روائع محمود الجيلي

[سمر علي]

ايام و عدت يا حزن .. أيام و عدت ياجفا

..لاقيت حبيب الروح خلاص ..و إتبدل الهم بالصفا.
...
. و قعدنا في أجمل خميل.. في لحظة يا ما ألطفا.

.ورسمنا للأيام دروب..مليانة بالريد و الوفا


أيام و عدت يا شجن.. راحت من العين الدموع..

.و البسمة نورت المكان..و القمرة عاودت الطلوع..

و الحيرة فينا إتبددت..و رقصنا في ضو الشموع..

أيام و عدت بي لقاك ..مبروك علي بيك الرجوع


آي نعم مرت علي .. أيام من البكا و الفراق.

.لحظات من الشقا و العذاب..حيرة و هواجس لا تطاق..

و اليوم بيمر زي السنين..كل يوم بيضيق بي الخناق...

.والضحكة بين الناس كذب.. و البسمة من غيرك نفاق


ندمان علي كل الجروح..الكنت فيها أنا السبب.

.ندمان على كل الكلام .أنا قلتو في لحظة غضب..

ندمان على تجريحي ليك.. .في كل خظاب ليك إنكتب.

.يا أسمى آيات الجمال..يا آية في الذوق و الأدب

[سمر علي]

بتخيل يوم نحن الإتنين

ماشين في سحابة و متماسكين

و نعاين للناس و نتاوق

و نرسل ليهم شوق و حنين

و نوصي المطرة تبل الريق

ما تكسِر لينا بيوت الطين

و تسيل بالخير في زراعة الخير

و تفيض و تكفي المحتاجين

و نشكل بالغيمات أحلام

للشفع ديلك متلمين

و نشاور للعشاق من فوق

و نرسل طيف للسهرانين

و نسوي دليل لي كل أنسان

و نصب الضو للضهبانين

و نجهز لينا شمس بالليل

للزول الكايس لي نورين

و البسمة تكون بين نسمة ولون

بي شوفنا بنقسموا لي لونين

يا أبيض زي لون النية

يا أسود واضح و ماسخ و شين

بي حب و محنة معانا دوام

ايدين بالحنة و متشابكين

ماشين في سحابة أعلى الريد

مرات بي جناح الطير طايرين

يا نعمة رب لي زول ولهان

[سمر علي]

عشانك تقيف الغناوي و تصفق..

عشانك بتفرح عيون الدموعن تتاوق ترقرق.

. عشانك نجمع حروف المحنة

و نشيل من عبيرك لغيرك نفرق

.. عشانك نقطّر مسام التصافي

و نيلين تدفّق.

. عشانك بتمرق حروفنا السجينة ..

و تفتح شبابيكا تلك المدينة .

. تدخِّل شروقك و و سيرتك تمطّق..


و صوتك ينطّق جبال الحقيقة ..

و نورك يمرّق ضلام الكلامن يشفّق..

عموما تخيل بلادك بدونك ..

غباشاً يضهّب عيون اليمامة

و صوتاً يجرّح حلوقنا و كلاما..

أكيد في غيابك كتير البيفرق.

. تصّدق لقيت صورتك إنت بتحاكي الشمس لما تشرق.

لا بالعكس جدا

لقيت الشمس مادا أيدا بتشابي

عليك و تنادي و هيهات تلحّق..

عموما تخيل وشيك في المدارس

و في كل شارع وشوقو البحرّق

.. دي كانت بلدنا بتكون واحدة تانية

و نكون نحنا غيرنا نطير أو نحلّق

[سمر علي]

حكم الهوى
في الحلوة نضحك بالحنين..في المرة حبنا هو الدوا
جد ما مهم جور السنين..بس المهم نفضل سوا
...
افضل على عهدك دوام..مهما الزمان جار أو قسى
والقاكي انتي معاي ملاك..لا خاني مرة ولا نسى

حاباني في كل الظروف..مالياني* بي نورك مسا
وانا حافظة حبك في الضلوع..لا ضل قلبي ولا غوى

أهديكي أجمل أغنيات..احميكي من غدر الدموع
تشفيني من جرح الزمن..تحفظ خطانا من الرجوع

وارعاكي في ظلمة ظنون..نوقد صوابع الحب شموع
أحباب وما يفرقنا هم..ولا نرضى غير ما نكون سوا

[سمر علي]

انا لسه بتذكر قعادنا على السحاب .. ما بنقفل الشباك.. و نفتح لي المشاعر ألف باب..لسه بتذكر ضفورا وكت تخش

فيهن.. و كيف البت تذوب لمان بتشعر بالعتاب .. لسه بتذكر غناها .. لسه بتذكر صفاها .. لسه بتذكر وفاها .. لسه

بتذكر جفاها .. و رغم صوتا الهسه مافي .. عمرو من همس المسامع مرة غاب...

لسه بتذكر عيون لمان تغير .. لسه بتذكر جنون بالريد يطير .. لسه بتذكر ضفايرا في الهوا .. لسه بتذكر كلاما عن

الهوى .. لسه بتذكر دروسا و حصّتا.. لسه بتذكر هدوما القصتا.. لسه بتذكر دفاترا و الورق .. ترتيبا ليها و رصّتا..

أنا أحكي ليكم قصتا؟

في مرة كانت بت أميرة و بت ملوك..في قصر علي و سور كبير

كانت بتمرق كل يوم زي الشمس .. بتطل علي الناس بي نداها و بي العبير

كانت بتمشي مع النسايم .. أو بالأصح كانت تطير

لمان تمد إيدا بتشيل كل الشقا و كل العذاب..

و أنا كلما أجي أحكي ليكم قصتا

أنا تاني بتذكر قعادنا على السحاب

طيب نواصل يا شباب

لو دايرا كل الكون يجيها و يبتسم

لو دايرا كل الفرحة حالا تترسم

لو دايرا أحسن زول و قسمتا تنقسم

تتحقق أحلاما و تفوز و الفارس المغوار يحبها بالإسم

بس للأسف أنا كم سؤال في بالي ما لاقيات جواب

و أنا كلما أجي أحكي ليكم قصتا

أنا تاني بتذكر قعادنا على السحاب

طيب نواصل يا شباب

عينيها في الصيد و المها .. و جبينا بالنور و البها .. و الطيبة أبيض قلبها .. بس لسه محتار في حبيبا و حبها

كان زول بسيط لا عندو ثروة و لا أمير .. بس كان غناهو كرامتو أبدا ما فقير .. من أشجع الشجعان دوام .. لكنو لي الريد كان أسير ..

و شايف الأميرة بعيدة منو .. و طيفا ذاتو رهاب رهاب .. و أنا كلما أجي أحكي ليكم قصتا .. أنا تاني بتذكر قعادنا على

السحاب

كان البسيط .. كان حاسي بيها بدت تحبو و تعشقو .. و كانت تشابي عليهو دائما تلحقو .. لكنو كان خايف شديد ..

رغم إنو كان حلمو المناهو يحققو .. لكنو كان خايف شديد .. لا بتشبهو .. لا بشبها ..حاسي السبب.. لا بيقدر يهديها

النجوم .. لا بقدر يكسيها الدهب .. و خايف كمان من الرياح .. تبعد قلوب و يتفرقوا .. و تصبح حياتو مع السراب..و أنا

كلما أجي أحكي ليكم قصتا .. أنا تاني بتذكر قعادنا على السحاب

بس المهم .. قالت عيونا و نظرتا .. لو كنت في قطية أو بيت من حصير .. قالت حروفا و دمعتا .. لو كنت عامل أو غفير

.. لو كنت مالك أو أجير أنا بعشقك و محال أبدل غير حبيب العمر غير .. كان البسيط دايب غرام .. غلبو التجرد عن

مشاعرو مثلما غلبو الكلام .. كانت عيونو الفي عيونا.. يدمعن بسمات .. و يفيضن بالهيام ..

أيام تعدي و تنتهي .. و الريد يزيد .. بالحب منوّر و برضو هي ... و الشوق شديد .. يصطبحو بي باقات ورود .. و ينوموا

بالقول و الوعود .. من غير حواجز أو حدود .. الفرحة و النجمات شهود .. بس للأسف أنا كم سؤال في بالي ما لاقيات جواب

و أنا كلما أجي أحكي ليكم قصتا

أنا تاني بتذكر قعادنا على السحاب

طيب نواصل يا شباب

آخر الكلام .. أنا إغتربت و فتهم .. خليتم آحلى إتنين.. قبل ما أمشي في الكون شفتهم.. و رجعت هسه و كلي شوق

أعرف حكاية ريدة كانت من سنين .. مسقية بالشوق و الأنين وين الأميرة الحلوة و الزول البسيط وين الحنين الحبو

أكبر من محيط وين صاحبي وين ؟؟ عرّس حبيبتو ..و بالسعادة رحل يطوف؟ .. و عمل زفافم بالطبول و السيرة و الفال

و الدفوف؟.. ونشر عبيرو علي الدواوين و القصايد و الحروف؟.. سكتت جميع الكائنات .. ماف زول نطق .. ما ف زول

بجاوبني و بيقتل فيني خوف .. سكتت جميع الكائنات .. خائف من الرد و الظروف..بس للأسف أنا كم سؤال في بالي

ما لاقيات جواب

و أنا كلما أجي أحكي ليكم قصتا

أنا تاني بتذكر قعادنا على السحاب

طيب نواصل يا شباب

في وقفتي جات الأميرة مع الحرس .. و معاها راجل في فرس .. ما كان بسيط .. كان مختلف في الطلة و الروح و

النفس .. كانت بتضحك ضحكتا زي لما كانت زي زمان .. و كأنو ما كان و إنهدم .. كانت بتضحك ضحكتا زي لما كانت زي

زمان.. من غير دموع حسرة و ندم .. و أنا هسه ضائع في الخلوق .. و فقدت في الريد الأمان .. و أنا لسه بسأل عن

صديقي الغالي وين .. و مين غيّر القلبين بعد ما حبو مين؟؟ .. خليت هموم الواطة للبوم و الغراب.. و قعدت أرسم في

صديقي علي السحاب

و كان بحكي لي .. قصة حبيبتو الرادتو .. يا حليلو غطاهو التراب

ويسرح و يقول :أنا لسه بتذكر قعادنا على السحاب .. ما بنقفل الشباك.. و نفتح لي المشاعر ألف باب..لسه بتذكر

ضفورا وكت تخش فيهن.. و كيف البت تذوب لمان بتشعر بالعتاب .. لسه بتذكر غناها .. لسه بتذكر صفاها .. لسه

بتذكر وفاها .. لسه بتذكر جفاها .. و رغم صوتا الهسه مافي .. عمرو من همس المسامع مرة غاب...

لسه بتذكر عيون لمان تغير .. لسه بتذكر جنون بالريد يطير .. لسه بتذكر ضفايرا في الهوا .. لسه بتذكر كلاما عن

الهوى .. لسه بتذكر دروسا و حصّتا.. لسه بتذكر هدوما القصتا.. لسه بتذكر دفاترا و الورق .. ترتيبا ليها و رصّتا.. أنا

أحكي ليكم قصتا؟

[سمر علي]

انا شفتها
جوه العيون بتختها
و الريده منك لي خلاص اديتا ليها و ردتها
انا كنت مالية عليك سماك و احلام سنينك عشتها
و الدنيا كان بتلومني فيك و انا إشتريتك و بعتها
حبيت علي يا غالي ليه؟؟؟؟ ليه كل حنانك إنتهى؟؟؟
هي حبتك اكتر علي؟؟؟؟ و أنفاس هواك انا ردتها!!؟
هي ختتك فوق النجوم؟؟؟ و النجمة ليك انا جبتها!!؟
وريني أحسن مني كيف؟؟؟ كيف في الفؤاد سكنتها؟؟
على كل حال انا كنت ليك...لكن رحلت و كنتها
غنيت عليك غنية حنين و مشيت بعيد ما سمعتها
حبيت علي يا غالي ليه
يا أحلى ايام عشتها
حاولت انت تدس علي
و أنا في عيونك شفتها

[سمر علي]

و أنا كان غبيتك يا دروب الريد بطش

و أنا كان ضهبت من العوينات و الرمش

أنا وين أمش؟؟

يا السمحة واضحة زي الشمش

صوتك كمنجات الحنين

صوتك هوى

صوتك دوا

صوتك محطات الأنين

صوتك روى

و لي صوتك إنتي النيل عطش

و الما سمع نمك مع الطير في الصباح

و الما سمع منك حلاوة الضحكة و الحكي و المزاح

في الناس طرش

ياطاعمة في عينيكِ قهوة و جنزبيل

يا ناعمة في خديكِ أزهار الخميل

يا شامخة في الطول و القوام

يا عالية زي شجر النخيل

فرشولك الدرب البسوقك بالقلوب

و كل الجمال عرشوهو من فوقك عرش

و الما بشوفك في بشارة الفال و في الشبال و في الدلوكة و السيف و البرش

في الريد مريض.. ما عندو إحساس بي قرش

و أنا يا أم وضيب

آمنت بالقسمة و نصيب

قاعد بصبّر في القلب بالريد

و واقف مندهش

[سمر علي]

و بكبر في عيون الناس .. و في عينيك بكون لسه

و دائما إنت خايفة علي..من فتحت لي هسه
...
بريدك يمه نبع الريد..و إحساس جنة بتحس

ويفيض بحر الحنان منك.. مراكب شوق عليك ترسى


بشوف يا يمة في عينيك ..أمان الدنيا متلمي

بشوف في ضحكتك دنياي..بتمسح لي دوام همي

و لما أبوس و أشم إيديك .. بحس بي الرحمة في دمي

و أدعي المولى يرضى عليك..و يخليك لينا يا أمي


و مهما قلت فيك كتير.. ما بوفيك أي كلام

لأنك إنت سر الكون.. و سر الريد معاي دوام

مهما الدنيا تقسى عليك .. ما بتتكسري للأيام

و ما بتشكي الهموم عينيك .. مهما كترت الآلآم

[سمر علي]

كلما تحس بالمواجع و المدامع في المقل



كلما تبعد تسافر و تبدأ تشتاق للأهل



كلما يجفاك حبيبك و يلقى لي قلبك بدل



و كلما تحس إنو بلدك إنو ما أجمل محل



أسقي روحك بالتمني و أملأ عينيك بالأمل



...............*...............*...............*..........



لو طريقك كلو ضلمة ..من قليبك سوي ضي



ولو بحور الدنيا نشفت.. الحنان الفيك ري



ولو ورود الريدة ماتت .. الضمير جواك حي



أملا بالآمال مدائن .. ألف شارع و ألف حي



...............*...............*...............*...............*.....



بالأمل في العين بتشرق .. ألف ضحكة و إبتسامة



و يبقى باكر أحلى موعد.. و الشمس أكبر علامة



بكرة حترد فينا روحنا .. و بكرة حتطير الحمامة



شايلا بين جنحينا لهفة .. وشوق توصلو بالسلامة

[سمر علي]

كنت مستنيك وصابر و إنت غائب و فيني حاضر

يوم لقيتك كنت حاسس انو في لحظة بتسافر

و ما خطر في بالي إنك تبقى تاجر للمشاعر

و رغم إنو البينا أصبح زي جرح كل يوم بتاور

ما بسلم بي رجوعك و بقدر أنساك أيوا قادر

و ما بقول في يوم ندمت و ما بكون في لحظة خاسر

و انو مهما يطول عذابك برضو حيطل فرحي باكر

انت إخترت إبتعادك و إنشغالك بي المظاهر

شيل معاك كل ذكرياتي و خلي لي بسمة بتكابر

يا مشاوير من عمرنا يا زمن في السكة عابر

يا قلب أوعاك تنشف أوعى من الريد تهاجر

اكتب الريد في الشوارع و المحطات و التذاكر

أنشر الريد في النسائم و الغمائم والبيادر

و عادي كل ما تزيد في ريدك تنغرس فيك الخناجر

بس تأكد انك أحسن و لسه جواك ألف شاعر

ما عشان جارت ظروفك تبقى بي كل ريده كـافر

[سمر علي]

مخنوق بي طوق الهم مخنوق

... و الدنيا محل ما تودي تسوق


إتباع الحق في ضل السوق


مسروق الريد في الجوف مسروق


أصبر في نارك لو محروق

ما تكون شفقان الموت ملحوق

[سمر علي]

ريدني بي إحساس مودع..تاني ما حيشوف حبيبو

و خلي شوقك شوق مسافر .. الفراق قدرو و نصيبو

...............*...............*...............*...............*...............*.......

ريدني بي إحساس زيادة .. و كل ما يمر يوم يزيد

ريدة تملاني و تدفق .. تجري في الدم و الوريد

ريدني بي لهفة مشاعرك .. ريدني ريد ما بعدو ريد

ريدني بي عيون الحبايب .. و شوقا للزول البعيد

...............*...............*...............*...............*......

ريدني أكتر ريدة عندك .. و برضو طمعان في الزيادة

ريدة بتخليني طاير .. بي جناحين السعادة

ريدني ريدة أشوفا دائما .. في عيونك و في سودا

ريدة أكتر من أقولا .. و مافي حاجة تقيف قصادا

...............*...............*...............*...............*...............

ريدني ريدة أعيش حياتي .. في تفاصيلا و حنانا

ريدني ريدة أغني ليها.. و أمسك النجمات عشانا

ريدة بتدوم في جمالا .. و مستحيل يرحل زمانا

بيها تبقى الدنيا دنيا.. و ما في زول في الكون معانا

...............*...............*...............*...............*............

ريدني ريدة زول مودع..تاني ما حيشوف حبيبو

و خلي شوقك شوق مسافر .. الفراق قدرو و نصيبو

[سمر علي]

...بعد صليت ..دعيت رب العباد و بكيت.

.يفكنا من قيود الهم..و يقرب للقلوب تتلم.
...
. ونزرع في ..حياتنا عشم..و نتكلم.

. ويحرك في نفوسنا ضمير..

و ما يحوجنا يوم للغير..ويا رب العباد ترحم.


بعد صليت .. دعيت رب العباد و بكيت..

يمسِّكنا الطريق الصاح.. و يدينا المحبة سلاح.

.نحارب بيها ظلم الناس .. ينوِّر في ضلامنا صباح..

و يا فتاح عليك رزق الفقير معدوم.. ورزق الفي القصور مرتاح..

تديم نعمك علي عبادك.. نجيب عز الوطن كان راح

[سمر علي]

نقااط الزير
ولحاف مهرود
ماتامي سرير
... والحوش وسخان
بلاعة البيت
جركانة الزيت
كسار الطوب
فردة مركوب
شجرة لالوب
شافع سرحان
مليان بالجير
ويقود النار
باقة الكركار
دخان الصاج
صوت الحجاج
باب النفاج
أولاد عمك
راقدين بي جاي
مهدودين حيل
شايلين الليل
احلام عشمان
ريحة البلدات
ضرعات جنيات
ميراث ابوات
وعصاية زان
صوت الأذان
موية الابريق
شوف لينا طريق
ختينا الني
ختينا الضيق
ادينا وساع
وكلاب الحي
ماكنات ومناع
مانعات الضي
والحال بطال
ادينا ريال
راجيانا عيال
وحبال في حبال
ماليها حدود
وطريق مسدود
والجيب مقدود
والود ميرود
حق الدكتور
والصف والدور
وابوهو معاش
ماف حاجه بلاش
سيد الدكان
ممنوع الدين
جاز البابور
سلك اللماع
طعميه فطور
ورسوم وهموم
وغبار وسموم
ام الأولاد
ماضاقت النوم
ولاحتي رقاد
تعبانه خلاص
ملت البرميل
ونهارا غسيل
حفظت البت
سورة الإخلاص
بي وجع الراس
رقدت بالتوب
ماقالت الروب
كوراك الديك
مستوره هديك
جهزت الشاي
ربك هاديك
مابفكك ساي
لابد يديك
من بعد الضيق
وانا كنت غريق
مالاقي القش
ولا حتي شهيق
ياالوشو قمر
مابدسو الغيم
وانا حبي قديم
وتتاوق البت
تملاني كلام
وعيونا عيون
ماليات الكون
بي اجمل لون
مرشوح جواي
ياهمس الريد
ياسر مغناي
بقراك في النم
سامعك شاشاي
عطرك ينشم ب
بحرك وداي
الناس بالناس
والكل للفوق
بعدوني بعيد
من المعشوق
غرباوي بقيت
رسموها شروق
وانا بين إتنين
بالظن مخنوق
بين إنك لي
أم إنك فوق
عسمني الريد
ياست الزوق
ياضل مفروش
جوات الحوش
مقشوش ونضيف
من قول الزيف
مرشوش بي موية ريد وحنان
والبن في النار
وتهب ريحتك
وانا راسي يدوش
متقريف ليك
والمطره بدت
في داك الحوش
المامعروش
سافر ياناس
انا القاو كيف
رسلت كتير
أشواق وسلام
وحروفي تطير
مرسالي حمام
وأقول لابد
يبعت لابد
لكنو هناك
لا بصد لا برد
شلهتني معاو
لي آخر حد
حدادي هواك
مدادي المد
ياخ مشتاق ليك
طمني علي
لو كت ماجاي
رسل عينيك
فجأة النباه
وانا ليلي طويل
متعشي جراح
لملمت اساي
جابلدت الآه
شهدت نجوم
وحدت الله
وأخيرآ عاد
كان شايلو بعاد
وأخيرآ عاد
وانا عاد ياناس
افراحي كحل
والريد مرواد
وجريت القاو
سابقني هواو
ولسوء الحظ
لاحظت اللون
ما لون العين
وإحساس ممحوق
مافيهو حنين
زي المسحور
او طاقشاو عين
الدنيا تدور
وقلب مكسور
ومراية الظن
ما بتعكس نور

[سمر علي]

منسية ساجدة... سجود سهو

أو
...
منسية ساجدة سجود... سهو


يا ناسية فرضك و هم نسوك

ما كلموك؟؟؟؟

النيل ضهب منك وقت يبطل وضوك

اتيممي وصليني شوق

و أستري عورة فكرتك ما تسرحي

خليكي واقفة مع النخيل إتوشحي

ريدة و محنة و أرشحي

يثبت غبارك امسحي

الأرض البكر تنبت سنابل

في شوارع الرملة و القوز و الحجر

يا قاعدة و الناس واقفة فيك

شاربنو دمك و يلبهو

منسية ساجدة سجود سهو

إتذكري

شيليهو همك فكري

ما تسكري

أصبغي شعرك أصبري

باكر بجيك

إتيممي و صليني شوق

ما تدنقري

ولدك وراك ماسك طرف توبك عشم

خلي الوهم

يا قهوة في ضل الضحى

يا قعدة حلوة و سمحة

داير معاك ونسة و ضحك

داير أنصحك

داير أبقى ليك مرواد على عيونك يمر

داير ابقى بيك طاعم وقت ما الحال يمر

داير أبقى بيك فاهم مع الناس الشتر

يا ناسية فرضك و هم نسوك واقفين عليك و يلبهو

منسية ساجدة سجود سهو

[سمر علي]

إغمض عليّ عيونك الولهى و دثرني فإن الجو برد

و إجعل خدودك في يديّ فإنها أعطاف ورد

و أنشر عبيرك في دمي ..

يأتيك بحر الشوق مدّاً تلو مد

قد كنت في كل الحروف مجسّدا

فلقد كتبتك في دواوين القصائد كلها

قد كنت أنت الصفحة الأولى

و إهداء البداية.. ثم بعد

قد كنت أنت ملامحي

شخصي تفاصيلي

محيطي ذكرياتي

لست أشياءً تُحد

إغمض عليّ عيونك الولهى و دثرني فإن الجو برد

فأنا أفتقدتك في سنين العمر - يا كل الأماني - أي فقد

إغمض عليّ عيونك الولهى و دثرني فإن الجو برد

قد كنت ُ أرسل في المدى صوتي

و أنت بداخلي لكنه يمضي ولا يأتي برد

[سمر علي]

عارف نفسي بيك و لهان.. و شايفك مني بتباعد


و عاذرك بس بلوم قلبي.. و حبي المن طرف واحد


...............*...............*...............

مخير قلبي في ريدو ... بيسوقني معاو شمال و يمين

و بتعذّب مع الأيام ..و أقاسي الليل دموع و أنين

و دائما قلبي مشغول بيك .. و قلبك لي سوايا رهين

و عاذرك بس توريني .. حنيني إليك أوديو وين؟؟


...............*...............*...............*........

غرامي المن طرف واحد .. براي بقدر أواسيهو

و أجفف دمعو بالآمال..و أشيل من عمري و أديهو

و أحاول أنشغل عنك..تجي الذكرى و تصحيهو

بقيت بالهم أصابح الريد.. و بالدمعات أمسيهو

...............*...............*...............*....

عموما أصلو ما ذنبك .. ولا برمي الملامة عليك

كفاية علي أشوف طيفك..مادام ما بشوف عينيك

و أقول ليك قلبي يوم بنساك..ولا في مرة يرجع ليك

وعشان كل الجمال الفيك.. في مليون زول معلق بيك

[سمر علي]

انت حر..

مرة اسقيني المحبة... ومرة اسقي الريدة مر..
...
و أبقى مر على بيتنا مرة..أصلو قربك لي بسر..

و مرة أبعد ياحبيبي.. خلي شوقي يزيد جمر

..انت حر و الدايرو دايرو..و الله يديني الصبر


انت يمشي علي كلامك..انت تأمر بس أمر

و بي مزاجك يا حبيبي .. مرة أضحك و مرة صر

و مرة أجرح قلبي أكتر ..ويوم أخد فيني الأجر

انت حر لو شلتي عمري.. و زدتو لي عمرك عمر


انت حر لو خنت وعدك.. و أصلو ما محتاج عذر

لو تخلي دموعي تجري..مافي يوم دمعة بتضر

سيبني أبكي و زيد نفورك..بي مزاجك و انت حر

ديمة بستناك حبيبي..و الله يديني الصبر

[سمر علي]

شنو الخلاني يوم أشتاق .. لي زول عمرو ما بشتاق

ولا بيفرق معاهو حنين .. ولا بيفرق معاهو فراق
...
عليك الريدة كان ماساي...بيقولوا* علينا ديل عشاق

غايتو بحب ليّ حبيب.. غريب في الطبعة و الأخلاق



شنو الخلاني أتورط .. و أشتاق ليك ليل و نهار

و عارف في هواك جزاي ...بضوق طعم المرار و النار

غريبة بكون معاك مبسوط..و أعاني من الفراق الحار

و عارف قلبي بيك ولهان ..و ما بيقدر سواك يختار


مناي أفهم حكاوي الريد..و أفسر كل قوانينو

و أعلم قلبي كيف يكره ..و كيف يجرح محبينو

و يكون في الدنيا في حالو.. و ما يلخبط موازينو

يدفّق في الوريد الدم.. ده كل النحن عايزينو

[سمر علي]

...بعد صليت ..دعيت رب العباد و بكيت.



.يفكنا من قيود الهم..و يقرب للقلوب تتلم.

...
. ونزرع في ..حياتنا عشم..و نتكلم.


. ويحرك في نفوسنا ضمير..


و ما يحوجنا يوم للغير..ويا رب العباد ترحم.




بعد صليت .. دعيت رب العباد و بكيت..


يمسِّكنا الطريق الصاح.. و يدينا المحبة سلاح.


.نحارب بيها ظلم الناس .. ينوِّر في ضلامنا صباح..


و يا فتاح عليك رزق الفقير معدوم.. ورزق الفي القصور مرتاح..


تديم نعمك علي عبادك.. نجيب عز الوطن كان راح