التـــــــــــــكل السودانى

[مها]

بسم الله الرحمن الرحيم
البوست يخص الاكلات السودانيه فقط
حتى تتعرف بقيه الشعوب على خصوصيه
مطبخنا السودانى ( التكل )
بسم الله نبدا

ملاح السلج

المقادير :

2-3 بصله

لحمه شرط تكون جديده عشان تكون طاعمه

سلج

باميه

شمار اخضر

فلفل وقرفه وهبهان حب

عطرون او كربونات

الطريقه :

نضع اللحمه والبصل والماء والملح والبهارات الصحيحه على النار

نغسل الباميه ونقطعها رفيع ونزعمط السلج من عروقو ونقطع الشمار ونغسلهم جيدا

ونضعهم فى مصفى حتى تنزل مويتهم

نترك الشوربه تغلى حتى تنضج اللحمه وتصبح كميه الماء قليله قدرما تغطى السلج فقط

لان السلج اصلا بينزل مويه نطلع اللحمه ونضيف السلج ونتركه يغلى قليلا ونفرك

ثم نضيف الباميه وبرضو نحليها تغلى ونفرك

ثم نضيف الشمار الاخضر والكربونات او العطرون مقدار بسيط جدا ونفرك

غلبك مافى اى مشكله مفراكة الكهرباء تتم الناقص بس اديها دوسه واقيفى يعنى ما تشغليها طوالى علشان

مايكون ناعم شديد

بعد كده نضيف البهارات والتوم

واتفضلوها يانسوان بالهناء

منقول للفائده

[مها]

ملاح الويكاب باللوبا
مقدار كوبين لوبا مدروشة ونضيفة ومغسلة جيدا ويفضل وضع مصفي عند غسيلها

نضعها في الحلة ومعها بصلتين وممكن ان نشوح البصلتين اول ثم نضيف الماء واللوبا( و حبة طماطم وحبة ماجي حسب الرغبة )ونتركه ليغلي قليلا ثم نضيف الويكاب(نذوب الويكاب في قليل من الماء) ومانكثر من الويكاب لانو حيبقا الملاح حامض نوعا ما اونخفض النار
ا لويكاب بعمل عمل الكربونات يعني بهرس اللوبا تماما وبعد يغلي وتشعري انو استوي اضيفي كوب صغير زيت افضل السمسم وكوب حليب اولبن حليب وفول سوداني دكوة مقدار معلقتين طبعا ذوبيهم في قليل من الماء اضيفي البهارات التي ترغبين والملح ثم افركي بالمفراك بعدها اضيفي الويكة المطحونة بالمقدار المناسب وماتكتري الويكة لان الملاح اصلا تقيل
بعد كده يؤكل مع عصيدة او كسرة وممكن تضيفي السمن علي الوجه

[مها]

الباميه المفروكه
المكونات لحمه_بصل_باميه_فلفليه _شطه_مكعب ماجي_ملح _شمار_كزبره

اولا تقطعي البصل مكعبات صغيره




تضيفي المكونات مع بعض وتضيفي المويه حسب الكميه لعمل الشوربه



تقطعي الباميه صغار



بعد تخلص الشوربه اضيف الباميه ومكعب ماجي



واخلي النار واطيه شويه مع عدم تحريك الباميه لحد ماتاخذ الشكل ده



بعدين افرك الباميه لحد ماتموت وبعداك اضيف الكزبره والتوم

[ميسم]

ملاح السلج ده امممممممممممممممممممممم يا مهويه حاجه رهيبه شهيتيني

تسلم ايدك يا حبيبه

[عبدالله عوض الكريم احمد]

بصراحة كلمة تكل خلتني اجي جاري
جري وقلت الحمد لله شليل ماراح ومن طاقة التكل فاح دخان الورتاب والويقود وريحة العجين المخمر
وصوت القرقريبه ( المرحاكه) ونغمة طاجن اللقمة والرهيفه وهناك فوق المشلعيب مختوته كوره فيها
عقاب لبن رايب وفوق ليهو معراكه
وتكل لافيهو باب بس فيه طاقه لزوم خروج الدخان ومنع الاغتناق لمن بالداخل وهي تتربع على بنبر وبالقرب من كوره مليانه مويه بعطنو فيها القرقريبه فيشان ماتنشف
بس اصبت بالـــــ

لقيتو ماياهو تكلي اللنا قاصدو وماعارف مها دي جابتو لينا من وين ياناس ده ماتكلنا طب
ده تكل اكيد جاي من بلاد الهونولولو
ولا يكون ده تكل MODREN:l ياشايل شمسك في جواك
لاتنجــــــــــــــــــع:

[فنجاطة]

ياسلااااام يا مهويا
ريحة ملاح السلج ضاربة البوست وريحة الطايوق في الدوكة
والله لعابي سال يعني ريلتي جرت يختي
بجيك راجعة

[عبدالله عوض الكريم احمد]

ياسلااااام يا مهويا
ريحة ملاح السلج ضاربة البوست وريحة الطايوق في الدوكة
والله لعابي سال يعني ريلتي جرت يختي
بجيك راجعة

ماتنسي جردل العجين
معـــــاك

[فنجاطة]

سمح يا عبد الله اخو
رسلتة الولد يجيب لي الخمار من الجيران
بخمر عجيني واجيكم
بعد ما اعوس الكسرة بعمل لمهويا الموص اليومين ديل
من كترت شغل المطيخ نزلت خمسة كيلو تفرك ساي
وناس دريم ومسلمة ومنو يجو يأكلو بس ويمشو

[عبدالله عوض الكريم احمد]

موص ولا نشـــــــــــــــا
كتري العجيـــــــــــن
بس بطلي الفنجيط يافنجاطه

[فنجاطة]

لا لا موص يا عبد الله
انا اكان بطلتة الفنجطة تاني اسوي شنو
يها شغلتي ياود امي مع الحريم اجارك الله

[darasta90]

والله الصراحة في اسامي كدة حقت اكلات انا اول مرة اسمع بيها عديل ههههههه
لكن بعد تشوف الصور مابهمك اسم الحاجه كتير
البطن مابتدي طريقة تفكر دايرة بس تتملي

[omar babikir]

يا سلام احلى تكل واحلى وجبات ....
يا ريت كل الناس تحترم اكلاتها وتراثها ...

وجباتنا دي رغم انها لايوقة شوية بس احلى من البيتزا

[أم رؤى]

[TABLETEXT="width:70%;background-image:url('http://im4.gulfup.com/2011-07-07/1310055695102.jpg');border:5px outset rgb(255, 69, 0);"][CELL="filter:;"]

آآآآآآآآآآآآآآآآآآآآآآخ ممكن أضوق
شهي جداً السلج

[/CELL][/TABLETEXT]

[عزيز بربراوى]

شكرا مها على الوجبات البلدية الظريفة .بس عندى استفسار السلج والبامية ديل للفطور ولا الغدا البقى عشا فى الزمن الاغبر دا وتانيا بالكسرة ولا بالقراصة(أحسن عمك بحبها شديد)...