منتدى أنا سوداني

زوبه كتب:

انساك كيف ؟
كل الدروب الراجعة من سكة وشيك
جربتها
كل الطلاسم والكلامات
لو تبعدنى عن لعنة عنيك
كل الحروف رددتها
كل الظروف والمكانات الساكنه
فى حضرة مجيك حركتها
بس كان حصادى دوام جفاف
كل المواسم عندى صيف

حاولته بس انساك متين
وانساك كيف؟

انتى الصباح الضاوى زى
اشراق شمس وسط الظلام
انتى القصيدة الما اتقرت
فى يو م ولا قاله الكلام
انتى الغناء الغنوه لى كل المباهج
والمسرات والريد ولى قصص الغرام
انتى الحسن صافى وبديع
انتى الكمال
انتى الجمال ما فيه زيف

ورينى بس
انساك متين وانساك كيف؟

كنتى السعادة الفى الخيال
وحلمى الجميل والانتشاء
والروعة فى لحظات هناى والابتسام
كنتى الشقاء المرتاح
على قلبى الجريح تكى ورقد
متوسد الاحزان فراش
متهنى بى وجعى الد فين والانقسام
انساك كيف والقى الامان
وسيف ريدك المغروز
على جنبى اليمين
وصل القلب واتملكه
فتق شرايين جسمى الهزيل
وعشعش على اكبر وريد
لامن خلاص ارهق قدرته
واهلكه
ورمانى فى عرض البحر
التهته فيه معاك سنين
شربته من كاس المزلة ومر الهوان
شابيت افتش للمروق
وقتين خلاص ضاق المكان
لكنه كان بحرا غريق
ما ليه قيف

ورينى بس انساك متين
وانساك كيف ؟؟

انساك لو ينسى الصباح
شكل الشروق
انساك لو تنسى النجوم وقت المساء
كيف المروق
انساك لو رحل الفراش
سافر بعيد
ونساه كيف طعم الورود
انساك لو فى قلبى انعدم النبض
وجفت دماى العروق
وضاعت دماى الفى العروق