اه نتونس ولانغنى

[اصيله]

هذه العباره قالتها احد المذيعات لضيفها فى البرنامج
هل البرامج اصبحت عندنا ونسه وغناء فقط ؟

[ود المسالمة]

هسع ما كل كلامهم في التلفزيون ونسة

[اصيله]

ود المسالمة
مشكور على المرور
ونحن زنبنا شنو نستمع لى ونستهم
بس الغايظنى اكثر حشر الغناء فى كل انواع البرامج حتى لو كان الموقف محزن لايحتمل الغناء برضه تلقى المذيع يقول ليك نسمع اغنية ونواصل

[لحــ غروب ـظة]

طيب لو سمحتي ممكن أهدي الغنية .....

[اصيله]

طيب لو سمحتي ممكن أهدي الغنية .....

يهد حيل القدو اضنينا بالصراخ

[aboalseem]

المشكلة مافي انو ونسة وبس..المشكلة في الهيافة ومواضيع الونسة زاتا...الزول بكون بحضر وبقرب تنفقع مرارتو

[اصيله]

aboalseem
المواضيع الهايفة والغناء البدون مناسبة وكانها قنواتنا اصبحت غنوات غنائية واصبحنا كأننا شعب لا هم له غير الغناء
يعنى اسى تحضر ليك برنامج واراهنك انك لاتخرج منه باى شى مفيد بالاضافة إلى الغناء المكرر والمعاد لكبار الفنانين وبدون اى إضافة او جديد

[فكي ريري]

الاخت / اصيلة
بعد التحية......
نعم .... أصبحت الإزاعات السودانية عبارة عن ((إزاعات مغنواتية))

انا في موقف ضد الإعلام السوداني لسطحيته وسلبيته ... في عكس الوجه الصحيح للسودان

نحن بلد لم يتم تقرير مصيره بعد عربي ام افريقي.... فالمفروض او الفتره هذه هي فترة الاعلام يعكس الصورة الطيبة الاصيلة للسودان فكفانا ما يعكسه الاعلام الاخر عن السودان ما يخفي عليكم دارفور واشياء اخري نعم لا ننفي وجودها ولكن ليس هذا فقط السودان ... ليس هذا القطر الشاسع المتنوع المناخات والثقافات .....
إذا لم يكون علي قدر هذه الرسالة فل يغنوا إذن

[aboalseem]

انا اتخيل لي انو المشكلة انو المعايير البختارو بيها المذيعين هي القاعدة تخرب في شكل التلفزيون القومي او حتى القنوات التانية الماخدا اسم( قناة سودانية)

[كيمو]

كديه يا حلوين ما تتفاصحو ساي


لو بتتكلمو عن الازاعات السودانيه


يعني اقول ليكم المشتهي الحنطير يطير


والمشتهي لوبا عفن يندفن هع هع هع هع


اسفين علي اللفظ العسل دا ..............

[شمس الغربه]

العزيزة أصيله......
موضوع شيق....أحسنت


هذه مشكله بالفعل
يعني زمان كان الناس بتشتكي من الكلام الكتير
مثلا البرامج السياسية والبرامج الحوارية
والآن بعد ان أصبحت تضم عدد لابأس منه من البرامج الترفيهية اعترضوا ايضا
انا معاكي في اننا متأخرين لكن بشوف اننا احسن من بعض الفضائيات الهابطة والغير هادفه
وبالنسبة للأغاني المكررة أعني القديمة فهذا لأنه لاتوجد مواهب عديده
الا نجوم الغد وهؤلاء مازالوا في البداية فقط

وتسلمي ياروعة
دمتي بود ،ودام قلمك معطاءا
بارك الله فيكي
تحياتي

[حافظ عوض الله محمد]

يختار معد البرنامج ان يملأ برنامجه بالاغانى لانها تخفف بعض الضيق على المشاهدين
يعيش الفرد منا فى مجموعة ضغوضات كثيرة على كل الاصعده
المشكله ماف الونسة
ولا ف الغناء

المشكله نتوس مع منو (ضيف البرنامج ) ونسمع لمنو (الفنان )

[اصيله]

aboalseem
حتى لو قلنا معايير اختيار المذيعين خاطئة برضه فى لجنة او مجموعه لاعداد البرامج يعنى ما المذيع هو لوحده الذى يضع البرامج يعنى المشكلة مامشكلة مذيع فقط

[اصيله]

شمس الغربة
[align=center]ايوا زمان كنا بنشتكى من الكلام الكثير المن غير فايدة لكن اسى بقى كله غناء نحن لانرفض الغناء ولا الترفيه ولكن ليس لدرجة انه الغناء يكون طاغى على الحوار والبرامج لدرجه انك لاتعرف ماهو موضوع او هدف البرنامج[/align]

[اصيله]

حافظ عوض الله
كلامك هو عين الحقيقه نتونس مع منو ونسمع شنو

[sunni]

والله يا أصيلة،، المشكلة بقت ما في الكلام،، المشكلة بقت في النقطة البديتي بيها الحديث،،، يعني لو فكرتي انك تلقي قناة ترضيك كل برامجها،، فإنت واهمة،،، لكن المحزن في قنواتنا ان كل برامجها أصبح ليها نفس القالب،، البرامج السياسية،، الإجتماعية،، الترفيهييه،، الرياضية،،، كلها بقت كالآتي

مذيع
مذيعة
ضيوف
فنان

والغريبة انه الفنان ده لما يخلص الغنية بتاعته (ولا المستلفا من الحقيبة ولا فنان كبير)،، بختو ليه الغشاشة زي الشافع،، وما بخلوه يقول (واك) لغاية ما يقولو ليه،، أها،، الغنية الجاية شنو؟؟

وأذكركم بي موقف محمد الأمين،، لما حاول يدخل في النقاش،، وسكته المذيع،، وقال ليه،، كدي خلينا من ده،، ما تسمعنا غنية،،، وقام محمد الأمين،، وحاول واحد من الضيوف يلطف الجو،، وقال ليه،، بنحتاج نسمع رأيك بعد الغنية دي،، ورد عليه محمد الأمين،، لأ،، نحن ما عندنا رأي،، نحن ناس غنا وبس،، وكان قصده وااضح.

قبل فترة إستضافت قناة سودانية بعض الأخوات،، وإتكلمو عن الزواج التاني،، وكانت معاهم واحدة حكت مشكلة إجتماعية مع زوجها أدت بيها للطلاق،، لما العبرة خنقتا،، المذيعة قالت لي زيدان،، ما تغير لينا بي غنية. يعني زي البلياتشو الكانو بيجيبوه عشان يضحك الملك!!! منتهى السخف................................

[sarona]

الرائعة أصيلة

اولا مشكورة جدا على العنوان اللي اختصر الكثير من الكلام

حقيقي شيء مؤسف ما يحدث في القنوات السودانية عامة .....

اصبح المطرب هو الضيف الاول والتوقف لأخد فاصل غنائي هو الاهم

وفي احد البرامج استضافة المذيعة دكتور من جامعة الخرطوم .....

وكان النقاش في اوجه والدكتور بيرد عليها .....عن قياس درجة الذكاء عند الاطفال

وعن الاجهزة المستخدمة و و و و والرجل يتحدث بكل صدق وحماس

وفي قمة ذروة الحديث قاطعته المذيعة وقالت لي معليش بس نسمع الاغنية دي ....



والله حسيت الدكتور كان عايز يرمي التربيزة القدامه ويطلع من الاستديو

وانا بصراحة استأت جدا وغيرة القناة

وبعدين لكل مقام مقال اغنية ايه وانت مستضيفة الدكتور ده وهو بيتحدث في موضوع زي ده

هي والمخرج ده كيف فكرو في عمل حلقة لا تليق بمستواهم الفكري كما اوضحو لينا

ولقيت انهم بصراحة الاحوج لقياس نسبة ذكائهم بصحبة معد البرنامج ......

وكان الله في عون ضيوف ومشاهدي القنوات السودانية.....

أصيلة...... الكلام كثير ....راجعة ليك تاني ...

.

[اصيله]

السنى
سارونا
كل النقاط والمواقف التى حكيتم عنها بتحصل كل يوم وفى اى برنامج لدرجة انو الاستياء مابيكون لضيف البرنامج لوحده الاستياء حتى للمشاهد البيكون متابع البرنامج بكل حواسه وتشتيت حبل افكاره ومتابعته للبرامج لانه لمن تكون انت متابع ليك برنامج معين بكل اهتمام وانتباه فجأه يقولو ليك نسمع اغنيه ونرجع شكلك بيكون زى الزول لمن يكون عاوز يعطس والعطسه تقيف ليهو فى نخرته
والمصيبه لوبقيت بالك طويل ومرضع ويكه وانتظرت لحدى نهاية الاغنية عشان تواصل ما انقطع من حديث تلقى المذيعه ذاتها نست الحاصل شنو ودخلت شمال فى موضوع جديد
بس الله يهون علينا

[لحــ غروب ـظة]

طيب يا أصيلة ممكن مدحة بنغمة حنانة ................

[اصيله]

طيب يا أصيلة ممكن مدحة بنغمة حنانة ................

ودى كمان نقطه عاوزه ليها بوست براهو حكاية المديح البى لحن الغناء وياتو غناء كمان اغانى الدلوكه ورقيص العروس سبحان الله يمدحون المصطفى عليه الصلاه والسلام بايقاعات الدلوكه والحان الاغانى التى يتراقصون بها