منتدى أنا سوداني

موسم الهجرة إلى .......................................... الممنوع ...

الخرطوم – لندن – الخرطوم

الخرطوم – دبي – الخرطوم

الخرطوم – كوالا لامبور – الخرطوم

الخرطوم – كاليفورنيا – الخرطوم

الخرطوم – اديس – الخرطوم

الخرطوم – القاهرة – الخرطوم

الخرطوم – جدة – الخرطوم

وتتعدد الوجهات والهدف واحد رحله البحث عن الكيان ,, حيث المستقبل المنتظر .. لتتحقق الاحلام الرماديه

في زمن انحسرت عنه الالوان ...

عوامل اقتصادية .. ظروف بيئية .. تاثيرات عاطفية ... الخ

تمتد لائحة الاعذار لمن ناشدو الفرار الي ارض بديله مخلفين ورائهم ماض متعدد اللغات كُلٌ حسب هواه ..

المثير للسخرية قابليتهم لشغل اي وظيفة شاغره مهما بلغت درجة الوضاعه وبكم هائل من الجهد لم يبذل ثلثه

في مكان اشد حوجه اليهم منه متعذرين بالمقوله (بلدا ما بلدك امشي فيها عريان) .. ياخ عريان هو انت خليت

لنفسك وش ..!!

هؤلاء تحديدا من فصيلة المحمومين بالاغتراب ,, ليحمل لقب مغترب في نظر الفريق (ناس الحله) .. هه ..

ولله في خلقة شئون..

واخرون ..اللي اترقع شاكوش ,, واللي حيكون نفسه .. مسائل القلب والحلم بعش الزوجية .. اكتشفوا واخيرا

بعد .........سنه ان العمر يمضي ولم يبقى من الماضى سوى الذكريات .. حتى (فلانه) ست الاسم اولادها دخلو

الروضة .. سبحان الله .. وانت تغني " شايل الدموع يا حبي لما أعود واجيك .. والوحيدة الراجياك .. امك "

ولسة بيناتكم المسافة ..!!





والدموع سحائب تروىقواحل غربتي ××يا ضيعتي ..

وانا بكفيك يا زمان غريب طار بأجنحه المنى ×× كي يعتلي ..

فهوى بقارعة الظلام ذبيحا ..

وبعثر الآهات لحنا ضائعا ××من فوق ارصفة الليالي والوعود ..

ياويلتي من وحدتي ..!!







اما في مقولة .. السمحة قالو مرحلة بعدك الفريق اصبح خلا .. فعندما نقيس علي هذه الابيات بالوضع الراهن

السمحه هي ارض المليون ميل .. وقالو فعل قوالة جاري تنفيذه .. مرحلة مع التشديد فعل دلاله للواقع

بفرتقةالمضمون وهو البلد الحزين ممن كانو ابنائه في يوم من الايام ..

ويازمن وقف شوية ..!!

ومازالت الفكرة تتبلور لدي العديدين بالهجرة ..كل زول سد دي بي طينة ودي بي عجينة ,, شكلو الشرود بقى

موضه .. ان كان الرئيس نفسة بشحمه ولحمه شعر بالضغوط الهائلة التي تمليها عليه الحياة (اتفكفك) فمابال

الشعب الفقير لله .. ( شكله ركب التونسية .. )

ولو سألوك عليا مهما طال فراقي او عز التلاقي ..هه .. قريب بي جاي ,, وجاي دي ما فرنسا ..

ما تفهمونا غلط ..!!

وتحت تاثير المستجدات وغلاء الاسعار نجد حتى الامثلة مسها الضرر.. فبأي وجه حق سنردد (يانيل يا طويل

يا ملولو) علي الحلف القال الكلام ده مدور..

طق السودان عين في نيلو ..!!

ولا نختلف مع من ضاقت بهم سبل الحياة وارتحلو ليس للافضل بل نحو المجهول ليفاجئو بزيف الترف وسوء

العشير ونمط النفاق المتبع فالكل وراء مقولة (رتب ورق الحمار زي ما يحب الحمار ..!!)




السيف فوق نهارهم ×× والزيف ملء حلوقهم ..

وقلوبهم نبذت سنابل حلمهم ×× وجميعهم صارو طعاما للوحوش وللجياع القادمين..




فمالذي يجبرك عالمر .. الأمر منه .. مع العلم انه لم ولن تحيا حياة (حمار الزريبة) بين احضان البلد الحنين ..

البلد الحنين سميتو يما ويابا ..!!

وحلتنا احلى حلة ,, وبيتنا شايفو فيلا ,, وارسم وجهك بالطبشور علي الحيطان ,, لكن .. الشفقة تطير ..

من اول محاوله وثانية ويتملك اليأس النفوس ..

ماهو السبب الرئيسي الذي يجعل الشعب السوداني معترف به في الدول الاخرى ؟؟ هل هو :

الانضباط ؟؟

المسؤلية ؟؟

مقيم ؟؟ ( دي حنك ساي )

جميعها عوامل نفسية ..

يقولون الحكومه .. وكذب المنجمون ولو صدقو لان اصابع اليد ليست واحده

واسطه .. حال اي بلد اخر عربي او اجنبي (يعني بالواضح كده خلق الله كلها زي ثلاجه البيبسي الا تخت

عشان تاخد)

ومحل ما تمشي بتلقى واحد يشغلها ليك ..!!

وان كانت الخيارات غربة بي ذل وكاشات نقدية .. او بلدك بي ذل وفلس .. فالافضل مكان "اظنك عرفتي

عواصفك مهبي وزورق خيالك يسوقني ويودي ".. المال يفنى .. والود يدوم ..

يا ضلنا ..!!

الكل حجز مقعده في طائرة خروج بلا عوده ..

منهم المخدوع بجمال الغابات الاسمنتية الشاهقة ..

ومنهم من اتبع المجون والعربده (ديل ناس المابتشوفو في بيت ابوك برا بخلعك ) ..

وفضائح ..!!

وسرقات .. ونهب مسلح ..!!

حتى متى ..!!

اصبحنا جيلا موسوم ..

فقدنا المستقبل .. ولوثنا الماضي ..!!

فليغفر التاريخ خطايانا ..

[حكامنا هم قادة لجيوش نمل ×× تنتشي تحت السياط معذبين ..

وانا وانت وغيرنا كنا لهم عباد وهم قدمو قربانهم ..

وولائهم ..

كي يذبحو احلام جيل ..

فلتهجرو تلك المقاعد اننا ×× لن ننحني يوما ً

ولن نمشي بركب المقعدين ..

ان المصاب مصابكم ×× ومصابنا في عالم صم المسامع لم يع رجع الانين ..

ليثر على الاغلال كل مكبل ×× ولتنزعو الاحجار من طود المنى ..

ولتجعلوها زادكم ..

خير لكم ولامه ضمت رفات الثائرين ..

في أن نموت بأرضنا مستبسلين وواقفين ..

فلترفعوا اقلامكم يا اهل كف زمانكم ..

وكفى بكاء فوق انقاض اليقين ..

ماضر نبع دافقٌ قد ضل عنه الشاربون ..

يتخبطون بتيههم ..

لكنه باق ومانضب المعين .]



لله درك يا وطن ..

اكيد يا احمد المجهول واقع لكن عمره ماكان مانع واما بالنسبه تذاكر الاياب فهي تحت شعار عدنا بخفي حنين واحتمال الخسائر اكبر لو احتسبنا العمر الضائع والضغوط النفسية ..
وتسلم عالرد...

رمـــ(الماء)ـــاد كتب:اكيد يا احمد المجهول واقع لكن عمره ماكان مانع واما بالنسبه تذاكر الاياب فهي تحت شعار عدنا بخفي حنين واحتمال الخسائر اكبر لو احتسبنا العمر الضائع والضغوط النفسية ..
وتسلم عالرد...

عزيزتى رماد

اذا قلنا ان احتمال الخسائر جائز فنحن قد نكون جملنا التعبير فا الخسائر واقعة لا محالة ....... وقد لا يكون المشاركين كثر فى هذا البوست لانشغالهم بآهات حارة من داخلهم عندما يقرأون ما كتبتى ....... صدقينى
الخسائر اكثر مما تتوقعين .........اما العمر الضائع اسكتى ساكت .......دا بوست براهو ......... تحياتى

موسم الهجرة إلى.......الممنوع؟؟؟
قد تهاجر الأجساد على أمل البقى على المبدأ
ولكن ان تهاجر كل مكنونات التأصل
ونصبح خواء
وااا أسفى
عليك يا زولاً
صبح رقراق
لا صلداً يحجب ضوء
ولا عاكس جميل
شفاف




مراحب بيك رماد
جميل سطرك

احمد يس كتب:عزيزتى رماد

اذا قلنا ان احتمال الخسائر جائز فنحن قد نكون جملنا التعبير فا الخسائر واقعة لا محالة ....... وقد لا يكون المشاركين كثر فى هذا البوست لانشغالهم بآهات حارة من داخلهم عندما يقرأون ما كتبتى ....... صدقينى
الخسائر اكثر مما تتوقعين .........اما العمر الضائع اسكتى ساكت .......دا بوست براهو ......... تحياتى

بوافقك الراي في انها اكتر مما اتوقع لكن كل بواحد بحصر من نقطه وجعه ... اما العمر فما تقدر تعرف هو الضائع و لا نحن المضيعنو ... وتسلم عالمرور

dreem-lady كتب:المتناقضات ماليانا ماليانا


ودي حقيقه والتوافيق واالتباديل البنعيشها بتغير فينا مع مرور الزمن ....

نرجع للنقطة الاساسية المغتربين ...مابين كفتين....هل هو الجاني ام المجني عليه.............................................بلادي وان جارت علي عزيزة .....واهلي وان ضنوا علي كرام

يسلم فمك ...

waya كتب:[grade="00008b ff6347 008000 4b0082"]الحياة لا تبتسم .. حقيقة بائنة علي مجريات الأحداث ..


" اللهم أعنا علي الحياة "


تشكراتي
[/grade]

ولا تعليق يليق ... يسلم مرورك

حنقلبها بللي يا طلال .. الله يثبت الاجر