منتدى أنا سوداني

مرسل: **الأربعاء 2010.1.20 1:41 am**

عاد يا حباني القصيدة حد ما عجبتني وهلوست بي عديل أصريت ألا اشارككم بيها ...
كدي اقروها وقولوا لي جنا شقوري ده مبدع والا روعة والا مافي منو

خسمتكم بالرسول اكان ما قلتو حاجة ... رجاءا اسألو لوصعب عليكم معنى ...

خالد شقوري

الحاجة مبروكة
قصاد الساقية اتلمن.. كروقة.. و جريدة.. و شوكة..
وشقاية عويد مشقوقة كانت بدري سلوكة..
وباقى حرازي هيل الشيخ أظن سواها فلوكة
طلحايات.. وعيدان منقة يابسي بقت على الدوكة..
والا حطب السدر في الساب تقول دقولو دلوكة ..
وكتين تم راس واقود قصاد تمر آل على الروكة..
عقدو الاجتماع الطارئ خصوص الحاجة مبروكة

رئيسن عود طلح سالم محزق وبالروى إنتلت
وقال.. بسم الله.. قول موزون فيه الحكمة إتجلت
ليها شهر واظن أكتر علينا الرايقة ما طلت
وما مرضاني كان مرضاني كان جات بتها انسلت
وتب ما جانا صوت صايح يعنى هى حيى ما ولت
وما ظنينا أم الخير من الواقود تكون ملت ...
طيب مالا ياالسامعين مالا الرايقة ما اندلّت ؟
نطت غادي كروقة قالت يبقى انشلت!
رد عليها ساق عشرة زعلان ضمة يتفلت
قبيل ما قلنا كان قشراني كان جات بتها انسلّت...
جريدة مزهجا الأشميق معوبسي واصلو ما اتبلت
قالت يبقى جاها سفر وفي البلد الهناك حلت
رد عليها عود مشقوق كيفن للديار خلت
وهي الكانت تصيدا الرجفة لو فات يوم وما اندلت..

ولما خلاص غياب الحاجة حيّر شلة الواقود
قالو نرسل الشوكة بينات شق كراع محمود
اصلو نسيبا وود خالا بيغشاها ومصيرو يعود
وباكر نعرف المستور...يلقى سؤالنا ألف ردود ...
مشت الشوكة وسط الشق أبدا مالقتلو حدود
هي خايفة تصل لحيمو الحي وينو الحي مع محمود
تربال ضمة مابتفرز كراعو وايدو جنب العود

وصلو مع المغيرب داك وباتت وعرفت المستور
وجات الشوكة صبح الليل ترجف زي جِني مسحور
مشققة لا حويل لا حال ولا عن راسا اظن مكسور
مرقت روحا من الشق ورقدت فوق كويم الصور ..
وقالت بي حسيس مبحوح... تعالوا انا جيت ملاني خبور

وتاني اتلم راس واقود نيم و هشاب حطب وحراز
وبدت الشوكة تحكي الحال معبورة ودميعا رزاز..
جاها من بلاد برة وليدا الكان زمان قفاز
أكان شفتيهو يالكروقة املس ولابس الهزاز
.. جاهم شايل الخلاطة والتلاجة والبوتجاز
والبوتجاز أكان شفتي النويرا الفيه شمساً ضاربي جوة قزاز
الشاي سوا رمشة عين خلا الحلة نوما خزاز
حليلك يا الجريد الكنت أسرع من قنيص الباز ..

في ايدا الغويشة دهب فنت في الركن حجلا
بقت تشرب لبن برا باعت بقرتا وعجلا
كمان الحنة ليل يا ليل تلمع في بطن رجلا
رمت في الحوش صباح الخير وقامت قلعت فجلا

وان كان لي تكيل الشبشى في فد يوم هو انجير
وحتى المرق الشايلو سنين في ماسورة السقف اتحير
خلاص الحاجة مبروكة حالا المايل اتغير
بعد ما نار بقينا وسخ عليك يا الكوشة نندير

واكان لي جراري الموية صادا الصادنا يا الحبان
من يوم جاتن التلاجة ما طقشنها الكيزان
وحتى القربة بس كاويق مطوطوة راقدا في الديوان
من شدة يباسا تقول مولعي تحتها النيران

خلت سيرة العشا في الخلوة وقولة ياستار ياهادي
وطول ليلا مقابلي التلفزيون ما اصلو مونسا مالا الرادي
شافتلها شفع فطر وبطر قالت اريتو دا حال أولادي
وما عارفاها القصة دعايه دعاية تخوذق الجاي والغادي

مسكينا الحاجة الإتغشت في الجاه الجاها بلا جيهه
الحال يعجب صح وحالاً زين لكين لي بتها مو ليها
عميرا سرح فوق الخمسين ما كانت تنساك يا ماضيها
ما كانت أصلاً تتنكر للنار الكانت تطفيها
بي نفخه قوية ولا مواصة ولا تلم هبودا عليها
وينا صلاتا مع الأذان سهر الليل مأثر فيها
وينو مشيها للجيران كأنو زمان ماكانو ذويها
وينو قعادا مع الحبان والجبنة التنت بكريها

الا مصيرو الحال يتغير باكر بكرة جناها بفوت
وغازا بيكمل وجازا بيكمل وحيلا بيكمل ونارا تموت
وترجع ليك يا درب الساقية شايلي عذابا وشوقا تعود
تقسم قشها تحقب نصو وترفع نصو مع محمود
تنوم في راسا كداد المعزي وتصحى على السعن المقدود
وتبقى حياتا حليلة ويكة وقربة موية وراس واقود
وتبقى حياتا حليلة ويكي وقربة موية وراس واقود

يلربي ممكن نرجع ليك يادرب الساقية !! هل من عود؟

مرسل: **الأربعاء 2010.1.20 8:40 am**

[align=center]ياحبوبة والله الجنا بالحيل فنان تب
والتعليق على الروعة دي انو
الماعندو قديم ماعندو جديد[/align][/b][/size]

مرسل: **الأربعاء 2010.1.20 8:57 am**

بسم الله قول موزون فيه الحكمة اتجلت

مرسل: **الأربعاء 2010.1.20 1:56 pm**

والله القصيده صعبة علي ,,

بس بحاول افهمها ..

يعني شنو البيتين ديل ..؟!

وشقاية عويد مشقوقة كانت بدري سلوكة..
وباقى حرازي هيل الشيخ أظن سواها فلوكة

مرسل: **السبت 2010.1.23 4:49 pm**

لبيب ... قولك ما بدور لو تعقيب ...

رغودة .. كدي بيني وبينك فهمتيها والا نص نص :d

وهج الخيال ... ده زول عندو خيال متوهج زيك كده

عويد = تصغير عود
ما معناه باقي عود مشقق كان زمان سلوكة ، والسلوكة هي قطعة من الخشب مقوسة وفيها فتحة كانت تستخدم كأداة لبذر البذور في الجروف ، والآن مصطلح تقسيم زراعي.
الحراز نوع من الشجر ، الشيخ عمل فلوكة (مركب صغير) من الشجرة ودي كانت من باقيها.
انا ح اشرحها كلها حسب فهمي ليها ، ووريني رأيك يا بتنا

وتسلموا ع المرور يا شباب ... راجاكم تاني .. طماعة مش :d

مرسل: **السبت 2010.1.23 4:53 pm**

كروقة = قعر الأبج – الأبج = نهايات الجريد (جريد النخل)
السلوكة = أداة تستخدم لجرف الجروف (قطعة خشب مقوسة محفورة)
الحراز = نوع من الشجر
فلوكة = مركب صغير
الطلح = نوع من الشجر
الدوكة = صاج العواسة والقراصة (ناره من الجريد غالبا)
الساب = ؟
راس واقود = كمية من الحطب والعيش الناشف يستخدم فيما بعد لإشعال النار
الروكة = على الشيوع – غير قابل للتقسيم
الأشميق (العشميق)= نسيج في النخيل بين بين الأبج والجذع تصنع منه الحبال (ليفة للعدة)
خزاز = ؟
قنيص = صيد – كناية عن السرعة
الباز = ؟
جراري = جمع جرة اللي الأزيار (زير الموية)
كاويق = عويش – أعشاب جافة
القربة = جلد الضان – يستخدم في حمل الماء في الأسفار وكمان لتبريد الماء.
السعن = جلد الضان – يستخدم لترويب اللبن الحليب واستخراج السمن

بسم الله .. اها يا الحبان هنا ود شقوري بحكي لينا موقف ، كدي اسمعوا شرحوا حسب فهمي
في القرية النساء والبنات بيمشوا يجمعوا الواقود للعواسة والطبخ ، بيلقطوا الحطب الناشف ويكسروا الجريد الناشف من النخل ويجمعوا كمية لا بأس بها يربطوها ويشلوها فوق راسهم ويرجعوا.
هنا بيقول لنا انو راس الواقود ده افتقد الحاجة مبروكة شان طولت ما نزلت عليهم.

كل الحطب الناشف اتجمع واترأسهم الطلح يتساءلوا عن سبب غياب الحاجة الشهر المضى وفي عرض للموانع قال ما ها مرضانة والا كان بتها جات بدلها ..
وما ماتت لأنهم ما سمعوا الصايح (المنادي للجنازة) ..
وما ممكن تكون استغنت (مافي زول بيقنع من النار)
سأل الحاضرين نطت قعر الجريد قالت تكون انشلت ، ساق من العشر ردّاها وهو أصلا زعلان من غياب (الرايقة) ما قلنا كان بتها جات ..
جريدة زهجانة من العشميق اللاصق فيها فالت تكون سافرت ، فند الفكرة السيد العود.

لم ما لقوا رد اتوصلو لي انهم يرسلوا شوكة في كراع محمود (عادي جداً الواحد تطعنوا شوكة) وأحيانا الترابلة الناشفين تب ما بيحسوا بيها .. زي ما حصل مع محمود.

دوام المزارع عادة من الفجر لي حوالي 10 – 11 صباحا ثم من صلاة العصر لين المغرب [يعتمد ع المواسم].
الشوكة وصلت الغرب عرفت الحاصل وجات الفجر للجماعة تخبرهم.

اتضح انو ولدها المغترب رجع وجاب ليهم بوتوجاز خلاها تستغنى من الواقود
وفي الوصف انو بسوي الشاي غمضة عين .. وامتد الوصف لي حال الرايقة الاتغير كيف بدلت الحجل بالغويشة الدهب واتنعمت واتحننت وبقت تتزين وتزين البيت بالزهور.
وحتى المطبخ بدل لياسة ساكت بقى مجير وسقفه بعد ما كان شايلو مرق بقى واقف علي ماسورة حديد
خلا حال الحاجة اتبدل ، ونحن بعد ما كنا نار بقينا وسخ يودونا الكوشة.
وزي ما نحن بقنا وسخ بع البوتوجاز كمان الأزيار نشفت والقربة مركونة في الديوان ناشفة بي عدم الموية.
وكيف الحاجة خلت صلاة العشا في المسجد وذكرها للمولى قل ، وخلت الرادي بقت مقابلة التلفزيون واتغشت بيه.
بيتكلم انو حالها سمح لكن لي بتها ما ليها ماهي خلاص كبرت وما كانت تنسى ماضيها والسهر الخلاها تفوت صلاة الفجر ، وليع النار وكيف كان بتطفيها ولم الهبوت (الرماد) ، وقعدات الجبنة والونسة وزيارات الجيران اللي بقت ما زي أول.

لكن هو لسة عشمان انو الحجة بترجع لي حالها القديم ، وتنزل تحت تلقط واقودها ، وترجع تشرب لبن معزتا وتنوع علي صوتها وتصحى علي سعنها وتخش روبها ، وتبقى علي حلة ويكتها وموية القربة الباردة.

يا اخوانا ده قدر فهمي والعندو زيادة ما يبخل ... وكمان في بعض الكلمات انا ما عرفتها ولو في تصحيح أو إضافة للورد معناهم ما تبخلوا

مرسل: **السبت 2010.1.23 5:57 pm**

[align=center][move=right]ماشاءالله عليك حبوبة تستحقيلقب المعجم الدارجي والله[/move][/align][/size]

مرسل: **السبت 2010.1.23 6:08 pm**

حبوبة تسلمي على النقلة الريفية .. وشوقي لي ناسا حنان كلمن ..

طبعا انا قريت القصيدة أكتر من مرة .. وترسمت قدامي الصورة ..

بالجد تسلمي ..

مرسل: **السبت 2010.1.23 7:33 pm**

حبوبه شكرا لمجهودك العظيم في نقل القصيده الاكثر من روعة
والتحيه للمبدع خالد شقوري
القصيدة تبين لنا انتقال الشخص من الريف
الي الحضر بطريقة سريعه لم يستوعبها هو
وتكون في دهشه من الحياة الاصبحت دخيله علي ثقافته
في نفس الوقت نسيانه لماضيه الجميل
الدوكه والصاج الواقود والفلوكه
تحياتي

مرسل: **السبت 2010.1.23 7:54 pm**

حبوبة

ابداع خالد شقوري واضح
وابداع حبوبة في الموضوع والشرح
بس الشوكة الفي الشق الماليهو حدود مبالغة تصوير
تنم عن الرجولة والسعي بين الحيضان وفي المياه ( الخبوب والطين)
حبوبة
الصورة تم استيعابها
والناس طافوا بالخيال
وانتي في البال
مودتي

مرسل: **الأحد 2010.1.24 12:11 pm**

يسلم لسانو ،،،

دا وصف للجانب السلبي للتكنولجيا ،،،

تعطيل اجتماعي ،، وضعف في الاجسام بسبب الراحة ،،،

مشكورة حبو على النقلة الرائعة والشرح الوافي ،،،،

<<<<ويا حليل أيام زمان >>>>

مرسل: **الأحد 2010.1.24 12:24 pm**

حبوبة كتب:
وتبقى حياتا حليلة ويكة وقربة موية وراس واقود
وتبقى حياتا حليلة ويكي وقربة موية وراس واقود

يلربي ممكن نرجع ليك يادرب الساقية !! هل من عود؟

زى ما قال الرائع (الضراع) الحكايه إنتقال الشخص بطريقه سريعه من اسلوب
الحياة فى الريف إلى اسلوب الحياة فى الحضر.. رغمـ إنو حاجه مبروكه لمـ
تنتقل للحضر من الريف بل الحضر حضر للحاجه فى الريف...لكن فى إعتقادى
إنو المبدع خالد شقورى وضع حكمه وعظه كبيره فى القصيده دى..
والعظه على ما يعتقد شخصى الضعيف فى القصيده إنو الواحد لما ربنا يغير
من حالو للأحسن ما ينسيهو النعيمـ ماضيهو الشقى وكيف رب العالمين فتح
عليهو أبواب الرحمه.. يقومـ يقـصر فى علاقتو مع الفتاح العليمـ .. ينسى صلاته
وعبادته.. ويقـصر فى صِِلات الرحمـ مع الأهل والجيران لأنو.. وتانى لأنو
دوامـ الحال من المحال وزى ما إتغيرت الحياة للأحسن ممكن فى غمضة
عين ترجع زى ما كانت.. و......

وتبقى حياتنا حليلة ويكه وقـربة مويه وراس واقـود
وتبقى حياتنا حليلة ويكه وقـربة مويه وراس واقـود

حبوبه..ياريت نرجع لى درب الساقـيه وترجع معانا أيامـ الصفـاء والود والتراحمـ
(همسه) يديك العافيه فى نقـل هذا الأدب الروحى الجميل

مرسل: **الأحد 2010.1.24 12:48 pm**

تسلمي يا حبوبه ..
الكلام دا الا سمح وانت ما بتقصري علينا تب بالحاجات الزي دي

والله قصيده مدهشه جدا وظريفه .. بتستحق التميز وكل الناس تعرف البتحتويه من جمال وانفراد في الابداع ..

بس دايره ليها قعده بمزاج .. ومع الشرح بتاعك
الله يخليكي لينا يا حبوبه .. ودايما اضافاتك ممتعه

مرسل: **الأحد 2010.1.24 1:09 pm**

ولما خلاص غياب الحاجة حيّر شلة الواقود
قالو نرسل الشوكة بينات شق كراع محمود
اصلو نسيبا وود خالا بيغشاها ومصيرو يعود
وباكر نعرف المستور...يلقى سؤالنا ألف ردود ...
مشت الشوكة وسط الشق أبدا مالقتلو حدود
هي خايفة تصل لحيمو الحي وينو الحي مع محمود
تربال ضمة مابتفرز كراعو وايدو جنب العود

قصيدة من الأمس من أجل اليوم وغدا...
تجلت فيها ملامح شعبنا الاصيل من اغائة للملهوف وتفقد الناس ومعرفة احوالهم ...
يديك العافية حبوبة ...
تحياتي

مرسل: **الأحد 2010.1.24 1:57 pm**

إختيار موفق بالجد يا حبوبة
وبالفعل كاد الزمن أن يطمس روعة معالم
تراثنا الأبّي ونحمد الله أن بيننا أمثالك
ينعشونا بعبق الماضي التليد.
قصيدة أكتر من روعة
تسلم الأيادي. وتقبلي مروري..

مرسل: **الأحد 2010.1.24 2:21 pm**

حبوبة الغالية
سرحت كثيرا في معاني ماسرد
لا اخفيك اني توقفت في كثير من المعاني لاستدراك كلية المقصود
استمتعت حين علمت مقصد الابيات
شي يعيدك للبلد دون قيد او شرط ودون جواز سفر
يعيدك علي جناح الشوق مجبور ومسرور
بحثت عن الحاجة مبروكة
وجدتها فينا
تخفيها أكوام من الاحزان
ان حاولت ان تزيحها فلابد ان تعيشها اولا
لذلك الوصول لحاجة مبروكة شبه مستحيل

مسكينا الحاجة الإتغشت في الجاه الجاها بلا جيهه
الحال يعجب صح وحالاً زين لكين لي بتها مو ليها
عميرا سرح فوق الخمسين ما كانت تنساك يا ماضيها
ما كانت أصلاً تتنكر للنار الكانت تطفيها
بي نفخه قوية ولا مواصة ولا تلم هبودا عليها
وينا صلاتا مع الأذان سهر الليل مأثر فيها
وينو مشيها للجيران كأنو زمان ماكانو ذويها
وينو قعادا مع الحبان والجبنة التنت بكريها

وهل هناك اروع من هذا القول
مسكينة الحاجة الاتغشت في الجاه الجاها بلا جيهة
كم توقفت ففي روعة هذا البيت الواقعي
الذي يحكي حالنا
حيث لازلنا ندمن مرارة الغربة بنشوة غريبة
حبوبة لا شلت يداك
ومزيدا من الابداع

مرسل: **الأحد 2010.1.24 11:18 pm**

ابداع ياحبوبه بس لقيتك خطيره فى الشرح
وعشان كلام اهلنا الحلو ده بنفتخر باننا منهم
ولو ما كنت من زي ديل وآماساتى وذلي
زيدنا من الدرر
شقورى شاعر مبدع

مرسل: **الاثنين 2010.1.25 11:12 am**

يا سلام يا حبوبة رحلتي بينا للجزور وللأصول

للجروف مكان الجرراي والسلوكة والجريد والحراز

ربما وقفت في طريقنا كلامات بسيطة لكن معجمك أراحنا

*******************************

وهل يكون للإبداع مرفأ أو ساحل عندما ينسكب مداده من محبرة مميزة

إبدددددددددددددددددددددددددددددددددددددددددددددددددددددددددددددددددددع

******************************

من حروفك تفوح العطور * * وبين سطو ها أصبحنا تايهين

فيها أشعرتينا بالقيم * * وبالقوافي المنظومة رصين

مرسل: **الاثنين 2010.1.25 12:42 pm**

الاخت الرايعة جداً حبوبة التحية لك والشكر على توجية الدعوة لى بزيارة رائعة خالد شقورى التى قدميتها لنا وكانت عبارة عن قصه درامية وواقع عشنا معه وكدنا أن نقول (لا للبوتجاز !!) رغم أنو من ناحية راحة عايزين الراحة للبنات والاخوات والعمالات والخالات.ولى حبوة شخصياً.
رغم أننى ليست بشايقى ولكن معظم الاصدقاء من الشوايقة وأعرف كل مصطلحات الشوايقة الخاصة بالبلد (حتى الساب أعرفو ) وصراحى تطربنى ومنذ الصغر أغانى وداليمنى وصديق أحمد وأشعر عندما أستمع لهؤلاء المبدعين بأننى لامست هذه الكلمات واقعاً......... أمنيتى أن أزور كريمة أو مروى وأبقى هناك أكثر من أسبوع وقد وجهت لى الدعوة كثيراً ولم ألبى ولكن فى النية والخاطر.
وعلى الرغم من أننى لى زيارات قديمة للعبيدية والباوقة أرض الجعليين ولكن أرض الشوايقة وقراصة الشوايقة لها وقع خاص زاد من أيقاعة وحرارته أن بيننا فى السقاى أسرة المرحوم محمد عبيدالله عليه الرحمه والذى عمل مساعد طبى فى شفخانة السقاى لفترة 20 وواصل فى مركز صحى السقاى قدرها وتوفى عليه الرحمه قبل 5 سنوات وإبنة الاخ مجدى محمد عبيدالله والذى ترعرع بيننا منذ أن كان شبلاً حتى أستأسد والان أصبح فى مرحله أن يستأسد أبنه وائل وتصبح ألاء عروسة قريباً، كذلك أسرة محجوب أرباب التاج وأرباب وبكرى وبقية أفراد الاسرة الكريمة والذين يداومون على عزومتنا وتكون القراصة بالحجم الشيايقى (العالمى حاضرة دايماً ) التحية لكل الشوايقة فى كل مكان والتحية لخالد شقورى ذلك المبدع والتحية للاخت حبوبه وهى لاشك ملكة وست الحوبة .

مرسل: **الاثنين 2010.1.25 6:45 pm**

قصيدة جميلة يا حبوبة

وتشبيهاتها حلوة

طبعا في الأول كان في صعوبة في فهم بعض الكلمات
بس شرحك مشاء الله تمام التمام

تسلمي يا غالية
تحــــــــياتي

منتدى أنا سوداني

الحاجة مبروكة وخالد شقوري

الحاجة مبروكة وخالد شقوري

رد: الحاجة مبروكة وخالد شقوري

رد: الحاجة مبروكة وخالد شقوري

رد: الحاجة مبروكة وخالد شقوري

رد: الحاجة مبروكة وخالد شقوري

رد: الحاجة مبروكة وخالد شقوري

رد: الحاجة مبروكة وخالد شقوري

رد: الحاجة مبروكة وخالد شقوري

رد: الحاجة مبروكة وخالد شقوري

رد: الحاجة مبروكة وخالد شقوري

رد: الحاجة مبروكة وخالد شقوري

رد: الحاجة مبروكة وخالد شقوري

رد: الحاجة مبروكة وخالد شقوري

رد: الحاجة مبروكة وخالد شقوري

رد: الحاجة مبروكة وخالد شقوري

رد: الحاجة مبروكة وخالد شقوري

رد: الحاجة مبروكة وخالد شقوري

رد: الحاجة مبروكة وخالد شقوري

رد: الحاجة مبروكة وخالد شقوري

رد: الحاجة مبروكة وخالد شقوري