منتدى أنا سوداني

اشتقت ليك يا روح انا
وهمس الحروف مشتاق يغازل مسمعك
وكتين يرق فيك الحنان
ويصبح صدى الكلمات نسيم
يلثم شعاف قلبا وديع

وكتين يفيض سيل الحروف
الكامنة ما بين شفتيك قبل الكلام
فى صمتك بتجرحنى الثوانى
وزكراك فى قلبى المعذب
مصلوبة فى عمق الدواخل بخيط تراب مشدود اليك

رتقيهوا بحنتك
وقت الخريف منك يطوف ببلاد مهجوره صيف
تتمنى بس لو تلتقيك
ساعة هجوع القسوة فى حضن التسامح
رمليهوا بي بذرة من طيبة سماحك
قبال صدودك يحرقوا يمكن يزوروا دعاش صباك

اصبغيهوا بسمرتك
وبى فرحة الناس الغلابه
لمن يغنوا مع الحصاد
بيت دوباى ونمه
يا بنيه هوي يالسمحه هوي
ما الفرحة شايلاها الدروب
وكل المساحات الفي القرى مفروشه حب

وزى فرحة لى اما تزغرد بعودة الفات اغترب
ياحليلوا عاد فارس الفريق
بزكرك ومناي لو ترجع خطاك لى سكة احلامى القبيل
النابعة من صمت التجارب
شريتا فى دنياك وشااح
يلامس لى شعاب صدرك يداعب

والحريق الفى الضلوع يا سالى ماناسيانى ناروا
اطفيهوا كيف.......؟
وانت الوراك كل الزمن اصبح حريق
اعيشوا او احياهوا كيف....؟
وانا ما براي كاتلنى شوقك ومشتهيك
اوصف ليك شنو....؟ لو احكيهوا ليك
ياريتنى لو احكيهوا ليك...!

وحقيقة يا عبق الاماسى
انا اصلى ماقادر اصدق
ممكن فى يوم تنسيهوا ريدى
او غرامى يهون عليك..!

ياسالى مديها المشاعر
لى زول وسط صمتك يحاول
مديها لمسات الحنان وخليها مرة يشع بريقا
ريانه زى ورق الخريف
وكت النسيم يغازلا فى الرشاش
ويشيل حزن زمن الكآبه
ويطفى نار الأنتظاااااااااااااااار
يا نسمه طاااااااال الأنتظار



# أنتظرك وانا اتحرق شوقا الى لقيااااااااك حبيبتى