%% موقع اناسودانى %%قلرى سهام قسومة
%%موقع اناسودانى %%عن مؤسس الموقع
%%موقع اناسودانى %%التراث والعادات السودانية
%%موقع اناسودانى%%السياحة فى السودان
%%موقع اناسودانى %%التعليم،الفنون،الثقافة
%%موقع اناسودانى %%معلومات عامة
%%موقع اناسودانى %%المقدمة
%%موقع اناسودانى%%تاريخ السودان
%%موقع اناسودانى %%الحكم فى السودان
%%موقع اناسودانى%%الرئيسية
%%موقع اناسودانى %%الاقتصاد السودانى
%%موقع اناسودانى%%الزراعة في السودان
%%موقع اناسودانى %%شعر حلمنتيشى سودانى
%%موقع اناسودانى %%عملات وطوابع سودانية

All copyrights are reserved © Salah Suleiman,  Schopfheim 23.Oct.2001

  

اضغط هنا للدخول الى منتدى اناسودانى

اضغط هنا للدخول الى قلرى صور اناسودانى

فن تشكيلى سودانى

عن مؤسس الموقع

التراث والعادات السودانية

السياحة فى السودان

التعليم،الفنون،الثقافة

معلومات عامة

المقدمة

تاريخ الســودان

الحكم فى السودان

الصفحة الرئيسية

الاقتصاد السودانى

الزراعة في السودان

شعر حلمنتيشى سودانى

عملات وطوابع سودانية


    حبك لذيذ   sweet  



انت مهما جريت ومهما قسيت

حبك برضه لذيذ sweet


ليه يا قاسي ستة شهور

more وامكن Since I saw you 


ماشي وجاي حزين مأسور

بين الـ windowوبين ال door


ليه تظلمني وتنسي هواي

وأنا بحبك زي my eye

وصولك كيف ومكانك high

تعال أدركني before I die


ليه يا قاسي كفاي تعذيب

في ذكراك I can't sleep

داخل قلبي جروحك deep

تعال أدركني before I weep


بحلم بيك أناday and night

أنا والنوم دوام في fight

ماعرفت شمالي من my right

هل الكلام دم  منك right !


&&&&&&&&&&&&&&&&&&&





الخط شــــــــبك



- ألو منو ؟


- واحدة يتكلم مكتبك


- قصدِك منو؟ الخرطوم هنا


- ما عارفه مال حيكون رَبَك


- أقصد أقول امكن يكون الخط شبك


- أنا قصدي انه يكون شبك


والروعة انه يكون شبك


- بس اسمك منو ؟ وقصدك شنو ؟


- أنا قصدي الحقيقي أونسك


وأنا من زمن حاضنه الهوي ومتمنية أقدر أعرفك


وسألت عنك يا عظيم وعرفت اسمك ونمرتك


وضربت ليك أونسك


وامكن ونستي بتعجيك


- حصل الشرف


وتعجبني من أول حرف


- ليه ما بتخاف أطلع جريئة وأمقلبك ؟


- مـأ بتقدري


- أتحدي ليــــك الـدريــك


- والله من ضحكتِك خليتيني أفتكرك ملك!


وكلامك المنساب عسل


خلاني أشتاق لو أصل


حتفولي انك مين و وين ؟


ولا نقفل ونقول الخط شبك؟


- لا أقول ما في شك


بس أيدأ من وين في الشرح !


ما دام قليبك منشرح


طبعي السمح


ولا من لون القمح


ولا البسيمة المذهلة


والوجنتين الكملن حد الحلا


والعيون الـ بالطبيعة مكحلة


وخصلة زي تاج الملوك للكواحل مسدلة


يكقيك كده ؟


- يكفيني كيف يا حلوة يا مستهبلة


في الحقيقة في القوام كلمات أحب أتأملها


واسمك يا لذيذة ما في شك بدون أوصاف حلا


- القوام فارع مديد لو شفتو حتقول الصلاة


وحكاية الاسم اللذيذ أحسن نسيبها نأجلا


لكن حروفه الأربعة فيهم اثنين واو ولا


والباقي مـا حنـ\قولها لا


أحسن نسيبها تعذبك


لمن تشوفنا ونعجبك


- طيب متين نتلاقي يا ست البنات يا مذهلة

؟

ما تقولي لي استني روق دي حكاية ما بستحملها


- بالغت كـــــك !!


خلاص معاليك ارتبك ؟


وبديت تجهز في الشرك؟


وحسبت حتي مرتبك !


القصة كلها يا لذيذ وبدون زعل


مقلب أكيد سببه المــــــــــــــــلل


تلفون جديد


وفراغ شديد


وقليب رهيف خلوه في البيت وحيد


وضربت ليك أتسلي بيك وأمقلبك


باي باي خلاص انساني قول الخط شبك


- لكن وحاتك ما أعرف الحلوة المعاها الخط شبك؟

-

- ما فيش لزوم بس قول جميل


أشبع غرورك وعذبك!


والخط شبك




&&&&&&&&&&&&&&&&&&&




أصله القصة قصة حب




سمحة وطيبة يا ناس الله هالكاني


وبالهار كاري كاتلاني


ومحضرة من زمان كفني


وأصله القصة قصة حب


وما بقدر أناضمها تـــب


أقيف قدامـها أتـكبـكـب


وأمرق الكلمة ألقي التانية ما بتركب


وكل يوم أقول الليلة أبقي عنيد


وقلبـــــــــــــــــــي حديــــــــــــد


حروفي الليلة حقوا تزيـــــــــــد


وأنقشـــها بكلام الريــــــــــــــد



ومما أشوفها قلبي يقيف


وأقيف أرجف


وريقي يجف


وساقي يلف


وعيني ترف


وأحس بزوغة في العينين


وصوت عربات وطايرات ودبابات صلاح الدين


وجملي تلاتة أقولها بتلهيف


صباح الخير


وكيف الحال وعاملين كيف


وسيد الناس يقول أهلاً ويتبسم


وأنا أتبكم وأتبجم


وأترمد وأتسجم


وأقول أكتب يجيني مغص


وأغادر للبركس بالدس


وكل يوم نقول باكر نعيد الكرة


ولي هسة عدنا الكرة متين مرة


ويا ناس الله نرمي الكلمة تطلع برة


أنا أستسلمت ملكي هلك


الرخ والطابية عاملين check


نودي يمين يقيف اسمك


نودي شمال يبين حسنك


ووبين اسمك وبين رسمك


نموت بالجملة في حسنك


حلاتك يا صباح النور حلاة اسمك



  

حبك لذيذ   sweet 

الخط شبك

قصة حب


 يا   suger


كل ما أقبّل وأعاين

ألقى عينيك جات في mine

حاجة very good

حاجة  fine


يا suger  مصنع كنانة

يا flour مالي البطانة


إنته fantastic banana 

 

إنتِ عينيك فيه light


إنتِ شعرك dark night


إنتِ طبعك كولو right


إنت my heart  إنتِ نورو 


إنت my love  البدورو 


عايز أشوفك  more tomorow     

 

عايز أشوفك more tomorow

 

&&&&&&&&&&&&&&&&&&&&


 

زولتنا كانت سمحه



زولتنا كانت سمحه جد


في عيونا كان الليل لبد


و في رموشا كان القيف كان شرد


و في الضحكه بصب البرد


و لكل سوال كان للجمال في عيونا رد


و زولنا كان بريدا جد في ريدا ما كان ليها حد و القصه عارفها البلد


بلقها لو يوم قام فجر في ونسه في شاي العصر


جنب بيتا لو حايم كدر


و دايما حديثوم في العرس


وكيف يلملمولو قرش قرش


و كيف يبنو من ساسو التحت لمن يودهو العرش


و كانو عايشين في غرام لافيهو خداع لافيه غش لا فيه كرامه بتنخدش


و تمر سنين بكل حنين لا فيها الم لا فيها انين


و زولتنا كان حافظا الوعد و لزولنا تب ما تغيرت لا من قريب لا من بعيد


و ياهو البحصل يا اهل لو كان صحيح الزول بريد


و صاحبنا بلم في المهر بالرغم من دخلو البسيط 200 جنيه اخر الشهر


فيها الاكل و فيها اللبس و فيها العالج فيها الوفر


و شان كنتي يالسمحه الامل


لا كدة لا ضاق بيهو فتر


بالرغم من حالو الصعب و بالرغم من دخلو الكعب


بالرغم من تعبو الشديد شان كان صحيح الريده في دم الوريد


بس بالزمن السمحه يوم اتغيرت و يما الزمن ياكل الحديد


السمحه ليه اتبدلت لزول تعب و نست الحنان في القلب


و السمحه ليه اتغيرت لي زول بحب و القصه ما كانت كضب



0*0*0*0*0*0*0*0*0*0*0*0*0*0*0*0*0*0*0*0*0*0*0*0*0*0


زولتنا بلا مغترب


السمحه بلا مغترب زولتنا يوم الوافقت صاحبنا في المقلب شرب


و كان العذراصلو العرس قسمه و نصيب


صاح يا اهل اصلو العرس قسمه و نصيب


بس يا اهل وين قسمه الخاضو الحرب


طول عمرهم لا اتغيرو لاحدو يوم من الدرب


و ين الحنان و ين المشاعر الفي القلب


بعاهوا بكوم الشنط


بعاهوا بالجزم ام سست


بعاهوا بالكمين جنيه و الكم شبط و الكم جنيه القالو لي قطع الرحط


بعاهو بصقفة بنات زغريد حريم وعلب كريم


وادوك للبقدر يجيب


و قالو العرس قسمه و نصيب


0*0*0*0*0*0*0*0*0*0*0*0*0*0*0*0*0**0*0*0*00**0*0*0*0*0*0*0*0*0*



و لو عارفه يا زينة البنات دقو الجرس بعاوك في سوق الرقيق


ودوك في اخطر طريق من دون رفيق من دون حبيب


ادوك للبقدر بجيب و قالو العرس قسمه و نصيب


و لو عارفه يا زينة البنات غشوك بيصوان كبير و عريس كمان في البدله عامل


 زي عوير


و البنسون اب عشرين كمان ولعه فيها صمام امان و كدوس عجيب دخانو بطلع

 بالاضان


و بنات عدد صفق الشجر


و السيره كان لا ليها راس لا ليها قعر و فنان يلعلع للفجر


و تطلبي شئ البيت قريب و التكسي بودي و يجيب


و قالو العرس قسمه و نصيب


و قالو العرس قسمه و نصيب



&&&&&&&&&&&&&&&&&&&


بترولنا هو الدين


حباب بترولنا فرحانين


ولي جيتك رجينا سنين


طلعت روحنا قبّالك


وطلّعوا زيتنا معصورين


قالوا بطون ، تربطوها .. ربطانها


هم فكّوا .. بقت كرشاً تشيل جاهلين


قالوا دقون ، تربّوها .. ربيناها


هم حلقوا .. صبحوا مُلُس حلاتو حسين


قالوا تدكّوا .. دكيناها


بس جرّونا ليك خمسين


أخدنا السيك وفي قبولنا


ورق يا أخوانّا فيو "آسين"!


لكن بس خلاص سودانّا بتصلّح


وتبقى "أمبّدة " زي "برلين"


تعال شوف كيف جنيهنا يعود


مكانو الفاتو ليهو سنين


جنيه حيساوي اتناشر


ما "دولار" "استرلين"


مزارعنا بتدّور جد.. مزارع فول وأب سبعين


وزيت السمسم قصب سكر ..بنلغي بطاقة التموين


نسوق عرباتنا نص الليل ..ونحرقوا ليك جِنِس بنزين


وتبقي الكهرباء بي بلاش


لا أمطار أبت تهطل ..ولا طوربينا خشّاها طين


والغسالة كهربا بل .. تكوي براها لو عايزين


تعال شوف ليك جِنِس تكييف


ونوم يا زول لحدي اتنين


بدل سودان .. نكون صفران .. نكون بويضان


ونبقى بويض ومرتاحين


والطب زاتو يتطّور .. نركّب للمريض قلبين


دكاكين حقّت اسبيرات .. كلاوي كِبَد أذين وبطين


دكاترة يجونا من برّة..دكاترة يجونا من لندن


عشان القحّة والتسنين!


علاج مجّاني ندفع ليك لو تمرض


منو البمرض! يقيسوا الدم ميّة وعشرين


والتعليم يكون ثورة .. تعم الناس ويفهموا زين


عشان ما يسامحوا زي أوّل


الياكل الناس باسم الدين


يجينا وزير كلامو كُتُر


يخت الخمسة في الإتنين


حندخل عاشرة وحداشر


قراية الجامعة بس سنتين


ينظّر زي فلان داكا ..محامي من أهل لينين


والبسقط ننجحوا لو وحيد أمّو .. عشان مسكين


ونلغي مدارس الوزرا..وينجحوا ناس خلف والزين


والقانون صريح واضح .. مصدّق لي كل زول بيرين


تعال شوف المشاكل عاد ..بيري وبيرك اتفتحوا


وياخ سلّفني طن بنزين


وعايز لي استخدام بتاع علماء فللك اتنين


وعالم ذَرّة متمكّن .. عشان ياخ ولدي ساقط دين


آدم موسى من دارفور


عاوز ليهو بيّاعين للتنباك .. عشان أصلي


يكونوا هنود وجامعيين


وواحد عندو كافتيريا .. خَلّى الحبشة والصومال


قال لبنان وسن عشرين


عاد بنّوتنا باراً جد..مع لبنان واستنطبول


بنات تلقى الشَعر مترين


وما غاليات عِرس الواحدة بي ألفين


ونتبوبر عاد جِنِس بوبار ..كلامنا يكون طرف نخرين


أكيد سوداننا بتطوّر


لو حاكمنا كل سارق ..وكل غدّار بس سنتين


أكيد بترولنا راح يطلع .. وبنسيّروا بالعديل والزين


بس البترول هو ما بنزين..هو الإيمان صحيح ما غِش


هو شرع الله ما تلوين


كيف بترولنا بس يطلع


بترولنا الدهب ..ماسات في المنجم


ومنجّمنا ياهو الدين


 


 

  

يا   suger

زولتنا كانت سمحه

بترولنا


 رهيب الفول



يا حبيب الشعب يا إنتاج بلادي


الله ما أحلاك بالجبنة والزبادي


فيك سحر غير عادي


إنت القدر والحبيب


رهيب والله رهيب


في مناسباتنا العديدة


دايما مشكل حضور


في السمايات والمآتم


في العرس والطهور


يا الكل يوم معانا


في العشا والفطور


عنك ما بنتخلى


إنت القسمة والنصيب


رهيب والله رهيب


نحن البيك همنا


وإنت سبب أذانا


في البيت والمطاعم


شايلين الصحانة


يا الساقينا موية


في الشتاء والسخانة


يا مسمار بطننا


يا أجمل حبيب



*****


يا ود عم الفاليوم


وجودك مهم في البيت


في كل المحافل


أصبحت ذايع الصيت


الله ما أحلاك بالبصل والزيت


من ما ناكلك إنت


نكوس العنقريب



*****


رهيب والله رهيب


أصلي ولد بلدنا


ماجابوك بالمطار


فيك فيتامين مغذي


زي السمك والخضار


وحاتك إنت طاعم


لو بالملح والشمار


إن شاء الله تكون فطورنا


في الجنة أم همبريب


رهيب والله رهيب



*****

يا النبتة العجيبة


وصفك تعدى الخيال


بتقوم في أي حتة


في الرمال والجبال


وإنت سبب الهزائم


للمريخ والهلال


ديل راقدين جنايز


ناقصم النحيب


&&&&&&&&&&&&&&&&&


نـــــــدى




قلتي ليّ سموك ندى!؟!


وده منو السمّاك ندى؟


ده أكيد أبوك


إنعل كِدة!


فيك شنو يسمّك ندى!؟


في صوتك أتخن مننا


إضنين كُبار زي دِشّنا


وتقولي ليّ سمّاك ندى!


خشمك ده ريحتو معفّنة


ايدين كبار حقات بُنى


وتقولي لي سمّاك ندى!؟


المشية كتّاحة وعلال


كرشك تقول شايل جَنى


وتقولي لي سمّاك ندى!؟


قالت لي "ها هدى في البطاقة إسمي ندى"


شوف يا أخ..


مافيش علاقة بينك وبين ندى


خلّيها ندى ..


خالت قريبة جارت صديقة ناس ندى


ما فيش علاقة


ندى في العيون أكحل مجعّد مسوّدة


انتي العيون فوقن قضى


ندى في الحواجب زي هلال


قصة نصوم دي مؤكدة!


انتي الحواجب دلجة بس


قلم الحواجب هاردها


وتقولي لي سمّاك ندى!؟


ندى تبتسم آلالاف مؤلفة تسعدها


وانتي الخشم شارّة التلاليش


بس طبق ومغطّي صينية الغدا


ندى في الوشيش نظرك بشيش..


ما يعقّدها


وانتي الوشيش وش الجحيش


نخرين كُبار كُرعين ردا


وتقولي سمّاك ندى!




قاتلي "آي أنا إسمي ندى"


شوفي أوعك تقولي اسمك ندى


ندى ما بس الاسم


ندى الجمال زايد الأدب زايد العلم زايد الفهم


ندى في الجمال ما شُفنا أجمل من كِده


ندى في الدلال خصّاها بيو رب العباد حين أوجدها


ندى في الأدب ..


ربّوها بيو رجال ياكلو النار مولّعة موقدة


ندى في الكلام


طبيعي صوتا بيجيب صدى


ندى في "البزاغ" ..


شربتي "سفن أب" ياهو ده !


وتقولي لي سمّاك ندى!



&&&&&&&&&&&&&&&&




الجوال


أجبر خاطري بس يا زول


لو حني بي مس كول


ليه أصبحت جافي وريدك ما هو صافي


صارف عني ولا إظهار رقم مافي


قول لي أيه يفيدك وأنا قلبي البريدك


هو مشحون بحبك وانت ضعيف رصيدك


الدنيا بطــالة وما دايمة أحوالها


لو تعبان رصيدك فرحني برسالة


قزازة الريحــة ريدتي معاك صريحة


بقي جسمي السلبته أرق من الشريحة


بقي عقلي ما ثابت وفيّ عزولي شامت


ما عرفت موبايلك محظور ولا صــامت


خليتـني مرتبكة وبحرقة قلبي بكـي


وكيف تسمع نداي وأنا خارج الشيكة


لو نرضي يا سيدي داك يبقي يوم عيدي


لو جاتني رسالتك بحول ليك رصيدي


 


  

رهيب الفول

نـــــــدى

الجوال




يا كهارب اقطعي


           أقطعي يا الجنيتي على القطع


           كمبيوترك ما بعرف الجمع


           اقطعي خلينا نبكي بالدمع


         اقطعي تكتر مصانع الشمع


        وينقص رصيد ناس الضرائب


       والحبايب ويا كهارب اقطعي


****


            أسلاكك بس بيت عنكبوت


            والبهبشك ما اظن يموت


         أقطعي خليهن يبكن البنوت


          وشًوفي الناس العجائب


                يا كهارب اقطعي


***


     أقطعي وخلينا بس نبقى الكبش


        اقطعي اسعارك ما بتنهبش


           اقطعي بنوًر بيوتنا بالشمش


                وننفك منك يا ام مقالب


             ويا كهارب اقطعي


****


اقطعي يا ربة الحسن والجمال


          يا قاسية بكيتي الرجال


             بتصيدي في الناس بالنبال


       تعيشيهم في مقالب


        وتخربشيهم بالمخالب


ويا كهارب اقطعي


***


     فشلتي ما قدرت واصلت المسيرة


        إيه فائدة البحر الدميرة


          والكوابل والعواميد الكثيرة


     دللوها واملوا بقروشها الخزائن


        ورجًعوا الناس للرتاين


   وينفكوا من كل المشاكل والمصاعب


والمتاعب يا كهارب اقطعي


***


أقطعي انت احوالك عجيبة


         أقطعي ملينا عيشتنا الرتيبة


    أقطعي ضلمي المدن الكئيبة


   وتقرًص الناس العقارب


والدبايب ويا كهارب اقطعي


&&&&&&&&&&&&&&&&&&


هاى


 


 

الاخ الكريم

عزيزي عمرو موسى

تحياتي وبعد..

الحالة ميئوسه

اخاطبكم لانك

زي ام العروسه

جاري تلم لينا

ناس حرب البسوسه

انسى القصة يا خي

عشان نديكا بوسه

***

تخيل انت قاعد

والقاعة مدفوسه

رؤوسنا وملوكنا

والنظره العبوسه

ياكلو لحمنا كلو

ويحلوا بسبوسه

وباقي الشعب ياكل

جرجيرا وكوسه

ماذا استفدنا

من ساس ويسوسا

بلا قمة بلا لمه

الناس عاوزين فلوسا

***

عزيزي جورج بوش

تحياتي لـ لورا

ولي والدنا بوش

ارجو اختصارا

نخش في القصة توش

عربي وانجليزي

وكلام من غير رتوش

وي نيد ايفري تايم

تفتوفة وقروش

وي دونيد سلاح

وي دونيد جيوش

وي نيد فول وشطه

وي نيد اونلي بوش

وي نيد ايدز حايم

يبقى كلام فشوش

وي نيد ايفري دولار

وي نيد القروش

الدرن ـ الملاريا

نايدات القروش

الارهاب مشرد كايس ليهو حوش

الارهاب حفايا

في غابه وحوش

تحياتي وشكرا

عزيزي كوفي كيفك

اوعى تسلو سيفك

يومداك جاني طيفك

زي نشفان خريفك

رسلت العساكر

والحلم البخيفك

ندمان كت خالص

مطرم شلاليفك

وحيران ما مصدق

والشيطان حليفك

ارجو ان تراجع

قيمة تكاليفك

تقسم لينا حبه

من فولك رغيفك

صرها في ملايه

«نشيفك»   وفي دارفور

تحياتي وهاي



&&&&&&&&&&&&&&&&&


مانديلا


قالت ليهو : ما لك بتاكل السندويتش حفار حفار


انت فار؟؟


قال ليها :بقيت مجنون بقيت محتار بعد ما زول طويل عريض


 انا فار؟؟؟؟


يا احلى كديسه في الدنيا


عليك ربك تبلعيني


وماتفضلي شي..وكان ده حصل بكون يا بُرّه اسعد فار


وانطط جوه في بطنك وانغص فيها للاسرار


واقيف اتـأمل الكبده والطوحال..تقول رادار


واخزن جوه في المعده


وافتش لي لكسره ما القى


واقبل جاي ده همبرغر


وكمان بي جاي جلي وكاستر


وكمان بهناك عصير مانجا..


وكمان اصفــــــــــــــــــــــــــر


مصارينها مستّفه بي عسل سكر


مش زي مصارين السماني ملفلفه زي حبال بمبر..


واطير ليك فو وفي الفشفاش اتحكر


وانط طوالي جنب قلبك واشوف الدم هداك احمـــــــــــر..


ابحلق جوه في بطنك اعاين القى صورتي انا..؟؟صورة الفار!!


اها يا عالم ده ما سبب البلع زاتو


اقول يا بره خارجيني..تقول لي نياو


عليك ربك تخارجيني..تقول لي نياو


بحبك ياخي خارجيني..تقول لي نياو


وتتوكل تتطلعني من اجمل فيلا واحلى سجن


يمين من جوه فيها بطن...مفرهده زي زهور الفل


بتعمل نكهة النعناع مطعمه بي طعم ليبتون


وفيها نسيم يجيك بــــــــــــــــــــــــــــارد ..مكندشه بس تقول


 هيلتون


ده من جوه..


ومن بره


تحلف بس تقول يازول واحد شل ليهو حبل وربطه وفي القمر جره


ولما تجي وهناك تقعد


تقوم من تاني تنفره


واشوف الخاشي ماشي بره


واحس بي قلبي فرّ فرّ


سجنتيني وجاري وراك مابنساك وما بتخلّى


حتى لو الزمن عاند


حتى لو السهم جلّى


بموت فيك موت


لانك انت


افريقيا


وانا البهواك....مانديلا


  



الزمن الضائع


متين يا الله ألم الفكه


أجيب الشيلة واسوي الشبكه


وأمي تزغرد بي طول صوتها


وأنا مبسوط وظابط الشكة


هدومي معطنة بالأرياح


ريحة الخمرة  وريحة الدلكة


واطبع للعيزومة كروت


حاشاها الما زي كرت البنزين


جميله زاهية في ورق التوت


وتحت الإمضاء مشكورين


لأنها لحظة ما بتفوت


وإلا تكونوا مبسوطين


ويجوا الأولاد بوجوهاً نادية


يقشوا الفسحة الواسعة وهادية


نرًكب فيها الصيونات


ونعمل حفلة بود البادية


ولازمن حفلة تكون صباحي


أشفي غليلي وأداوي جراحي


من زمن العذابة الأغبر


السًود عيشتي وزاد لنواحي


أفك القيد من قلبي وأغني


حبيب الروح وغني يا صاحي


وفي العصرية نمرق سيرة


خلوق منتظمة ماشة مسيرة


زي صف دكانأً ناصية


فيه سجاير بالتسعيرة


بناتنا يغنن مبسوطات


دور بينا البلد ده


يلفن يدورن العربات


ولمن أصل بالسيف اتقدم


زي الفارس ماشي ملجم


وشي بينضح لمعه ونضرة


قميصي نضيف وماه مجلبط


بملاح خدره


أهز في البنوت بي سيفي


وابخبخ فيهن لبن البدرة


وفجأة يدق صوت الدلوكة


وتبقى الناس بالجد مربوكة


واحدة تصفق واحدة تزغرد


وواحدةتلوك في لبان بازوكة


جابوا عروسي وبدت الوقفة


سرحت بعيد في حق القفة


جابت قون بي رقة وخفة


ما اتجرست كلا وحاشا


الا هناك واقفين شماشة


قالوا اكيد شارب حرباشة


زعلت شديد وغلبني اللعب


لانو كلامن كلو كضب


قاموا اصحابي بصوت عالي


يا عبد الله اطلع بره إشاعة إشاعة


وحتماً يوم لي أمك عايد


قونها حقيقي  ما اوف صايد


صوت أصحابي أثر فوقي


بحركة ذكية جبت القون


وانا والحلوة بقينا  درون


وفجأة  أضفت الهدف الثاني


وغمر الساحة فرح رباني


مرقوا اصحابي يكوركوا ويهتفوا


فاتوا الفسحة وسدوا الشارع


صوتهم طاغي ظاهر وطالع


يا عبد الله هايل ورايع


جبت القون في الزمن الضايع


&&&&&&&&&&&&&&&&&&&&&&



الحافلة


الحافلة بعدك محزنة ركابها فارقهم الهناء


ده حرام عليك ياجميل ما بيصح ليك تنزل هنا


ساعة وصولك يا أمير تبينا واقفين كلنا


عشان تقعد انت وتستريح ليك التعب ما بيهمنا


أطربنا لهجك من بعيد بطلنا نسمع للغني


حتى البنات يتأملن ومن خجلتك خجلتنا


الناس جميع أتشهدوا ومن فتنتك حيرتنا


نورا بزهر شيء جديد وده خيال صوت لنا


سواقنا تقل سرعتك عشان يطول عمر الهنا


من ثاني يضمن شوفتوا مين ده من الجنان ما من هنا


الفات محطته ما شعر أعماه من حسنك سنا


أما الفصيح شافك سكت جد يا جميل لجمتنا


ما باقي لسه محطتين أيه لو قضيتهم جنبنا


تبقي العيون فرحانة بيك والدنيا تصبح ملكنا


ساعة نويت انت النزول قبال تفوت أوحشتنا


والشارع الثائر هجد لما القوام مال وانثني


وصحينا من حلم جميل لمن خلاص فارفتنا


سارحين نتابع في خطاك ساحرانا قدرة ربنا


ومشيت سريع من غير وداع خليتنا في لهفة وعنا


وتركت صورتك في الخيال تنهب عقولنا تجننا


وفضلنا نتساءل نقول هل تاني شوفتك ممكنة


ولا الزمان الأنت فيه للبسمة صار من حظنا


&&&&&&&&&&&&&&&&&&


أريدك كيف



اريدك كيف ...اريدك كيف وبيتكم انتو سابع دور


وريحة كلبكم ريف دور . أريدك كيف


انحن البيتنا جمب الخور وبيتنا الديما قاطع نور


ملاحنا الفول كمان بنحلي بالعجور


اريدك كيف يا زينة بنات الحور


انحن حياتنا مختلفة وقتين تقعدوا في الصفرة


وكل واحد حداو صحنو


عجب والله ورانا الزمن محنو


فرق شعب في وطنو


دا ما الخلي الحسن هاج فوق أخوه وطعنو


أريدك كيف وانتو بتاكلو بالشوكة


تغازلو اللحمة في السرويس تهبشوا صلطة المايونيز


وطبعاً دا كلو بالشوكة


ونحن ملاحنا مفروكة


وبنعجنة كسري بي ويكة


هنديك يمه بت الزين تعوس الكسري في الدوكة


وتزيد خمار عجينة دقيق وتقولنا كسري مبروكة


دقيقة زواره في الشيخة هديــــــــــكه بهايمه مفكوكة


بتعوس يمه عقب لا تكل ولا بتمل تضاري دموعه


بشوقه وقت الصاج يحر يسخن تهديهو يمه بروقه


وتجيب معراكته وتمسح وتطعن فوقه طايوقه .


طبق الكسري يتندل تضاريو يمه بتوبه


عشان أحمد وقت يقطع بجز الكسري من فوقة


ويابه الجاي من شغلو وعارف الشاري سبلوكة


بتسمع فوق سكاتو انين تحس في حلقو ديك العبرة مخنوقة


يشيل احمد يعاين ليهو تكنو بيشك في يوم باكر ويجر سبلوكتو بروقة


ويصلي صلاتو ويستغفر .


تروح العبرة مفكوكة يصيح ليمه بت الزين هياااا ست البنات بسرااااع بطنا مطقطقة


 عروقة .


ونقعد في البنابر ديك بطنا الخاويه بجوعة


نبلع لقماً تحلف تقول ضفدع متلب جو بالوعة


بنبلع ومافي زول بمدغ سخانة الويكه والجوعة


والايد ماشه مرفوعة و ويكة سايلة لكوعة


نقوم من الاكل شله وجماعة وما اظن شبعو


هديــــــكه بيكابسو في الحله لكن ماهي كسري بي مويه


من الزير أو القلة بنفرقة تمله بستله وهو انحن ملاحنا دا بنسمي ملاح


أريدك كيف وانتو ملاحكم التفاح


يمين باباكي لو شافني ببلع في لقمة بلع صاح


يحلف يقو جد دا ما زول دا تمساح


انحن خشمنا وقتين ينفتح تحلفي تقولي بس


يتمزع ما بتمزع طق..طق..طرق بصل الاضان ممكن كمان يدخل ضلع .


أريدك كيف وانا كراعي التقول مكوه وقت احلم .. بحلم بأوقات في الغالب تكون بلوه .


أريدك كيف .. وكيف يتحب زول فطموهو بالقهوة .. وكيف يتحب زول فطموهو بالقهوة


 


العذابة


أقولها نصيحة ليك يا بابا


أحذر جيرة العذابة


أهل الضمنة والكشتينة


ديل أهل الطباع الشينة


ليهم مرة نحن مشينا


لا إتغدينا لا إتعشينا


***


لو وقعت ما بتنحل


حتى إن كان بقيت زي بله


ديل القوم في أي محله


نص الليل بشدوا الحلة


***


يعبوا البيت زي الباخرة


ما بعرفوا السراير الفاخرة


دفاتر الكل عليهم ساخرة


أصلوا خلاص بقت دين آخرة


يخلوا البيت مبشتن ديمة


يدخًلوا فيه عدة قديمة


كمان لو فيه شجرة نيمة


يكون وسخان وحالتو أليمه


***


الملاية ما مفروشة


وجوه الأوضة قامت كوشه


ست البيت تكورك فيهم


ديل أخواننا ضربوا قروشا


***


الغسًال يكورك فيهم


والتاجر أبا يديهم


والجزار مشرك ليهم خلاص يا اخواننا عرفوا الفيهم


زحمة شديدة في الشماعة


ريحة كريهة في البلاعة


ديل في الحلة عملوا مجاعة


شفطوا القدرة في نص ساعة


***


ضد العرس رفعوا الراية


ديل إنحلًوا من الداية


لا تطعيم كمان لا رعاية


مافي كرامة ولا سماية



&&&&&&&&&&&&&&&&&&&






حبيناك وما حبيتنا


يا القصيت دربنا وجيتنا


من بين الشباب ناديتنا


قلنا كتير خلاص حبيتنا


لما شبكنا فيك ابيتنا


يظهر ناوي تخرب بيتنا


قول باالله كيف باريتنا


بي موت العيون جريتنا


في حبل الغرام شريتنا


مااا تنزلنا ياااا الماطريتنا


ورانا كتير جريت سكيتنا


لي قاضي المحنة شكيتنا


لما شبكنا فيك فكيتنا


بدمع العيون بكيتنا


جيتنا وبالعيون باكيتنا


لمّن غلبتك سكيتنا


زي لعب الورق شكيتنا


جيت حمبكتا ليه دكيتنا


تاني بريس بريس لاقيتنا


لما رضينا بيك صافيتنا


وتاني بدون سبب جافيتنا


ليه يا جكسا يعني طفيتنا


وقمت وبالحنان وصيتنا


لمن للاهل عصيتنا


ولمن في الدرج رصيتنا


في الآوت بعيد باصيتنا


زي لعب العيال سويتنا


واتفششته زيييييين كاويتنا


يا الغسلتنا ولاويتنا


ما اتكرمشنا ليه ما كويتنا


اتشتتنا ما لميتنا


في قفة هواك خميتنا


في كانون هواك حميتنا


لمن زيتنا فاح شميتنا


لمن زيتنا فاح شميتنا


لمن زيتنا فاح شميتنا


 &&&&&&&&&&&&&&&



سيد بشبش


جيناكم يا ناس عشة


ناكل ونتعشى


نشرب وندشى


وبالموية نترشة


كشونا جنس كشة


*****

سيد بشبش .. سيد بشبش


عامل حاج ونضيف وبيرقش


أمرو بيمشي وكفو بيطرش


وعينو الحارة في يوم ما بترمش


عند المكتب رسمي بيغضب


جوة البيت يرفس ويضرب


وسط أصحابه بيرقص ويلعب


راجل نكتة وصاحب مقلب


وآخر الليل يقابض بشبش


*****

وسيد بشبش راجل دين وراجل دولة


صاحب سطوة وصاحب وخطوة وصاحب صولة


وبيني وبينكم


سيد بشبش واعي وفاهم .. فاهم .. فاهم


وعارف إنه الواحد .. برضو .. ويعني .. ولازم


وبالمفتوح بس ده كلام سر مافيش واحد يمشي يسمع


سيد بشبش راجل دغري


لكن بالليل هجيجو يولع


زي ما تقول بيحب المنقة والحاجات النايس ونص نص


وقبل ما ندخل ديب آند ديب


أحسن نعرف صورة بشبش


أسمر .. أصلع


وشو بيلمع


بادية عليه علامة النعمة


عالي ومكرش


وعرجة خفيفة في حادث حركة


شكل سيادتو عموماً مدهش


ودايماً يحمل سبحة تسبح وحدها دون تسبيح


أتوماتيك .. حكمة ربك ونعمة صحيح


*****

سيد بشبش راجل أرقد


ريتش إنتلجنت


إسموث آند إليقانت


بت سمتايمس آند دستدريندق


أبريس وييك آند دسلايكلي .. سيمكالت


في عصرية وكانت جمعة


سيد بشبش .. حكحك دقنو وهذب شنبو


ووشو بينضح نضرة ولمعة


خت عبايتو، وطق عصايتو


وخبت الباب من خلفه برزعة


خلى البيت يتراجف كله


حاجة نفيسة بناتها تلاتة


وبالأولاد بيكملوا سبعة


في المرسيدس أخد القعدة


كدوسو البني يهبهب نارو


مد صباعو .. وهز دماغو


يعني سيادتو بيحي في جارو


وعاد البينز قال يا ليل


وسط الشارع يلوي غبارو


وأثناء ما سايق وماش في السكة


كان بيدندن.. يعني بيمدح


دشكة .. دشكة .. أووو دشكا


دشكة .. دشكة .. أووو دشكا


نحن ما صعاليك .. أووو ديشكا


نتاوق بالشبابيك أووو ديشكا


دشكة .. دشكة .. أووو دشكا


وأثناء ما سايق يغني ويمدح


عينو الزايغة بتجمع وتطرح


وهناك على زاوية لمح المنقة


أووووووووه


سيد بشبش تمساح لو يلمح


قلبو ينطط جوة ضلوعو


يطق الروري يسكل ويردح


ولفه ودور حول المنقة


ودور ولفه


رسم الزاوية وكشف المسرح


وبسمة أنيقة صناعة بره


بسمة ثعلب حكمة وخبرة


ما نتفاهم يا خلق الله


وعاد خلق الله ما فهامة وناس واعيين


عارفين الحال والأمر الواقع


إشارة خفيفة وغمزة عين


كان الرد الفرح بشبش وخلى سيادتو يهدي يمين


وجات المنقة تشيل تتمخطر


مساء الخير .. آنسة مرمر


إسمك روعة


جسم روعة


بهجة وسكر


أما سيادتو: سيد بشبش


رائع مدهش


إسمك منعش


موسيقي ومطرب


بس خازوق الناس تتلخبط ومرة تقول لسيادتك.. شبشب


يا بت يا نكتة صنفك متعب


*****


وهناك في شارع كم مش عارف


والبيت الناصية أشجار وزخارف


عربات تتلامع لمبات ورفارف


كانت هيصة وربة تولول


ناس بتصفق


وناس بتزغرت


وناس بتهلل


وناس بتنادي شيلي وختي


وناس بتغازل أموت يا إنتي


وناس منبسطة غاسلة وكاوية


وناس ركاني بتعزف زاوية


وناس بتغني حني يا تتي


وسيد بشبش أمير الموقف وبطل الساعة


كان مشغول.. مع ناس مرمر بيصلي جماعة


لمن تم صلاتو وسلم


قام يسلم بالأحضان


قال مشتاق وكاتلو الشوق في الحبان


وزي ما قلنا قبيل عم بشبش راجل بهجة وجد فنان


جدع العمة هناك وعصايتو ولحق جزمتو بالقفطان


وهاك يا دانس


ودارت حلقة عجاج وغبار


وناس بتسوي الردحي الجد


وناس في الردحي رقيصها هظار


وناس إنبسطت فوق للحد


وناس بتدق كاروشة وظار


وناس بتقول يا رفاعي مدد


ناس إنبطحت


ناس إنمبرشت


ناس إندرشت


ناس إنكمشت شان تتمد


وفجأة في لحظة حصلت كبسة


وزي ما تقول البيت إنهد


الجو إتلغم


فار واتسمم


وصل الكومر شكله يخوف


نزل إمباشى معاهو الأورطى


عملوا السد وجاط الموقف


وسيد بشبش ضرب اللخمة


ربط الساعة مكان الجزمة


لبس الجزمة وفاكرها عمة


لفة العمة محل الساعة


لقى القفطان ورمى الشماعة


فكر ينط من فوق للحيطة


تلب تووف جوة البلاعة


وجوة الكومر وبالبوليس الناس شحنوها


البتباكى والبتوقع


البتعزر وبالبتشفع


والضحكات باهته وبتشجع


وناس تتجرس


وناس تتونس


وناس بتحنس شان يعفوها


وفي نص الكومر كان متمحن سيد بشبش

 

ماسك سبحتو


مرة يسبح


ومرة يقحقح


ومرة يسب


مشغول باولاده وحاجة نفيسة


وناس المكتب وكيف القصة هناك بحكوها


وكل ما مرمر تبسم ليهو


يسب للمنقة ويوم زرعوها


نحمدو وفي الجنة ننكمدو


 


 

الزمن الضائع

الحافلة

أريدك كيف

  يا كهارب اقطعي

هاى

مانديلا

العذابة

حبيناك وما حبيتنا

سيد بشبش


أمل حياتى


كتبت عشان الاقى زول كان الرد من زوله


اتسامرنا وحكينا حكاوى حبوبه


شليل وينواكلو  الدودو شليل وين راح اكلوالتمساح


كلمه كلمه غنوه غنوه همسه همسه لبست الحب وشاح


نادى المنادى قلت خلاص قلبى ارتاح


عرفت الحب بقيت عاشق بلاقى فى كلمات براح


اردد ليه ليه من زمان ماتقابلنا ندمان على الماضى الراح


ابتسامتك الزاد لى بكره صوتك البلبل الصداح


خيالى برسم فى المشيه والقدله وفى النجوم بقيت سواح


سابح فى خيال طيفى وبشوف فى وجيها صباح


كتمت حبى فى الكتمان بلاقى نواح


انين فى دواخلى بقطع فى حشاى الم فى قليبى مابنزاح


جنتى ...... حبك وكلماتك تداوى جراح


انتظرتك تقولى الكلمه طال انتظارى وفجر الصباح لاح


اخر العذاب قلبى مل من صبرو قال عاوز ليه صراح


وقلت انا الكلمه من امل حياتى القى نجاح


ياريت لو بتنفع ياريت اترفع فى وجيهى سلاح


وانكسر قلبى انكسر السهاد زامل عيونى بقى ماعندى صباح


من حبات الرمال شيدت ليكى قصور فيها العطر فواح


فى جواى زرعت ليكى مدن مشتوله بالافراح


سلمتك قليبى رهيف قليب طفل كل شئ فيهو مباح


عرفتى دواخلى والكان وكان وعارفه قلبى لى سواك ماراح


 ظمايئ برويه من كلماتك وظمائك برويه من وريدى وفى بحر الحب كمان  سباح


بسأل بى كل صراح يجف مدادى بدون الحاح


وبدعو الواحد الاحد يوقف كلماتى ومن عذاب امل حياتى أرتاح


&&&&&&&&&&&&&&&


عربسات


 


قلبي صحن دش وعيونك عربسات


والبث حي مباشر من شفاتك


سلكي ولاسلكي وعبر المسافات


يسري اثيرك في فضاي وصفاتك


القلب مخرج والمشاعر مذيعات


والشوق مبعوث مراسل لذاتك


ارسال متواصل على خمس فترات


ينقل وقايع ما يصير بحياتك


صورتك في فكري على سبع شاشات


وافضل برامج سهرتي ذكرياتك


وارسال حسادك قطعتة عن السات


بدلت كيبلهم بكيبل غلاتك


والغيت يا ثريا الغلا الأشتراكات


ما عاد اشاهد غير ما بث ساتك


لو شوشت ع البث كل المحطات


يلقط رسيفر خاطري ذبذباتك


جرب على ريموت الأحساس ضغطات


تلقاه ما يختار الا قناتك


 

&&&&&&&&&&&&&&&


سماحتك


سماحتك عقّدتني عديل


أعاين ليك دموعي تسيل


أكُر في الحمدو عشرين مرّة


وأقرى معاها سورة الفيل


ولمن تمسكي المنديل وتمسحي بيو كحل عينيك


لمّي الدمعة فوقوا تسيل


أعاين في عيونك ديل


وأقول أريتني كان منديل


ما بنفع كلام يا ريت


نوعي ده ما شَبَه منديل


ملامحي قريبة للصارقيل!


كيفن بس أكون منديل


ولمّا تقومي منعدلة


وتقدلي ليك كم قدلة


أفنجط بي وراك ســــــــــــاي


التقول سخلة


أعاين وأقول هَمَلة


وحلاة القدلة في أهلها


حليوه وتمشي بي جَهلها


وتتقصّد مشي الأصلة


وأنا الفجغوني بي عَدلة


أنا اليادوب في دنيا الريد


مناي يا رب سلام في الإيد


عيونك زي عيون الصيد


كُبار زي خروف العيد


تكهربي بيها خلق الله


ونوعي ده عاد جنونو يزيد


وأقول يا رب تسلّم لي أو ساكت


تأشّر لي، وكان غمزت ده يوم العيد


وعينيك طالعا بينها طوّاف


لا الكبكابة لا الرجّاف


تقول رشّوني بي البفباف


يجيني رعاف


وأقعد ألف، عيوني ترِف


وأقول أكيد ده أثر فطور الفول


لمنّ تضحكي في نُكته


التقول لبعوني بي شنطة


وأكب فوق العصير شطّة


وأقرطع ما أسيب نُقطة


وأقول "يا سلام عصير لُقطة"


وإنتِ تقولي"بالغت وشربت الشطّة يا إنتَ"


مالها الشطّة، ما شربات عصير كُفته


عصير جركان من الدُكّان


يترشّه في صحن فتّة


ما مهم شرابي الشطة


والمهم الكلمة "بالغت "


و "شربت الشطّة يا إنتَ"


 

  


الفيكس


حاجة عجيبة ودنيا تنسّي


ناس اغتربت تمشي المانيا


تمشي اليابان ونيوجيرسي


حاجة عجيبة وجات بالعكس


من الصين وللسودان


الجكس اغترب وباع الفيكس


واحدين قالوا جونا هنا


لأنو هناك حرارة الطقس


واحد قال بكين بالنص


للسوق العربي رماهم بوكس


وميه الميه بايركس


وبايركسنا كمان بايركس


السودان ضاع وضح النهار


من غير ما لبس


والشوارع دقداق تفتل دركسون


وتحل جربوكس


ومن الصحافة زلط وللخرطوم بالعكس


ثقيف مشرور وتهتز زي البترول


وما يفضالك كرسي


نهارك ضاع من تصبح لامن تمسي


ركشه هنا وركشه هناك وللصالح العام


أحالوا التكسي ..


الدفار جاك وهاك يا كوداك


تصل عرقان وقميصك وسخان


وحالتك يخسي


راسك زي سخّان يغلي غليان


وما يساوي الفلس



&&&&&&&&&&&&&&&&&&&


السيستر

أنا العيان


حرارتي الضاربة فوق ميتين


و لا بينفع بخور تيمان


و لا بتنزل دموع بالعين


رقدت سنين


سريري تعب


مركب فوق وريدي درب


تعب و رعب


جحر عيني يدخل فارة أم سيسي


و أجرجر نفسي بالسيسي


أتقول مخنوق


مصنقع فوق


و كل ما يوم يشيلوا الدم


يزيدوا الهم


يقولوا مقاسو طالع كم.. و طالع كم


و أنا الساكت و غالبني


و غالبني


محل ما أشوفها أتكلم


و ما بسلم


و حاكي البلي و الشمبر


و كان قمت


بقع في السلم أتكسر


عشان تظهر


تمر بسراير العنبر


و تاخد نبضي بالرختر


عيونها الزي عيونها براها


تطعن بالإبار مرضاها


و إبرة ترك و في منديل


وما بتتعب


تكركب في البلاط كركب


وقلبي يدق يسو رب رب


و ناري الليلة تتعلق


دا عنبر كم؟ و شايل كم؟


دكاترتو كم؟


و فد سستر؟


تجهجه في خلايق الله


و أنا العيان


حواسي المابية تتدلى


أدوش دوشة


أهضرب هضربة زولا


رقد في برش


و خت رويسو فوق بنبر


و لما الناس تقول هستر


وتتغالط.. أظن هستر


أظن دفتر..


أظن بامية.. أظن كستر


أدق الطارة وأتحكر


أدوبي أشكر السستر


أوصف في بنات آوى


كضب كان قالوا بتداوى


و فاضل في المداواة الكي


و ما أظن زاتو ينفع في


أدوخ كلما العيون ترمش


و لما السلسلة تكشكش


أزوغ أتضارى في الكورودور


و الصالة بقت نور


و خاتة الكاب على جنبة


و راشة الريحة فايحة زهور


تموت كرعي أقع و أزحف


و راس طرطور


عشان أرتاح


عليك الله و عليك الله


تفجخي راسي بى ساطور


 


 

&&&&&&&&&&&&&&&


مومو


القليب ما قادر المو


اصلو مجروح جاري دمو


ضربو زايد.. قاسى همو


قالو سبب الرجفة والموت


الحليو الأسمو ممو


واصلو ممو..


كمو كطو


وكطو كمو..


ابوها بابي


مامي امو..


من الجماعه الكل يوم


قاعد استحمو


والعطر خمسين متر


حرم تشمو


ولما تقدل بس تقول


تقلع ترابا التمشي فيهو


عديل تخمو


طبعو رقه


لونو منقه


في اوربا مارادونا


وفي بلدنا مافي زيو


الا تنقا


واصلى مما شفت ممو


قلت يا ناس دي الملائكه؟


ولا خلقه..؟


قالوا خلقه


قلت انو ..ما اظنو


واصلي من ما شفت ممو


عقلى فر وقلبي دقه


وبنطلون الجنيز طقه


اي عجور ضقتو بعدو


لقيتو منقه


باكو السجاير جوه جيبي


لقيتو حقه


الفنيله اللونا ابيض


فجأه جيت


ولقيتا زرقاء


يا ريتني لو من مويتو


القي ليا بقه


ان شاء الله حتي


لو فيها شرقه


يا ريتني لو في بحرو


القي ليا غرقه


كنت بغطس


وما بدور لي تاني مرقه


تاني امرق..؟


وين اقبل..؟ للبعاعيت؟


عليكم الله ديا خلقه؟


ممو يا ناس ما اذانا


بى خدودو البرتكانه


ممو يا عالم جمانه


لا اكل يوم زي عشانا


كسره بى لبن البطانه


ولا شرب من زير مغبر


زي فلانه وفرتكانه


ممو ما فيش منو اتنين


هما مخلوقين براهم


ونحن مخلوقين برانا


الفرق


نحن بنعوس كسره في الصاج


وهم رغيفن


بشتروه من اجزخانه


الفرق


هما بمشوا عديل افوتو


ونحن نترجي البكاسي


ويومي نتلفت ورانا


الفرق...


هم عندهم توليت مكندش


ونحن عندنا أأآنا


ممو حني عليكي بابا


تعالي نعمل حبكانه


امكن اتعلم


احب ناس هاي اروق


بدله فاخره واستكانه


غايتو حاقوليك حالي


كان نفع قولى اوكي


ما نفعت..


قولي ما نافع معانا


عندي شده


وبنطلون واحد مرقع


حالو حالنا ومستوانا


ابوي مزارع


احفر الطين بالطوارى


عرقو نازل


في هجير الدنيا


في الصيف والسخانه


شان القط لقمه .. لقمه


شان اتمتم لي ..عشانا


شان إشوفنا


بنقرأ نتعلم برانا


عمي ترزى ...وكان تمرجي


ولادو دسته


وكلهم ساكنين معانا


ممو يا الجو المكندش


شوفي كتاحه هوانا


واصلي عارف


بكره اظهر مغترب


نأكل النيم والزلط


وانتو بتلوكوا اللبانه


ونحن بنكابد نجابد


ونبقي في الأخر ضحيه


الشواكيش كع ..كرع


اتقول بس بندقيه


والمآسى الفي جوانا


كل يوم بتزيد شويه


الا بس اصبح عزانا


طيبه القلب البينزف


وكتين الناس البتشحد


وكل اطفال التشرد


لما امشوا عشان ارقدوا


ينوموا في نص الشوارع


يعني ما يلقوا المكانه


الا بس اصبح عزانا


طيبه اخلاصنا ووفانا


وكتين اولاد المدارس


يوت ادافروا .. في طريقهم


شان اكتبوا الحصه


في حينا وزمانا


الا بس اصبح عزانا


حب بلدنا


منبت الخير والوداعه


ريحه الطين والزراعه


حب تقاليدنا وطباعه


وفوقا ما بنرضي الأهانه


 


 


  


الوداعية



جلست في ظل النيمة


تتأمل في الودع المرصوص


قالت يا ولدي  شيل شيلتك


وتسلح فالحرب ضروس


امامك مشوار طويل


الا ان تركب مخصوص


الموقف مكتظ مليان


ستدافر يا ولدي كثيرا


وستركب وسط النسوان


وستنشل كل نقودك


وستصبح دوما حزنان


الناس يا ولدي جيوش


مندفعة مثل الطوفان


فنصيحتي أن تذهب كداري


ولا تركب بص ام درمان


زواجك يا ولدي محال


أصبر يا ود الصًرة


حاليا وضعك بطال


وحتبقى حياتك مرة


فالمهر في كل الحلال


قد اصبح بالعملات الحرة


احببت فتاة مغرورة


لعبت بي قلبك كورة


أنساها وأبحث عن غيرها


ويا ريت لو شرطت الصورة


أنسى وتبسم


فالزوجة قسمة وتوتوكورة


&&&&&&&&&&&&&&&&



هلوسه



روح يا نسيم جيب لي منو...........News


انا عقلي اتبدل قربت ليه.......To Loose 


أحايل فيه لكن عارفو .......Will refuse


اشتكي للظلمني وليه......... I accuse



*********************


في دنيا الجمال والله زيو.........Few


كل ما يوم نشوف في حسنو حاجه....New 


زهره نديه عباقه وعليها.........Dew 


قليل في حقو لو قت ليه......I love you


*********************


من كتر الهموم انا صابني ...Hypertension 


ما نايبني منك غير صدود و ..Rejection


متجاهل هواي ماتعيرني اي.....Attention


كان اعديك إذا كان في الغرام...Infection


*********************


اصبح في الاسي وامسي ....In my pain


انت بتزدهر وف نار هواك  ......I wane


من عيني الدموع سياله .....  Like rain


تعدل او تجور ما ياهو عاد ....Your pain


**********************


ساكن في الفؤاد بالقوة من غير.... Fees


قافلو موكرو طب شايل معاك ال....Keys


مهما يطول جفاك ماتفكر ..I will cease


يوم القاك تجدني امامك...On my knees 


************


 


 


 &&&&&&&&&&&&&&&&


فالنتين


"وقالت صحي ..النوم يازول


عيد الريد والناس مبتهجه


مالو البال لا زال مشغول"



عيد الريد


السنه كم عيد ؟


ماهم عيدين


في تاني جديد


يابت معقول


ضحكت


ونغمة صوته تغني


وقالت


"تُب

تاريك ما ناقش


عيد الحب الليه وحاتك


وكان ما ما شي


برايه بقول"



بتقولي شنو


شالت عينه..ورفعت راسه


وقاعده بتكتب في


كراسه


تكتبي شنو؟


هي يازوله دقيقه


استني


عيد الحب ده عديل محني



العيد الاول معروف شغلو

لفا طويله وحلويات



والعيد التاني


كمان بس لحمه


مراره وشيه وشربوتات



العيد التالت


فيهو شنو؟


"قالت فيهو جنس حاجات


اسكت ساكت


امشي وشوفو


وكان ما بتعرف


قلد واعمل


بس


بنظام الخواجات


"


الخواجات!!؟


ناس عوض ود احمد


وقامت كيف


والغضب اتوحد


وقالت وصوته حاضر وبشهد


انت مطرطش ولا شنو


اه لو اعرف قبل القاك


انك فاره


فاره منو؟


اه لو تعرف قلبك صخره


وانا نواره


نوره منو؟


اه لو تعرف ؟ بس استني


آآآه انا منك


ياخ ما بتفهم


هوووووووي


يابت ما عندك شغلا


قالت عيد والناس محتفلا


وبتضبحو ايه انشالله الليله


زعلت وقالت "حاوريك


حضبك انت يامتخلف


وما متعلم


فلنتاين


ما تتكلم

"هي ما تقولي بقولو شنو


ضحكت وقالت


"i love you"



هي يا زوله


u love me

اي لفلي اشوفك


دي براها كفايه


can i see


عيونك مره



ابتسمت وقالت



"ههههاااااااي



yes u can"


وطيب بس


ما تقولي كده


علا دقيقه عليك عينيك


عيد الحب ده


علينا عليكي



وكل سنه وانتو طيبين


 


 

  

أمل حياتى

عربسات

سماحتك

الفيكس

السيستر

مومو

الوداعية

هلوسه

فالنتين




حب اللحوم


ما عشقتك لي غلاتك


انت اغلى من العيون


او هويتك لي حلاتك


انت اجمل شئ يكون


يا المعلق في الشناكل


إنت هيجت البطون


أم العيال كاشفة حالي


عايزة لحمة وانت غالي


انت غالي يا الخيالي


ديمة في السلخانة باين


ملمسك ناعم حريري


وهناك في اطراف بعيدة


ناس كتير باعوك كيري


اصلو ما بقدر عليك


اخير تشوف ليك حد غيري


بياكلو من البقري فخذه


ومن بطون الضأن كبدة


الظروف حنت عليهم


والدنيا صارت ملك ايديهم


ونحن ناكل في التسالي


وانت غالي


نحن جنينا وسعرنا


عليك ابدا ما قدرنا


كلما الماهية تعلى انت برضو بتغلى


كم موظف بيك هايم


يحلم في يوم يتغدى شية


فوقها دكوه وشطه  حاره


على يمينها مرارة نيه


نفسو مجروحة وحزينة


إنهد من أكل السخينة


ومعاها ماجي ...


ما بصح أبقارنا زينة


ونحن ناكل في السخينة


الارض بتنادي لينا


والأمل معقود علينا


لو مرقنا على المزارع


او مشينا على المصانع


بكرة نشبع في الكوارع


والجقاجق والزبادي


نبني مجدك يا بلادي


&&&&&&&&&&&&&&&&&



تغشينى



تغشيني وتقولي لي بحبك زين

وانا المغشوش انا المسكين

واتاريك لاعبه في الحبلين

واتاريك فندق الحرمين

يحبك سيف جديد وسنين

يا دجالة يا محتاله جدك مين ؟

فريد العصر راسبوتين

وابوك لينين

يلين عضمك بدل واحد تحبي اتنين


****************


فساتين نحنا كم قصير وكم طويل

واحد تلبسيه بفليل

وواحد للصباح دانتيل


****************


يحبك ضر يا صرمه

ويحشك بصله قاورمه

ويختك جوه في برمه

ويسويك فته للطاشين


كنت بدور نكون اتنين

ازور بيك لندن السمحه

واسوقك في حلات فسحه

اوديك رحلة سور الصين

واتاريك لاعبه في الحبلين


******************


مناي انا بس اجيب سكين

واقطع ليك إضيناتك اخليك طير بلا جنحين

واجزجز ليك شعيراتك اكردك صلعة جبنة طين

تطيري سنسن وما تلمي

اكان عكرتي لي دمي

وزدتي علب كمان همي

انا البى وراك نسيت امي


***********


رسالاتك تجيني مطر

حبيبي اللونك الاسمر

بلاك للدنيا ما بقدر

قطر ينفيك يوديك للسماء الاحمر

ويشيلك زي هبوب طوكر

ويقطع ليك كريعاتك يسويهن كراع بنبر


تغشينى


 &&&&&&&&&&&&&




وين رســـــائلا؟

 


ياما سألت عليك كتير ...ياما سألت سؤال نِكير


وين زولي يا ناس وين أميرةَََ الكون حلا


وين الرسايل الكان زمان بترسلا


قولولي يا ناس شن حصل قبال أسافر أحصّلا


لا كلمة منها لاخبر .. لا بسمة منها لانظر


هــوي يا جماعــة انــا فــي خطــر.....................


............... النار في جسمي مشعـلِلا


................يكونشي حاصل مشكلا


............... نعال هي مو متعـلـّلا


والله المصيبة تكون نست داستني بالكعب العلا


وختـّتـْني فوق الرف معا حاجات قديمة مهمّلا


معقول ده يحصل منها .. لالالاله وألف لا


طيب أقول بس أيه حصل دي اربع شهور متكاملا


وآخر رسالة إذكـَّرا .. كانت كتابي مهرجلا


وكاتبالي قبال آخرا .. سامحني أنا مستعجلا


أبداً دي ماها عوايدا .. واللهي ماها عوايدا


................يا ربي عاد شن صايدا


قصدت حياتي تنكدا .. قصدت عيوني تقدِّدا


خازوق يكون فيـِّي إنضرَب لوتبقى عاد دي مقاصدا


,,,,,,,,, لكنــِّـي تانــي أرجـــع وأقــــول ,,,,,,,,,


ده محال يكون .. دي مظنـّة ساكت وأخْيِلا


,,,,,,,,,,,, دي حقيقة لازم أجهلا ,,,,,,,,,,,,


وأصلو الحقيقة من اولا وهي دي كان بدايةَ المشكلا


لاقتني في نُصّتْ نهار والواطة حارة موَلـْوِلا


وانا كتّ يا زول منقشر آخر شياكة مكمّلا


شاكـِّي القميص ورابط الحزام والبدلة روعة مفصلا


ويا دوبي متعطـّرْ كمان ..أرياحي فايح صندلا


أدّتـني عين !! لاحولة عاد لاقوة .. عاد مُوعين نَصاح


,,,,,,,,,,,, دي عديل موجّهة قنبلا ,,,,,,,,,,,,


وفي الحال مفاصلي إنفصّـلـن وكرعَيْ بقتـلي مكجْولا


وقلبي المسيكين إتوَهم وكان دار يقيف لو ما قريت البسملا


وختـّيت نفس .. وعلـِّيت نفس .. وبعد تعَبْ عاينتلا


,,,,,,,,,,,, بسمتـلي قمت بسمتلا ,,,,,,,,,,,,


,,,,,,,,,, وفكـّيت طــويل مــن غيــر كـــلام,,,,,,,,,,,


وكان لي العرق .. معّط فنيلتي وبلبلا


قعدت أحلل في الحصل .. وراسي إنشحـن بالأسئلا


دي تكون شنو ...!! حورية دابا منزّلا


وبسمتـلي ليه .. والنظرة كيفن أحلـّلا


,,,,,,,,,,,, جايز تكون مستهبلا ,,,,,,,,,,,,


جايز دي أحد المعجبات وانا نفسي ساكت جاهلا


يا رب في سابق معرفة .. وبالبسمة دايري توصّلا


اللهُ أعلم ما أظن .. دي اول مصادفة أقابلا


وآخر حقيقة طلعتبا .. يمكن تكون دي مشاغلا


,,,,,,,,,,,,,, بــس تـــانــي يـــــوم ,,,,,,,,,,,,,,


إن كان أشوفلك زولتي في الكافتيريا باسمي مهلـّلا


أتاري البنية هِيْ طالبة وجابوها يا دوب في اوّلا


تعرفني وأنا ما بعرفا .. يا للمصيبة والبلا


موقف صعب .. بي ياتو وش انا أقابلا


مشيت عليهن .. كوم بنات.. أهلاً وسهلاً ويا هلا


سلـّم عليهن بي بشاشة وهي خاصة كتـّرْ زدتلا


وبحلـْقتَ بحلـَقْ في العيون تحلف تقول دار آكلا


وحصل التعارف والكلام .. خلاص خلاص قربتلا


وسألتني ليك عن يوم أمس .. لي بي بياخا فتحتلا


وحلـَفْ حلفت انا باليمين ما كنت داير أعطـِّلا


وما كنت عارفك إنتي مين .. وجابوكي للمعهد متين


على كلو حال انا بعتذر .. إن كنت غلطان واللهْ لا


والبسمة فرَّتْ من رموشا .. ومن عيونا .. ومن سنونا


والدنيا بسمتْ بي نـِويسينا وعفاريتا وجنونا


,,,,,,,, وانا إبتسمْ .. والتاني بي جمبي إبتسم ,,,,,,,,


وكان مو الكضب .. كرْسيّا فرفر وابتسم


,,,,,,,,,,,,,, سبحانهو الخلق النـِّعم ,,,,,,,,,,,,,,,


سبحانهو الخلق الجمال وادّاكي منـّو وكت قـَسم


وخلاكي ضمّه تمخـْوِلي وتربّي في الراس الوهم


وخلاني قدامك صِغِرْ ولساني بي طولو إتبكم


داير الحقيقة.. انا إتوهم .. وعِدِّوني بس شوال فحم


أو قول أبو الهول بالتمام .. انا ما جمدتّ بقيت صنم


,,,,,,,,,,,,, سبحانهو الخلق النعم ,,,,,,,,,,,,,


سبحانك الله يا عظيم .. القـُدْرة فيكا ممثلا


,,,,,,,,,,,, فيك الصفات متكمـِّلا ,,,,,,,,,,,,


والبسمة فرَّتْ من رومشا .. وومن عيونا ومن سنونا


والدنيا بسمَتْ بي نويسينا وعفاريتا وجنونا


,,,,,,,,,,,, الله علِي الذوق والحلا ,,,,,,,,,,,,


يا منقة سنـّاريّة تشفي الزول قـَبُـلْ ما ياكلا


يا باسطة في طبلية بي أنواعا راقدي مشكـَّلا


,,,,,,,,,,,,,,,,,, إنتي الحلا ,,,,,,,,,,,,,,,,,,


إنتي السِّـكيكـْري الفوق كسيرتاً بي لبيني مبلبلا


روحِكْ تريِّحْ ميَّه زيِّي .. واكيد رويحتي مجنضلا


وعينك تهزَّ الماب يشوف .. وانا نظرة ما بستحْملا


زهـْللـْتي قلباً من زمان الريدة كاتلا مزهـْللا


,,,,,,,,,,,,,,,, وكيف العمل ,,,,,,,,,,,,,,,,


وباقيلي بس إسبوع معاك ودي تكون نهاية المرحلا


,,,,,,,,,,,,,,,, وكيف العمل ,,,,,,,,,,,,,,,,


,,,,,,,, ويادوب بديت شهر العسل ,,,,,,,,


آه يا عسل .. يا احلا وجبة مفضـَّلا


,,,,,,,,,,,,,,,, وكيف العمل ,,,,,,,,,,,,,,,,


وانا داير أسافر وروحي فيكي معنكلا


ليه من زمان ما جيتي .. وين كانت زروعك ومشتلا


لو كنت عارفك إنتي جايي .. انا كتَّ دست الفرملا


وانا كت ربّتّ السنة والجايي جايز أكنصلا


واحلى الكلام كان الكلام في قعدة حلوة مدنكلا


أحلى الكلام يوم قلتي ليْ بي نغمة وتــَرَة مرتـّلا


أنساكا كيف والقاكا وين .. والدمعة بلـّتْ جدولا


واحلى الكلام يوم قلتي ليْ .. أيامنا دي انا ما بجهلا


وحتكون بيناتنا مراسلة والبوستة تبقى مواصلا


,,,,,,,,,,,,, وكانت بيناتنا مراسلا ,,,,,,,,,,,,


كانت رسايلا زيّها .. رشيقة .. حلوة .. مدللا


أحب أصابعيكي الرُّقاق الهندسة اللا مسطرة ولا منقلا


,,,,,,,,,,,, الله عليها رسايلا ,,,,,,,,,,,,


أبدا الرسالة من أولا ... لكن قـَبُـل ما اكمّلا


أبداها تاني من اولا .. وتبقى الحكاية مسلسلا


ولمان أكون في نهايتا .. انا حالتي تصبح مهزلا


,,,,,,,,,,,,, أعصابي تبقى مصلصلا ,,,,,,,,,,,,,


لا بقدر أبلع ولا بلوك .. وعيوني زايغي مزغللا


,,,,,,,,,,,, الله عليها رسايلا ,,,,,,,,,,,,


والخط قطع .. وقلبي انقطع .. وراسي انصدع


تفكيري سافر وما رجع .. الدنيا ياها فعايلا


ترخيلك الخيت تـنبسط .. وتجيب مصايـبا تبهلا


وين زولي يا ناس وين أميرة الكون حلا


وين الرسايل الكان زمان بترسلا


قولولي يا ناس شن حصل قبال أسافر أحصلا


,,,,,,,,,,,, دي اربع شهور متكاملا ,,,,,,,,,,,,


وآخر رسالة اذكـّرا .. كانت كتابي مهرجلا


وكاتبالي قـُبّال آخرا .. سامحني انا مستعجلا


نعال هي ماها في مشكلا .. بس لاتكون متعللا


,,,,,,,,,,,, وانا في السؤال والأسئلة ,,,,,,,,,,,,


مرات أجاوب أقول نعم .. مرات أقرِّرْ أقول ده لا


جاني الخبر شايلو الغراب وخبر الغراب دايماً بلا


,,,,,,,,,,,, السمحة قالوا مرحَّلا ,,,,,,,,,,,,


غنـُّوها ليها ورقـّصوها .. الحلوة زولتك عرسوها


,,,,,,,,,,,, واسّع في سوريا معسّلا ,,,,,,,,,,,,


يا حليلي انا الباري السراب وداقش دريبات الخلا


ودعـْتك الله مع السلامة وسكـّتك ما بدخلا


 


 


  




يا ريت


يا ريت لو كنا بنزرع


يا ريت لو كنا بنصنع


ما كان ساءت احوالنا


وبقينا نقابض ونقلع


العيد الماشي علينا


ختانا في خشم المدفع


اسعار الخرفان الغالية


اسود وابيض ومبرقع


تسعين النعجة الحامل


بي مية الحمل البرضع


عارفين الأضحية سنة


للزول البقدر يدفع


وماها واجبة علينا


ماذا دهانا نصنع


نحن المضفورين في بيوتنا


ولحكم نسواننا بنخضع


بيأثر فوقنا قرارن


نقوم نتدين ونلبع


نتكلف فوق طاقتنا


عشان ما نرضي الشفع




&&&&&&&&&&&&&&&&&


شـربـت الـشـطّـة


سمـاحـتـك عـقّـدتـنـي عــديــل

أعـايـن لـيــك دمـوعــي تـسـيـل

أكُـر فــي الحـمـدو عشـريـن مــرّة

وأقــرى معـاهـا ســـورة الـفـيـل

ولمن تمسكي المنديل وتمسحي بيو كحل عينيك

لـمّـي الـدمـعـة فـوقــوا تـسـيـل

أعـايــن فـــي عـيـونـك ديـــل

وأقــول أريتـنـي كـــان مـنـديـل

مــا بنـفـع كـــلام يـــا ريـــت

نـوعـي ده مـــا شَـبَــه مـنـديـل

مـلامـحـي قـريـبـة للـصـارقـيـل!

كـيـفـن بـــس أكـــون مـنـديـل

ولــمّــا تـقـومــي مـنـعـدلــة

وتـقـدلـي لـيــك كـــم قــدلــة

أفـنـجــط بــــي وراك ســــاي

الــتـــقـــول ســخـــلـــة

أعــايــن وأقـــــول هَـمَــلــة

وحـــلاة الـقـدلـة فـــي أهـلـهـا

حلـيـوه وتـمـشـي بـــي جَهـلـهـا

وتـتـقـصّـد مــشــي الأصــلــة

وأنــا الفجـغـونـي بـــي عَـدلــة

أنــا الـيـادوب فــي دنـيـا الـريـد

منـاي يــا رب ســلام فــي الإيــد

كُـبــار زي خــــروف الـعـيــد

تـكـهـربـي بـيـهــا خــلــق الله

ونـوعـي ده عــاد جنـونـو يـزيــد

وأقـول يـا رب تسلّـم لــي أو سـاكـت

تأشّر لـي، وكـان غمـزت ده يـوم العيـد

وعينـيـك طالـعـا بينـهـا طـــوّاف

لا الـكـبـكـابــة لا الـــرجّـــاف

تـقـول رشّـونـي بـــي البـفـبـاف

يــجــيــنــي رعــــــــاف

وأقـعـد ألـــف، عـيـونـي تـــرِف

وأقـول أكيـد ده أثــر فـطـور الـفـول

لـمــنّ تضـحـكـي فـــي نُـكـتـه

التـقـول لبـعـونـي بـــي شـنـطـة

وأكــب فــوق العـصـيـر شـطّــة

وأقـرطـع مـــا أسـيــب نُـقـطـة

وأقـول "يـا ســلام عصـيـر لُقـطـة"

وإنتِ تقولي"بالغت وشربت الشطّة يـا إنـتَ"

مالها الشطّـة، مـا شربـات عصيـر كُفتـه

عصـيـر جـركـان مـــن الـدُكّــان

يـتـرشّـه فـــي صـحــن فـتّــة

مـــا مـهــم شـرابــي الـشـطـة

والـمـهــم الـكـلـمـة "بـالـغــت "

و "شـربـت الـشـطّـة يـــا إنـــتَ"


&&&&&&&&&&&&


بحبك زين


تغُشيني وتقولي لي بحبك زين

وانا المسكين وانا المغوش وتاريك لاعبه علي الحبلين

يا غشاشه يا دجاله احبك سيف جديد وسنين

يقطع ليك ادياتك يكسر ليك كريعاتك

يخليك طير بلا جنحين

تطيري سنين وما تتلمي ..بدل واحد تحبي اتنين

نحن عندك ذي فستان كم طويل وكم قصير

واحد للبس بالليل واحد في الصباح تاتيل

احبك صرمه يا ضرمه واحشك بصله قاؤرمه

واسويك فته للطاشين

برضو تقول لي بحبك زين

........................

ومع كل قطر رسالاتك تجيني مطر

حبيبي اللونك الاسمر

بلاك الدنيا ما بقدر

قطر يشيلك يوديك السماء الاحمر

يشيلك زي هبوب طوكر

وانا الكان مناى نكون اتنين

نسكُن في قصر عابدين

وازور بيك لندن ديك يا السمحه واوديك فسحه لبرلين

لكن فورتي علي دمي

وكترتي علي همي

وانا البى وراك نسيت امي

برضو تقولي بحبك زبن

.........................

احبك سيف حديد ... يقطع ليك ادياتك

يكسر ليك كريعاتك يمعط ليك شعيراتك

يخرب ليك لقائاتك يخليك شينه بين قوسين

طالب ربي ...يوم يبلاك بواحد يكون عنتر

عضلاتو حديد ادياتو متر

يطرشك كف ..يلفك لف ..يلخبط ليك وشك يخليك لا قرد لا زول


  



كفتيرتك


كفتيرتك في السوق مرمية


وكبايتك يابسة ومجدوعة


يا بت الخلطة النوبية


يا حلوة ورائعة ومربوعة


كانونك كان عامر بالناس


صناع عمال ومساعديه


حارسنك طول اليوم


تجار وسماسرة عطلجية


كم استحملتي رزالة الناس


عشان امونة وزكريا


فتشنا عليك في كل السوق


ورتنا صديقتك قمرية


حزنانة بتبكي بدمعا حار


والعدة هناك في البلدية


كشوك يا حواء من الأسواق


واصبحت ايدك ملوية


انتى الجيتي تشدي الشاي


بتفتشي في لقمة هنية


بتخافي كتير من كشف الحال


أبيتي الطرق الملوية


أحلامك على قدر لحافك


ما عائزة عمارة وعربية


عاجبك بيتك في الإنقاذ


أو حاج يوسف ردمية


كشوك يا حواء من الأسواق


والدمعة في خدك متكية


وهسة خلاص خليتي الشاي


بتبيعي مريسة وبقنية



&&&&&&&&&&&&


حاجة قريبه منك


لو زهجانه واظنك

ما عرفتي سؤالي عنك

يا اللزيزه الكلكي جنك

عايز اكون انا ابقي منك

اي حاجه قريبه منك

تبقي طربيزه ابقي كرسي

تبقي راكب ابقي تكسي

بيكي اسافر لام دقرسي

وتبقي حافله ابقي بوكسي

وياسلام لو ابقي ببسي

تشربيني

تقرطعيني

تدفقيني

بس مهم شوفت عيونك ابقي اي حاجة قريبه منك


تبقي وردي ابقي ترباس

تبقي سانتو ابقي كدباس

تبقي بنكي ابقي حراس

تبقي برعي ابقي عباس

تبقي اوبرا ابقي ترباس

ابقي غرقان تبقي رفاس

رفسيني

وفتشيني

وغرقيني

وفنجطيني

بس مهم شوفت عيونك وابقي اي حاجه قريبه منك


تبقي فالق ابقي مفلوق

تبقي كسره ابقي طايوق

تبقي منفوخ ابقي مطفوق

تبقي ويكه ابقي لايوق

تبقي شناق ابقي مشنوق

تبقي حراق ابقي محروق

وياسلام لو تبقي خازوق

مقلبيني

وزهجيني

وعكريني

بس مهم شوفت عيونك وابقي اي حاجه قريبه منك


تبقي حيطه ابقي طوبه

تبقي روسيا ابقي كوبا

تبقي جمباظ ابقي هوبا

تبقي غنمايه ابقي لوبه

تبقي فاطمه ابقي زوبه

ابقي راس هي تبقي قوبه

الميني

وعوريني

وبشتنيني

وزهجيني

بس مهم شوفت عيونك وابقي اي حاجه قريبه منك


تبقي سكر ابقي ضبان

تبقي بوليس ابقي بمبان

تبقي كبده ابقي مصران

تبقي شيته ابقي طرزان

ابقي حفله وتبقي سكران

فرتقيني

وجهجهيني

وبهدليني

بس مهم شوفت عيونك وابقي اي حاجه قريبه منك


قالو زعلانه واظنك

قالو قرفانه واظنك

ماكي عارفه سؤالي عنك

يااااااااااااا اللزيزه الكلكي جنك

عايز اكون انا ابقي منك اي حاجه قريبه منك

اي حاجه قريبه منك

اي حاجه قريبه منك

اي حاجه قريبه منك


&&&&&&&&&&&&&&&


حلمنتيشى مسطول


في الليل داك

وفي نفس المكان الكان

بفتفت فيه كل الهم

واسوق أفراح بدل أحزان

أجيبا معاي من الحبان

ودفتر لف من الدكان

واجيب بالباقي منو لبان

واصنقر في الأرض وانجم

ولما ألف بكون فرحان

بكون هيمان

بكون خرمان

أفت الحمرا في الورقة

وأكب من فوقا سر الجان

ولي صباعي الصغير أمدغ

وأطلّع للبذر بحنان

وامسك للوريقة الحلوة

وأبدا ألف بخور الجان

وبلساني المرطب ديمة

ألحسا بالعرض بأمان

وأبرم للطريف الفوق

واشمّها زي حريف إدمان

واختّها في الخشيم المر

سواد شلوفته زي قطران

وكبريتي الملهلبة نارا

أشعل عودا زي بركان

وامرّر للهب بشويش

سجارة الدوكو دايرة حنان

ولنفيس البداية أجر

وألحقو بالتني بجنان

ويتقل راسي زي صخرة

ويبرد حيلي زي تعبان

واحس برجولي زي مافي

وأهبش فيها زي مرضان

وأبدا في دور من السرحان

وواصل في السجارة شراب

واشوف حاجات عجيبة كمان

أشوف غنماية في فستان

ممكيجة في خشيما لبان

ومرة كمان أشوفلي بحر

وفيه حسان بكل ألوان

وضحكات صاخبة منداحة

والكل بي فرح طربان

وأوصل بالسجارة هناك

محل شوشاوتا وازدان

وازغرت بيها زي نسوان

واجرجر للرجول أوقف

واهبش في الارض حفيان

نعالي نسيته وين ختيته

من جيت للمكان خرمان

وأمسك دربي زي برجل

أدوّر في المشي السكران

وأوصل بيتنا دربه أمان

واشيل الجك وفوت للزير

ده ريقي نشف نشاف البان

واقرطع للجكيك كله

وبرضي كمان بكون عطشان

وأفتح للمواسير سيل ش

وكل دقيقة بمشي كمان

وفي الآخر سريري حنين

يشيلني نعاس ونوم غمران


  

 حب اللحوم

تغشينى

وين رســـــائلا؟

يا ريت

شـربـت الـشـطّـة

بحبك زين

كفتيرتك

حاجة قريبه منك

حلمنتيشى مسطول


متين يالله نرجع


متين يالله نرجع السودان

ونلقى الحبيب منتظر بي لهفة جنب الدكان

ومعاهو ورق كلام في الحب وحلاوة لبان

وقعدت اتونس معاها واتونس واكل في اللبان

وقعدت تسال فيني متين جيت راجع للسودان

وانا عامل مطنش واتلفت واتفرج في ناس الحلة والجيران

قلت ليها:قلت شنو؟....اااااا؟....اااااااا.انا ما حاضر الحصل في امدرمان

قالت لي:امدرمان شنو ياراجل اجي ؟؟؟انت سكران؟

قلت ليها :لالا ......انا بس محتار في طولك الزي البان

وفي وجهك البشبه صباح العيدوبهجة ناس امدرمان

يانضار وياكلك وقار...و......وما عارف اقولك يا اجمل انسان

وما قادر اكمل ماقادر اوصفك يانبع الحنان

انا بس ما عارف ابدا ليك من وين

من عذاب الغربة وايام الشقا والضياع في بحور النسيان

ولا من ايامي الخوالي ومر السهاد والسهر في نص الليالي

واايييك لو حكيت ليك معاناتي ومغامراتي هناك

الحوامة نص الليالي والصياح اثناء النوم كالنسوان

انا هناك يابنية كنت بتالم لمن اشوف صورتك في خيالي وكلامك لي والتحنان

واااه واه منك يا حلوة لو اديتيني بوسة تروي العطشان

وبعداك قولي علي اي حاجة انشاءالله سكران

وفجاة عرفت البنية انها بتحب ليها واحد غبيان

جاءها من الغربة وفكرو ما فيهو اي شئ بس كلو جن في جنان

وهو حق المواصلات ما عندو ولا حتى كمان حق الدحان

زول ضاقت بيهو الايام في غربة كلها جن في جنان

رجع لي اهلو ما عندو غير السلام عليكم يا اخوان

واعملي حسابك يابنية

زي العطشان دا بتلقي منو مية

بس انت اعرفي الله ورسولو وفي خوفو ختي النية

وما تخافي من قطر العرس حتى لو جات سنة مية


&&&&&&&&&&&&&&&&&&&&&&&


لي إيــدينا بنــــــــرفع


لي إيــدينا بنــــــــرفع *** والعازب كلو بيســــــــمع

نفوسنا كتير مشــتاقة *** للراعي دوام نتضـــــــــرع

شعارنا عريس متواضع *** ياخي ياقدر اسمع أجمع

نحن البايرات في لهفة *** والعمـــــــــر ولـــي وودع

نحن مساكين ياجماعة *** وللجنة دوام نتطــــــــــلع

لو واحد قام وأتقــــــدم *** في لحظة نلبي ونسمع

***

بلاش عربيــــة خصوصي *** مالو الكداري دا هســـع

بلاش من شبكة وشيلة *** بي أبســط حاجة بنقنع

البيت ماشــــــرط عمارة *** دي مظاهر ساكت تخدع

لي جنة نضيرة نحــــــول *** البيـــت الخرب البجمـــع

ما شـــــرط تجيب تلاجة *** كفاية الزيـــــــــــر البنقع

***

ما دايرين كبدة وشـية *** بي ويكة تقيلة بنشـــــــبع

ما أصلو شــبابنا الودع *** ما ممكن تانــــــي بيرجــــع

أحلامنا الكانت بــدري *** ما عادت تانـــــي بتنفــــــع

دايرين الشاب الأغبش *** حتى لو فقــــــران ومقطع

لانو الفيهو الفايــــــــدة *** ليهــــــــــــو دوام نتطلــــع

حياة الســــــترة أملنا *** انشاء الله ربنــــــا يجمــــع

يحن الله عليــــــــــــنا *** ونشــــــيل أيدينا ونرفـــــع

***

للرب شـــــكوانا بنرفع *** والبايـــر كله بيســـــــــــمع

في دربك يامـــا جرينا *** والعين الســــــاهرة بتدمع

كم مرة ايدينا اتمـدت *** والرد الجــــــارح اقنــــــــــع

احلامكم والله غريبــة *** وللعـــــــين بتزغلل وتذلــــع

طلباتكم لينا تحيــــــر *** جايين تتواضعوا هســــــــــع

ما جينا زمان شن قلتو *** يافقير يامقطـــــــع أرجــــع

***

ما عندك حق الســــــــفة *** لابس دمـــــــور ومرقع

دايرين العنــــــــــدو مصانع *** لو كان لي غيروا بيركع

ما جينا زمان شــــــن قلتو *** يافقير يا مقطـــع أرجع

في جيوبك ساكنة عناكب *** لو كان باعوك ما بتنفع

دايرين العنـــــــدو الفـــــلة *** لو كان حنكوش ومدلع

ما جينا زمان شـــــن قلتو *** يا فقير يا مقطـــع أرجع

***

لو ماشـــي لآخر الدنيا *** تركــب رجليك تتبرطــــــع

دايرين العنــــــــدو البنز *** لو يبقى عجـــــــوزاً أصلع

ما جينا زمان شن قلتو *** يافقير يامقطع ارجـــــــــع

يا البيتـــك مبني زبالة *** ومن غير فيضــــان يتزعزع

دايرين العنــــــدو الفيلا *** لو كان صغيـــــر بيرضــــع

ما جينا زمان شن قلتو *** يا فقير يامقطـــــع أرجــع

***

وموكيتاً فخـــماً فاخــــــــر *** ونجفاً بالـــدر مرصــــع

والكندشة فريون ضــــاربة *** وثلاجة فريــــــزر تجمع

بي فيديو كاسـيت وأتاري *** نتسلى لو وكتنا نضيع

ما جينا زمان شـــن قلتو *** يافقير يامقطع أرجــــع

***

دايرين زنقيل ومقنــــــدل *** لو كان تمســـــاحا يبلع

والعملة الحرة ضــــــروري *** والمهر دولارا يدفــــــــع

وبشرط الشــيلة العامـرة *** والكرسي الجابر يلمـــع

وذهباً مختوم وأســـــــاور *** مليانة الإيد للأصـــــــبع

وضروري الحفــــــلة بوردي *** والكابلي اللحنو موقـع

ونقضي عسل في أوروبــا *** ونطوف العالم أجمــــع

بي لندن وروما وموســـكو *** وفينا المدن الأربــــــــع

نلبس في الكاسي العاري *** ولو طلعت موضة بنتبع

وناكـــل فاكهة طـــــــازجة *** وبالخير نتمتع ونشـبع

أفلامـــكم والله عجيبـــــــة *** خلونا نحمض ونطبـــع

ماجينا زمان شـــــــن قلتو *** يامبهدل أوعك تطمـع

***

مد رجليك قـــــدر لحافك *** وشوف ليك طـورية وأزرع

لي مين تتقــــــــدم انت *** يا قرد ياقبيح يا مبرقـــــع

كيفن بتحـــــب يا أغبش *** من غير شاكوش تتفرقع

لو كان بنحــــــــب الزيك *** ما أخير الموت الأســـــرع

لو مت وفاتك تفــــــــــرح *** ولو عشت حياتك تفجـع

ولو تبقي ضراعي الأيمن *** في لحظة بنقطع ونجدع

***

ما قلنا الدنيا دي فانية *** وآمالنا مظاهـــــر تخــــدع

اختاروا العندو ديانـــــة *** الديمة وشـــــــو بيلمـــــع

قلتولنا خلاص انتظـــرو *** الحــور في الجنة بتنفـــــع

الليلة قطـــــــركم صفر *** والعمـــــــــــــــر ولى ودع

عجزتو قعــــــدتو تقولوا *** واشبابنا الأغبـــــش أجدع

ماجينا زمان شن قلتو *** يافقير يا مقطــــع أرجــــــع

***

ما جينا زمـــان ليه كنتو *** جاهــلننا زي الشــــــــفع

ما خلاص الليلـة وقعتوا *** من قد القفة الأوســـــــع

والليلة قطركــــــــم دور *** وقعتوا في وش المدفــــع

رافعين الراية البيضـــــاء *** لكن هيهــات ما بتنفــــــع

رافعين لعرس جماعي *** وفي العشرة ألف ما بنطمع

وهنياً ليكم كبدة وشية *** بعـــد الأضراس تتخلــــــــع


&&&&&&&&&&&&&&&&&&&&&&


 ليه طلقت الولية؟


شكيتي وبكيتي وقلتي عاوزة موبايل

مشيت وجريت وجبت ليك ستاير

ستاير ومرايل ودواير على قافية موبايل

اوع يا ولية اسمع منك قوايل

حردتي واعترضتي وقلتي ابوكي شيخ قبايل

طيب طالق بالتلاتة ولو في رابعة انا كنت قايل

بس ما عاوزين نعقد المسائل

شوفي احسن الموبايل ولا الستاير



  


شنا شديده


  يا زول تعال شوف الخشيم

    ممطوط تقول جاريه سيل

    ولة الكضوم منفوخة كيف

    منفوشة زي طشت الغسيل

    وده كلو كوم ولة الكرش

    تحلف تقول بالعالا فيل

    وعيونا داقشات الغزال

    كافتات شمال من غير دليل

    والصوت كمان ما شفتو كيف

    صوتاً خمير زي العويل

    ووبّاً علي من شفتا

    صاج العواسة اخير عديل

    ولة الحبوب الفي الوشيش

    طربيزة عِن حدّاد بخيل

    ايديها واصلات الارض

    ممدودة زي حبل الغسيل


    ولة الخشيم الما خشيم

    ده كبير وشين وش قندران

    والنخرة ممطوطة التقول

    خور في الخريف سايل كمان

    ورجولا سكاكات عديل

    لا لحمة فيها تقول أضان

    والراس مدوقس فولة بس

    فاضي ومحفر وقمله بان



&&&&&&&&&&&&&&&&


غزل عمال


 قال مكانيكى:

    يا واقفة بين صبري وتروس الفرملة

    أنا بحكي ريدك للملأ

    والجاني من بستم مشاعرك

    بلفو طار بحكيبو لليل والخلا

    و أنا بعذرك

    وأوزن دركسون الصبر

    وأضغط كلتش الأمنيات

    لو ألحقك

    يا الحنتا زي زيت رجوع

    أسود من الشقا والدموع

 @@@@@@@@@@@@@@@


    قال جزار:

    يا طاعمة زي كبدة ابل

    بالشطة والليمون شفا

    أنا بي وراك سبت القطيع

    ضل الدريب وعليك حفا

    يا كاسرة بي فرار هواك

    أضلعي وظروفي المؤسفة

 @@@@@@@@@@@@@@@@

    قال مكوجي:

    يا كاوية قلبي قبل قميصي

    رشيت لياقتو وما انكوى

    يا ريتني لو أغسل دواخلي من الهوى

    زي عمة بيضا أشرها

    صابون هواك غسل النوى

 @@@@@@@@@@@@@@@@@@


    قال نجار:

    مسمار ودقيتي

    في خشب الليالي المحزنة

    منشار هواك

    قطع الصلات الممكنة

    يا أبلكاش وفورمايكة

    أو تك خشب الجنوب

 @@@@@@@@@@@@@@@@@@@@@


    قال واحد جعان:

    يا حاجة أشبه بالرغيف

    مرقوها أسي من الفرن

    أنا بفقدك لما العيون

    تشتاق أماسيك الشبع

    واتخيلك قدرة

    ورحيق الفول

    انشالله في أحلاك ظروف

    ما نشتهي الجبنة ونطوف

    كل الدكاكين مغلقة

    والزيت صبح يا زيت مناي

    مافي ونشف

    مصران مشاعري المرهفة


&&&&&&&&&&&&&&


لما شفتك

لما شفتك قلبي كان ناصع نضيف

زي الطيور الراحلة في زمن الخريف

عشت متألم وما قادر أقيف


زي زي مشرور وحيد


مستني باصات الجريف


أنا الكيشة صًدقت إدعائك


يوم قلتي لي دمك خفيف


وخدعني بوخ نظرات عيونك


مليانة بالكحل الظريف


قمت شلت الكيس من ايدك


ووقفت في صف الرغيف


دافعت ليك وسط الخلوق


عشان تقولي ولد حريف


واديتك العيش بابتسامة


نابعة من قلبي الرهيف وبعد ما شلتي العيش


نسيتيني ومشيتي بعيد


وانا المشدوه أعاين فيك


زي إقليمي جاي جديد


تاه في زحمة الخرطوم


وشاف الناس شمال وصعيد


ما تنبسطي يا حلوة


بعد نكرانك المعروف


أصلو الحي مصيرو يلاقي


ياما بيشوف


واصلو الناس حياتها ظروف


ويوم بلقاك في ورطة


لانو بلدنا كلو صفوف


  



يا جزمتي


يا جزمتي الشالك يطير


يبلوه بي مرضا خطير

بي الايدز بي شر مستطير

يا جزمتي الشالك يقع

في بركة في يوماً مطير

لا يضوق سعادة ولافرح

لا باسطة لا شاي بي فطير

يا جزمتي الشالك يموت

في السكة بي نطحة عتوت

بي رفسة تتفطس مصارينو التجوط

يا جزمتي الشالك يقع

في السكة في اعفن ترع

تتكسر الرجلين وتنحل الضلع

واخر ختامو يكون صرع


&&&&&&&&&&&&&&&


محن الزمن


يلا يا اخوان تعالوا

شوفوها كيف محن الزمن

داير اكتب لي كلام

في حاجة ما معروفة كيف

وصفوها قالوا عليها فن

والله محن

بقولوا فن

الفن دا مايك ومندلين ؟

الفن دا ساون واورقنين ؟

وفنان وقف منفوخ سمين

بدا حفلتو

لمن تشوف

الوان قميصو وبدلتوا

والمايك المسكين

سجين في قبضتو

تقول يغني الاوصفوك

او بالاقل الم الفراق

والناس تردد بي ورا

لكن كضب

اول كلام غناهو كان

راجل المرا

ومزيكا صاخبة مزمجره

بعديها جاب

هوي يا اب شرا

والحفلة كلها جايطة جوط

تنطيط وفرحة وفرفره

وكل شاب محزق بالهدوم

شمّط بطينتو وضمرا

وبنات نضيفة متمرة

لابسات لبس

مابتوصف

الجينز كيف

وبلوزه ضيقة مشرشرة

وفنانا بالحيل منطرب

فرحان يغني ومنكرب

ماغني غنيات الرجال

دور عليهو غنا البنات

فيو صال وجال

ما الناس دي اصلها حالا مال

وخلاص خرب

ما الفن بقي

ممكن يكون لي اي زول

اسهل درب

ويقولوا فن

وغنا الحقيبة

خلاص قدم

سبقه الزمن

يا حليلو مات

وهنا اندفن

والله محن



&&&&&&&&&&&&&


حظي التعيس


حظي التعيس الهردبيس

الناس يرك فوقا الحمام

انا يرك فوقي الكديس

افرش مصلايتي فى الجامع تطلع قرمصيص

لوقلتة اقشر يوم خميس

وافوت الحفلة فووووطوالي

تتفرتك الحفلة وتموت ام العريس

لبستة لي قميص كدة

وقلتة الليلة حيعمل هيصة وصدا

مشيت الجامعة الشغل ابتدا

اول زول لاقيتو ندا

قالت لي دا شنودا

ليه عامل في نفسك كدا

والله صدمتني وحميتني الغدا

قلتليها والله باكر اجي بردا

شديت لي قميص اصفر

نضيف تقول مصنفر

وركبتة في السلم عشان اظهر

وقلتة الليلة فقري خطر

حا اجيب قون من السنتر

اول زول قابلتوسحر

قالت لي دا شنو يااشتر

لابس ليك قميص اصفر كمان في الحر

هنبوك ولا كستر تكسي بيجو ولاهنتر

حظي التعيس الماعندو دم

في الفشفاش القي العضم

حظي النحس الجواي دايما منحشر

في البسكويت القي القشر

كراعي في البنطلون مابتنحشر

سنارتي من البحر تقبض جقر


  

شنا شديده

غزل عمال

لما شفتك

يا جزمتي

محن الزمن

حظي التعيس

متين يالله نرجع

لي إيــدينا بنــــــــرفع

 ليه طلقت الولية؟

Visitors عداد الزوار