منتدى أنا سوداني

مِنُو الغيرِكْ ؟؟

بِيَدخِلْ فينا كُلَّ البَهْجَه ..

يمنحنا الحنَانْ البصِّدِقْ ممهور

مِنُو الغيرِكْ ؟؟

وكِتْ يبسُمْ ..

تفِيض أفراحنا شُوق وسرور

مِنُو الغيرِكْ ؟؟

بِيَمْسَحْ دَمْعَة المحزُون

ويَنْشُرْ في رُبَانا عُطور

مِنُو الغيرِكْ

بِيَكتُلْ للحُزُنْ جُوَّانا

يهدينا السَّعاده بحور

مِنُو الغيرِكْ لمَََنْ نزعَلْ

بِيَضْحَكْ من عمِيقْ جُوَّاهُ

لا تمثِيلْ ولا مجبُور ؟!

عشان نَضْحَكْ

نعيد البَسْمَه مِنْ أوَّلْ

فرَحْ زَاخِرْ ..

جمَالْ مَوْفُور

مِنُو الغيرِكْ ؟؟

عشان تحصِينا مِن العين

قَرَا الفاتحَه ..

وطَلَقْ كُلَّ النَّواحِي بخور

مِنُو الغيرِكْ ؟؟

بزِيلْ وحشَتْنَا في الظُلمَاتْ

ويشْلَعْ في سَمَانا النُّور

****

مِنُو الغيرِكْ ؟؟

صبَرْ مِنْ كنتَ في الأرحام

لَمَّنْ خَلاصْ تَاتيتْ

مِنُو الغيرِكْ ؟؟

بقُولْ تاتي وموَشِّحني الأمَلْ

مِنْ قُمْتَ مِنْ شَبّيتْ

مِنُو الغيرِكْ ؟؟

بسَاهر الليلْ يحَجِّيني ..

ويَسْرَحْ في الحَكاوِي بعيد

يِلُولِيني ..

ينَادِي النُّومْ تَعَالْ وتَعَالْ

يقُولُّو أبيتْ

مِنُو الغيرِكْ ؟؟

بكتِّرْ لينا في الدَّعوَاتْ

يشيل اللِّيلْ صَلاه وبرَكاتْ

مِتين تَكْبَرْ أشُوفُو جَنَاك

يفرِّحْني ويعَمْر البيتْ

مِنُو الغيرِكْ ؟؟

وكِتْ خَطَواتي تِتْأخَّرْ

يقِيفْ قِدَامِي يِتْحَسَّرْ

يقُولْ يا ريتني كان يا ريت

مِنُو الغيرِكْ ؟؟

حَنَان مَرْدُوم !!

دَهَبْ مختوم !!

عَشَقْ منظوم !!

عِقِدْ سُومِيت

منو الغيرك ؟؟

مِنُو الغيرِكْ ؟؟

مِنُو الغيرِكْ سماح

يا يُمَّه زِينة البيت !!