ما تحرك حناني

و ألقى نفسي على دروبك و تاني ما أقدر ألف

و تبدأ تلعب بي مشاعري و ألقى كل الكون عِرِف

[سمر علي]

عارف نفسي بيك و لهان.. و شايفك مني بتباعد


و عاذرك بس بلوم قلبي.. و حبي المن طرف واحد


...............*...............*...............

مخير قلبي في ريدو ... بيسوقني معاو شمال و يمين

و بتعذّب مع الأيام ..و أقاسي الليل دموع و أنين

و دائما قلبي مشغول بيك .. و قلبك لي سوايا رهين

و عاذرك بس توريني .. حنيني إليك أوديو وين؟؟


...............*...............*...............*........

غرامي المن طرف واحد .. براي بقدر أواسيهو

و أجفف دمعو بالآمال..و أشيل من عمري و أديهو

و أحاول أنشغل عنك..تجي الذكرى و تصحيهو

بقيت بالهم أصابح الريد.. و بالدمعات أمسيهو

...............*...............*...............*....

عموما أصلو ما ذنبك .. ولا برمي الملامة عليك

كفاية علي أشوف طيفك..مادام ما بشوف عينيك

و أقول ليك قلبي يوم بنساك..ولا في مرة يرجع ليك

وعشان كل الجمال الفيك.. في مليون زول معلق بيك