منتدى أنا سوداني

قصيده روعه من شاعر سوداني نادي علي احد الاخوة العرب بيا(زول) فرد عليه باستياء انا مش (زول)..فرد شاعرنا ::
انا الغلطان تقول لي زول
بقول ليك زول
مالو الزول
وانت بتعرف ايه للزول
سخيف وجهول
كمان زعلان
خلاص ياسيدي انا غلطان
شطحت وكنت فاكرك زول
الزول الماهو عاجبك ده
الله الخلقو خلقو كده
سمرة لونو من طينو
يبقي الفرق بينك وبينو
انو نضيف وابيض قلبو
عارف قدرو شاكر ربو
ساتر عرضو ماسك دينو
مخلص امين وديع ورزين
حشيم القول بديعو رصينو
اسد في الحارة
لا بختاك ولا برجاك تجيو في عرينو
اكان بي حدرة بادرتو
بتلقاك بي عترة
ويستناك تقول الروب
قبل ما يشممك سكينو
ياتوب يا بوسدك الطوب
والراجل يحمر عينو
كمان بي كلمه بتخاويهو
وبي بسمه بجيك خيرو
لا بتقدر تعيش من دونو
لا بتختاهو لي غيرو
زول الماهو عاجبك ده
بلا توجيه ولا تعليم
اديب وفهيم
هميم وكريم
وفطرة ربو من خلقو
لا فتان ولا خوبيتاه
لا فتان ولا خوان
اخو اخوان
بكفي الالف والالفين من الضيفان
زول الماهو عاجبك ده
يوم تحتاجلو بتلاقيهو
اكان ورطان وكان جيعان
وكان وجعان وكان سجمان
قبل تتاوه وتناديهو
يمين في اقل من برهة
وبين مد الالف والها
قبل ناسك يجيك حفيان
يضمد جرحك ويداويهو
ده جمل الشيل
دخري الحوبة فارس العتمة ساري الليل
لبيب وذكي ونجيب بالحيل
فهيم فهما يهد الحيل
تقول لي ما فهمت عليك عيد القلتو لي تاني
واجيب فهامة عاد من وين
كلامي القلتو الماني؟
اخير ليك تمش تختاني
وتنسي الزول وتنساني
وفوت قبال تعاديني
واقول اللوح ده عاداني
ويكفي الزول ويكفيني
اني وانو...............
سوداني....

ممتنة لمرورك الانيق عزيزتي ست الذوق الماسة

ابو الملكات كتب:

نعم ياهو الزول ما اصلو الزول سمح بلحيل
شكراً يارائعه ياسودانية اصلية يا بت بلدي
كل الود

دخري الحوبة فارس العتمة ساري الليل
اكيد هي صفاتك ايها الزول الاسمر الجميل
ولو ما كنت من زي ديل
وآاسفاي وآمآساتي وآذلي
سرني مرورك ابو الملكات
يديك الف عافية

ابراهيم عباس كتب:حقيقة اعجبنى هذا الكلام الجميل ومن كتب مثل الكلام سودانى اصيل
لك كل الشكر والتقدير

وديل اهلي
ولو ما جيت من زي ديل وآسفاي
وآماسآتي وآذلي
تصور كيف يكون الحال لو ماكنت سوداني
واهل الحارة ما اهلي
اخي ابراهيم
سرني مرورك الرائع

قصيدة رائعه جدااااااااااااا