الزينة ست الشاي
مرسل: الخميس 2013.8.15 7:08 pm
حكاية الزينه ام احمد
لمه وجوطة
وناس حوليك
ضحكة وقمزة
كلمه وهمسه
وخوف ف عينيك
وكل الدنيا كأنها ضدك
وعاكس موجا مسار تيارك
تقضي نهارك همك زايد
وكل كواكب الفرحه اللافه
يوم ما جاتك زايرة مدارك
سته عيون في البيت راجياكي
راجيه يخش النور من بابا
,,,,,,,,,
وفوق كانونك جمرك نارك
صوتك وجعه
وعبرة خلاص يادوب اتبلعت
لسه تفتش درب الرجعه
شاقه كبيدتك
لامن شوفتي في عينين والدتك دمعه
وقدرك بدري اراد تعذيبك
يوم الراجل فاتو مسارك
ولسه بتوقدي جمرك نارك
تصبحي نارك وتمسي في نارك
ونار الخوف الحارقه قليبك
ناكرك جارك
حتي قريبك
حتي الزمن الراميه عليهو
اهداك كانونو وزود نارك
.,.,.,
صلي رقيبة الفجر البدري
واطوي الوجع مع المصلاية
صحي طيورك
وخشي عشيشك
سوي فطورك
ودي مودة المدرسة برضو
وشيلي الباقر فوق لي كتفك
واحمد بقدر يمشي حداك
ماسك توبك وما فكاك
وعيونو تعاين فيك وبسأل
ماما تعالي نشيل الكورة
وانتي تحاولي تضحكي فيهو
وتسرعي تمشي عشان مجبوره
وينسي بانو الحق الدايرو
مجسد في كانونك صورة
بكره العيد لابدو ملابس
وحتي اليوم مابكفي مدارس
وزمنك وحظك ختو متارس
معبيه جيبك الف مطالب
تلوي ضراع الراجل الفارس
وكان قانونك في كانونك
انتي جليسك شلة عطالة
وفي صفايك شرح الحاله
وكل الناس سالاها اضفارا
كيف الزينة القادلة غزالة
جارا البنمبر في ضل نيمة
تصفي العزة مع الحبشاي
حتي الضل مرات بتسارق
إلا اولادا بظللو غيمة
وهمها كل الهم في بالا
بكرة بذورا تخضر وتثمر
حت لو كان ست شاي شغاله
ولمن احمد جاتو الحمي
في كانونا بتلمس جسمو
وفي عيون الناس حوليها
ما بتشوف غير احمد واسمو
تصب الشاي في الجبنه وتسرح
ودمعة تزيد النار
والنار يا الزينة
هبي النار الموية بتبرد
واقلي البن وقليبك برضو
دقي احلامك جوه مدقة
وقسمي وجعك في فنجانك
عل الناس الفيكي تضوقو
وزي البن الرايق جنبك
يسيبو الشينه وبرضو يروقو
واحمد يشفي
مودة تبقي طبيبة
وحلمك يرسي
وعمرك يصفي
اما الباقر يبني الفرحة حداك
ويختم ليك الرحلة بحجة
ويختم ليك الرحلة بحجة
