مشتهيك
مرسل: الخميس 2007.10.18 5:52 pm
دوما حين اشارك في محفل اجد نفسي ابدأ بهذا النص .. لا ادري ما السر ولكم أن تكتشفوه معي وهو بالعامية ..
مشتهيك وداير أجيك لكن كسيح ..
قلت أسند طولي جنبك وأرمي شوقي
على كتوفك وأستريح ..
وفي عيونك ..أشوف ملامحي تحت
رموشك قاعدة في الضل الفسيح ..
وأبقى ريح ..
تتهادى فوق أمواج ضفايرك وترتعش
من نفحة الجيد النضيح ..
وتلمس الزهر المندي .. وتترجم الصمت
الزمان ريدة بالمعنى الفصيح ..
مشتهيك .. والشوق فتر من الرديح ..
كلما يصبح صباح أقول أجيك .. تمنع
خطاي متارس الزمن القبيح ..
وأرجى بكرة بلا نعاس ..متوسد
الشوك والسريح ..
عيوني في النجم البعيد غرقتو بالدمع
السحيح ..
حسيتبو مشتاق لك معاي .. لكنو ماقادر
يبيح ..
فضَـل سكاتو على الكلام
خايف يعود منك جريح ..
يفقد معذتو والغرام ويبدل أحلامو النويح ..
لاكني وحياة الأمل وحياة عيون
قمري الوضيح ..
جاييكي منك ماني خايف .. بيك
بلاك برجع صحيح ..
جاييكي شابل أشواقي موج وفيني
بحر الريد فسيح ..
مالدنيا كلها إغتراب وريني
وين بستريح ومافي غير قيفك
وطن يشيلني فوق خاطراً مريح
ولكم الود
ايهاب ..